မာကု 16
16
စံဝ်ယေဆု ႎီးယာ်ည်ႇအီမ်းဒေဲႈဒယာ်မ်း
မတဲ ၂၈း၁-၈၊ လုကာ ၂၄း၁-၁၂၊ ယောဟာန် ၂၀း၁-၁၀
1ႎါည်းဘိူန်တာ် ဆငည်းဆတာင်း၊ အီးပဲန့်ကဲကလံက် ကဲစီဇိူဝ်ႈဟာဝ်းလာ် အေဲမ်းပျိုင်းအူႈညျှူး စာနံင်ဟာဝ်းကျည်းတာ် တံင်တိုးချာပ်စံဝ်ယေဆု။ ကဲဒီး စီမိုႈလာ် မာရိတူအီးလှံင်းမာဂဒလ၊ တောႇစံမ့် ဆာလိုင် ကာည်း မာရိ အီးမိုႈမာရာကိုပ်။ 2ဘိူဝ်စာ်မ်းဒေဲႈ အချီုင်လေႈဆာင်ငည်း ခည်ညျှေးဇေဝ်းဇေဝ်း တံင်ဆငည်းတဇူႈဒို့အီး ခေဲင်းပူးဆငည်း၊ ကဲကဲဒီး စီဟာဝ်းဇူး ပါ့်ထံမ်ဖေဝ်း။ 3အီးပဲန့်ကဲဒီး ဇိုကဲဂီဟာဝ်း တောႇအီုန်ဒါ်န်း ကဲလည်ကလာင်းဒါ်ႈလာ် “ဆီနံင် စူန်းဂ္လီင်ႎိူဝ်ႈဒဲႈ မာဝ်းဒါင်း အီးဘိအူန်း ကတဲဝ်းထံမ်ဒီး။” 4ဘိူဝ်တိူဝ်ႈဟာဝ်းကဲ ကဲစီဟည်ယေဲဝ်းလာ် မာဝ်းဒါင်းဒီး ဟည်ဂ္လီင်ႎီုန်အူန်းဟော်ည်ႇ ဒမိုည်ႇကတဲဝ်းထံမ်။ မာဝ်းဒီး ဒါင်းပေါႇအခည်း။ 5ကဲမာ် စီဒေဲႈစာ်မ်းလာ် ပါ့်မိုည်ႇထံမ်ဒီး ဇိုဂီလေဲပ်ဟာဝ်းကဲ ခေဲင်းကတဲဝ်းထံမ်ဖေဝ်းဒီး၊ ကဲဟည်ယေဲဝ်းလာ် တူအီးကရာတ်အူချှေႈ ချှေဲပ်တဆီးလီုည်း အံက်အူန်းညျှာတည်းအေဲႈကဲ။ ဘိူန်ဇေဲန်း အီးပဲန့်ကဲဒီးမာ် ဟည်ကဒိုန်းဟည်ယံဝ်းဒို့။
6အန်းမာ် ကလာင်းဒါ်ႈတာ့်ကဲ “ပဲ ခူကစာႈခူကဒိုန်း၊ ပဲ အာဝ်မိုႈဟီုဝ် အီးဒေဲႈဟြာ်ည်ႇ စံဝ်ယေဆု တူအီးလှံင်းနာဆရဲတ်၊ ပံင်အီးတော်က်ကတံက် ပယာ်မ်းႎီုန်အန်း တံင်ရံင်းတာ်ႇတည်းဒိူဝ်း။ အန်း ဘူဂေါ်ည်းမ ပါ့်နီး။ အန်းဟည် ႎီးယာ်ည်ႇအီမ်းဒေဲႈဟော်ည်ႇ ဒယာ်မ်း။ တိူဝ်ႈဟံင်း ကဆီုဝ်ဒီပ္လေႈအူန်းတာ် တိုးချာပ်အန်းစံဝ်နီး။ 7ပဲမာ် စီဟာဝ်းကလာင်း တာ့်ပေတရုကာည်း တပဲစံဝ်ကဲချှေႈဟည်း ဒါ်ႈ ‘စံဝ်ယေဆု အန်းဟည်ဟာဝ်းနှံက် ပါ့်အရာပ်ဂါလိလဲ လအာည်ႇပဲ။ ပဲ စီနံင်လည်ကညားပါ့်ဒီး ဘာည်းကလာင်းအူန်းအန်းစံဝ် တာ့်ပဲ ခည်အာည်ႇနီး’။”
8အီးပဲန့်ကဲဒီးမာ် စီလည်လေႈဒေဲႈ ပါ်ယံဝ်းပါ်ကဘည်း စီဒဲဝ်းဟာဝ်းလာ် ဒကတဲဝ်းထံမ်ဖေဝ်းဒီး။ ဂေါႇမိုႈ ကဲဟည်ယံဝ်းယာဝ်း၊ တာ့်ချှေႈမှေဲ့မာ် ကဲဘူကလာင်းဒါ်ႈမဆိ။
စံဝ်ယေဆု နှဲဒဲႈတိုးအန်း တာ့်မာရိတူအီးလှံင်းမာဂဒလ
မတဲ ၂၈း၉-၁၀၊ ယောဟာန် ၂၀း၁၁-၁၈
9[ႎါည်းစံဝ်ယေဆု ႎီးယာ်ည်ႇအီမ်းဒေဲႈ ဒယာ်မ်း၊ ခည်ညျှေးဇေဝ်းဇေဝ်း တံင်ဆငည်းတဇူႈဒို့အီး ခေဲင်းပူးဆငည်း၊ အန်းစံဝ် စီဟာဝ်းနှဲလာ်တိုးအန်း တာ့်မာရိတူအီးလှံင်းမာဂဒလ လအာည်ႇဒို့အီး။ အန်းစံဝ် ဟည်ချူႈႎီုန် ကနာ်မ်းဇေဝ် ပူးတိုး တံင်မာရိဒီး ဘိူန်ဒေဲႈအာည်ႇနီး။ 10ဘိူန်ဇေဲန်း မာရိမာ် စီဟာဝ်းကလာင်းနှဲလာ် လော်င်ဒီး တာ့်ကဲအီးတောႇအန်းစံဝ် ကာည်း ကဲအီးဂီနောႈဒဲ့ယာမ်းအူန်းကဲဒီး။ 11ဘည်ဘာည်းမာ်၊ ဘိူဝ်ယေဲဝ်းကဲတာ် တညာဝ်း ဘည်ဘာည်းအန်းစံဝ်ဟည်ယာ်ည်ႇအီမ်းဟော်ည်ႇ ကာည်း ဘည်ဘာည်းကာည်းမာရိဟည်လည်ယေဲဝ်းမာ်၊ ကဲ အာဝ်ညျှေဲမ်မ။
စံဝ်ယေဆု နှဲဒဲႈတိုးအန်း တာ့်ခေဲင်းတပဲအန်းကဲ အယ်ချှေႈ
လုကာ ၂၄း၁၃-၃၅
12ႎါည်းဒီး အန်းစံဝ်မာ် ဒေဲႈနှဲလာ်ဘိုးတိုးအန်း တာ့်ခေဲင်းတပဲအန်းကဲ အယ်ချှေႈ ဇိုယာမ်းဂီဟာဝ်း ကာည်းတာ် ပါ့်အီုန်ဇူႈဘျည်း။ ဘည်ဘာည်းမာ် ခည်ယာမ်းဇေဲန်း အရာင်တိုးအန်းစံဝ် အာဝ်နှေးမအီးပျီမ်း ဟည်ခလာည်းဟာဝ်း ဘာည်းဘိုးအူမျိုး။ 13ဘိူဝ်ႎီးနာ်ႇကာည်းတာ် ဒါ်ႈမိုႈအန်းစံဝ်၊ ကာည်းစီႎီးကလာင်းပေါႇ ဘည်ဘာည်းယေဲဝ်းဒေဲႈကာည်းဒီး တာ့်တပဲကဲချှေႈဟည်း။ ဘည်ဘာည်းမာ် တပဲကဲချှေႈဟည်းကဲဒီး ဆံမ်အာဝ်ညျှေဲမ်မ ပံင်ဒေဲႈကလာင်းကာည်း။
အန်းစံဝ် ဆူည်ႇဒဲႈကဲရေဲန်း ဇီုင်းဒါင်း
မတဲ ၂၈း၁၆-၂၀၊ လုကာ ၂၄း၃၆-၄၉၊ ယောဟာန် ၂၀း၁၉-၂၃၊ စံင်နာင်းစံဝ် ၁း၆-၈
14ႎါည်းဒီး စံဝ်ယေဆု စီဒေဲႈနှဲဘိုးတိုးအန်း တာ့်တပဲအန်းအူကိူဝ်းလေႈအူချှေႈကဲဒီး ဇိုဂီအံက်ဟိုမ်း ကဲတာ် ပိုမ်းမှေဲဝ်း။ ဘိူန်ဇေဲန်း အန်းစံဝ်စီဆူးဒါ်ႈ တာ့်တပဲအန်းကဲဒီး ဂေါႇမိုႈလီုင်ဘူညျှေဲမ်ကဲ ကာည်း လီုင်ကဲကလာင်းဒည်း။ ဆီမ်ဘာည်းဆံမ်ဒါ်ႈလာ်ဘာည်းဇေဲန်း ကဲအာဝ်ညျှေဲမ် ပံင်ဒါ်ႈ အီးဟည်ယေဲဝ်းဒေဲႈ အန်းစံဝ် ႎါည်းအန်းဟည်ယာည်ႇအီမ်းဒေဲႈ ဒယာ်မ်းဒီး။ 15ႎါည်းဒီး စံဝ်ယေဆု စီဒါ်ႈ တာ့်ကဲ “ပဲလည်လေႈဟာဝ်း စီလှယ်လာ်ဟောကလာင်း ခါဝ်ဆတာင်းအီးမှေဲမ်ခိုည်း တာ့်တူအီးတော်န်းချှေႈ တော်န်းဒီတော်န်းဒဲန် ပါ်ကီုင်းကံမ်ဖာနီးနာ်ႏ၊ 16ချှေႈမှေဲ့ ဆာ်ဟည်ညျှေဲမ်အံဝ်း ခံမ်လာည်းဘပ်တိစမ်၊ အန်း စီနံင်ကညားချော်တ်လာည်း ဒပံင်ကလူည်ႇအန်း။ ဘည်ဘာည်းမာ် ချှေႈမှေဲ့ ဆာ်ဘူညျှေဲမ်အံဝ်းခည်း၊ စံဝ်ဖြား စီနံင်ဒဲႈတံမ် တာ့်အန်း။ 17ကဲအီးညျှေဲမ်အံဝ်းကဲဒီးခည်း ကဲနံင်ဘယ်ပေါႇရေဲန်း ပံင်အီးမှေဲမ်အာမ်းစားကဲနီး၊ ကဲဒါးဇီုဝ်အံဝ်း နံင်ဘယ်ပေါႇ ချူႈႎီုန်ကနာ်မ်းဇေဝ်ကဲ၊ နံင်ဆမားဘိုး ကလာင်းကျောႈ အီးတမာည်းဂည်မျိုး။ 18ကဲ ဘည်ကညား စံမ့်ကမ်းဟန်းဟာည်း ဘူဒါ်ႈ၊ ကညားစံမ့်စိုင်း အေဲမ်းအီးမေဲႈကော်င့်ပေန်ယာ်မ်း ဘူဒါ်ႈ နံင်အာဝ်ပေန်မ ဖေးဆိ တာ့်ကဲ။ ဆာ်ကဲတာင်တည်းကဲ တေဲင်းတူအီးဆဲဝ်းမာ်၊ တူအီးဆဲဝ်းကဲဒီး နံင်ဘိူန်းဒို့ ႎီးဂေါ်ည်းချမ်ဆာဟာဝ်းပေါႇဟာ့်။”
စံဝ်ယေဆု ဟိုက်ဟာဝ်း ပါ့်ပ္လါ်န်း
လုကာ ၂၄း၅၀-၅၃၊ စံင်နာင်းစံဝ် ၁း၉-၁၁
19ႎါည်းစံဝ်ကညျားယေဆု ကလာင်းဟော်ည်ႇ တာ့်တပဲအန်းကဲ၊ အန်းစီကညားလာ် လာည်းဟိုက်ဟာဝ်း ပါ့်ပ္လါ်န်း၊ စီအံက်လာ် ညျှာတည်းအေဲႈ ဒီဇိုက်ဖိုက်အူန်း စံဝ်ဖြားဟာ့်။ 20တပဲအန်းစံဝ်ကဲမာ် စီလည်လေႈဟာဝ်း လှယ်လာ်ဟောကလာင်း လော်င်ခါဝ်ဆတာင်းမှေဲမ်ခိုည်း တော်န်းဒီတော်န်းဒဲန်။ အီးမိုႈစံဝ်ကညျားမာ် စီကဇော်ည်ဒဲႈတာ့်ကဲ၊ ကျောႈတြား ပံင်ဟောကလာင်းဟာဝ်းကဲမာ် နှာင်းကံပ်မိုႈကံပ်မှာန်၊ အန်းစံဝ် စီဒဲႈတာန်ခိုးတာ့်ကဲ နှာင်းကဲဘယ်ရေဲန်း ပံင်အီးမှေဲမ်အာမ်း။]#၁၆:၉-၂၀ တီင်ဘေဲႇကျာမ်းအီးပျီမ်းမာင်ကလံက် အာဝ်တောႇမဘ္လာ်က်နီး။
S'ha seleccionat:
မာကု 16: RMT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© (Active), Wycliffe Bible Translators, Inc. All rights reserved.