Lucas 24
24
Uwalijik i Jesús che i kamik chkixol i kamnaq
1Xwiri che i nab'e ij re i seman, lik we' tan i ixoqib' le xe'e chik pa muqtal wi i Jesús; xkik'am b'i i kunb'al muy chi kiyijb'am. 2Are xeuponik, xkilo chi i ab'aj tz'apb'al re uchi' i jul lik elsam chik puk'ijib'al. 3Are uri, xe'ok b'i chupam, xwiri xkiriq ti uch'akul i Ajwal Jesús. 4Lik xe'ok il rumal, lik kkiriq taj wach kki'ano. Xaqte'et xekil keb' achiyab' je tak'al chila ku', lik kwalch'in ki'u'. 5Mas xe'ok il che, xaq xkilukb'a kipalaj pulew. Xwiri i keb' achiyab' le xkib'ij chke:
—¿B'uchak kitzukuj jun k'aslik chkixol i kamnaq? 6Ire chi ti chik o wi; walijnaq chub'ik. Chk'un chik'ux wach xub'ij chiwe are k'a ix o pa Galilea. 7Xub'ij chiwe chi pacha Winaq chi Xolalaxoq chwach Ulew o uchak kjach ni pki'ab' i ajmakib' laj taq winaq, lik ktz'aw na xaq krip ni chwach i krus, xaq kk'un ni saq chwach churox ij.
8Are uri xk'un utzij i Jesús chkik'ux. 9Te'uri xetzalij li chila ipa muqtal wi, xaq xkiya utzijol chke i julajuj apostolab', xaq chke i jub'an chik. 10I ixoqib' chi xkiya utzijol chke i apostolab' le je are ati Mariy Magdalena, xaq ati Wan, xaq i ati Mariy chi uchuch i ma Jacobo. Ike le ku' i jub'an chik ixoqib'. 11I kitzij ixoqib' le, xa ch'uj laj tzij xkita i apostolab'; ike lik xkikoj taj.
12Xwiri, i ma Pedro xwalijik, x-e pa'anem chila ipa xmuq wi i Jesús. Are xtzun pan chupam, xrilo chi xwi chik i sawan o kanoq. Te'uri x-e chi rachoch; lik xub'isoj wach i x-anik.
B'e chi k-e pa Emaús
13Che i ij le, je keb' chke utijoxelab' i Jesús ke'e che jun komon, Emaús ub'i; kolo oxib' lew unajtil che i Jerusalén. 14Are ketijin che i b'e, ketijin chuch'ach'axik ni'pa i xk'ulmax pa Jerusalén. 15Are kkilap ile, k'a ketijin ne chitzij, are uri i Jesús lik xtejeb' pan ku', xaq xe'e junam. 16Ike tupu lik kkitaqej xwiri xketamaj ti uwach; xa pacha taq ch'uqtal kib'a'wach. 17I Jesús xutz'onoj chke:
—¿Wach kixtijin chulapik are kixtijin che i b'e?
Are uri ike lik juntir xetak'i'ik, lik xeb'isonik. 18Jun chke, ma Cleofas ub'i; ire xula' uwach che xaq xub'ij:
—Konojel i winaq is keta'am wach i x-ani pa Jerusalén che taq i iji. Konojel i ajsolinel chila keta'am chik, ¿Xwi b'ari yet aweta'am taj? —Xcha.
19—Are uri i Jesús xutz'onoj chke: ¿Wach taq xk'ulmaxik?
—Chi xki'an ut che i Jesús aj Nazaret. Ire are jun nim laj profeta. Ni'pa i xu'ano, ni'pa i xub'ij, lik nim xril i Dios, xaq lik nim xkil konojel i winaq. 20Are x-ani man i kaj-atzil i rajpatan i Dios junam ku' i qawi qajolom xkijach ni pu'ab' i atb'al tzij. Xki'at tzij puwi chi kkamsaxik; xaq xtz'aw ni chwach i krus xaq xkamsaxik. 21Kqab'ij te'eq yoj, moq are ire koj-elsaw te'eq chisaq chi yoj oj aj Israel winaq, xwiri xkikamsaj; are urox ij iri u'ankil ile. 22Tupu o jujun ixoqib' je qachi'ilam, xojkikoj il, man are lik k'a we' na xeupon ipa muqtal wi, 23xaq xkiriq ti kamnaq. Xek'un qu' xaq xkib'ij chqe chi xkil keb' ángel chila; xb'ix chke chi ire k'aslik. 24O jujun chke i qachi'il xe'e ipa muqtal wi; lik xkiriqa i jul lik pacha i xkib'ij ixoqib', xwiri xkil ti uwach i Jesús. Keje xkib'ij i keb' achiyab' ile che i Jesús.
25Are uri i Jesús xub'ij chke:
—¡Yix lik kixch'ob'on taj! ¿Junpa nawi kikoj piwanima ni'pa i xkib'ij i profeta? 26¿Iweta'am ti b'ari, chi i Cristo o uchak kutij ni uyej nab'e, te'uri koksax ni u'ij? —Xub'ij chke.
27Te'uri xujeq usaqixik chke ronojel ni'pa i tz'ib'tal ujer chupam uwuj i Dios chrij ire; xujeq li ulapik chrij wach utz'ib'am kan i mam Moisés, te'uri, chrij ronojel wach kitz'ib'am kan konojel i profeta.
28Xeupon che i komon ipa ke'e wi. I Jesús xu'an che rib' chi pacha taq k-e pan jub'i' chik. 29Xwiri ike xkiya ti che k-ek.
—Chatkanaj qu' yoj, ya xqaj i ij, ya kok equm —xecha.
Are uri, i Jesús xok b'i ku' man kkanaj kan chila che i a'ab' le. 30Are je kul chi mexa, i Jesús xuchap i wa re trigo, xaq xutioxij che i Dios. Te'uri xupiro xaq xujach chke. 31Are xu'an ire ile, pacha taq xjaqtaj kib'a'wach xaq xketamaj uwach; are uri ire xsach an chkiwach. 32Te'uri xkib'ij chkiwach:
—¿Wach xana yet pak'ux are xlapan ire qu' pa b'e? ¿Xana jun nim laj il? ¡Yin xinna'o! Are ktijin chusaqixik i ujer tzij chi tz'ib'tal kan chupam uwuj i Dios chqe —xecha chkiwach.
33Juntir xewalijik xaq xetzalij chik pa Jerusalén. Chila xekiriq wi i julajuj apostolab' kimolom kib' ku' jub'an chik kachi'il. 34Ike xkib'ij chke i keb':
—¡Qatzij, i Ajwal xwalijik; xuk'ut rib' che i ma Simón! —Xecha.
35Te'uri i keb' xkilap chke wach xkik'ulmaj pa b'e, xaq wach i retamaxik uwach i Jesús xki'ano are xupir i wa re trigo.
Uk'utik rib' i Jesús chke utijoxelab'
36Lik k'a ketijin chuch'ach'axik ile, xaqte'et i Jesús xwinaqir an chkixol, xaq xuya rutzil kiwach, xub'ij.
—¡Chuxlan ik'ux!
37Ike lik xe'ok il, lik xkixij kib'. Kkib'ij ike chi xa jun anima xkilo. 38Xwiri i Jesús xutz'onoj chke:
—¿B'uchak kixij iwib'? ¿B'uchak chi lik kikoj taj chi xinwalij chik? —Xub'ij chke. 39—Chiwila in-ab', i waqan, ¡Chi lik are yin! Chinichapa i chiwila pe', man jun anima nti ub'aqil, nti uti'lal pacha kiwil chwe yini —xcha.
40Are xub'ij ire ile, xuk'ut u'ab' i raqan chke. 41Xwiri i ike lik k'amaja kkikojo we are i Jesús o chkiwach. Rumal i nim laj kikikotemal xaq rumal i nim laj b'isb'al, rumali i Jesús xutz'onoj chke:
—¿O tijawik re chi? —Xcha.
42Te'uri xkiya ch'aqap b'olom kar che, ru' ch'aqap aqaj o kab' che. 43Ire xuchapo xaq xutij b'i chkiwach. 44Te'uri xub'ij chke:
—Ni'pa ink'ulmam, ronojel ile are i xinb'ij chiwe are k'a in o te'eq iwu'. Chi lik rajwaxik chi kk'ulmax ni ronojel ni'pa i tz'ib'tal chwij yin chupam uwuj i mam Moisés, xaq ronojel ni'pa i tz'ib'tal kan chupam iwuj ke i profeta, xaq wach i tz'ib'tal kan chupam i wuj Salmos —xub'ij chke.
45Te'uri xuya kinojb'al, man kkita ub'e ni'pa i tz'ib'tal kan ujer chupam uwuj i Dios. 46Xub'ij chke:
—Are i tz'ib'tal kanoq are iri: I Cristo o uchak kkamsaxik, te'uri churox ij, kk'un chik saq chwach. 47Xaq kpaxsax ni utzijol inb'i pa taq tinimit, man keje ile konojel ketzalij chik ru' i Dios xaq kkuy ni kimak. Kijeq li pa tinimit Jerusalén 48Yix iwilom wach in-anom, ix ajb'il re uri chke i winaq. 49Chita pe', yin kintaq li Jun piwi chi usujum Inqajaw chiwe. Xwiri yix chix-ol waral Jerusalén k'a kqaj na li ucho'ab' i Dios piwi, chi upetik chikaj. Keje xub'ij i Jesús ile chke i utijoxelab'.
Relik b'i Jesús chikaj
50Te'uri xe'el b'ik, xeuk'am b'i k'a che i komon Betania; are je o chila xuyak u'ab' chikaj xaq xuya utzil chomal pkiwi. 51Tz'aqat are ktijin chuya'ik utzil chomal pkiwi, xel chkixol xaq xk'am b'i chikaj. 52Are uri ike xkikoj u'ij, te'uri xetzalij pa Jerusalén, lik kekikotik. 53Ij ij je o prachoch i Dios, ketijin chukojik u'ij i Dios. Amén#24.53 Amén pa qach'ab'al ke'eloq: Qatzij, ch-antaj na..
S'ha seleccionat:
Lucas 24: ACHICUB
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Biblia Achí de Cubulco, Derechos reservados de Sociedad Bíblica de Guatemala