Luka 24

Ɛnza ngúunngo ó

Matiyu 28.1-10; Maki 16.1-8; Yaya 2.1-10

1Kookɔɔ ló ŋó sɔ́ɔ jónan ó mán, muso ólu tɛ wɛ́ɛ túu swáandhyaanin mín nɔ́bhyɛ, ii i wíi kɛ táa ni óle kábulu só ó la. 2Káwagbuba mín ndɛ́ɛ kábulu ó lála, ii táa sɔ́ɔ ké ó tɛ́ kábulu ó la lá bhée. 3Ii ló kábulu ó kɔ́ɔnnɔn, i mán Mantii Ɛnza nzú ó yé. 4Kɛ́ í hákii ɲáanminnin ŋó tó, íi bháa kɛ cɛ fyáa lɔnin ɲé i ɲánkɔɔ, faani gbɛ́ é i kannan. 5Muso ólu sháan kɛ í kún mánbiin lúuman, cɛ fyáa ólu fɔ i yɛ kó: «Mɔɔn míin i ɲánla mínnɛɛn lé kósɔn aa ó ɲíinan sú ólu cɛ́man? 6A tɛ́ yánun, a wɛ́ɛ kúun. A tɛ wɛ́ɛ kóman mín nvɔ́ a yɛ ké aa ní ale Galile, aa i hákii tó o lɔ. 7A tɛ́ wɛ́ɛ a fɔ kó fɔ́ mɔɔn Dhyénjɛ ó yáa ló yúumukɛbhaa ólu bhóo, ké íi a gbáan yíi ó mán, á tée sáwaɲɔn ló ŋó a yáa kúun.»

8O wáati ó lɔ, muso ólu hákii é bhyaa Ɛnza ɲɛn kóman ó lɔ. 9Muso ólu i kwɔ́sɛɛ kɛ bhɔ́ kábulu só ó la kɛ táa o kóman ólu lɔ́sɔɔ kaamɔɔndhye ndá ni kée ŋólu yɛ, óni kɛ a lɔ́sɔɔ mɔɔn tɔ́ ólu yɛ. 10O muso olu tɛ́ɛ Mwɛnyamu Magidalaka, óni Zaani, óni Zaki wóobhaa Mwɛnyamu. Muso tɔ́ mínnu tɛ́ɛ ní íle, ólu ŋé kó o lɔ́sɔɔ céladhye ŋólu yɛ. 11Wáa muso ólu kóman mín nvɔ́, céladhye ŋólu mán lá o la. 12O bɛ́ kwɔ́, Piyɛli é i wíi kɛ bwée kɛ táa kábulu só o la. Aa í bíin kɛ kábulu ó kɔ́ɔnnɔnlaa ó mánfɛɛ, aa fáani gbɛ́ ó lé lánin ŋé lúuman, aa í kwɔ́sɛɛ kɛ táa a bhóo lú mán. Kó mín ŋwɛ́ɛn kɛ o wɛ́ɛ a káwakoya.

Ɛnza e í yɛ́ɛ yáala Kaamɔɔndhye nvyáa la

Maki 16.12-13

13Wáa, o ló ŋó la, kaamɔɔndhye ŋó fyáa tɛ́ɛ táala só lɔ́la mín ndɔ́ɔ kó Emayusi. O só óni Yeluzalɛmu cɛ ó tɛ́ɛ kilo tá ni fyáa ɲɔ́ɔnnɔn bhɔ́la. 14Kó mínnu kɛ i tɛ́ɛ ólu bhálo ó kɛ́la ɲɔ́ɔn nvɛ́. 15Kɛ i tó bhálo óni sɔ́sɔli ó la, Ɛnza ŋé i mangbaa í la tó kɛ táamankɛ ni íle. 16Wáa aa kɛ le óo i ɲán ó sílinin ɲé, i mán bhɔ́ Ɛnza ɲan le. 17Ɛnza ŋé i mánɲaankɛ kó: «Aa mínnɛɛn lé bhálo lá ɲɔ́ɔn nvɛ́?»

Oo kɛ́ mínngɛ, ii i lɔ. I ɲánlasiinin ndɛ́ɛ. 18Kée ndɔ́ɔ kó Kilopasi, óo a yawi kó: «Kó mínnu wɛ́ɛ kɛ́ tée fyáa míin ngɔ́ɔnnɔn, mɔɔn sí tɛ́ Yeluzalɛmu ní mín ɲé sé kɛ fɔ kó ale mán o kó ólu lɔ́.»

19Ɛnza ŋé i mánɲaankɛ kó: «Oo kó mínnɛɛn lé?»

Ii a yawi kó: «Kó míin kɛ Ɛnza Nazalɛtika lá! A tɛ́ɛ céla báakaman né le, aa káwakolu kɛ, óni kɛ kóman ni sébhaaya le Ala ní mɔɔn ólu bɛ́ ɲánkɔɔ. 20Wáa faanlɛɛɲansebhaa olu kúnndii ólu ní án ɲɛ́n só ó ɲɛ́nmɔɔn ólu é a ló mɔɔn yóo ŋólu bhóo ké íi a fáa. Ólu a gbáan yíi ó mán. 21Án ɲii tɛ́ɛ a man óo ale lé káa Izalayɛlidhye ŋólu kunmanka. Wáa, kó míinnu kɛnin ŋó tée sawa lée bí le. 22Án née kaamɔɔndhye ŋólu cɛ́man, muso lɔ́lu yé. Ólu tɛ́ wɛ́ɛ táa kábulu so ó la sɔ́ɔ jónan ó mán, kɛ́nan kóman lɔ fɔ án ɲɛn mín ɲé an ngɔ́ɔnnɔn bhá. 23Kó i mán a su o yé. Ii fɔ án ɲɛn kó malɛɛka lɔ́lu i yɛ́ɛ yáa i lá, kɛ fɔ i yɛ kó Ɛnza ŋé i ɲánla. 24Án ndáamanɲɔɔn lɔ́lu ŋé táa kábulu só o lá kɛ a mánfɛɛ. Muso ólu fɔ i yɛ ɲán mín mán, íi táa a sɔ́ɔ cé né, wáa i mán ale gbú o yé.»

25Oo kɛ mínngɛ, Ɛnza ŋé fɔ i yɛ kó: «Áa hákiinda yé lɛ́! Céla ólu kóman mín nvɔ́, a lánin ndɛ́ o la a? A yóso o tɛ́ bhɔ́la o ɲánle jónan. 26Fɔ́ Kílisi o tɛ́ɛ tɔ́lɔya lé myáan cé kɛ tó lónan a yɛ nɔ́lɔya ó lɔ.» 27Kɛ lámyaan céla Musa yɛ sɛ́wɛ o mán, óni céla o tɔ́ ólu yɛ kitabu ó kɔ́ɔnnɔn, kó óo kó sɛ́wɛnin ndɛ́ɛ a tá sháa o fɛ aa ólu bɛ́ lɔ́sɔɔ i yɛ.

28I tɛ́ɛ táala só mínnan, íi súnɲan o lá mínngɛ, Ɛnza ŋé kɛ óo aa fɛ kɛ tínmin kɛ táa ɲɛ́n. 29Wáa íi a dɛ́li kó tó ni an ne, tée ó káa bé né wé, ywáa ó wɛ́ɛ sé. Ɛnza ŋé ló ni ile bhó ŋó kɔ́ɔnnɔn. 30Ɛnza ŋé i síi ní íle tabhali ó la mínngɛ, aa búlu ó tá kɛ bálika bhɔ́ Ala yɛ, kɛ́ a lɔ́taandaa kɛ a di di i mán. 31Oo kɛ́ mínngɛ, i ɲan ó i láka, íi a lɔ́ ŋóo ale lée wé, wáa aa túun i ɲánkɔɔ. 32Ii fɔ ɲɔ́ɔnɲɛn kó: «A tɛ́ɛ kómanla án ɲɛn sháa o lá wáati mínnɔn, óni a tɛ́ɛ Ala yɛ kitabu o sɛ́wɛli o ɲan fɔ́la án ɲɛn wáati mínnɔn án ɲóso o tɛ tɛ́ án nvyɛ́fyɛ la a?»

33O ywáaninngee ŋó lɔ, íi i wíi kɛ i kwɔ́sɛɛ kɛ táa Yeluzalɛmu. Ii táa céladhye ndá ni kée ŋolu ládhyɛnin nzɔ́ɔ yé óni mínnu tɛ́ɛ ni ile. 34Ólu fɔ mɔɔn fyáa ólu yɛ kó: Tínɲan ín ne Mantii ó wɛ́ɛ kúun, a wɛ́ɛ i yɛ́ɛ yáa Simɔn la.

35Kó míin kɛ kaamɔɔndhye nváa o lá sháa o la, óni ii Ɛnza nɔ́ ɲán mín man súnman nɔ́ɔ wáati ó lɔ, íi o lɔ́sɔɔ kaamɔɔndhye ŋó tɔ ólu yɛ.

Ɛnza ŋé a yɛ́ɛ yáala a yɛ kaamɔɔndhye ŋólu la

Matiyu 28.16-20; Maki 16.14-18; Yaya 20.19-23

36Kɛ i tó ó kóman ó la, ii bháa kɛ Ɛnza nɔnin ɲé i cɛ́man. Aa fɔ i yɛ kó: «Ala a hɛ́lɛ o kɛ a yɛ́.»

37I yóso é bwɔ́ ii sháan koyoongɛ kɛ mansɔɔ i tɛ́ɛ a yéla lɔ lé yáa é le. 38Wáa Ɛnza ŋé fɔ i yɛ kó: «Mínnɛɛn lé kósɔn a kɔ́ɔnnɔn wɛ́ɛ múun? Mínnɛɛn lé kósɔn aa síka lá? 39Aa né bhóo óni né sé ŋólu mánfɛɛ, né lée wé. Aa i bhóo túunan kɛ mánfɛɛ, kɛ mansɔɔ fásisoo óni koo tɛ́ ní ó lɔ́, wáa óo né lɔ.»

40Ɛnza ŋé o fɔ mínngɛ, aa a bhóo ólu ní a sé ŋólu yáa i la. 41I nisɔ é dhyáa koyoongɛ, yáanin o bɛ́ kwɔ́ i tɛ́ mán lá a lá bhá. O lɔ, Ɛnza ŋé i mánɲaankɛ kó: «Lɔ́minfe nɔ tɛ́ sɔ́ɔ a bhóo ya ŋán?» 42Ii yɔ́ɔyaanin nɔ dí a mán. 43Aa o myáan kɛ o lɔ́ɔ i ɲanla.

44O kwɔ aa fɔ i yɛ kó: «Né tɛ́ɛ ni ale wáati mínnɔn, né tɛ́ɛ o kó ólu le fɔ́la a yɛ, fé ŋóo fé ŋé sɛ́wɛ Musa yɛ sɛliya ó lɔ, óni céla ólu yɛ kitabu o lɔ, óni zabulu ólu kitabu o lɔ né tá sháa o fɛ́, fɔ ó kó o bɛ́ tɛ́ɛ kɛ́ lé.»

45Oo kɛ mínngɛ, áa i hákii ó láka ké ii bhɔ́ kitabu o kɔ́ɔnnɔnkan ŋó ɲánle. 46O kwɔ, aa fɔ i yɛ kó: «A sɛ́wɛnin ɲé Kitabu ó lɔ kó Kílisi ó yáa tɔ́lɔya myáan, a tee sáwaɲɔn ló ŋó a yáa kúun kɛ bhɔ́ saya o lɔ. 47Ké yɛ́ɛmanli ó wáa kɛ, ké yúumu yafa ó sɔɔ wáa i láse síya ólu bɛ́ mán ale tɔ́ɔla, kɛ lámyaan Yeluzalɛmu mán. 48Ale léelu o kó ólu sɛ́ɛya lé. 49Né Fá é fé mín náheli tá, né yáa o lanan a mán. Wáa ále, áa tó só o kɔ́ɔnnɔn, fɔ́ o sébhaaya o wáa yíi kɛ bhɔ́ sá ŋó lɔ.»

Ɛnza ŋé yɛ́ɛla sángboo ó lɔ

Maki 16.19-20

50O kwɔ, aa táa ni ile fɔ Betani fán ŋó fɛ. Aa a bhóo fyáa olu láwii kɛ lwáau kɛ i yɛ. 51Kɛ a tó lwáau kɛ ó lá i yɛ, aa bhɔ́ i ɲánkɔɔ kɛ yɛ́ɛ sángboo ó lɔ. 52Ilee kwɛ́nnin, ii wɛ́ɛ a bhátola mínngɛ. O kwɔ́, ii i kwɔ́sɛɛ Yeluzalɛmu ní nisɔdhyaaba le. 53I tɛ́ɛ ɲɔ́ɔn nádhyɛla Ala bhatobhomba ó kɔ́ɔnnɔn wáati o bɛ́ kɛ Ala tando.

S'ha seleccionat:

Luka 24: MXX

Subratllat

Comparteix

Copia

Vols que els teus subratllats es desin a tots els teus dispositius? Registra't o inicia sessió

Més informació sobre Mahou

Luka 24

Versets bíblics populars de
Luka 24

La Bíblia:

Mahou

Versió: Mahou - MXX

Luka 24

Luka 24

Versets bíblics populars de Luka 24

La Bíblia:

Mahou

Versió: Mahou - MXX

Luka 24

Versets bíblics populars de
Luka 24