Ima̍tiyu 12
12
Lɛlā yī Ɔ̄chī Ɔmyɛ̍nyɛ̍
(Ima̍aki 2:23-28; Ilu̍uku 6:1-5)
1Yɛ̄grāa ɔha̍ bɛ̍ɛ̄nɛ̄, Iji̍sɔ̄ɔsi yɛ ē ga la yɛrɔ̄ yī igu ɔha̍ nīi re̍ka iwi̍iti ma̍ la Ɔ̄chī Ɔmyɛ̍nyɛ̍. Lɛmiyɛ yɛ ē ya̍ a̍chi̍kpo̍ yī nū ma̍, e̍ pīya abɔ̄ yɛ ē chē ahu̍ yī igu ē re̍. 2Āchɛ yī Ifa̍rasīi ɛha̍ ma̍ wā nīi e̍ yɛ ē ya̍ i̍ngɔ̍ɔ ma̍, e̍ da Iji̍sɔ̄ɔsi hīka, “Ma̍ lɛlā nīi Lihɔ yī alɔ i̍ chikpo̍ ka ɔ̄chɛ ɔ̍lɔ ge̍ ya̍ la Ɔ̄chī Ɔmyɛ̍nyɛ̍ ni̍ ma̍ nīi a̍chi̍kpo̍ yī wɔ yɛ aa̍ ē ya̍ gɛ!”
3Iji̍sɔ̄ɔsi hīya aa̍ ɔkɔ hīka, “O̍ re̍ka ala̍ i̍ ma̍ īpū po̍ lɔkɔ nīi Ide̍bīidi ya̍ i̍chɔ̍lɔ yɛ̄grāa ɔla̍ā nīi anu̍ ba̍la āchɛ nīi yɛ tāa anu̍ ma̍ de kpo̍ ku̍ lɛmiyɛ ma̍ je̍ ni̍? 4Ide̍bīidi chɛ̄ ga u̍nu̍ yī Ɔwɔ. Anu̍ ba̍la āchɛ nīi yɛ tāa anu̍ ma̍ gāa ge̍ re̍ ibrɛ̍ɛdi nīi e̍ de kwɔbɔ̄ lā de Ɔwɔ abɔ̍ɔ ma̍. Lihɔ nɛ; ɔ̄chɛ ji bāa aa̍ ma̍ i̍ ē chī re̍ ibrɛ̍ɛdi ɔla̍ā ni̍; ɔ̍chi̍kpa̍kpa̍ āchɛ nīi - aligbe yī Ɔwɔ ma̍. 5Kɛ̄ɛ, o̍ re̍ka ala̍ i̍ ma̍ īpū yī Lihɔ yī Imo̍sīisi po̍ i̍ngɛ̍ɛ̄nɛ̄ je̍ ni̍? O̍ ka hīka aligbe nīi - ɛ̍lɛ ē ya̍ u̍ku̍rɔ̍ la u̍nu̍ yī Ɔwɔ la Ɔ̄chī Ɔmyɛ̍nyɛ̍ ma̍, ɛ̍lɛ ē bīya lihɔ yī ɔ̄chī Ɔmyɛ̍nyɛ̍ myɛ̄grāa-myɛ̄grāa. E̍ yɔ̍ɔ̄ya̍ i̍ngɔ̍ɔ ma̍, e̍ i̍ chī gblɛfiyɛ yī lihɔ ni̍. 6Lēchi̍, n ā koko̍o de ala̍! Ɔjāha̍ hɔ̄ mu u̍ma̍ama nīi gla u̍nu̍ yī Ɔwɔ ta̍ ma̍. 7Ala̍ u̍tu je̍ ochi̍chi̍ yī lɛlā yī Īpū yī Ɔwɔ nīi hɔ̄ ma̍ ma̍ yɛ̍yɛ̍?
“ ‘N i̍ chikpo̍ yī ɛbɛ̍ ode pā um ɔpɔ̄pā ni̍.
Ɔlɛyaya nīi n chikpo̍ a̍nɛ.’
Ala̍ ge̍ je̍ ɔ̄ yɛ̍yɛ̍ nɛ, ala̍ i̍ ge̍ē de lɛpɔ̄ ku̍ āchɛ nīi i̍ gblɛfiyɛ ni̍ ma̍ ni̍. 8Wu̍chē oji̍ nɛ, Ɔyi̍ yī Ɔngrɔ̄ɔ ɔlɔjā - Ādādā yī ɔ̄chī Ɔmyɛ̍nyɛ̍ nɛ.”
Iji̍sɔ̄ɔsi nyiya ɔngrɔ̄ɔ ɔha̍ nīi kwa̍ābɔ̄ oko̍ōku̍ ma̍
(Ima̍aki 3:1-6; Ilu̍uku 6:6-11)
9Iji̍sɔ̄ɔsi ku̍ pīya hī ɛbɛ ɔla̍ā, pīya ga u̍nu̍ ogrēeyī yī wā ɔha̍. 10Ɔngrɔ̄ɔ ɔha̍ nīi hɔ̄ abɔ̍ɔ ma̍ kwa̍ābɔ̄ oko̍ōku̍. Āchɛ ɛha̍ gblāa abɔ̍ɔ i̍ngi̍ngɔ̍ɔ yɛ ē chikpo̍ ge̍ē ku̍ Iji̍sɔ̄ɔsi la abɔ̄lɛ̄lā abi̍ ɔyɔ̍ɔ̄ya̍. E̍ che Iji̍sɔ̄ɔsi ikpo̍ bɛ̍ɛ̄nɛ̄ hīka, “Lihɔ yī alɔ chɛ̄ ka ɔ̄chɛ ɔ̍lɔ ge̍ nyiya ɔ̄chɛ la ɔ̄chī Ɔmyɛ̍nyɛ̍?”
11Iji̍sɔ̄ɔsi hīya aa̍ ɔkɔ hīka, “Ɔ̄chɛ ɔha̍ lipu̍ yī ala̍ ge̍ lɛ ɔnyīyɛrɔ̄ ūkpo̍he nīi o̍ ge̍ ngma̍ ta̍tū la wɔ̄gɔ̄ la Ɔ̄chī Ɔmyɛ̍nyɛ̍ ma̍ bɛ̍ɛ? Je̍ka o̍ ge̍ē de ɔ̄ ē wu̍ hī wɔ̄gɔ̄ ɔpɔ̄ɔpɛ̄? 12Ɔ̄chɛ̄ɛchɛ chī - ɔjā ɔlamu-ɔlamu pɛtɛpɛtɛ hi̍ ɔnyīyɛrɔ̄ a̍nɛ. Bū la ɛbɛ ɔla̍ā, Lihɔ yī alɔ chɛ̄ gblɛ̍ɛgblɛ̍ɛ ka ɔ̄chɛ ɔ̍lɔ ge̍ tū ɔ̄chɛ wɔbɔ̄ la Ɔ̄chī Ɔmyɛ̍nyɛ̍.” 13Bɛ̍ɛ̄nɛ̄, Iji̍sɔ̄ɔsi da ɔngrɔ̄ɔ ɔkwa̍ābɔ̄ oko̍ōku̍ ɔla̍ā ka ɔ̍lɔ ge̍ nā abɔ̄ yī ɔ̍lɔ ɔla̍ā kpaa.
O̍ nā abɔ̄ ɔla̍ā kpaa ma̍, o̍ de lɛ cha̍cha̍ i̍ngɔ̍ɔ ke̍e̍ bāa abɔ̄ ɔ̍mɛpa ma̍. 14Āchɛ yī Ifa̍rasīi ɛla̍ā pīya ɔpɔ̄ɔpɛ̄ ge̍ miya tū Iji̍sɔ̄ɔsi nīi e̍ ge̍ē de ɔ̍ ē ngmo̍.
Ɔ̍chɛ̍ yī Ɔwɔ nīi o̍ hōhu ma̍
15Iji̍sɔ̄ɔsi de po̍ i̍ngɔ̍ɔ ma̍, o̍ ku̍ pīya hī ɛbɛ ɔla̍ā. Āchɛ lyɛ̄mɛ̄mɛ̄ nīi pɛ̍ ku ɔ̍ la u̍tu ma̍. Āchɛ nīi kwi̍īyē wa̍a̍ ma̍, o̍ de wa̍ nyiya cha̍cha̍. 16O̍ ta̍ wa̍ ɔna ka ɛ̍lɛ ge̍ e̍e koko̍o de āchɛ ehēhī ni̍. 17Onūma̍ ya̍ nīi lɛlā nīi Ayisa̍ya ɔ̄chɛ ɔkɛrɔ̄ yī Ɔwɔ mwɔ̍ɔmu ma̍ ge̍ē de ē pīya ichɛ̄ɛhi. Anu̍ hɔ̄ ma̍ a̍nɛ:
18“Ɔ̍chɛ̍ yī u nīi hōhu ma̍ hɔ̄ ma̍ a̍nɛ.
Ɔhɔtū yī u lēchi̍ lēchi̍ nɛ.
N lɛ ɔwɔ̄wīyā kpɛ̍ɛji ba̍la anu̍.
N ge̍ē de Uhu yī u ē tū ɔ̄ la ibi̍īyē.
Anu̍ ge̍ē chabɔ̄ yī lɛpɔ̄ ɔhɔ̍ɔ̄hɛ̍ kpakpa ē hu̍ ɛchamɛcha a̍nɛ.
19O̍ i̍ ge̍ē kɛlā chichichi kɛ̄ɛ ē tɔ̍ɔna hwōhwōhwō ni̍.
Ɔ̄chɔ̄chɛ i̍ ge̍ē pɔ̍ɔkɔ yī nū gbra̍gbra̍gbra̍ la ogblo̍lo̍ ni̍.
20Ɔchi̍ nīi po̍ōpu̍ ma̍, o̍ i̍ ge̍ē de chārɛ̄ ji ni̍.
Otīnīkā oya̍ ingūɔ̄la̍, o̍ i̍ ge̍ē de ɔ̍ ē nyi̍ ji ni̍.
O̍ ge̍ē nyiya i̍ngɔ̍ɔ kpɛɛ ē ya̍ nīi lɛlā ɔlɛkpakpa ɔyɔ̍ɔ̄ya̍ ē de ɛbɛ ē kla̍.
21Ɛchamɛcha wa̍a̍ ge̍ē de ɔtū che riyī yī nū.”
Iji̍sɔ̄ɔsi ba̍la Ibɛ̍sɛ̄buli
(Ima̍aki 3:20-30; Ilu̍uku 11:14-23)
22Āchɛ ɛha̍ bī ɔngrɔ̄ɔ ɔha̍ nīi priyī gba̍a gwōko̍o ma̍ ge̍ de Iji̍sɔ̄ɔsi. Yapri̍ija ɔdwɔ̄bi̍ nīi ku̍ ɔ̄ ma̍ ya̍ ɔ̄ i̍ngɔ̍ɔ a̍nɛ. Iji̍sɔ̄ɔsi de ɔngrɔ̄ɔ ɔla̍ā nyiya ke̍e̍ nīi o̍ de myɛ̍ma̍ gba̍a kɛlā. 23Āchɛ wa̍a̍ de kpo̍ kwi̍ibū ji bɛ̍ɛ̄nɛ̄. E̍ gblāa abɔ̍ɔ ē chikpo̍ hīka, je̍ka ɔngrɔ̄ɔ nūma̍ ɔ̍lɔ - Ībī yī Ide̍bīidi nɛ?
24Āchɛ yī Ifa̍rasīi po̍ i̍ngɔ̍ɔ ma̍, e̍ ka de āchɛ hīka Ibɛ̍sɛ̄buli ɔlɛhu̍ yī yapri̍ija ɔdwɔ̄bi̍ ɔ̍lɔ de wɔhu̍ de Iji̍sɔ̄ɔsi nīi ɔ̍lɔ yɛ ē nū yapri̍ija ɔdwɔ̄bi̍ mɛ a̍nɛ.
25Iji̍sɔ̄ɔsi je̍ ɔjā nīi e̍ yɛ ē gbɛri̍ya̍ ma̍ ɔpɔ̄ɔpɛ̄. O̍ ka de wa̍ hīka, “Ala̍ ma̍ ko̍ō! Ɔcha ūkpo̍he ɔha̍lɔha̍ nīi ge̍ de iyī nū yi̍ya, kū la lɛwu̍ la okpo̍ōkpo̍ tāa iyī nū, ɔcha ɔla̍ā i̍ ge̍ē ri̍yɛchɛ īchāha̍-īchāha̍ ni̍. Ipwo̍gra kɛ̄ɛ u̍kpu̍fi̍ye̍ ɔha̍lɔha̍ nīi ge̍ de iyī nū yi̍ya, kū la lɛwu̍ la okpo̍ōkpo̍ tāa iyī nū, o̍ ge̍ē ku̍ mīyanya. 26I̍ngi̍ngɔ̍ɔ nīi iyī Isa̍tan nīi - ɔchwɔ̄lɛ̍ yī yapri̍ija ma̍ lɛ a̍nɛ. Ribi yī āchɛ yī nū ɛha̍ ge̍ yɛ ē kplɛ̍wu̍ tāa ribi ɛha̍, ɔ̍lɔma̍ ɔchwɔ̄lɛ̍ oro̍ōre̍ yī nū ge̍ē kū ē yi̍ya mi̍ni̍mi̍ni̍, de ē chāajɛ ɔpɔ̄ɔpɛ̄. 27Ala̍ ka hīka Ibɛ̍sɛ̄buli ɔ̍lɔ de wɔhu̍ de amɔ̍lɔ ohu̍ nīi amɔ̍lɔ ē nū yapri̍ija ɔdwɔ̄bi̍ a̍nɛ? Ɔ̄nyɛ ē chī de wɔhu̍ de āchɛ yī ala̍ ka ɛ̍lɛ ge̍ nū yapri̍ija ɔdwɔ̄bi̍ ma̍? Āchɛ yī ala̍ de chabɔ̄ mɛ̍ hīka lɛlā yī ala̍ ɔla̍ā ɔ̍lɔ i̍ grāa ni̍. 28Lēchi̍, Uhu yī Ɔwɔ de wɔhu̍ de u nīi n yɛ ē nū yapri̍ija ɔdwɔ̄bi̍ mɛ a̍nɛ. Bū la ɛbɛ ɔla̍ā, ala̍ jo̍ōkū gɛ hīka, Ɔchwɔ̄lɛ̍ Oro̍ōre̍ yī Ɔwɔ wā dikpo̍ba̍ ala̍ mɛ̍.
29“Ala̍ ma̍ gɛ ko̍ō! Ɔ̄chɔ̄chɛ i̍ ē chɛ̄ ga u̍nu̍ yī ɔla̍ga̍ba̍ wɔhu̍-wɔhu̍ ge̍ē kpo̍ āɛ̄jā yī nū mɛ ni̍; ɔ̍chi̍kpa̍kpa̍ ɔlɔjā ku̍ ɔla̍ga̍ba̍ ɔla̍ā wā orī o̍bū, aa̍ nīi o̍ ge̍ē de wɔlɛ̍ yī nū wu̍ ē re̍ mɛ a̍nɛ.
30“Ɔ̄chɛ nīi i̍ ge̍ - ɔ̄chɛ yī u ni̍, ɔ̍lɔma̍ ɔlɔjā - oluji yī u nɛ. Ɔ̄chɛ nīi i̍ ge̍ twɔ̄bɔ̄ tāa ami tu̍ ɛjā tu̍chɛ̄ ni̍, o̍ re̍ka ɔlɔjā yɛ ē kpo̍ ɔ̄ mīyanya omōmī. 31Wu̍chē yī lɛlā onūma̍, n ā koko̍o de ala̍ gɛ! Lɛlā ɔdwɔ̄bi̍ ba̍la lɛlā abi̍ ɔha̍lɔha̍ wa̍a̍ nīi ɔ̄chɛ ē ka ma̍, Ɔwɔ ē de ē kɔ̄ de ɔ̄chɛ. Ɔ̄chɛ nīi ge̍ chī kɛlā abi̍ ku̍ Uhu Ɔnɛ̄ɛhɛhi yī Ɔwɔ, Ɔwɔ i̍ ge̍ē de ē kɔ̄ de ɔlɔjā ni̍. 32Ɔ̄chɛ nīi ge̍ kɛlā abi̍ ku̍ Ɔyi̍ Ɔngrɔ̄ɔ, Ɔwɔ ge̍ē de ē kɔ̄ de ɔ̍ ē mɛ. Ɔ̄chɛmɔ̄chɛ nīi ge̍ chī kɛlā ɔha̍ abi̍ ku̍ Uhu Ɔnɛ̄ɛhɛhi yī Ɔwɔ, Ɔwɔ i̍ ge̍ē de ē kɔ̄ de ɔlɔjā u̍ma̍ama kɛ̄ɛ kpɛɛ ge̍ē gbo̍ ni̍.
Ɔchi̍ ba̍la īkpō nīi o̍ ē wa̍ ma̍
(Ilu̍uku 6:43-45)
33“Ɔchi̍ ge̍ hiyē, īkpō nīi o̍ ē wa̍ ma̍ ē hwɔhi hwɔhi. Ɔchi̍ ge̍ chī gbi̍tɛ̄, īkpō nīi o̍ ē wa̍ ma̍ ē dwɔ̄bi̍-dwɔ̄bi̍. E̍ ē je̍ ɔchi̍ bū la ita īkpō nīi o̍ ē wa̍ ma̍. 34Ala̍ wɔma yī ogbiji nīi gblāa aa̍ ma̍! Kana̍ nīi ala̍ nīi - āchɛ ɔdwɔ̄bi̍ ma̍ ge̍ē kɛlā ɔnɛ̄ɛhɛhi mɛ ma̍? Je̍ka lɛlā nīi mōmu rɛ la ūkpɔ̄tū ma̍ nīi oko̍o ē de ka a̍nɛ? 35Ɔ̄chɛ ɔnɛ̄ɛhɛhi ē wu lɛlā ɔnɛ̄ɛhɛhi yī nū ē bīyɛchɛ ē bū lipu̍ yī lɛlā ɔnɛ̄ɛhɛhi nīi mwɛbɛ nīi o̍ de gbōgbō ma̍. Ɔ̄chɛ ɔdwɔ̄bi̍ ē chī wu̍ lɛlā abi̍ yī nū bū lipu̍ yī lɛlā abi̍ nīi mwɛbɛ nīi o̍ de gbōgbō ma̍.
36“N chī ge̍ē koko̍o ē de ala̍! I̍chi̍chɛ Nīi Ɔwɔ Ge̍ Ē Hlɛ̍ɛ̄pɔ̄ Ma̍, ɔ̄chɛmɔ̄chɛ ge̍ē koko̍o yī a̍kpla yī lɛlā wa̍a̍ nīi ɔlɔjā bī oko̍o ka je̍ ma̍. 37Wu̍chē oji̍ nɛ, bū lɛlā yī oko̍o yī awɔ ɔlɔjā nīi Ɔwɔ ge̍ē bī hlɛ̍ɛ̄pɔ̄ a̍nɛ. Anu̍ nīi o̍ ge̍ē bī ka hīka lɛpɔ̄ ɔ̍lɔ ngma̍ la aɔ̍lɔ kɛ̄ɛ ɔ̍lɔ ku̍ aɔ̍lɔ a̍nɛ.”
Āchɛ ɛha̍ chikpo̍ yī lɛlā ɔlɛbɛ̍bi̍ ɔmɔ̍ɔ̄ma̍
(Ima̍aki 8:11-12; Ilu̍uku 11:29-32)
38Āchɛ yī Ifa̍rasīi ba̍la āchɛ ongū Lihɔ yī Iju̍u ɛha̍ da Iji̍sɔ̄ɔsi bɛ̍ɛ̄nɛ̄ hīka, “Ɔngūlɛ̄lā be̍e! Alɔ chikpo̍ nīi a ge̍ yɛ̍ɛ̄lā ɔlɛbɛ̍bi̍ ɔha̍ chabɔ̄ nīi alɔ ē ma̍.”
39Iji̍sɔ̄ɔsi ka bɛ̍ɛ̄nɛ̄ hīka, “Fi̍yɛ! Āchɛ ɔdwɔ̄bi̍ ba̍la āchɛ i̍je̍ Ɔwɔ ni̍ hɔ̄ ma̍ la yɛchɛ nūma̍ a̍nɛ ko̍ō! Ala̍ chikpo̍ yī lɛlā ɔlɛbɛ̍bi̍ ɔmɔ̍ɔ̄ma̍ bū la abɔ̄ yī u? Īchāha̍-īchāha̍! Lɛlā ɔlɛbɛ̍bi̍ ɔchabɔ̄ lōri̍īnū nīi hɔ̄ de ala̍ ma̍, iyī Ijo̍na nīi ɔ̄chɛ ɔkɛrɔ̄ yī Ɔwɔ ma̍ nɛ. 40Lɔkɔ nīi ijo̍na tū la lipu̍ yī ɛbɛ̍yēenyi ɔnɔ̄kɔ̄kū ɔha̍ la otu̍ ɛta̍ yɛnɔ ɛta̍ ma̍, i̍ngi̍ngɔ̍ɔ nīi Ɔyi̍ yī Ɔngrɔ̄ɔ ge̍ē tū lipu̍ yī ajɛ la otu̍ ɛta̍ yɛnɔ ɛta̍ a̍nɛ. 41I̍chi̍chɛ Nīi Ɔwɔ Ge̍ Ē Hlɛ̍ɛ̄pɔ̄ Ma̍, Alini̍nīfɛ ge̍ē nīichō yarɛ ē ya̍ ala̍ lɛfiyɛ. Wu̍chē oji̍ nɛ, aa̍ po̍ ɛrɔ̄ yī Ɔwɔ nīi Ijo̍na ka ma̍, e̍ pīyabɔ̄ta̍ hī lɛlā abi̍ ɔyɔ̍ɔ̄ya̍ yī wā. N chī ge̍ē koko̍o ē de ala̍! Ɔjā nīi gra Ijo̍na ta̍ pɛtɛpɛtɛ ma̍ hɔ̄ amu. 42I̍chi̍chɛ Nīi Ɔwɔ Ge̍ Ē Hlɛ̍ɛ̄pɔ̄ Ma̍, Ɔchwɔ̄lɛ̍ Ɔnɔ̄nyā ɔha̍ nīi bū la ɔcha yī wāā yī ihi̍yajɛ ma̍ ge̍ē nīichō yarɛ ē ya̍ ala̍ lɛfiyɛ. Wu̍chē oji̍ nɛ, anu̍ pīya bū abɔ̍ɔ la ɛbɛ i̍ba̍ni̍ ɛbɛ i̍gboni̍ ɔla̍ā wa̍a̍ wā dikpo̍ba̍ Iso̍lōmɔn ge̍ plɛ̍ɛ̄lā ojo̍ōje̍ ka̍ka̍ yī nū. N chī ge̍ē koko̍o ē de ala̍! Ɔjā nīi gra Iso̍lōmɔn ta̍ pɛtɛpɛtɛ ma̍ hɔ̄ amu.
Oku̍chē yī yapri̍ija ɔdwɔ̄bi̍
(Ilu̍uku 11:24-26)
43“Yapri̍ija ɔdwɔ̄bi̍ ge̍ bīyɛchɛ hī ɔ̄chɛ, o̍ ē pīya ē ta̍yaha wa̍a̍ ē ga ajɛ ɔngma̍akprū ge̍ē gāla̍ ɛbɛ ɔmyɛ̍nyɛ̍. O̍ i̍ ge̍ ma̍ ɛbɛ ɔmyɛ̍nyɛ̍ gɛ ni̍, 44o̍ ē ka ē de iyī nū ka anɔ̍lɔ ge̍ē ku̍chē gāa wɔlɛ̍ yī anu̍ ɔnɛ̄chɛ̄. Yapri̍ija ɔdwɔ̄bi̍ ɔla̍ā ē ku̍chē bɛ̍ɛ̄nɛ̄ ge̍ē ma̍ ɛbɛ nīi ta̍lā abɔ̍ɔ ji bāa ɔcha̍cha̍ ma̍, nīi e̍ de ɔ̍ gbla̍a lɔ̄lā abɔ̍ɔ. 45Yapri̍ija ɔla̍ā ku̍chē pīya ge̍ē bī yapri̍ija arāapa ɛha̍ nīi dwɔ̄bi̍ lɛlā hi̍ anu̍ ɔlɔjā ma̍ ē wā abɔ̍ɔ. E̍ gāa ge̍ē tū abɔ̍ɔ la ibi̍īyē yī ɔ̄chɛ ɔla̍ā. Bū la ɛbɛ ɔla̍ā, iyī ogwīihi nūma̍ ē de ē hɛ̍ wɔbi̍ dɛ̄ de ɔ̄chɛ ɔla̍ā hi̍ ɔrāarāa bɛ̍ɛ̄nɛ̄. I̍ngɔ̍ɔ ke̍e̍ nīi lɛlā yī āchɛ ɔdwɔ̄bi̍ yɛchɛ nūma̍ ge̍ē lɛ a̍nɛ.”
Aɛ̍nɛ̍ yī Iji̍sɔ̄ɔsi ba̍la ɛ̍nɛ̍ yī nū
(Ima̍aki 3:31-35; Ilu̍uku 8:19-21)
46Iji̍sɔ̄ɔsi e̍e rɛ abɔ̍ɔ yɛ ē kɛlā yɛ̄grāa nīi aɛ̍nɛ̍ yī nū anāngrɔ̄ɔ ba̍la ɛ̍nɛ̍ yī nū gbajɛ gāa ma̍. E̍ de jī rɛ abɔ̍ɔ yɛchɛ yɛ ē chikpo̍ ge̍ē kɛlā ba̍la anu̍. 47Ɔ̄chɛ ɔha̍ lipu̍ yī āchɛ nīi ha̍du tū Iji̍sɔ̄ɔsi ma̍ ka de Iji̍sɔ̄ɔsi hīka, ɛ̍nɛ̍ yī ɔ̍lɔ ba̍la aɛ̍nɛ̍ yī ɔ̍lɔ anāngrɔ̄ɔ ɛ̍lɛ gblāa abɔ̍ɔ yɛchɛ. Ɛ̍lɛ chikpo̍ ge̍ē kɛlā ɔha̍ ba̍la ɔ̍lɔ.
48Iji̍sɔ̄ɔsi hīyɔkɔ hīka, “Ɔ̄nyɛ u̍tu re̍ka ɛ̍nɛ̍ yī u ma̍/? Kɛ̄ɛ ānyɛ re̍ka aɛ̍nɛ̍ yī u - anāngrɔ̄ɔ ma̍?” 49O̍ miya abɔ̄ yī a̍chi̍kpo̍ yī nū, koko̍o de āchɛ ɛla̍ā wa̍a̍ hīka, “Ala̍ ma̍ gɛ ko̍ō! Ɛ̍nɛ̍ yī u ba̍la aɛ̍nɛ̍ yī u gblāa ma̍ i̍ngɛ̍ɛ̄nɛ̄ a̍nɛ. 50Wu̍chē oji̍ nɛ, ɔ̄chɛ nīi ē yɛ̍ɛ̄lā nīi A̍dā yī u nīi hɔ̄ la ichō ma̍ chikpo̍ ma̍, anu̍ re̍ka ɔɔ̍nɛ̍ yī u ɔnɔ̄ngrɔ̄ɔ a̍nɛ; anu̍ re̍ka ɔɔ̍nɛ̍ yī u ɔnɔ̄nyā a̍nɛ; anu̍ chī re̍ka ɛ̍nɛ̍ yī u a̍nɛ.”
S'ha seleccionat:
Ima̍tiyu 12: YBASR
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2020 Bible Society of Nigeria (second edition)