Nugana 8
8
‘UPWA 8.
1Ta Eaubada Noa ‘i nua‘i‘isina, iage maiawasina iauna ta, lagolagowa iauna waga ‘ena si miami ma‘enao ta: ta Eaubada iagila ‘i bubuna be bare‘u ‘ena ‘i da toa, ta boasi si mwa‘umwa‘uta; 2ni‘u wate wewerupwana ta garewa ‘ana ‘awa ‘i egibodena, ta ‘usana garewega ‘i gumwara; 3ta boasi si ‘ila‘ila bare‘uia: ta ni‘atu asiata ‘e wani anaredi ta pipiti si gumwara ga boasi si mwa‘uta. 4Ta waga nawarae ‘e sebeni nina ‘enega ‘i toa, nawarae nina ‘ana asiata ‘e sebenitini nina, Ararata ‘oeana ‘edia. 5Ta boasi si mwa‘umwa‘uta ga nawarae ‘e teni nina: nawarae ‘e teni nina ‘enega, nawarae nina ‘ana asiata ‘e bweuna ‘enega, ‘oea debadi si apwesa. 6Ta asiata ‘e poti si gumwara ga gete ‘i apwesa, Noa waga ni‘atu ‘i bubuna ‘ana ‘awa debanega ‘i gigegena: 7ta kaokao ‘e bweu ‘i etunena, ga ‘i pili dadana, ga boasi si iapaiapasa bare‘uia. 8Ta bunebune ‘e bweu ‘enega ‘i etunena, be ‘i da ‘ita nai boasi bwa‘a matanaia si mwa‘umwa‘uta; 9ta bunebune ‘aeiapaiapana ‘ina ‘ebeiasa nigea ‘i lobaloba, ga waga ‘ena i ‘ita, boasi bare‘u maibo‘ana matanaia si miami: ta nimana ‘i iasitoto, ga i ‘ewena, ta ‘ena ‘i me‘ena waga ‘enaia. 10Ta ‘i miami ga wate asiata ‘e sebeni; ta wate bunebune ‘i etunena wagega; 11ta bunebune asunuanuaia ‘i ruguma; ta, wa ‘ita, ‘awanaia olibe iawana gitagina: ta ‘enega Noa ‘i mwaratonina ni‘atu boasi si mwa‘umwa‘uta bare‘uia. 12Ta ‘i miami wate asiata ‘e sebeni; ta bunebune ‘i etunena; ga nigea wate i ‘ila‘ilama ‘enaia. 13Ta iakwara ‘e sikisi anaredi ta wani nina gete ‘i apwesa, nawarae ‘e bweuna ‘enega, nawarae nina ‘ana asiata ‘e bweuna, boasi si iapasa bare‘uia: ta Noa waga ‘ana ‘auboda i‘elo‘ewena, ta i ‘ita, ta, wa ‘ita, bwa‘a matana ni‘atu ‘i iapasa. 14Ta nawarae ‘e ruena ‘enega, nawarae nina ‘ana asiata ‘e tweniti sebeni nina ‘enega, bare‘u ni‘atu ‘i iapasa.
15Ta Eaubada Noa ‘ena ‘i ona, ‘i gwae, 16Wagega ‘u da apwesa, ‘oio, mwaneio be, natumuao me ‘olotodi be, natumuao mwanediao be ma‘emuao. 17Iage maiawasidi iauna ma‘emuao wa miamiana esio iauiauna ‘ediega ‘u da ‘au‘ewa apwesedima ma‘emuao, manua ta, lagolagowa ta, iage lookawaridi iauna bare‘uia si kawakawara ta; be ‘enega si da susaila sinabwana bare‘uia, ta si da losiwa, ta si da eiau bare‘uia. 18Ta Noa ‘i apwesa, natunao me‘olotodi be, mwanena be, natunao mwanediao be, ma‘enao: 19bomitawa iauna, iage lookawaridi iauna, manua iauna ta, to‘ase nai ‘i tautauia bare‘uia, ‘idi susu nadigega, wagega si apwesa. 20Ta Noa ‘ebetaria i ‘abina Ieoba ‘ena; ta bomitawa ‘esasena iauna, ta manua ‘esasena iauna, ‘ediega i ‘ewedi, ta ‘ebwaeadaita gabugabuna i ‘ebwaea ‘ebetaria ‘enaia. 21Ta Ieoba maina dibidibina ‘i muina; ta Ieoba ‘atenega ‘i ona, gea‘abo wate bwa‘a ia da elialima tai manuna, tai ‘atena ‘ina nuanua ‘i to‘umalina ‘ina tubuauunuiega ta ‘enega; ta gea‘abo wate iage maiawasina iauna ia da unuunu lima na‘ieana ni‘atu ia guinuena. 22Tuta ‘enega bare‘u ‘i miami, ‘ebedauna ta ‘ebesesoi, gogai be iaiiai ta, nawarae iaiiai be nawarae gogai ta, asiata be boiboi ta, gea‘abo si da gumwagumwara.
S'ha seleccionat:
Nugana 8: DOBOT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Published by the British and Foreign Bible Society in 1919