Genese 4
4
Kaina i Abela ila
1Kahara, Adamu areve uva Eva ore leipe, are kai ero ila leipe; are Kaina epai mariape: “Amua araro lahukapaila, ara akore le epai”. 2Are aeka akore aea epape, rare Abela. Abela are va mamoe kiva haela, Kaina va kekele ihaki haela. 3Hoa aea Kaina kekele ve hae uku meru hovea Iehova oropa ve aiaupe. 4Abela kara, areve mamoe mere paraeapo veveke iele meru hovea avaupe. Iehova Abela ve meru ikivere leipe, 5aka, are Kaina ve meru ikivere au leila. Laelave Kaina iki kakare lei oropape hihiri le leipe. 6Iehova Kaina maeape: “A va ikiheaha kai oropape hihiri laleila ehovealeve ha? 7A veveke la leikilava ela aro ikivere lei va ka ha? A veveke leiki aue la leikilava, mai heaha okiape mahaukaia ve aro ikivere leive: a va arero heaorapakive, heroe”.
8Kahara, Kaina akoreheari Abela maria maeape: “Elavaila kaipu arahavakive”. Erealila kaipu arahavape la hoa Kaina Abela huru le hape. 9La hoa Iehova Kaina maeape: “Ave akoreheari Abela lahoa ha?” Are kavale maeape: “Ara ore ka. Are arave akoreheari ve kiva haela ha?” 10Iehova arero maeape: “A va learia laleila ha? Ave akoreheari ve apu ve āra kekele ve leia araro itavave. 11Ma hoa, ave akoreheari la apu, a mai avuhukavaeape la apu avape kekele areve ape ha aro lei haiae laleila. 12A va aireaki kekele ihaki la hoa are aro iele maeakoko avara va ka, a va oaoka lei vivilaki haela leikilai, kai mea oaria meahaiapo naoae veakilai”. 13Kaina Iehova maeape: “Arava haiae ve kavale mehau iele, ara hovea ka. 14Eavi, a va mahau hare araro kekele ve lavakaila, ara ave oropape ve arai ve leikilai, ara va oaoka lei vivilaki haela, meahaiapo naoae veaki haela leikilai: araro la eavaki haela araro harilai”. 15Iehova arero maria maeape: “Laria ka! Haela aea Kaina la harilava, are kavale avakilai, hoa 7 hovea”. Iehova Kaina ve maea ve ihova leipe, arero eavaki haela arero hari ave. 16Kahara, Kaina Iehova ve leia hakurepape; are aeaveape ita rare Noda, Edena ve kauri ukaki.
Kaina ve akoremari ve huhuve
17Kaina areve uva ore leipe, are ero‐ila lei Enoka epape. Are karikara kupe. La karikara are areve akore ve rare itavape, rare Enoka. 18Enoka Irada epape. Irada Mehuiaela epape, Mehuiaela Metusaela epape, kai Metusaela Lameka epape. 19Lameka uavila orahokaila karape, haroapo rare va Ada, aeva haroapo rare va Sila. 20Ada Iabela epape, are va kovo uvi apealula haela kai boromakau kiva haela oaria ve ipi haela leipe. 21Areve akoreheari ve rare va Iubala, are va auli hivi helalula kai puva hohoalula la haela oaria ve ipi vila leipe. 22Sila Tubala‐kaina epape. Are va berasi i auri ila eharu karikivahaelula haela oaria ve ipi haela leipe: Tubala‐kaina ve mareheari ve rare va Naama.
23Lameka areva uavila orahokaila maeaeape: “Ada i Sila ila arave āra iapai; Lameka ve uavila arave oharo auhohi iapaila. Araro lei kakare leipe harokou haela ae ara huru lahila, ehovea are araro koape. 24Kaina ve heaha ve kavale hoa 7 la leikilava, o iele Lameka ve kavale va hoa 77 ila”.
Seta ve akoremari ve huhuve
25Adamu areve uva aeka ore leipe. Are akore epape kai areve rare Seta rare itavape, ehovea are mariape: “Aualari araro akore aea avikiarape, ehovea Abela ve ita avakive, ehovea Kaina arero huru hape”. 26Seta kara akore epape, kai arero rare Enosa rare itavape. La hoa haela Iehova ve rare ve ivaiva leikive ipopeavape.
S'ha seleccionat:
Genese 4: ORO
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Published by the British and Foreign Bible Society 1963-1972