Juan 21
21
Jesupa ichi ome p'ɨrrɨapataɨrã siete p'anɨrã́ ichi unupida
1Mãɨya nak'ari Jesupa mãicha ara ichi ome p'ɨrrɨapataɨrã́ unupisima Tiberia senia choma ik'idá.#21:1 Tiberia senia ichiaba «Galilea» apatama. Nãɨyasima: 2Mãɨ ewaride ará p'anasidama Simón Pedro, Tomá ichi ɨ̃ana t'ɨ̃ Mikisu apataɨ, Natanael Galileade bɨ p'uuru Caná p'uurudepema, Zebedeo warrarã mãɨnepa waapẽarã ume. 3Mãɨya p'anɨne Simón Pedropa jarasima:
—Mɨ to bat'ade wãipɨ.
Mãɨne ãchia jarasidama:
—Tai sida pɨ ome wãnaipɨ.
Ara mãɨne p'ãp'orrode batoodak'ari wãsidama. Maamina mãɨ teamasi beta jitadaé pasima. 4Tap'ededa Jesú ipude bai nɨbasima maamina ãchia ichi atua p'anasidama. 5Mãɨya bɨde Jesupa ãchiá idisima:
—Ũpẽarã, ¿beta jitasidak'ãra?
Ãchia p'anoosidama:
—Jitadawẽma.
6Jesupa jarasima:
—Mãɨya bɨpɨra juaraari t'ɨri bat'at'ɨ. Mãɨyara jitadaipɨ.
Mãɨya ichia jarada jĩra oosidama. Maapae mãɨ t'ɨri p'ue jiradaé pasima beta minachia beesideepuru. 7Mãma basima Jesú ome p'ɨrrɨaparí chi “Jesupa minachia k'ɨ̃ria bɨ” apataɨ. Mãɨpa Pedroa jarasima:
—¡Jãɨ Tachi Chiparipɨ!
Simón Pedropa “Tachi Chipariade” a jarada ũriside ichi neet'á ɨ̃rɨpema jɨ̃sima, mãɨ neet'áwẽapachi pẽra mãɨ to bat'ai k'orea. Jɨ̃k'ari maapae toedá t'ĩu wãsima. 8Maamina chi waapẽarã p'ãp'orrode p'aneesidama. Chi t'ɨri beta ipiru beeda jidibari enemeesidama ipudea, senia ik'idá cien metros k'ait'a p'ana pẽra. 9Batooutade t'ɨpɨ urua nɨbɨt'a unusidama, beta, p'ana ome. 10Jesupa jarasima:
—Mãrapa beta arat'ea jitadaadadepema enemeet'ɨ.
11Ara mãɨne Simón Pedro p'ãp'orrodea wãk'ari t'ɨri ipudea jidibari enemeesima. T'ɨri beta nepalá bepa ipiru basima. 153 joisiasidama. Maamina chok'ará jitasidamina chi t'ɨri k'õaé pasima. 12Maapae Jesupa jarasima:
—Nek'ode chet'ɨ.
Mãɨne ãchia wap'easidama ichi k'ayade a ididai k'orea, ichi Tachi Chiparit'a k'awasida pẽra. 13Mãɨya p'anɨne Jesupa p'ana atak'ari ãchiá teasima. Mãɨnepa beta teasima.
14Mãɨpa bari k'ak'o ũpea pa basima Jesupa chi ichi ome p'ɨrrɨapataɨrã́ chok'ae p'irabari bak'ari unupisit'a.
Jesú Pedro ome mãicha sõpia bada
15Nek'ok'ari Jesupa Simón Pedroa idisima:
—Simón, Joná warra, ¿pɨa mɨ pia k'ɨ̃ria bɨk'ãra cha berãpa mɨ k'ɨ̃ria p'anɨ k'aepẽra?#21:15 Waapẽarãmá Jesupa nãɨya idi bɨma: ¿Pɨa mɨ pia k'ɨ̃ria bɨk'ãra nejõma k'aepẽra?
Pedropa p'anoosima:
—Ãjã mɨ Chipari, pɨa k'awa bɨma mɨa pɨ k'ɨ̃ria bɨt'a.
Jesupa jarasima:
—Chi mɨne ĩjãa berã minachia ak'ɨ base oveja chak'erã ak'ɨpari jĩra.
16Jesupa mãicha Pedroa idisima:
—Simón, Joná warra, ¿mɨ k'ɨ̃ria bɨk'ãra?
Pedropa p'anoosima:
—Ãjã mɨ Chipari, pɨa k'awa bɨma mɨa pɨ k'ɨ̃ria bɨt'a.
Jesupa jarasima:
—Chi mɨne ĩjãa berã minachia ak'ɨ base oveja chak'erã ak'ɨpari jĩra.
17Jesupa mãicha idisima:
—Simón, Joná warra, ¿mɨ k'ɨ̃ria bɨk'ãra?
Mãɨpa bari k'ak'o ũpea idi basima. Pedro k'ĩra piawẽa nɨbeesima, Jesupa bari k'ak'o ũpea abarik'a idida pẽra. Maapae ichia jarasima:
—Mɨ Chipari, pɨa ne ãarea k'awa bɨma. Pɨa k'awa bɨma mɨa pɨ k'ɨ̃ria bɨt'a.
Jesupa jarasima:
—Chi mɨne ĩjãa berã minachia ak'ɨ base oveja chak'erã ak'ɨpari jĩra. 18Piarã jararuma: k'ũtã́ basieda pɨ tuaba neet'á jɨ̃pachima pɨ wã k'ɨ̃riarumá wãi k'orea. Maamina pɨ chõa beek'ari waapẽarãpa pɨ jua jiradaipɨ neet'á jɨ̃pidai k'orea. Maapae ateewãipɨ pɨ wã k'ɨ̃riawẽa bɨmá.
19Mãɨ jara bɨdepa Jesupa k'awapisima Pedro sãmaasã́ piui bɨt'a, ichi piurudepa ẽpẽerãpa k'awadamẽrá Tachi Ak'õre chi choma bɨt'a. Mãɨya jarak'ari Jesupa Pedroa jarasima:
—¡Mɨ ome p'ɨrrɨase!
Jesú, chi ichia minachia k'ɨ̃ria bɨ ome bada
20Pedropa jĩitea ak'ɨk'ari Jesú ome p'ɨrrɨaparí, chi Jesupa minachia k'ɨ̃ria uru baparí k'aadea cheru unusima. Mãɨ Jesú k'ait'a suak'abari basima Egitodepa wãnana k'ɨ̃risiapataɨ chik'o k'osidaɨde. Ichia idi basima: «Tai Chipari, ¿k'aipa pɨ jitapiima?»#Juan 13:25. 21Pedropa mãɨ ẽpẽra unuk'ari Jesua idisima:
—Mɨ Chipari, ¿nãɨ ẽpẽra ome sãaima?
22Jesupa p'anoosima:
—Mɨa k'ɨ̃ria bɨpɨra ichi chok'ae beeit'a aba mɨ mãicha cherudea ¿pɨa mãɨ k'orea sak'aima? Mɨa k'ɨ̃ria bɨma pɨ mɨ ome p'ɨrrɨait'a.
23Mãɨya jarada k'orea chok'ará ũpẽarãpa k'ɨ̃risia p'aneesidama chi mãɨ Jesú ome p'ɨrrɨaparí piuiwẽt'a. Maamina Jesupa jaraé pasima ichi piarã piuiwẽt'a. Mãɨpari jarasima: “Mɨa k'ɨ̃ria bɨpɨra ichi chok'ae beeit'a aba mɨ mãicha cherudea ¿pɨa mãɨ k'orea sak'aima?”
24Ara mãɨ Jesú ome p'ɨrrɨaparipa mãɨ k'orea jara bɨma mãɨnepa nãɨ k'art'ade nãɨya bɨruma. Tachia k'awa p'anɨma ichia jara bɨ piarãt'a.
Jesupa mãɨ ne minachia ooda
25Jesupa nãɨ ne oo bada k'aepẽra atepe ne minachia ook'oapachima. Maamina mãɨ ãarea k'art'ade abaabá bɨutapara, mɨmá mãɨ k'art'a bɨk'oadada nãɨ ĩjũa ãareaɨne ara baiwẽ pasima.
S'ha seleccionat:
Juan 21: tdc
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active), Wycliffe Bible Translators, Inc. All rights reserved.