Ruuka 4
4
Yesu ˆaghasakibhu ne Erishambu
(Mataayo 4:1–11; Maariko 1:12–13)
1Yesu akaru mo‑rooche ro Yorotaani, ichoriibhu Akörö Ahörëëru. Akörö iyo ekamukangata ekamohira mwibhara, 2akamara chaasiko miröngö ene arasakibhu ne Erishambu. Kwo riibhagha riyo ryose, taariire egheghiro ghyokyose. Chaasiko chiyo hano chesiriri, akooghu anchëra.
3Niho, Erishambu rekamobhoorera rekabhugha, “Aribha iye n‑Omoona o Ryobha onyi, nobhoorere eriibhohe rino riigharure ribhe omughaate.” 4Yesu akarigharokeri akabhugha, “Yandëkuru mo‑Mandëkö Amatööbhiyu kubha,
‘Omughaate#4:4a Omughaate n‑ekiinyakurë ghe chaasiko choose kwo Bhayahuuti. oweene tooghughëri omooto abhe no obhuhöru.’#4:4b Mööhi Kohiita kwo Meghiro 8:3.”
5Rekamara, Erishambu rekamohira Yesu ahaghiro hano haanyi ighoro chwee. Hayo hayo rekamwërëki obhutëmi bhoose bho chaase choose. 6Rekamobhoorera rekabhugha, “Neghokuha obhukangati bho bhino bhyose, haghirohamu no obhwame bhooche bhoose. Wiiki, gho kubha neenyi no obhotoro bho bhino bhyose, nëngënda komuha omooto wowoose uno nekwënda, nekomuha. 7Ibheere, iye oriishereri ghunsëngëra, neghokuha bhyose bhino.” 8Yesu akarigharokeri akabhugha, “Yandëkuru mo‑Mandëkö Amatööbhiyu kubha,
‘Nekwëndëru omusëngëra Omutëmi Waryobha waacho,
no omuhökëri iwe omwene chiri.’#4:8 Mööhi Kohiita kwo Meghiro 6:13.”
9Hano rimariri, Erishambu rekamohira Yesu Yerusareemu. Rekamwimeereri ighoro arososooni ro Risëngërö, rekamobhoorera rekabhugha, “Aribha iye n‑Omoona o Ryobha onyi, nwirëkërë haase, 10gho kubha yandëkuru mo‑Mandëkö Amatööbhiyu kubha,
‘Eryobha ndeghoghotomera bhamarayika bhaache, bhaghochonge.’
11Wiiki, ‘Mbaghoghughëgha mo‑mabhökö ghaabho,
amaghoro ghaacho ghataacha ghwituuratuura mwitare.’#4:10–11 Mööhi Sabhuri 91:11–12.”
12Yesu akarigharokeri akabhugha, “Yandëkuru mo‑Mandëkö Amatööbhiyu kubha,
‘Otamusaki Omutëmi Waryobha waacho.’#4:12 Mööhi Kohiita kwo Meghiro 6:16.”
13Hano Erishambu rimariri komusaki Yesu, rekamotigha, mbagha ribhönë omweya owonde o komusaki.
Yesu ˆaghataraahu
(Mataayo 4:12–17, 13:52–58; Maariko 1:14–15, 6:1–6)
14Akamara, Yesu aghagharuka mo‑mukööwa o Ghariraaya, anyi no obhotoro bho Körö Ahörëëru. Amangʼana ghaache, ghaghasancha chwee mo‑bhyaro bhiyo bhyose bhino bheenyi haghuhe na Ghariraaya. 15Nawe naare areeghi abhaato mo‑masinaghooghi na abhaato bhoose, bhaakabha bharamutöghösi.
16Akamara, aghagharuka awaabho Nasareeti, mo‑kyaro kino ꞉arëriiru. Orosiko ro Riikane, aghasöha mo‑risinaghooghi, kinya are anariri. Akiimeerera asömë angʼana e Ryobha. 17Akahaabhu eghitabhu ke murööti Isaaya, aghakehunyura, aghatabhara ahaghiro hano haandëkuru,
18“Akörö e Mutëmi Waryobha, neenyi haghirohamu na neeni.
Wiiki, nimariri konyaahura kobhamënyi,
abhahabhe Angʼana Anchömu.
Nentomiri kwo bhabhöhu,
nebhabhoorere kubha mbaghotighooroku.
Abhahuku, bhatore korighi wiiki,
na bhano bhakunyaakibhu, nebhatoori.
19Wiiki nebhabhoorere abhaato,
omooka uno akwërëki aghareeya yaache ˆokahikeerana.”#4:19 N‑omooka o ghareeya o Ryobha o kobhasongoreri bhano ꞉bhaare bhiihinyeriire. Mööhi Isaaya 61:1–2.
20Achekumara ghoghasöma amangʼana ghayo, Yesu akahunya eghitabhu kiyo, akamugharokeri omutamishi o risinaghooghi, aghiikara eghi abhaato. Abhaato bhoose bhano ꞉bhaare mo‑risinaghooghi, bhakamoomeri amiisho. 21Akabhabhoorera akabhugha, “Amandëkö Amatööbhiyu ghano mooghwire reero ino, ngahikeriine mo‑matu ghaanyu.”
22Yesu hano abhabhooriire amangʼana ghayo gha ghareeya, ghaghaghëri abhaato bhoose komughamba bhoheene. Bhakaroghoora chwee, bhaghasëëma kobhoorani, “Kana uno, taanyi omoona o Yusubhu?”
23Akabhabhoorera akabhugha, “Mbe, wiiki mokomboorera ekirëngi kino, ‘Omughabho, wiihöri iye omwene.’ Wiiki mokobhugha, ‘Ebheroghooro bhino tooghwire uköriri mo‑moghya o Kabherenawumu, nobhikörë na hano mo‑kyaro keecho!’” 24Yesu akabhugha, “Mbe, mahëënë ˆnekabhabhoorera, taanyi‑ho omurööti uno aghwishereru mo‑se yaache omwene.
25“Kwo riibhagha re murööti Eriya, ambura titëëkiri emeeka etato ne emyëri esaasabhe. Aghëëcha ihaari eghasöhërëra ase yoose e Isiraeri. ˆNekabhabhoorera ino enyi hëënë kubha, mbaare‑ho abhasino bhaaru mo‑se kwo riibhagha riyo. 26Koru hangʼu, Eriya taatomuru kwo mooto wowoose o Isiraeri. Amare aghatomu kwo mosino umu o mo‑moghya o Sareebhuta, mo‑se e Sitooni.#4:26 Mööhi 1 Abhatëmi 17:9–24.
27“Wiiki eriibhagha re murööti Erisha, mbaare‑ho abhabhabharu bhaaru bha mbiti mo‑se e Isiraeri. Koru hangʼu, taanyi‑ho mooto wowoose o Isiraeri uno ꞉ahöruru. Akamuhöri omooto umu koru ase e Siiriya uno are arabherekeru Namaani.”#4:27 Mööhi 2 Abhatëmi 5:1–14.
28Abhaato bhayo bhoose ꞉bhaare bhiikomiine mo‑risinaghooghi, hano bhooghwire amangʼana ghayo gha Yesu, bhaghakarara chwee. 29Hayo hayo bhakiimeerera bhwango, bhakamughööta bhakamohoroki anche. Bhakamohira mbagha mo‑ngëghu e gheghoro kino omoghya waabho ꞉waabhëkuru ighoro yaache, kubha bhamosughutere haase. 30Amare, akaheta ghateghate yaabho, aghaye checheeche.
Yesu ˆakëërëki changuru cheeche
(Maariko 1:21–28)
31Akamara, Yesu aghaye mo‑moghya o Kabherenawumu, mo‑mukööwa o Ghariraaya. Orosiko ro Riikane, aghasöha mo‑risinaghooghi, aghasëëma kweghi abhaato. 32Ameeghi ghaache, ghakabharoghoori chwee, gho kubha ngaare no obhotoro.
33Ibheere mo‑risinaghooghi riyo, naare‑mu omooto uno are no omusambu. Omusambu uyo, oghakuura kwo riiraka ikoro, okabhugha, 34“Oo Yesu o Nasareeti, neke okwënda ghokwito! Kana, wichiri ghotosireekereri? Nekweche niiye we, iye n‑Omutööbhiyu o Ryobha onyi!”
35Yesu akawohiinya omusambu uyo akabhugha, “Okiri omonu waacho! Omoru omooto uno!” Hayo hayo, omusambu uyo okamoghwishi omooto uyo haase, ambërë e bhaato bhayo bhoose. Okamara okamoru otamunyahaariri hohoose.
36Abhaato bhoose, bhakahagha chwee, bhakabhoorani, “N‑ngʼana ke ino? Koru emisambu, omooto uno naghoghihatëka kwo bhotoro na changuru, naghyo gheru!” 37Ibheere, amangʼana ghaache, ghaghasancha chwee mo‑bhyaro bhiyo bhyose.
Yesu ˆakabhahöri abhaato bhaaru
(Mataayo 8:14–17; Maariko 1:29–34)
38Yesu hano aruure mo‑risinaghooghi, aghasöha o‑Simiyooni.#4:38 Simiyooni n‑eriina erende re Bheetero. Mööhi Ruuka 6:14. Nawe nyinabhiyaara Simiyooni, naare aghööturu ne ekihëënö kihaari chwee. Bhakamusabha Yesu amuhöri.
39Ibheere akiimeerera haghuhe nawe, aghakehiinya ekihëënö kiyo. Hayo hayo akahöra, akabhooka aghasëëma kobhahökëri.
40Eriibhagha riyo eryobha ndeere reeghaye ghosikera. Mbaare‑ho abhaato bhano ꞉bhaare na abhabhabharu bhaabho, bhakamurëëtëra Yesu, abhabhabharu bhano ꞉bhaare na amashaagha haghare haghare. Yesu aghatoora amabhökö ghaache kwo mooto woose, akabhahöri. 41Wiiki, Yesu akahëëbha emisambu mo‑bhaato bhaaru, gheghakuura gherabhugha, “Iye n‑Omoona o Ryobha onyi!” Ibheere Yesu aghaghehiinya na ghoghirëki ghetasiikëra wiiki gho kubha emisambu ghiyo ꞉ngiimënyiri kubha niwe Kirisito.
Yesu ˆakeeghi abhaato Ghariraaya
(Maariko 1:35–39)
42Atabhoori yaache hano bhookiire, Yesu akaru hayo, aghaye ahaghiro hano abhaato bhataanyi. Obhoyo bho bhaato bhaakabha bharamutabhara, hano bhamobhwine, bhakëënda komurëki ataru hayo. 43Amare, Yesu akabhabhoorera, “Nekwëndëru neghi mo‑bhyaro ebhende wiiki, ghusanchi Angʼana Anchömu e bhutëmi bho Ryobha, gho kubha, ghayo nigho ghaghëriri neghatomu.”
44Niho, Yesu aghaye gho kohetera mo‑mukööwa o Ghariraaya, arasanchi angʼana e Ryobha mo‑masinaghooghi gha iyo.
S'ha seleccionat:
Ruuka 4: ntk
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2022 Wycliffe Bible Translators, Inc. All rights reserved