Juan 7
7
I rachalal i Jesús xekojon ti che Ire
1Chrijil chik ile i Jesús xb'in che ronojel i ulew Galilea; xraj ti olem pa Judea man aj Judío kkaj ukamsaxik. 2Xwiri ya knaqajab' i nima'ij re i ral taq mujb'al re es chi are jun nima'ij ke aj Judío. 3Are uri i ratz i ucha' i Jesús xkib'ij che:
—Matkanaj chi; jat pa Judea, keje ile ni'pa je teren chawij chi je o chila kkil ni'pa i ka'ano. 4Man jun we kraj chi k-etamax uwach, ani'al ti uri ku'an i jalajuj taq b'iroxik, man we ka'an nimaq taq il le cha'ana uri chkiwach konojel i winaq re uwach i jyub' ta'aj.
5Lik xaq mitene uri ratz i ucha' xekojon che. 6I Jesús xub'ij chke:
—K'amaja ni kuriq i ij chi kin-an ile, xwiri chiwe yix xa pachike ij is utz. 7I winaq chi to' je re uwach i jyub' ta'aj tzel ti kixkil yix, xwiri yin tzel kinkilo man kinb'ij chke chi utz ti i kki'ano. 8Jix yix pa nima'ij le; yin kin-e taj, man k'amaja ni kuriq i ij chinwach.
9Keje ile xub'ij i Jesús chke, rumali Ire xkanaj kan pa Galilea.
I Jesús xupon pa nima'ij ke i mujb'al re es
10Xwiri are je enaq chik ratz ucha', i Jesús x-e pa nima'ij. Xwiri qas ti xuk'ut rib' chke i winaq man xa laj ani'al o chila. 11I aj Judío kkitzukuj i Jesús chila pa nima'ij le, xaq kkib'ij:
—¿Ipa nawi o wi i achi le? —Kecha.
12I winaq pa nima'ij le kkich'ach'a i Jesús chkiwach, o jujun kkib'ij: “Ire lik utz laj achi”; xwiri o jub'an chik kkib'ij: “Ire le utz ti laj achi man xa keut'or i winaq”; kecha.
13Xwiri xa ani'al kkib'ij ile man kkixij kib' chke aj Judío.
14Are nik'ajarnaq chik i nima'ij, i Jesús xok b'i prachoch i Dios; are uri xok che i k'utunik chila. 15I aj Judío lik kkib'isoj rumali xkib'ij i tziji:
—¿Wach u'anik ile chi lik o reta'am, man nti jun k'utunik yatal che?
16I Jesús xub'ij chke:
—I k'utuniki yin ti xinnojij, iri are unojb'al i Jun chi xintaqaw loq. 17We o jun chi ronojel uk'ux ku'ano pacha kraj i Dios, kretamaj uri i k'utunik chi kin-ano we qatzij petnaq ru' i Dios o we xa innojim yin. 18Jun we to' unojim wach kub'ij, xa kojb'al u'ij uri ire kutzukuj, xwiri we jun kutzukuj ukojik u'ij i Jun chi xtaqaw loq, ire le lik xwi i saq laj tzij uri kub'ij xaq lik nti i utz taj ku'ano.
19¿Qatzij ti b'awa ile chi mam Moisés xuya i atb'al tzij re i Dios chiwe yix? Xwiri mijun chiwe yix xkojon che. ¿B'uchak uri kiwaj kinikamsaj? Keje ile xub'ij i Jesús chke.
20Are uri i winaq xkib'ij che:
—¡Yet xa oknaq itzel chawe! ¿Pachin taq kraj akamsaxik? —Xecha che.
21Are uri i Jesús xub'ij chke:
—Iwonojel yix lik xib'isoj xa rumal jun nim laj il xin-an che i ij sábado. 22I mam Moisés xub'ij chiwe chi k-an circuncisión chke ral taq alab'om, tupu ile utaqanik ti mam Moisés, ile are jun taqanik ke iwatit imam ujer. I yix b'uchak uri ki'an circuncisión chke ral taq alab'om tupu sábado. 23Yix we ki'an pen u'anik pacha kub'ij i atb'al tzij re mam Moisés; chi ki'an circuncisión che jun ral ala tupu sábado. ¿B'uchak uri chi kpe iwoywal chwe yin chi xinkunaj uch'akul jun achi che i ij sábado? 24Mi'at tzij puwi jun winaq we iweta'am taj wach taq umak, are ki'at tzij chi'ata tzij pacha usuk' —xcha i Jesús.
I Jesús kub'ij ipa petnaq wi
25Jujun chke winaq chi je jeqel chila pa tinimit Jerusalén xe'ok chub'ixkil chkiwach:
—¿Are ti b'awa achi iri chi ktijin utzukuxik man kkaj ukamsaxik? 26Chiwila pe', ley olik le, lik ktijin che i lapanik chkiwach i winaq, xwiri mijun kukoj umak. ¿Xatab'a i aj-atzil ke aj Judío kkikojo chi are Ire le lik are i Cristo? 27Xwiri yoj qeta'am ipa petnaq wi Ire le; xwiri are kk'un i Cristo mijun kretamaj ipa kpe wi —keje ile xkib'ij.
28Are xuta i Jesús ile, are ktijin che i k'utunik prachoch i Dios, i lik ko xub'ij chke:
—¡Yix iweta'am b'ari inwach xaq iweta'am b'ari ipa in petnaq wi! Xwiri yin to' ti in k'unnaq pinwach wi. In taqtal li rumal i Jun chi lik saq laj tzij, xwiri yix lik iweta'am ti uwach. 29Yin lik weta'am uwach man ru' Ire in petnaq wi xaq are Ire in taqawnaq loq —Keje ile xub'ij i Jesús chke.
30Are uri lik xkaj uchapik, xwiri mijun xchapawik, man k'amaja kuriq i ij chi ch'iktalik. 31Lik je k'i xkikub'a kik'ux che xaq xkib'ij:
—Are kk'un i Cristo, ¿Xatab'a lik mas ku'an nawi k'iyal nimaq taq il chwach ku'an i achi ri? —Xecha.
I aj fariseo xkaj uchapik i Jesús
32I aj fariseo xkita wach kkib'ij i winaq chrij i Jesús, rumali ike xaq i kaj-atzil i rajpatan i Dios xekitaq b'i jub'an chajinelab' re i rachoch i Dios man keje ile kkichap i Jesús. 33Are uri i Jesús xub'ij chke:
—Xa attal ij in o iwu', te'uri kintzalij chub'i ru' i Jun chi xintaqaw loq. 34Yix kinitzukuj na xwiri kiniriq taj, man yix kixtiki ti che enam chila ipa kink'iji wi Yin.
35I aj Judío xkijeq utz'onoxik chkiwach:
—¿Ipa taq k-e wi Ire le, chi kqariq taj? ¿Xatab'a k-e ku' qach aj tinimit chi je enaq chkixol i aj Griego winaq, moqxa keuk'utu chke aj Griego winaq chila? 36¿Wach taq ke'el usuk' ile chi xub'ij chqe, “Yix kinitzukuj na xwiri kiniriq taj man yix kix-e ti chila ipa kink'iji wi Yin.” Xcha —Keje ile xkib'ij aj fariseo.
K'aslik taq ya
37-38I k'isb'al ij re i nima'ij chi lik are mer o u'ij. Che i ij le i Jesús xtak'i anoq, ko xub'ij i tziji:
—We o jun kk'atik, chpet wu' yin, i we kkojon chwe, chutu'u uri uya'. Man pacha tz'ib'tal kan chupam uwuj i Dios: Pachin kukub'a uk'ux chwe yin, ire le keje na pacha i ralaxb'al ya.
39Ru' i tzij le i Jesús xraj ub'ixkil iri: Ni'pa kekojon che ire kok ni Lo'laj Utewal i Dios pkik'ux k-on panoq. Man k'amaja ni kk'un i Lo'laj Utewal i Dios chwach i jyub' ta'aj man i Jesús k'amaja kupon chila chikaj ru' Uqajaw ipa koksax wi u'ij uchomal.
Ujachik kixol i winaq
40O jujun chkixol i winaq are xkita utzij i Jesús xkib'ij:
—Saq laj tzij i achi le lik jun profeta —xecha.
41Xaq o jub'an chik xkib'ij:
—Ire le lik are i Cristo.
Xwiri o jub'an tan chik xkib'ij:
—Are taj, man i Cristo chila ti kpe wi pa Galilea. 42Chupam uwuj i Dios kub'ij: I Cristo, are jun umuq uxikin i ajawinel mam David, chi kpe ni chila che i tinimit Belén, chi xaq lik are utinimit mam David, man chila xalax wi ire.
43Rumali, i winaq xkichap kib' che tzij rumal i Jesús. 44O jujun xkaj te'eq uk'amik b'i prexil, xwiri mijun xukowij rib' chu'anik.
I o atb'al tzij pki'ab' xkikoj ti i Jesús
45I chajinelab' re i rachoch i Dios are xeupon chik ku' aj fariseo xaq ku' aj-atzil chke i rajpatan i Dios, xtz'onox chke:
—¿B'uchak xichap ta loq?
46Are uri i chajinelab' xkila' uwach:
—¡Lik mijun achi ch'awnaq keje ile!
47Are uri i aj fariseo xkib'ij chke i chajinelab':
—¿Xaq keje yix xixt'ortaj rumal i achi le? 48¿Xatab'a o jun chke i qaj-atzil xaq we jun aj fariseo kojonnaq che i achi le? 49Are uri aj fariseo xkib'ij chke i chajinelab':
—Xwiri i winaqi chi lik je b'uy keta'am taj wach kub'ij i atb'al tzij, lik kpe ni k'oqb'al pkiwi.
50Xwiri i ma Nicodemo, chi aj fariseo, chi xupon juyak chrilik i Jesús, xub'ij chke:
51—I qa'atb'al tzij kuya ti chqe chi kqaya utojb'alil che jun winaq we yatal ti che chi kusaqij chwach i atol tzij wach u'anom.
52Are uri ike xkib'ij che ma Nicodemo:
—¿Xaq yet at aj Galilea? Chawajlaj uwach i ujer wuj tz'ib'talik, keje ile kawetamaj na chi mijun profeta kpe chila Galilea.
53 # 7.53 I jub'an versículo ri (7.53-8.11) kriqtaj ti chupam i ujer taq uwuj i Dios. Iri xu'on panoq te'uri xkiya ru'. Chrijil chik ile chkijujunal xe'e chi taq kachoch.
S'ha seleccionat:
Juan 7: ACHICUB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Biblia Achí de Cubulco, Derechos reservados de Sociedad Bíblica de Guatemala