Genesis 1
1
Epilli ya ophatusiwa
1Vawaambawaamba Mulluku aaphatusa oddullu ni ellapo yavatthi.#1.1 Vawaambawaamba…yavatthi: apaalle Mulluku aambilleeye ophatusa ellapo yooddullu ni yavatthi. 2Ellapo yavatthi kheyaari ni erive ello. Nave epiphi yaakhuneella enyanja yoowallamella navettho Munepa a Mulluku#1.2 Munepa a Mulluku: apaalle masiva a Mulluku apaalle ephevo yoovenyera wa Mulluku apaalle ephevo yoottikhiniha. aaneeteeta vaddullu va maaddaayo. 3#2 Ako 4.6Vano Mulluku aallota wi, “Owale” nave waawala. 4Nave Mulluku ahoona wi owalanko waari waphaama. Vaavo Mulluku aahiyaniha owala ni epiphi. 5Mulluku aaromolla owalanko “Otthaana” navettho epiphiiyo aayiromolla “Mahiiyu”. Nave waakhalla misikuwa navettho waakhalla ohinase, nllapo nawaamba.
6 #
2 Pet 3.5
Vano Mulluku aallota wi, “Vikhalle yoohiyaniha maaddi wi maaddaayo ekawaneye mapuro meelli” 7nave nndda ddaheereya. Sika Mulluku aaphatusa yoohiyaniha maaddi, waahiyaniha maaddaayo wi amodda ekhalla vatthi va yoohiyaniheeyo amoddaayo vaddullu viwa. 8Yoohiyaniheeyo aayiromolla “Oddullu”. Nave waakhalla misikuwa navettho waakhalla ohinase, nllapo naneepiilli.
9Vano Mulluku aallota wi, “Maaddi a vatthaalla etthukumane vamodda wi mutunda okhallevo,” nave nndda ddaheereyella mwemmo. 10Mutundooyo aawuromolla “Ellapo” nave maaddi ootthukumanaayo ahaaromolla “Enyanja.” Nave Mulluku ahoona wi nndda ddaari ddaphaama. 11Sika Mulluku aallota wi, “Ellapo ekhalle ni ddoomella ddoohiyanahiyana ddookhalla ni mmiddo navettho miteekho dda ezipaso ddookhalla ni mmiddo moollikana ni mitundu ddiwa.” Nave nndda ddaheereyella mwemmo. 12Sika ellapo yaakhalla ni ddoomella ddoohiyanahiyana ddookhalla ni mmiddo ni miteekho dda ezipaso ddookhalla ni mmiddo moollikana ni mitundu ddiwa. Mulluku ahoona wi nndda ddaari ddaphaama. 13Nave waakhalla misikuwa navettho waakhalla ohinase, nllapo naneeraru.
14Vano Mulluku aallota wi, “Oddullu okhalle ddoomolleella wi ddihiyaniheke otthaana ni mahiiyu navettho wi ddikhalle ezizindikiro dda enthawi, Ehakallallo dda Mallapello.#1.14 Ehakallallo dda Mallapello: apaalle enthawi. 15Nave ddoomolleellanndda ddikhalle oddullu wi ddimolleelleke ellapo yavatthi.” Nave nndda ddaheereyella mwemmo. 16Vano Mulluku aaphatusa yoomolleella yuullupalli, nndduwa wi nilamuleke voomolleellani otthaana. Aaphatusattho yoomolleella eng'onong'ono, mweeri wi olamulelleke voomolleellani mahiiyu. Aaphatusattho etheneeri. 17Mulluku aahiya ddoomolleella oddullu wi ddimolleelleke ellapo yavatthi 18nave wi ddilamulelleke otthaana ni mahiiyu navettho wi ddihiyaniheke omolleella ni epiphi. Nave Mulluku ahoona wi nndda ddaari ddaphaama. 19Nave waakhalla misikuwa navettho waakhalla ohinase, nllapo naneesese.
20Vano Mulluku aallota wi, “Mu enyanja mukhalle ddoophatusiwa ddinchichi ddoohiyanahiyana nave vikhalle epallame ddoovava muddullu.” 21Sika Mulluku aaphatusa ehomba dduullupalli ddamunyanja ni ddoophatusiwa ddimodda ddittheddene ddookhalla m'maaddini, vamoddattho ni epallame ni ddoovava ddimodda ddamitundumitundu. Nave Mulluku ahoona wi nndda ddaari ddaphaama. 22Aaddidalisa voollotani wi, “Muttotthollane wi muddalle munyanja nave epallamettho ddiddalle va ellapo yavatthi.” 23Nave waakhalla misikuwa navettho waakhalla ohinase, nllapo naneetthanu.
24Vano Mulluku aallota wi, “Va ellapo yavatthi vikhalle ddoophatusiwa dda mitundu ddoohiyanahiyana moollikana ni mitundu ddiwa. Vikhalle eziweto, ddawaapadda ni enama ddamuhakani moollikana ni mitundu ddiwa.” Nave nndda ddaheereyella mwemmo. 25Sika Mulluku aaphatusa enama ddamuhakani, eziweto ni ddawaapadda, ddittheddenenndda moollikana ni mitundu ddiwa. Nave Mulluku ahoona wi nndda ddaari ddaphaama.
26 #
1 Ako 11.7
Vano Mulluku aallota wi, “Hankoni nimuphatuse muthu moophwanaphwana ni hiyaano, akhalle wonanko hiyaano. Alamulelleke ddamunyanja, epallame, eziweto, enama ddamuhakani#1.26: Ottaphullella wakhalle omodda wookhalla ni mawu awi eziweto…ddamuhakani; mu Eheberi mookhalla mawu awi eziweto ni ellapo ettheene. ddawaapadda ddittheddene dda va ellapo yavatthi.” 27#Gen 5.1,2; Mat 19.4; Mrk 10.6Sika Mulluku ahaaphatusa athu, mullopwana ni mutthiyana, moophwanaphwana ni olliye. 28Ahaadalisa athwaayo vawaalleellani wi, “Muyarane wi mwaate, muddalle va ellapo yavatthi wi muyilamulelleke. Mulamulelleke va ddamunyanja, epallame ni enama ddittheddene ddinakhalla va ellapo yavatthi.” 29Nave Mulluku aallota wi, “Kohuuvahani ddoomella ddoohiyanahiyana ddookhalla ni mmiddo ni miteekho dda mitundu ddittheddene dda ezipaso ddookhalla ni mmiddo wi mucheke. 30Nave enama ddittheddene ddamuhakani, epallame ni ddawaapadda ddittheddene, kooddivaha munyepu wi ddicheke yooyo,” nave nndda ddaheereyella mwemmo. 31Mulluku aaweeha ddittheddene nnddo addiphatusalleeye nave ahoona wi ddaari ddaphaama wunchichi. Nave waakhalla misikuwa navettho waakhalla ohinase, nllapo naneetthanu ni nimodda.
S'ha seleccionat:
Genesis 1: MW2019
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The Bible in Elhomwe © The Bible Society of Malawi, 2019.