Lukas 13
13
Beuk nam caanz kaw ngaz luh
1Meuz phangz an diz ihz teur ka truz cu Yesuhz lao daz meuz ihz Kalile teur ka yeung pukz caw ne Khunz Pilat piamz thengz keuh. 2Yesuhz daz mial keuh nahz, “Ihz prih Kalile keu diz talz ceun diz ne, anz pehz thaang reung dengz kawi keuh leuz ihz prih Kalile teur ka hiuz? 3Nam leuz keuiz! Pehz hacz aamz kaw beuk nam caanz reung dengz kawi ne pehz kaw talz luh sumz ceun keuh. 4Samz thaengz meuz khrengz pao yawt Siloam yaatz tengz yam ihz seu kawlz tahz ne, anz pehz thaang reung dengz kawi keuh leuz ihz weng Yerusalem keui hiuz? 5Nam leuz keuiz, pehz hacz aamz kaw beuk nam caanz reung dengz kawi ne talz luh sumz ceun keuh.”
Pung taek teungz laangz wah
6Yesuhz lao pung taek an ni, “Maang ihz hawkz peuk seumz teungz laangz wah tuhz sraakz daehz. Hnhz truz yawt plaehz kaw nam awlz plaehz. 7Kawp ceun diz hnhz lao ihz lum la sraakz nahz, ‘Yawt, teungz laangz wah an ni ohz a wa truz yawt waiz wit, nam awlz plaehz hawkz hawkz. Teunyz thengz lah! Aez khamz ti keu tehz sraakz cih naehz?’ 8Keuiz daz ihz lum la sraakz ne daz, ‘Teungz mah raez, tahz, ngawm yawt thaengz seu wit. Ohz ngaz kawngz rim teungz ne sapz aez nahz mun. 9Doz caang plaehz. Beuk nam plaehz kaw caang kai teunyz thengz.’”
Yesuhz seuk neum keun nyah nam krang
10Kaai seu ngihz sinz hawkz, Yesuhz sawnz boh tuhz crawp rawz traz ne, 11maang keun nyah hawkz phiz tekz rae takz penz naeh seu kawlz tahz wit. Butz hnhz khotz, nam caang ceukz keu sangz toz daehz. 12Meuz Yesuhz awlz keun nyah an diz ne lao hnhz nahz, “Keun nyah aez, mih a wa rak keuiz.” 13Yesuhz leh tihz Daehz tam kaai hnhz, meuz diz luat toz hnhz kaw a wa ceukz keu sangz bawnz rae lupz phrawz Phraz Pen Caoh.
14Keuiz daz ihz mawh crawp rawz traz ne sunz ca Yesuhz seuk neum kaai seu ngihz sinz. Hnhz daz ihz keui nahz, “Maang boh kraao cih kaanz tualz seu ngihz, truz seuk neum kaai seu ngihz keu diz raez, yak cih kaai seu ngihz sinz.”
15Yesuhz mial daz, “Seuk cih daehz naeh ihz rak keui aez, kaai seu ngihz sinz ne anz maang ihz nam plawiz meuk, nam anz kaw meu rang mahz liz keui lae thaz khawk tiangz omz hiuz? 16Keun nyah an ni naeh kheuz Abraham, Satan peun pae hnhz seu kawlz tahz wit. Rak seum cih aez bilz kaai seu ngihz sinz ne nam anz haz?” 17Mony reu ma Yesuhz cih aez ihz khatz Hnhz keui bawnz keu sehz. Ihz keui seuz tawiz an rak seum sangz an Hnhz cih.
Pung taek cakz mustart
(Matthe 13:31-32, Markus 4:30-32)
18Yesuhz lao, “Prih Phraz Pen Caoh ne naeh seu naez ez? Ohz ngaz leh naehz neung ez? 19Naeh ceun ihz peuk seumz cakz mustart kyehz tuhz sraakz daehz ne, mawh truz penz teungz, simz ploiz keui cih haanz tawz kaakz hnhz.”
Pung taek ceu
(Matthe 13:33)
20Hnhz kaw lao thaengz, “Ohz ngaz leh naehz neung plaez prih Phraz Pen Caoh? 21Naeh ceun keun nyah hawkz leh ceu sapz tuhz phangz kaaiz mun waiz khwaaiz ne kaaiz mun keu diz pawkz truz.”
Keur wah seuk ngiak
(Matthe 7:13-14,21-23)
22Waaiz an diz Yesuhz sawnz aez ihz keui nahz tawiz pruh tawiz weng rae lan boh weng Yerusalem. 23Ihz teur ka maanyz Hnhz, “Tahz, ihz bawnz reung dengz khyawt ne lany baaiz haz?”
Hnhz kaw mial daz, 24“Khatz phawmz kut tuhz keur wah seuk ngiak raez. Ihz keui khatz phawmz kut boh kaw nam caang. 25Meuz tahz kaang rawi dapz keur wah ne pehz samz ceng boh thaz nawk kaang, khrakz keur wah maanyz lawk daz, ‘Lawk keur wah luz tahz.’ Keuiz daz tahz kaang an diz mial daz, ‘Ohz nam mas pehz, pehz truz thaz naez?’ 26Pehz kaw mial daz, ‘Ehz suamz kawmz tiangz kawmz boh mih, mih kaw a wa truz sawnz aez tawiz reung dengz ehz.’ 27Tahz kaang kaw mial daz, ‘Ohz nam mas pehz, pehz truz thaz naez? Ihz meukz raai keui, tiunz yaan yaan ohz raez.’ 28Pehz te bawnz yaam teur kak tang raangz meuz pehz awlz Abrahm, Isaac, Yakop boh ihz taangz phraz keui naeh tuhz prih Phraz Pen Caoh, pehz samz talz wah thengz lang nawk. 29Ihz keui truz thaz reu lae, thaz reu keutz, thaz seun daalz, thaz keun bongz rae keu dez suamz kaai pheunz tuhz prih Phraz Pen Caoh. 30Yawt, ihz klaez thaz puatz keui ngaz tan aacz, ihz tan aacz keui ngaz klaez thaz puatz.”
Yesuhz phawmz kyehz ta weng Yerusalem
(Matthe 23:37-39)
31Meuz phangz an diz Pharise keui truz cu Yesuhz daz, “Mih kraai a niz lan lah, Khunz Herot sunz piamz Mih keuiz.”
32Yesuhz daz keuh nahz,“Pehz lan lao sohz keu tehz an diz nahz raez, Ohz wah thengz phiz, cih aez ihz moh rak meu ni kap siz. Kaai peuk dakz ne Ohz ngaz teuk wa kaanz Daehz. 33Keuiz daz Ohz yeung lo lan seu ngihz meu ni, kap siz boh peuk dakz. Neuz lak weng Yerusalem ne ihz taangz phraz keui nam talz ihz piamz.
34Euz, weng Yerusalem, weng Yerusalem, mih piamz ihz taangz phraz keui, leh kawnz reu aangz wiurz ihz phuhz reu oiz Phraz. Ohz sunz aez kuanz mih kai kai teur cuhz baaiz, naeh ceun yaerz tum kuanz daehz tuhz keutz piangz, keuiz daz mih samz nam aez Ohz cih ceun diz. 35Yawt, kaang pehz ngaz raam. Ohz daz pehz nahz, pehz ngaz nam awlz thaengz Ohz thonz taw kraao an pehz daz, ‘Phraz Pen Caoh aez reung dengz rak kaai ihz truz kawp mus Daehz.’”
S'ha seleccionat:
Lukas 13: ril
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2022, Wycliffe Bible Translators, Inc. All rights reserved.