Génesis 4
4
Muꞌ Caín judyeyaꞌ Abel
1Chat muꞌ Adán p̂entum ĉọshi Evatum chat qui ạvaꞌyiꞌ in. Aty meꞌsiꞌ basdyiꞌ mọꞌ, sonꞌ ạvaꞌ mọꞌ naꞌi, Caín tịj muꞌ. Yiꞌ mọꞌ Eva:
—Sonꞌ ạvaꞌ naꞌi yụ, muꞌ Ayoꞌ soꞌmintyiꞌ yụ.
2Quivij ạvaꞌyebanꞌ mọꞌ Eva, naꞌi muꞌ Abel vojity Caíntyimꞌ. Abel ĉọjcaiꞌtyiꞌ muꞌ oveca yụꞌtac, muꞌ na Caín quịjoijtyiꞌ muꞌ yụꞌtac.
3Aty meꞌsiꞌ muꞌ Caín tuyete ñịbeꞌyedyes Ayodyes, sacacdyeꞌ damꞌ tuyete muꞌ. 4Muꞌ na Abel jam muꞌ joꞌmes tuyete Jenꞌ, tashches ovecas ạvaꞌ mọꞌ, mọꞌ ñịbeꞌjete mọjoꞌchaꞌ jämꞌsiꞌ shush. Muꞌ Ayoꞌ anic jamaꞌjotyiti muꞌ Abel, anic jämꞌ jaĉubuti tuyacdyemꞌ. 5Muꞌ na Caín jam jamaꞌjotyiti Jenꞌ, jam jämꞌ jaĉubuti muꞌsimꞌ. Mọꞌdyes qui muꞌ Caín anic där fạ́coij, jämꞌ yocdyejyi vejyaꞌ. 6Muꞌ Ayoꞌ jajiti:
—¿Junꞌ dash meꞌ fạ́coij mi, jämꞌ aꞌc̣hijyi vejyaꞌ mi? 7Rụij bäꞌyi jụijyaꞌ mi maꞌjotac raꞌ mi. Jam na meꞌ rụij bäꞌyi jụijyaꞌ mi, peñi raꞌ mi, anic vejyaꞌ mọꞌ juchaj q̂uinꞌ mi, mọꞌ mạꞌjeꞌ jiꞌpeñin. Tupuj qui na ramꞌ feryi mi paj qui jam jiꞌpeñin mi.
8Yirisĉan mạyedyeꞌ yi muꞌ Caín jéyaqui vojity muꞌ Abel:
—Jeshaꞌ sóbaĉaꞌ muꞌve raꞌ jịjcajaꞌ.
Aty mochyejoij in muꞌ Caín chuqui vojity muꞌ Abel, muꞌyaꞌ ijatidyeij in. 9Chat qui muꞌ Ayoꞌ jajiti Caín:
—¿Junaꞌ vojity um Abel?
Vorjete muꞌ Caín:
—Jam chịj yụ junaꞌ raꞌ muꞌ. Jam nash yụ ĉọjcaquity vojity.
10Vorjajiti muꞌ Ayoꞌ:
—¿Junꞌ dash meꞌ mi? Mi nash ijaqui vojity mi, yoj na ĉaĉaij jacches chäsh muꞌ, mọꞌdyes yụ raꞌ soꞌmeye vaꞌtacdyeꞌ. 11Q̂uinꞌ chat raꞌ vaꞌtacdyeꞌtum bäꞌyi mi. Yụ raꞌ meijjeye ọijcheꞌ jac yóyaꞌdyemꞌ jiꞌchäshete vojity um. 12Fibiꞌ raꞌ carijtyeꞌ quịjodyeꞌ mi, aty raꞌ jam chịptaqui cätidyeꞌ mi. Paiꞌ raꞌ nati mi úcheꞌ jaccheꞌ, jam raꞌ junaꞌ jịꞌjutyiti mi —jajiti Jenꞌ.
13Yi Caín vorjete:
—Anic fersiꞌ ọij vaꞌtacdyeꞌ ĉọiꞌ yụ, jam raꞌ junꞌ dyich buꞌyi yụ. 14A nash vaꞌquictim úcheꞌ jaccheꞌ, paiꞌ raꞌ nati yụ jam raꞌ junaꞌ jịꞌjutyiti yụ, aty qui raꞌ jam mísiꞌyaꞌ vej bäꞌyi yụ. Tyi ĉụiꞌ rébin jụijyaꞌ yụ in, muꞌyaꞌ qui raꞌ jadyic yụ —yi muꞌ Caín.
15Vorjete muꞌ Ayoꞌ:
—Jam raꞌ meꞌ, tyi chuc ijantyiꞌ, yụ raꞌ soꞌmete yävätidyeꞌ vaꞌtacdyeꞌ muꞌdyes —yi jajiti Jenꞌ.
Mọꞌdyes qui muꞌ Jenꞌ yụꞌtyeyete aꞌcheꞌ cac̣htacdyeꞌ muꞌ paj qui chịjve muntyiꞌ in jam qui ijateve in muꞌ Caín. 16Chat qui muꞌ Caín yacchute muꞌ Ayoꞌ tsun, yocsiꞌve jac jịjcaij, Nod tịj mọꞌ. Mọꞌ jac shupquives tsun, mọꞌ na Edén jịjcaijcheꞌ tsun.
Muꞌin Caíntyiꞌ vóshimꞌ
17Caín p̂entum ĉọshi chat qui mọꞌ ạvaꞌyiꞌ. Aty meꞌsiꞌ basdyiꞌ mọꞌ, Enoc tịj ạvaꞌ mọꞌ. Caín jämꞌtyeꞌ yiris bäꞌyedyeꞌ, yojdyemꞌ ạvaꞌsiꞌ tịj umꞌ, meꞌ tịj yụꞌtyeyeꞌ bäꞌyedyemꞌ, Enoc jịꞌtiꞌeꞌ. 18Enoc ạvaꞌyi muꞌ Irad, muꞌ qui Irad ạvaꞌyi muꞌ Mehujael, muꞌ qui Mehujael ạvaꞌyi muꞌ Metusael, muꞌ qui Metusael ạvaꞌyi muꞌ Lamec. 19Muꞌ Lamec päräꞌ p̂en muꞌ, yiris Ada tịj mọꞌ, yocsiꞌ na Zila tịj mọꞌ. 20Ada ạvaꞌyiꞌ muꞌ Jabal, muꞌtyiꞌ Jabaltyiꞌ vóshiꞌ in muꞌin quịꞌsiꞌ acaꞌ muꞌin, vaca ĉọjcaiꞌtyiꞌ in. 21Jabaltyiꞌ vojity muꞌ tịj muꞌ Jubal, muꞌtyiꞌ vóshiꞌ in vịꞌtyiꞌ vịcdyeꞌ in judyeyaꞌ boñedyeꞌ chimeꞌ. 22Mọꞌ Zila ạvaꞌyiꞌ, Tubalcaín tịj muꞌ. Muꞌ carijtyety fiyero judyeyaꞌ bronce, joꞌmes jedyeꞌ jämꞌtyeꞌ muꞌ. Mọꞌyaꞌ vojiꞌ Tubalcaínsiꞌ, Naama tịj mọꞌ.
23Yirisĉan mạyedyeꞌ muꞌ Lamec jéyacsi p̂en muꞌ, Ada judyeyaꞌ Zila:
"Seꞌvaĉamꞌ miꞌin ọij p̂eyacdyeꞌ yụ.
Yụ nash ijate yirity nanaty muntyiꞌ,
muꞌ chuntyiꞌ yụ judyeyaꞌ areꞌjin yụ.
24Yi Jenꞌ jiquej: "Muꞌ raꞌ ijatety Caín,
muꞌ raꞌ yävätidyeꞌ vaꞌtacdyeꞌ soꞌmac.
Damꞌdye raꞌ yụ, muꞌ raꞌ ijantyiꞌ yụ,
yävätidyeꞌ quiꞌtac yävätidyeꞌ jiyiꞌ vaꞌtacdyeꞌ soꞌmac", yi muꞌ Lamec.
Chibinyity ạvaꞌ Adántyiꞌ
25Muꞌ Adán cuvij p̂entum ĉọshi, cuvij ạvaꞌyebanꞌ p̂en muꞌ, Set tịj ạvaꞌsimꞌ. Yiꞌ mọꞌ Eva:
—Jenꞌ yoctyiꞌ qui soꞌmin ạvaꞌ yụ, jeñej buꞌban Abelvun jiquej ijatety muꞌ Caín. 26Chimeꞌdye muꞌ Set ạvaꞌyi, Enós tịj ạvaꞌ muꞌ. Aty meꞌsiꞌ muntyiꞌ in tiyacchuti cọdaqui Ayoꞌcheꞌ in, muꞌsiꞌcheꞌ tịj cọdaqui in.
S'ha seleccionat:
Génesis 4: CAS
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Copyright 2017 Nuevo Testamento en Chimane
Jen'si' P̂eyacdye'