युहन्ना छ्येःकी परीचय
छ्येःकी परीचय
चु ज्यबे सम्तर् येसुइ डब युहन्नाचे ब्रीबल य्हीन्ब। युहन्ना येसुचे म्होइजेत्पे डब मुबल (युहन्ना १३:२३; २१:२०)। होत्तज्यीम् थेचे येसुइ थुः ज्यनले गोज्यीम् चु ज्यबे सम्तर्री य्हक्को ङ्हच्छ्यङ् बीचारतेङ् तम्मा ब्रीबल मुब। येसुनो पर्मेस्वर्की ज ओसेम् थेङ्चे पीत्युजेत्प पङ्ज्यीम् प्रतीज्ञा स्य्हेङ्जेत्पे मुक्तीदाता य्हीन्ब। चु ज्यबे सम्तर् खेत्पलमाचे येसुतनो मुक्तीदाता पङ्ज्यीम् बीस्वास् स्य्हेङ्खइ ओसेम् हुजु बीस्वास् ग्यम्से थेङ्यीमाचे जीवन् यङ्खइ पङ्ज्यीम् चु ज्यबे सम्तर् ब्रीबल य्हीन्ब (२०:३१)। युहन्नाचे चु ज्यबे सम्तर् इस्बी सम्बत् ७०-९० गुङ्री ब्रीबल य्हीन्ब बी य्हक्को र्हङ्ब बाइबल्की बीद्वान्माचे पङ्बल मुब।
पर्मेस्वर्की फ्रोइतेङ् येसु गीनो य्हीन्ब पङ्ज्यीम् युहन्नाचे चु छ्ये तीप्पल मुब। ओसेम् येसुनो पर्मेस्वर्की जतेङ् पर्मेस्वर्चे पीत्युजेत्प पङ्ज्यीम् प्रतीज्ञा स्य्हेङ्जेत्पे मुक्तीदाता य्हीन्ब बी चु ज्यबे सम्तर्की ङोन्ग्यम्की अध्ययकी अचम्मइ लक्मा ग्यम्से ज्यनले ङोन्ब। हुजु लीप्चे येसुचे लोप्जेत्पे फ्रोइमाकी बारेरी ब्रीबल मुब। ओसेम् डेत् डेत् म्हीमाचे येसुत बीस्वास् लज्यीम् थेङ्की डब तज्यी, तर ल्हो-ल्हो डेत्चेम् थेङ्त बीस्वास् अस्य्हेङ् पङ्बे तम्माएनो चु छ्येःकी ङोन्ग्यम्की अध्ययमाचे ङोन्ब। ओसेम् तेह्र अध्यय य्हङ्से सत्र अध्यय न्हङ्री येसुतेङ् डबमाचे थेङ् चुङ्स्येकी ङ्येसेरी स्य्हेङ्जेत्पे सङ्गतीतेङ् थेङ् क्रुस्री स्यीब बीम ङोन्ग्यम् डबमात आर् न्हङ्बे फ्रोइमाकी बारेरी ब्रीबल मुब। ओसेम् लीक्यम्की अध्ययमारी येसुत चुङ्बल, थेङ्त छोत्च्याबल, क्रुस्री स्यीजेत्पल, दोज्यीम् स्यीब ग्यम्से सोजेत्पल, ओसेम् थेङ् र्हङ्की डबमाज म्रङ्खजेत्पे तम्की बारेरी ब्रीबल मुब।
खेमेएनो अबेबे जीवन्मी ख्रीस्ट् ग्यम्से यङ्ब। येसुत ग्यम्, देमेन् ओसेम् जीवन् य्हीन्ब बी बीस्वास् लज्यीम् थेङ्ज खबलमाचे चु जीवन यङ्ब। चु ज्यबे सम्तर्री युहन्नाचे आत्माइ तम् गोनलबरी ङ्य्हङ्त तोःबे स्हेमा यी, ग्येङ्, य्हल्, गोर्तेन्, ग्यु ओसेम् अङ्गुर्की दोङ्बोतेङ् रोरोकी तम्मा ग्यम्से जम्मचेनो गोनले अर्तमारी स्येत्पल मुब।
चु छ्येःन्हङ् मुबे तम्मा
भुमीका १:१-१८
बप्तीस्मा पीन्बे युहन्नातेङ् येसुइ डबमा १:१९-५१
येसुचे जम्मचे म्रङ्नले स्य्हेङ्जेत्पे लक् २:१-१२:५०
येसु यरुसलेम्की कोरोरो स्य्हुजेत्पे ज्युःकी दीन्मा १३:१-१९:४२
येसु स्यीब ग्यम्से सोजेत्पल ओसेम् म्रङ्खजेत्पल २०:१-३१
थेङ् गालील्री म्रङ्खजेत्पल २१:१-२५
S'ha seleccionat:
युहन्ना छ्येःकी परीचय: WTDG
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2024 (Active), Wycliffe Bible Translators, Inc. All rights reserved.