Hecho 1
1
Jesupa Tachi Ak'õre Jaore teai jarada
1Teóp'ilo, chi k'art'a naena bɨdade mɨa bɨ basima Jesupa ne ãarea ooda mãɨnepa jarateada, 2Tachi Ak'õrepa mãɨ pajãnea ateewãrunea. Pajãnea wãi naena ichia peedaɨrã́ Tachi Ak'õre Jaoredepa jarateasima k'ãre oodai p'anɨt'a. Mãɨrã ichia jɨrɨ atada pasima.
3Jesú piuk'ari ara ichi ãchiá bari k'ak'o minachia unupipachima k'awadamẽrá ichi piarã chok'ae p'irabarisit'a. Mãɨne ãchiá jarateapachima ichidepa Tachi Ak'õrepa ichidirã ichi juade ua bɨ k'orea. Ewari k'ak'o cuarenta mãɨya oosima. 4Ewariaba Jesú ãchi ome baside nãɨya jarasima:
—Jerusalén p'uurudepema ãyá wãrãt'ɨ. Nãma nɨ p'aneet'ɨ aba Tachi Ak'õrepa ichi Jaore teai jarada mãɨ tearudea.#Luca 24:49; Juan 14:26-27; Isaía 32:14-15; Joel 2:28-32. Mãɨnepema mɨa mãrá naena jarasima. 5Piarã Juanpa ẽpẽerã paniapa porochoasima, maamina tãaraawẽa bɨde Tachi Ak'õrepa ichi Jaoredepa mãra porochoaipɨ.
6Maapae chi Jesú ome ará p'anɨrãpa ichiá idisidama:
—Tai Chipari, ¿naapaepuru pɨa tachi Israel p'uuru chĩara juade bada k'ẽet'aapik'ari, tai mãɨ mãicha pia beepiima?
7Jesupa p'anoosima:
—Mãɨ ewari mãrapa k'awadaiwẽa p'anɨma. Aba mɨ Ak'õrepuru mãɨ k'awa bɨma, mãɨ ewari bɨda pẽra. 8Maamina Tachi Ak'õre Jaore mãra ome beede cherude, mãrapa ichi jua chaarea jitadaipɨ. Mãɨpa mãrapa Jerusalene, ãarea Judea mãɨnepa Samaria tuade mãɨnepa tua t'ɨmɨa bede mɨ k'orea pedeadaipɨ.
9Jesupa mãɨya jarak'ari ãareaɨrãpa ak'ɨ p'anɨne ɨt'aa ateewãsima. Mãɨne jɨ̃arapa ichi ɨ̃rɨ ãarea p'ãriona pẽra waa ununaé pasima. 10Mãɨ Jesú ɨt'aa wãpodomisa, pia ak'ɨ p'anasima. Mãɨya bɨde ãchi k'ait'a ẽpẽra ume neet'á t'ot'oa jɨ̃ p'anɨt'a orrobarisidama. 11Mãɨ ẽpẽerãpa nãɨya jarasidama:
—Galileadepemarã, ¿k'ãre k'orea pajãnea ak'ɨ p'anɨma? Ara mãɨ Jesú pajãnea wãna mãicha cheipɨ ara machia pajãnea wãru ununana jĩra.#Apocalipsi 1:7.
Matía jɨrɨ atadada
12Maapae Olivo eyadepa Jerusalenea jĩitea wãsidama. Mãɨ eya Jerusalén p'uurudepa kilómetro aba#1:12 Kilómetro aba. Griego pedeade nãɨya bɨ bɨma: k'ait'a bɨma, saodode tachi p'ɨrrɨapataɨ jĩra. Chi eda waapẽarã Moisepa bɨda jarateapataɨrãpa jarateapatama chi mimianak'apɨ́ ewaride judiorã p'ue chi t'ɨmɨa wãnaiwẽa p'anɨt'a, chi ãchia jara p'anɨ wãyá. bɨma. 13Jerusalene padak'ari chi te ɨt'ɨ pará bɨmá ãchi mãma k'ãipataɨmá wãsidama. Ãchi nãɨrã pasima: Pedro, Juan, Santiago, André, P'elipe, Tomá, Bartolomé, Mateo, Alp'eo warra Santiago, Simón chi Celote mãɨnepa Santiago warra Juda.#1:13 Santiago warra. Griego pedeade chi eda waapẽarã k'art'ade bɨ bɨma: Santiago ũpẽa. 14Ãchi ãarea, Jesú ũpẽarã ome, ichi nae María ome mãɨnepa waapẽarã wẽrarã ome pida abarik'a k'ɨ̃risia p'anɨnepa ará p'anasidama, Tachi Ak'õrea ɨt'aa chiididai k'orea.
15Mãɨya p'anɨne ewariaba Pedro chi ũpẽarã esa bai nɨbeesima chi ẽpẽerã́ pedeai k'orea. Ãchi 120 p'anasidama. Mãɨne jarasima: 16«Ũpẽarã, naena Tachi Ak'õre Jaorepa Judapa ooi bɨ k'orea Davia bɨpisima.#Salmo 41:9. Tachi Ak'õre pedeade bɨ bɨ jĩra piarã mãɨyai bada pẽra Judapa ẽpẽerã ateewãsima Jesú jitadamẽrá. 17Juda tachi jĩra Jesupa peeda pasima mãɨnepa chi tachia oopataɨ ichia pida oo bapachima».
18(Judapa Jesú jitapida k'orea, chi mãɨ erreara ichia jitadapa ĩjũa atasima. Mãma poroari baek'ari chi bi t'erawãk'ari, maapae chi jɨ̃si ãarea awara wãsima. 19Ãarea Jerusalenepemarãpa mãɨ k'awasidaɨde chi ĩjũa t'ɨ̃ bɨsidama Acéldama. Mãɨ t'ɨ̃ ãchi pedeade jara k'ɨ̃ria bɨma «Oa Ĩjũa»).#Mateo 27:3-10. 20Mãɨne Pedropa jarasima: «Juda mãɨyasima Salmo k'art'ade bɨ bɨ jĩra:
“Ichi te nenea beeipɨ. Mãɨ aba pida mãma baiwẽma”.#Salmo 69:25.
Ichiaba jara bɨma:
“Ichia oo badat'a awaraɨpa oo beeipɨ”.#Salmo 109:8.
21»Mãɨpuru ichi k'ak'ua pae mãranepema aba tai ome beei bɨma ẽpẽerã́ jarai k'orea Tachi Chipari Jesú piarã chok'ae p'irabarisit'a. 22Mãɨ tai ome ará bai basima, Juanpa porochoa bapachiedapema aba Tachi Ak'õrepa Jesú pajãnea ateewãsidea».
23Mãɨya ẽpẽra ume bɨsidama, ãchidepema aba jɨrɨ atadai k'orea. Aba José pasima. Ichiaba Barsabá wa Justo apatama. Chi abaɨ Matía pasima. 24Maapae ãareaɨrãpa Tachi Ak'õrea nãɨya ɨt'aa chiidisidama:
—Tai Chipari, ãareaɨrãpa sõne k'ɨ̃risia p'anɨt'a pɨa mãɨ k'awa bɨma. Taiyá unupise nãɨ ẽpẽra umepemarã chi sãɨ pɨa jɨrɨ atait'a, 25chi pɨa peedapa ooparit'a oomẽrá. Judapa mãɨ ooi badat'a itu bɨsima, chi ichi wãi bɨmá wãi k'orea.
26Maapae ne jemena ajorosidama k'ai beei k'awadai k'orea. Mãɨne Matiat'a beesima. Ara mãɨne ichi chi Jesupa peedaɨrã once p'anɨ ome ará beesima.
S'ha seleccionat:
Hecho 1: tdc
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active), Wycliffe Bible Translators, Inc. All rights reserved.