Intaliko 7
7
Intalaa
1Apano Imfumu e Leza anena Nowa ati, Yinjila mu wato, wewe ni wuvi lyako, amuno nalola kuno wewe wenga we mulungamane mu nkulo yoo. 2Kwakwe wila musango wa nyama nzima usende injonsi munenulambali ni njanachi munenulambali. Nga kwakwe wila musango wa nyama zino zisi a nzima usende ziwili, injonsi ni njanachi; 3ni nyunyi zya mupela ukulingana ni misango yakwe zyolizyo nazyonye usende wamukolwe munenulambali ni ntende munenulambali, alyakuti imisango yonsi iyakwe zyolizyo iyize ipusuke munsi moo. 4Amuno ndi amanda munenulambali yasila ndituma imvula munsi ku manda amakumi yani (40) uwusiku nu musanya, ndilovya wila chintu chino nelewuzile munsi. 5Achaleka Nowa wachisile vyonsi vino Imfumu e Leza wamunenile ukuchita.
6Nowa walinji ni myaka imyanda mutanda (600) pano intalala yatonyile munsi. 7E Nowa na wanakwe awana wonsi nu muchi na wanyinavyala wamuka wanakwe awinjila mu wato, alyakuti wapusuke ku minzi ya ntalala. 8Ni nyama nzima, na zino zisi a nzima, ni nyunyi na wila chintu chino chikasela pansi, 9viwili-viwili, ichonsi ni chanachi, avinjila mu wato apaliponga nu Nowa, ukulingana na muno Leza wamukomelezizye. 10Ayala manda yasila munenulambali intalala itonya munsi.
11Pano Nowa walinji ni myaka imyanda mutanda (600), mu mwezi wachitiwili, pa wanda wachitikumi na manda munenulambali, wa mwezi wonyewoo apano utuntopwezi tonsi utwa pansi-pansi atuwamiminuka, na mapongololo ya mwi yulu ayiyuka. 12Nga imvula itonya munsi amanda amakumi yani uwusiku nu musanya. 13Pa wanda wowonye e Nowa na wanakwe e Shem nu Ham nu Jafeti, nu muchi na wanyinavyala wonsi winjizile mu wato, 14woliwo apaliponga na wila chinyamana, na wila chikwato, na wila chintu chino chikasela, na wila nyunyi ukulingana ni misango yakwe vyolivyo. 15Vyinjizile mu wato nu Nowa, viwiliviwili vyonsi vino vili nu wumi vino vikafuta. 16Na vyonsi vino vinjizile kwalinji ichonsi ni chanachi, ukulingana na muno Leza wakomelezizye Nowa; ni Mfumu e Leza ayiyala ichisakati.
17Intalala itonya munsi amanda amakumi yani; aminzi ayavula, ayaleka uwato awambama nkaninye ukufuma pansi. 18Aminzi ayizula nkaninye munsi; nu wato awuwakwambama papela pa minzi. 19Ukuwa aminzi ayavulisya nkani munsi achaleka ni myamba mitali nkani isiwila yonsi; 20aminzi ayasiwizya imyamba, ukulingana na mapande kananimonsi. 21Ni vya wumi vyonsi vino vyalinji munsi avifwa, inyunyi, ni vikwato, ni nyama, na vyonsi vino vikasela pansi, na wila muntu; 22na wila chintu chino chikafuta ni mpuno achifwa. 23Alovya wila chintu munsi, umulawa ni nyama na vyonsi vino vikasela ni nyunyi zya mupela; avilowa vyonsi munsi. Akusyala e Nowa wenga na wano walinji nawo mu wato. 24Na minzi ayalanga yali munsi amanda umwanda wonga na manda amakumi yasano (150).
S'ha seleccionat:
Intaliko 7: WWN82
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Chinamwanga Bible © United Bible Societies, 1981.