Mark 13
13
Jisue Kerüsuokiu Kaketuo Pukeshü
(Mat 24:1-2; Luk 21:5-6)
1Süsie puo rüsuoki nunu parzhü tse, puoe pethakelieko mia puo sie puo ki, “Harie, kepethau, ketsieko mu kiko kide zha shi!” 2Sitse Jisu sie puo ki, “No ki kezha hako ngu tha mo? Ketsie hako biemewa di ketsie puo bu rei kemhosepfü zhülie lho.”
Mha Kebvükecü mu Kepechü Vorketuo
(Mat 24:3-14; Luk 21:7-19)
3Süsie puo vo rüsuokiu kepetsoutsa Oliv Kijüthou gei balie tse Pitor, Jakob, Johan mu Andria uko pekhre vor puo ki, 4“Kedikechükipuo mha hako chütatuo shi, mu mha hako pete chütaketuo la zasi kedipuo pekieshütuo shi, hie ki pucie.” 5Sitse Jisu uko ki, “Miapuorei bu nie se zeta molieketuo la nie kirei terülie. 6Mia kekra a za se vor di, ‘A süu zowe!’ idi mia kekra se zetatuo. 7Siro nieko terhüko mu terhü kechü dze diekrie sishü ro, nie nou kehoukeruo chüta hiecie, hako chü molie lho, derei süu puotei thelau moluo. 8Kekreilamonyü seyie puoe seyie kekrei puo ze kegeituo, mu kedi puoe kedi puo ze keperhietuo; süki lukihaki kiükishütuo; pekrie vortuo. Hako nuonuovachü therieko zo.
9“Siro nieko rei nie kireiliecie; kekreilamonyü mia nieko tepie mechükehouko nu shütuo; mu sinagogko nunu nie vütuo; siro ahngko mu kediko mhodzünu zhapu chüshüketuo la nieko a la süko mhodzünu rei thatuo. 10Derei dieliekeviu se seyie pete ki pushüwa rietuo. 11Siro nieko merhashü ze dienyaki nu kevo ki nie kedipuo putuo shicü lepie nie nou kemezhie hiecie, derei puoteiu vor tse nie bu die punukeshüko pie pu zoliecie, kekreilamonyü nie puketuo dieko nie die monyü Kemesa Ruopfü kinu vortuo. 12Siezedzürie thuo huoniehuo teshüpie kesia nu shütuo, mu miapuonuoko rei u nuonuo gei sükemhie chütuo, tsiu mianuonuoko rei u krünuoko ngumvü di mia bu süko dukhrituo; 13siro a la themia pete bu nie ngumecütuo. Derei hie zo tha thela tsokelieu kelalietuo.
Kemezhie Phiketuo
(Mat 24:15-28; Luk 21:20-24)
14“Sirei nieko mha va perhu sekecü kemecü chü zokecüu tha zhü kemonu ketha ngukelie ki (kephrümia bu süu lelie) süki Judia nu kebako bu ta kijüthouko gei votalie; 15mu ki tsüle gei kebau bu la ke hie, morei puo ki nunu mhapuorei chülietuoü la le hie; 16siro lie nu ketuou bu puo pfhe chütuoü la vo hie. 17Süki thenumia nuonipfü ketuoko mu u nuonuo nuyakezhako we kemezhie phituo! 18Mha hako bu teisei ki chüta molieketuo la chaliecie. 19Kekreilamonyü süki kemezhietuo, Ukepenuopfü kijüu chülie tse nunu vor tsie ketso kemezhiekecü süthede chü kemo mu thiesie mhakipuorei silie kelho chü vor zotuo. 20Siro Niepuu thuo teisozha süko chü pedzüshü motuo ücüwe, miapuorei kelalie lho; derei puoe puo thuo kedakelieko la, teisozha süko chü pedzüwate. 21Mu sükisü kehoupuorei nie ki, ‘Harie, Khrista haki ba,’ morei ‘Lere-i, puo luki ba!’ isi rei pele hiecie. 22Kekreilamonyü ketho kemo Khrista mu ketijü siedzekesiko sier di zasiko mu u ngoko chüpie mia pekie di chülie kevi sie kedakelieko rei setuo. 23Derei nie pfheüla balie; a pedzü mha peteko pie nie ki pushüwate ho!
Themia Nuou Vorketuo
(Mat 24:29-31; Luk 21:25-28)
24“Derei kemezhiekecü teisozha süko sie,
niaki zeitatuo,
tsiu khrü zieshü motatuo,
25mu teigei nu themvüko rürietatuo,
tsiu teigei ketuo kekuoko shü keniewatuo.
26Süsie ukoe ‘Themia Nuou kimhou geinu’ kekuo kezha se zapuzayie chü di kevor ngutuo. 27Süsie puo dielieko ketseshü di kijü kela nunu vo tei kela ketso mu teikhrie diako nunu puoe kedakelieko kie kengulietuo.
Chiedebo-u geinu Kepetha Die
(Mat 24:32-35; Luk 21:29-33)
28“Siro chiedebo-u geinu kepetha dieu siliecie: puo co medzü lale di puonyü kesa the kepar ki teiletietakecü nieko silieya. 29Sütuoi mha hako chüketa ki nieko puoe penuoketa, kikha ki thaketa siliecie. 30A nieko ki pu toushütuo, mha hako pete chüwa kemochie thephou hau jütalie lho. 31Tei mu kijü jütatuo, derei a dieko we jütalie lho.
Miapuorei Si kemo Teisozha mu Bavüdo-u
(Mat 24:36-44)
32“Sirei teisozha morei bavüdo süu Puou zo kemosie miapuorei, teigeidielieko morei Nuou rei si mo. 33Nie kireilie, pfheüla balie;#13:33 Leshü kewe huo nu mu cha balie icü sa. kedikechükipuo puotei süu vortuo shicü si kemo la. 34Süusü mia puoe puo ki khapie puo kituoko tsüshü mu mhatho u thetse kha u tsüshü mu kikha kepfheu bu rei pfheüla balienushü di rüveketa mhie zo. 35Süla nieko pfheüla ba zoliecie, kekreilamonyü nieko rei ki niepuu thevatie tuo mo khisoteiluo tuo mo, thevü kekhou ki tuo mo, khise tuo shi: puo kevor tei si kemo la, 36moro puo mhai vor nie zezhü di ngulie rei silie kelho la. 37Siro a nieko ki pu ketha hau themia pete ki pu tha zo: Pfheüla baliecie.”
S'ha seleccionat:
Mark 13: ANBRBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The Bible Society of India
© 2023, Used by permission. All rights reserved. More