Juan 4
4
Jesús judyeyaꞌ Samariaĉansiꞌ p̂en
1Fariseo seꞌvaqui p̂eyaqui in mujuꞌchaꞌ cäc̣häꞌchute Jesús in, judyeyaꞌ mujuꞌchaꞌ chimeꞌ chojtacsi, uyaꞌyaꞌ muꞌ Juan. 2Jam qui namꞌ Jesús chojtacsi muntyiꞌ in, jịꞌchiyactyiꞌ muꞌ, muꞌin chojtacsi in. 3Jesús chị́qui junꞌ chuc muꞌin fariseo in aty mọꞌ chịj in, aty qui jam maꞌjotyebajte in, mọꞌdyes qui sacjeꞌ jịꞌchiyactyiꞌtum muꞌ, Galileaĉan jijtuban in. 4Jemoñeꞌ Samariave tyeij in.
5Venjoij in Sicarĉan Samariaĉansiꞌ bäꞌyedyeꞌ, c̣hẹiꞌyaꞌ mọꞌ jac Jacobvunsiꞌ mọꞌ soꞌmaquis ạvaꞌ muꞌ José jiquej. 6Chimeꞌdye noria mọꞌyaꞌ Jacobvunsiꞌ jiquej muꞌ. Quichĉan tsun venjoij muꞌyaꞌ in. Muꞌyaꞌ noriayaꞌ p̂utsquenꞌyi muꞌ Jesús jịꞌjutyiti ĉaĉaij na fer noꞌbi miꞌi. 7-8Muꞌin na jịꞌchiyactyiꞌ muꞌ räj muꞌin jiyi in, bäꞌyedyeꞌĉan jịjcaij in yaꞌiyequi säcsedyes in. Meij mọmoꞌ muꞌin in shupquetiꞌ mọꞌyaꞌ yiris p̂en Samariaĉansiꞌ, ojñituiꞌ mọꞌyaꞌ. Jesús jeꞌ mọꞌ p̂en:
—Cumꞌjiyitiꞌ damꞌ ojñiꞌ —yi jeꞌ mọꞌ p̂en.
9Vorjete mọꞌ p̂en:
—¿Junꞌ cudyityitiꞌ ojñiꞌ um? Yụ nash Samariaĉansiꞌ, mi qui namꞌ judío —yiꞌ jéte.
Meꞌ mọꞌ yiꞌ jéte ĉaĉaij na muꞌin judío jiquej in jam junꞌ cạ̈näꞌnacsi in muꞌin Samariaĉantyiꞌ in. 10Jesús vorjeꞌ:
—Jam junꞌ chị́yepte mi Jenꞌsiꞌ ñịbeꞌyedyeꞌ mạꞌjeꞌ tsanꞌ soꞌmin mi, mijam chäyitiꞌ yụ mi, yụ cọdyetyeyety ojñiꞌ. Faraj vuꞌ caꞌ chịꞌ mi, paj qui yụ cudyityitiꞌ paj qui yụ soꞌmeye tsạꞌchucsis ojñiꞌ —jeꞌ Jesús mọꞌ p̂en.
11Yiꞌ mọꞌ p̂en jéte Jesús:
—¿Junas bu raꞌ soꞌmitim tsạꞌchucsis ojñiꞌ? Junꞌ quiꞌĉansiꞌ raꞌ ọij noria mijam mọꞌyaꞌ jäcaquis ojñiꞌ mi. 12¿Mi buty mujuꞌchaꞌ ferdyeꞌtum ĉúti, uyaꞌyaꞌ buty muꞌ Jacobvun vóshiꞌ tsun jiquej? Muꞌ jiquej jämꞌtyeꞌ ọij noria, mọꞌĉansiꞌ jiquej tyeij muꞌ ojñiꞌ ạvaꞌtumdye muꞌ, judyeyaꞌ cuꞌdyeꞌ chimeꞌ muꞌ, tsundyes qui q̂uinꞌ shupquiꞌ mọꞌ —yiꞌ jéte.
13Vorjeꞌ muꞌ Jesús:
—Tyi chuc q̂uinꞌ tyeij ọij ojñiꞌ muꞌin raꞌ cuvij jajreban in. 14Muꞌin na mọꞌ tyeijtyiꞌ in mọꞌ soꞌmacsis yụ, muꞌin raꞌ jam cuvij jajreban in, ĉaĉaij na mọꞌ soꞌmacsis yụ mọꞌ raꞌ jeñej buꞌyiꞌ jijmoꞌmoj ĉojtyiꞌĉansiꞌ muꞌin, mọꞌĉan raꞌ shupquiꞌ, aty jam raꞌ jayej muꞌin in, Jenꞌyadyety raꞌ muꞌin in —jeꞌ Jesús.
15Yiꞌ vorjete:
—Jeshaꞌ soꞌmitiꞌ mọꞌ ojñiꞌ mọꞌ p̂eyes q̂uinꞌ mi paj qui jam cuvij jajrebanꞌ yụ, paj qui jadyic ojñituiꞌ yụ ọ́yaꞌ noriayaꞌ —yiꞌ qui jéte.
16Vorjeꞌ Jesús:
—Tạij jeĉajme vämtyiꞌ mi —jeꞌ muꞌ Jesús.
17Vorjete mọꞌ p̂en:
—Itŝij nash vämtyiꞌ yụ —yiꞌ jéte.
Jesús qui vorjeꞌ:
—Anic rụijsis p̂eyacdyeꞌ jítim, yiꞌ mi: "Itŝij nash vämtyiꞌ yụ." 18Jam mụiꞌ yoctyiꞌ yoctyiꞌcheꞌ vämim, aty ĉanamꞌ tyiti vämtyiꞌ mi, muꞌ q̂uinꞌ jajbuꞌyetety mi, muꞌ jam anictyity vämtyiꞌ mi, mọꞌdyes anic rụijsis p̂eyacdyem —yi Jesús jeꞌ.
19Mọꞌ p̂en aty mọꞌ seꞌvepte p̂eyacdyeꞌ jéte:
—Q̂uinꞌ chat chị́yeye jorojĉan mi soꞌmintyiꞌ p̂eyacdyeꞌ Jenꞌ mi. 20Jeshaꞌ vóshiꞌ tsun jiquej Samariaĉantyiꞌ tsun, muꞌin úcheꞌ mụcuꞌcheꞌ timaꞌquete Jenꞌ in. Miꞌin na judío yi miꞌin Jerusalénĉan mọmoꞌ tupuj timaꞌqueja muꞌ Jenꞌ —yiꞌ jéte.
21Vorjeꞌ Jesús:
—Anic rụijsis ọij p̂eyacdyeꞌ aty c̣hẹiꞌyaꞌ tupudyeꞌ ayij, jadyic raꞌ mụcuꞌcheꞌ timaꞌquetinte Jenꞌ miꞌin, mijam raꞌ Jerusalénĉan timaꞌquectinte, junamꞌ ĉụiꞌ raꞌ tupuj timaꞌquetinte miꞌin muꞌ Jenꞌ. 22Miꞌin Samariaĉantyiꞌ mijam chị́yetinte muꞌ timaꞌquetintety tsanꞌ miꞌin. Tsun na judío anic jämꞌ chị́yete tsun muꞌ timaꞌquetety tsun, ĉaĉaij na muꞌ Jenꞌ yuꞌtyin tsun judío tsun paj qui tsunĉan naꞌi muꞌ Jiꞌc̣honacsity Muntyiꞌ. 23Aty ayij tupudyeꞌ, muꞌin anictyity timaꞌquetety Jenꞌ in rụijsisyaꞌ raꞌ dyijyedyeꞌ timaꞌquete raꞌ in, ĉaĉaij na yiꞌdye Ạꞌedyeꞌ muꞌ, joꞌmety quevacsi Jenꞌ q̂uinꞌ. 24Jenꞌ Ạꞌedyeꞌ buꞌyi, jemoñeꞌ rụijsisyaꞌ dyijyedyeꞌ timaꞌcac muꞌ, yóyiꞌdyemꞌ Ạꞌedyeꞌ umꞌ —yi jeꞌ muꞌ Jesús.
25Yiꞌ mọꞌ p̂en vorjete:
—Yụ chịꞌ atsij raꞌ muꞌ Jiꞌc̣honacsity Muntyiꞌ, muꞌ Cristo jétety in. A raꞌ muꞌyaꞌ jụijyaꞌ muꞌ, muꞌ raꞌ räj jiꞌchäquiyisinꞌ tsun —yiꞌ mọꞌ.
26Vorjeꞌ Jesús:
—Yụ p̂eyaquity q̂uinꞌ, yụ nash Jiꞌc̣honacsity Muntyiꞌ —jeꞌ.
27Meꞌĉandye shupqueshan in jịꞌchiyactyiꞌ muꞌ, dạquishajte in p̂eyevaꞌqueꞌ mọꞌyaꞌ yiris p̂en. Jämꞌ äjjete in, mijam qui namꞌ yirity muꞌin in cọdyete p̂eyacdyeꞌ in, ¿Jedyeꞌveiꞌ buty? ¿Jedyeꞌ buty p̂eijvaꞌqueꞌ mọꞌtum? jam cọdyetyete in. 28Mọꞌ na p̂en farajjeyactaquiꞌ chum puñuj mọꞌ camanꞌ mọꞌ bäꞌyedyeꞌĉan jịjcabanꞌ. Venjobanꞌ mọꞌĉan jéyacsebanꞌ muntyiꞌ in:
29—Meꞌ toꞌ caꞌ yụ dạcte yirity muntyiꞌ, muꞌ räj jin yụ junꞌ chuc bäꞌyiꞌ yụ. ¿Areꞌ muꞌ Jiꞌc̣honacsity Muntyiꞌ? Cabuꞌtyum cạvecja —yi jéyacsebanꞌ muntyiꞌ in.
30Meꞌdye muꞌĉantyiꞌ ñuryetaqui in cạvecte in muꞌ Jesús. 31Jambiꞌdyemꞌ ventyecte in, muꞌin jịꞌchiyactyiꞌ muꞌ jéte in muꞌ Jesús:
—Jịꞌchiyacsity, säcseva.
32Vorjeyacsi muꞌ Jesús:
—Mọꞌyaꞌ o ĉụiꞌsiꞌ säcsedyeꞌ yụ, mọꞌ jam chị́yetiñes miꞌin —jéyacsi muꞌ Jesús.
33Jịꞌchiyactyiꞌ muꞌ yi jítidyeij in:
—¿Tuyise buty säcsedyeꞌ jiquej in? —yi jítidyeij in.
34Jesús jéyacsi:
—Yụ́siꞌ säcsedyeꞌ chiquepte raꞌ yụ Jenꞌsiꞌ p̂eyacdyeꞌ muꞌ, muꞌ jutintyiꞌ yụ, paj qui ijaij yụ carijtacdyeꞌ, mọꞌ soꞌminsiꞌ yụ. 35Jam raꞌ yi miꞌin: "Vạjpedyeꞌdyety o ịvaj chat qui raꞌ vädaĉajshaꞌ tsun", jam raꞌ meꞌ yi miꞌin. Yụ jéyac: Cạvevac cätidyeꞌ, a toꞌ o jiyiꞌ intsiiꞌ atsvun.#4:35 Ọij p̂eyacdyeꞌ Jesússiꞌ jịꞌĉocdyes shupquiꞌ. Muꞌin vädacdyeꞌĉan carijtaquity in muꞌin voroꞌtacsity in, judyeyaꞌ mọꞌ vädacdyeꞌ muꞌin, muꞌin jụjjetety in. 36Tyi chuc carijtaquity vädacdyeꞌĉan in, mọꞌyaꞌ raꞌ yaꞌitacdyeꞌ muꞌin, mọꞌ na vädacdyeꞌ muꞌin, tsạꞌ buꞌyiꞌ raꞌ Jenꞌyaꞌ muꞌin, mọꞌ raꞌ tuyacsiꞌ maꞌjodyeꞌ, muꞌ cätity judyeyaꞌ muꞌ vädaquity, vaj cäts raꞌ maꞌjoij in. 37Anic rụijsis ọij p̂eyacdyeꞌ yiꞌ: "Yirity cätity, yoctyiꞌ na vädaqui." 38Meꞌdye miꞌin chimeꞌ, juteyac paj qui vädaqui miꞌin, meꞌ tsanꞌ jam cäti miꞌin, yoctyiꞌ cätityiꞌ in, miꞌin qui namꞌ vädaĉantyiꞌ, jäcacsebi miꞌin yoctyis carijtacdyeꞌ muꞌin —yi Jesús jéyacsi jịꞌchiyactyiꞌ muꞌ.
39Meꞌdye muꞌin Samariaĉantyiꞌ in daiꞌ anicjete Jesús in, ĉaĉaij na seꞌvebiꞌ in p̂ensiꞌ p̂eyacdyeꞌ mọꞌ, yiꞌ mọꞌ jéyacsiꞌ jiquej: "Muꞌ räj jin yụ junꞌ chuc bäꞌyiꞌ yụ." 40Mọꞌdyes muꞌin ĉọcte in muꞌ Jesús, jéte in paj qui damꞌ chum muꞌĉan bäꞌyi. Jụj jaꞌyete chijämꞌ in, päräꞌ mạyedyeꞌ muꞌĉan jajbuꞌyacsi. 41Seꞌvepte in Jesússiꞌ p̂eyacdyeꞌ muꞌ, dadamꞌ daiꞌyaij anicjete in. 42Yi jeꞌ p̂en in:
—Q̂uinꞌ chat anicjete tsun, jam mis mọmoꞌ p̂eyacdyeꞌ anicjebiyac, anic qui muꞌsiꞌ p̂eyacdyeꞌ seꞌvepte tsun. Q̂uinꞌ chat chị́yete tsun muꞌ nash Jiꞌc̣honacsity jacchety muntyiꞌ in —yi muꞌin in.
Jesús jiꞌchäquebibajte ayoty ạvaꞌ muꞌ
(Mat 8:5-13; Luc 7:1-10)
43Päräꞌ mạyedyeꞌ muꞌĉan muꞌ Jesús jịjan qui, ĉụiꞌsiꞌĉan jac jijtuban Galileaĉan. 44Yi muꞌ Jesús: "Muꞌin na jasoꞌmitity p̂eyacdyeꞌ Jenꞌ in ĉụiꞌsiꞌĉantyiꞌ bäꞌyedyeꞌ in mijam méquiꞌ jụjyi muꞌcheꞌ in." 45Venjoban Galileaĉan, muꞌĉantyiꞌ tiĉunꞌte in ĉaĉaij na muꞌinmun cạvequeꞌ feshta Jerusalénĉan in, muꞌĉan cạvepte in ferdyeꞌ muꞌ.
46Aty meꞌsiꞌ muꞌ Jesús chimuꞌve jịjcaban Canáĉan, Galileaĉansiꞌ bäꞌyedyeꞌ, yóĉandyemꞌ vino jiꞌmuñeꞌ ojñiꞌ u. Chimeꞌdye muꞌĉan yirity ayoꞌ Capernaumĉantyiꞌ, japacjoij muꞌtyiꞌ ạvaꞌ. 47Seꞌvaqui muꞌ ayoꞌ aty muꞌ atsijbadaque Jesús Judeaĉantyiꞌ, Galileaĉan jijtuban. Chat qui muꞌ ĉọcte Jesús, fercheꞌ cạte paj qui ĉọcbite ạvaꞌ muꞌ jiꞌchäquebibajte, ĉaĉaij na aty cändyety ạvaꞌ muꞌ. 48Yi muꞌ Jesús jéte ayoꞌ:
—Jam jụijyaꞌ cavibutiĉamꞌ ferdyeꞌ yụs miꞌin, a vuty jam anicjitiĉaꞌ u miꞌin —jéte.
49Vorjete muꞌ ayoꞌ:
—Cavinyeva jambiꞌdyemꞌ säñi ạvaꞌ yụ —jéte.
50Vorjete Jesús:
—Tạij, acatubada, yụ yi muꞌ ạvaꞌ mi aty chäĉän.
Anicjepte muꞌ p̂eyacdyeꞌ, meꞌdye jọban muꞌ acaꞌyaꞌ jijtuban. 51Jambiꞌ dạcajquiĉan acaꞌ muꞌ pạrej úñity muꞌ jiꞌrebebajte in. Jiꞌrebete in jéte in:
—¡Atyuꞌ caꞌ chäĉän ạvaꞌ mi!
52Jéyacsi muꞌ ayoꞌ:
—¿Junꞌ quiꞌ caꞌ tsun yacchubun chäĉän ạvaꞌ yụ? —jéyacsi.
Vorjete in:
—Munjaꞌ u caꞌ quichĉan tsun jiꞌjiyaqui jänjändyeꞌ muꞌ —jéte in.
53Dyijtupte p̂eyacdyeꞌ muꞌ Jesússiꞌ. Yi muꞌ ayoꞌ: "Yoquiꞌdyemꞌ q̂uinꞌ tsun u, meꞌquiꞌ yi muꞌ Jesús jin yụ: Aty chäĉän ạvaꞌ mi." Räjtumdye chätidyeꞌ muꞌ anicjete Jesús in. 54Päräꞌ quiꞌ jịꞌcaveyacsi ferdyeꞌ muꞌ Jesús aty atsijbanyaꞌ Judeaĉantyiꞌ, Galileaĉan jijtuban.
S'ha seleccionat:
Juan 4: CAS
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Copyright 2017 Nuevo Testamento en Chimane
Jen'si' P̂eyacdye'