Itanguriro 50
50
1Maze Yosefu arambarara kuri se aramuririra amusomagura. 2Hanyuma abwira abaganga bamukorera ngo bategure ikiziga ca se Isirayeli; nuko baragitegura. 3Igikorwa co gutegura ikiziga ciwe cafashe imisi mirongo ine nk’uko vyari bisanzwe bigenzwa. Nuko Abanyegiputa bamugandarira imisi mirongo indwi.
4Igihe co kugandara giheze, Yosefu yegera abahanuzi ba Farawo arababwira ati: “Nimba ngiriwe ubuntu mu maso yanyu, ndabinginze mumvugire kwa Farawo, 5mumubwire ko data yandahije akambwira ati: ‘Urabona ko ngiye gupfa. Uze usubize ikiziga canje mu gihugu c’i Kanani, umpambe mu mva nateguye ko bazompambamwo.’ Nuko rero ndakwinginze unyemerere nje guhamba data. Mpejeje kumuhamba, nzoca ngaruka.”
6Farawo yemerera Yosefu ico amusavye, arishura ati: “Genda uhambe so, ubikore nk’uko yakurahije.”
7Nuko Yosefu aja guhamba se, aherekejwe n’abakozi bakurubakuru bakorera umwami, abajejwe ikirimba n’abubahwa bo mu gihugu ca Egiputa cose. 8Yosefu yongera ajana abo mu rugo rwiwe bose, hamwe na bene se n’imiryango yabo. Abana bato n’amasho n’imikuku ni vyo basize i Gosheni gusa. 9Yosefu aherekezwa n’imikogote myinshi n’abagendera ku mafarasi benshi.
10Bashitse ku mbuga ya Atadi, hafi y’uruzi Yorodani, bagira ikigandaro gikomeye kandi c’akataraboneka. Yosefu ategurira se ikigandaro c’imisi indwi. 11Abanyakanani baba aho hantu babonye ikigandaro kiriko kirabera ku mbuga ya Atadi, baravuga bati: “Abanyegiputa bagize ikigandaro kibababaje cane!” Ni co gituma aho hantu hafi y’uruzi Yorodani hitwa Abeli-Misirayimu, bisigura “ikigandaro c’Abanyegiputa”.
12Nuko abahungu ba Yakobo bakora vyose nk’uko yari yabibasavye. 13Bajana ikiziga ciwe mu gihugu c’i Kanani, bamuhamba mw’isenga riri mw’itongo rya Makapela, hafi y’i Mamure, iryo Aburahamu yari yaraguriye Efuroni Umuheti nk’ikibanza co guhambamwo. 14Ahejeje guhamba se, Yosefu asubira muri Egiputa hamwe na bene se n’abari bamuherekeje bose guhamba se.
Yosefu ahumuriza bene se
15Abavukanyi ba Yosefu babonye ko se apfuye, baravuga bati: “Yosefu arashobora kutugirira urwanko akatwihora ku bibi twamukoreye.” 16Nuko barungika intumwa kwa Yosefu bati: “Imbere yo gupfa, so yasize avuze ati: 17‘Muze mubwire Yosefu muti: Aragusavye uze uharire bene so icaha n’ikibi kibishe bagukoreye, igihe bakugirira ibitagirwa.’ None turakwinginze uduharire icaha cacu twebwe abakozi b’Imana ya so.” Yosefu yumvise ayo majambo, aca ararira.
18Na bene se baca baraza barambarara imbere yiwe, baramubwira bati: “Turi abagurano bawe!”
19Ariko Yosefu arababwira ati: “Ntimugire ubwoba, erega jewe sindi mu kibanza c’Imana. 20Mwebwe mwashaka kunkorera ikibi, ariko Imana yahinduye ico kibi iciza. Yanshize muri kino kibanza kugira ngo ikize ubuzima bw’abantu benshi. 21Nuko rero ntimusubire kugira ubwoba, nzobandanya ndabitaho mwebwe n’abana banyu.” Uko ni ko yabaremesheje, ababwira amajambo meza.
Urupfu rwa Yosefu
22Nuko Yosefu na bene se n’imiryango yabo babandanya baba muri Egiputa. Yosefu yamaze imyaka ijana na cumi, 23yibonera abana b’umuhungu wiwe Efurayimu gushika ku runganwe rwa gatatu; yibonera n’abana ba Makiri, umuhungu wa Manase, bavukiye ku bibero vyiwe.
24Umusi umwe Yosefu abwira bene se ati: “Jewe ngiye gupfa. Ariko Imana izobagendera ibatabare, ibakure muri iki gihugu, ibajane mu gihugu yarahiye ko izoha Aburahamu, Isaka na Yakobo.” 25Nuko Yosefu arahiza bene Isirayeli ati: “Imana niyabagendera ikabashoboza gusubira mu gihugu canyu, mundahire ko muzojana amagufa yanje mukayakura muri kino gihugu.”
26Nuko Yosefu apfa afise imyaka ijana na cumi, bategura umubiri wiwe n’amavuta amota kugira ngo ntiwononekare, bamushira mw’isandugu ikozwe mw’ibuye muri Egiputa.
S'ha seleccionat:
Itanguriro 50: BKC
Subratllat
Comparteix
Compara
Copia
Vols que els teus subratllats es desin a tots els teus dispositius? Registra't o inicia sessió
Bibiliya mu Kirundi coroshe™
Uburenganzira © 2021, 2025 bwa Biblica, Inc.
Vyakoreshejwe bitangiwe uruhusha.
Uburenganzira bwose kwʼisi yose ni ubwa Biblica.
Kirundi Contemporary Bible™
Copyright © 2021, 2025 by Biblica, Inc.
Used with permission. All rights reserved worldwide.