लुका 10
10
येसु सुम कुरि ते चात्यागेलाइहेङ दिङगिल्हि
1कालाउ न्हुसो प्रभु येसु सुम कुरि ते झना आरु चात्यागेलाइहेङ छाल्हि, कालाउ वा इम्बालाइहेङ न्हेमि न्हेमिपा पातेङ ताइमि जेदोङ सहर कालाउ देरा भारि हानिलि खाङघाखे इन्ताङ दिङगिल्हि। 2कालाउ येसु इम्बालाइहेङ दोअ्हि, “जेसाङ मिलिङगेलाइता हेन्जा बालि हि, एन्साङ दोङ हेन्जा द्याङगेलाइ हि जाइ परमेस्वरको बचन हिङलि मन पाखे। कालाउ परमेस्वरको सासनको बारेता दोअ्लि द्याङगेलाइ आतुइसा हि। प्रभु सेकाको गिह्रि, वासेहेङ प्रार्थाना पाअ्, कालाउ सेका जोम्पालि हेन्जा खेतालागेलाइ दिङगिल प्यावा।” 3हानेसु का नेलाइहेङ स्याइलेको माझाता भेडाको मेसाको पान्ठा भाइपा दिङगिल्लाङका। 4ताका, झोला, जुत्ता हाइ बुङ दोफाङ माचुम्पुसु, दामाता हानिलाउ द्याङगेलाइहेङ मासेउपासु।
5जेदोङ साअ्ता दुल्लि खान्तेङ लाम्फा दोअ्सु! इदोइ साअ्हेङ सान्ति ज्याको। 6जेसापा सान्तिप्रिय द्याङ इन्ता हिहे पानु नेलाइको सान्ति वाको दोफा ह्यावा। जेसापा इन्ता सान्तिप्रिय द्याङ मान्थुहेपानु नेलाइको सान्ति नेलाइ दोफाङ घुरितेङ लावा। 7सान्तिको साअ्ता योम द्याङगेलाइ जेदोङ चाका-आम्का पिखे चाअ्, हाइपालिपानु एमि खेताला ताइको कामको ज्याला निङलि योग्यको हि, भेनेङ साअ्ता हिलि लाम्फाको साअ् मालासु।
8जेसापा नेलाइ सहरता हानिस्वाना कालाउ द्याङगेलाइ इन्ता स्वागत पाहे पानु, इम्बालाइ जेदोङ चाका-आम्का पिखे चाअ्सु। 9इन्ताको थामेगेलाइको मासाधेकालाइहेङ एल्पासु, कालाउ इम्बालाइहेङ दोअ्सु, परमेस्वरको सासन चेम्ताङ लोका हि। 10जेलाउ हिदोइ बुङ सहरता, हानिलाउ कालाउ द्याङगेलाइ नेलाइहेङ स्वागत मापाहेपानु, सहरको कुन्हाँ-कुन्हाँता हानेसु कालाउ दोअ्सु। 11केलाइ नेलाइको सहरको धुलासुधाङ नेलाइको बिरोधता केलाइको खोकोइको धुला ह्रिकाङ, कालाउ थाहा गिसु कि परमेस्वरको सासन चेम्ताङ लोका हि। 12का नेलाइहेङ दोअ्खा, न्यायको दिना इङको सहरता द्याङगेलाइको बेथा सोदोम सहरको द्याङगेलाइको खान्तेङ झन सहिलि मादोअ्का जेनावा।
13हे कोराजिन सहर कालाउ बेथसेदा देराको द्याङगेलाइ, नेलाइहेङ परमेस्वर हेन्जा साजाइ प्याङ! नेलाइको माझाता का जेदोङ सरबुङसाइका कामगेलाइ पाका हिघाखा, इङको काम टुरोस कालाउ सिदोन सहरता पाअ्कानु इन्ताको द्याङगेलाइ लाम्फा दोङ पाप पाका लाअ्का तिङपालि बोराको लोखोन होङतेङ कालाउ बुसिरि उधावा। 14न्यायको दिनाता टुरोस कालाउ सिदोन सहरको द्याङगेलाइको बेथा खान्तेङ नेलाइको आबास्था झन सोहिलि मादोका जेनावा। 15ए कर्फनहुम सहरको द्याङगेलाइ, हाइ नेलाइ सोचिसुखेना स्वर्गता साम्मानित जेङस्वाना माको नेलाइ साम्मानित माजेङस्वाना नाअ् नरकता हुलाना।
16जाइ नेलाइको काथा हिङखे, वा काङको काथा हिङखे, जाइ नेलाइहेङ मन्दा माताखे कालाउ उङको कासेहेङ बुङ मन्दा माताखे। जाइ कासेहेङ मामानिखे वा कासेहेङ दिङगिल्काहेङ बुङ मामानिखे।
17जेलाउ उङको सुम कुरि ते चात्यागेलाइ घुरितेङ लोहि, इम्बालाइ मेनाङ लेङचाहि। इम्बालाइ दोअ्हि, हे प्रभु जेलाउ नाङको मिङता केलाइ आग्या पिनान्हि भुत-आत्मागेलाइ बुङ केलाइको आग्या किहि।
18येसु इम्बालाइहेङ दोअ्हि, का साइतानहेङ आचानाक स्वर्गसो बिजुलि भाइपाङ हुल्का तिङघा। 19खाङसु, का नेलाइहेङ पुय्याँगेलाइ कालाउ चिम्ताङगेलाइ याङलि खाबारा पिका हिघा। का नेलाइहेङ सतुरुगेलाइको (साइतान) गोताङ सरबुङ ह्रुता खाबारा पिका हिघा, कालाउ हासु बुङ नेलाइहेङ हान्ति पालि माद्वावा। 20कालाउ इङको भुत-आत्मागेलाइ नेलाइको आग्याहेङ किखे दोअ्तेङ नेलाइ माहाउसाइलि, भरु नेलाइको मिङ स्वर्गता लेखेका हि दोअ्तेङ नेलाइ लेङचासु।
21एन्सालाउ दोङ येसु पबित्तरो आत्माको आनन्दोहोइ पोङघातेङ दोअ्हि, हे आबा परमेस्वर स्वर्ग कालाउ प्रिथिबिको प्रभु, का नासेहेङ धन्यबाद पिखा, हाइपालिपानु बुद्दिमान कालाउ बाठा द्याङगेलाइसो म्होनातेङ ताअ्का काथा साधारन द्याङगेलाइहेङ बुझाइ पिका हिना। एइ आबा इसिका पालि नासेहेङ मन जेङहि।
22काङको आबा कासेहेङ गोताङ आनेमानेको जिम्मा पिका हि। आबा बाहेक चानहेङ हासु बुङ मानाल्खे कालाउ चान बाहेक आबाहेङ हासु बुङ मानाल्खे। कालाउ चान दोङ नाल्पालि खाङकालाइहेङ चाहि आबाहेङ नाल्खे।
23कालाउ न्हुसो येसु एक्लाङ ताइको चात्यागेलाइ दोफा हिघाहि, वा इम्बालाइ भारि घुरितेङ दोअ्हि, नेलाइ धन्यको हिसुन्हा जेदोङ नेलाइ मिसियाँहोइ तिङसुखेना। 24हाइपालिपानु का नेलाइहेङ दोअ्खा, नेलाइ तिङका काथा हेन्जाङ परमेस्वरको बक्तागेलाइ, कालाउ राजागेलाइ खाङलि मन पाघाखे, कालाउ बुङ मातिङहि, कालाउ इम्बालाइ हिङका काथा हिङलि खाङघाखे, कालाउ बुङ माहिङहि।
रेम्का सामारिको बारेता निङपिका
25एनि येसु द्याङगेलाइहेङ सिक्स्या पिघाखे कालाउ एमि व्यवस्था धिरपाका द्याङ येसुहेङ जाचिलिको भाअ्सिङ बिचार पाहि कालाउ वा दोअ्हि, “हे गुरु ज्यु, परमेस्वरसो का आनान्त जिबन निङलिको भाअ्सिङ हाइ पालि गोयाङ?”
26येसु वासेहेङ दोअ्हि, मोसाको व्यवस्थाता लेखेका नाअ् हेसा बुझिखेना?
27उङको द्याङ दोअ्हि, नाअ् परमप्रभु नाङको परमेस्वरहेङ ताइको गोताङ ह्रदयहोइ, गोताङ प्रानहोइ, गोताङ सरबुङहोइ कालाउ गोताङ बिबेकहोइ प्रेम पालि गोइखे। कालाउ नाअ् बुङ ताइमिहेङ भाइपाङ देरागेलाइहेङ प्रेम पालि गोइखे।
28येसु उङको द्याङहेङ दोअ्हि, नाङको दोअ्का ठिक हि। ओदोङ भाअ्सिङ एन्साङ पाअ् कालाउ नाअ् आनान्त जिबन निनाना।
29उङको द्याङ ताइमिहेङ ठिक तिङपालि येसुहेङ दोअ्हि, कुनु उङको देरागेलाइ हासु जाइहेङ का प्रेम पालि गोइखे?
30वाको जोबाफता येसु एनोङ निङपितेङ दोअ्हि, एमि द्याङ यरुसेलेम सहरसो यरिहो सहर हानिघाखे आधिमि दामाता डाकुगेलाइ वासेहेङ गोहोराइहि कालाउ इम्बालाइ वाको लोखोन धाबा गोताङ चुम्पुहि कालाउ नाङघाइ पातेङ दानाइहि कालाउ आधामारा पातेङ लाअ्हि। 31आसा न्हुसो एमि यहुदि पुजारि इङकोङ दामा पातेङ हानिघाखे कालाउ उङको आधामाराका द्याङहेङ तिङतेङ वा मासाघाइसिङ भेन्चाकाइतेङ हानिहि। 32एन्साङ पातेङ एमि लेबि बुङ मुन्दिरता काम पाका पुजारि ओदोङ दामा पातेङ लोघाखे उङको आधामाराका द्याङहेङ दुरेसोङ तिङतेङ मासाघाइसिङ भेनेङ दामा भेन्चाकाइतेङ हानिहि। 33एमि द्याङ सामारिया प्रदेससो ओदोङ दामा पाहा हानिघाखे, उङको आधामाराका द्याङ हिका थामेता लोहि, कालाउ वासेहेङ तिङतेङ वाको मन दायाहोइ पोङघाहि। 34वा आधामाराका द्याङको भेरपा हानिहि, कालाउ जैतुनको चुइति कालाउ दाखरस लागाइतेङ वाको पेचाराता पट्टि जिङपिहि। कालाउ वा उङको द्याङहेङ ताइको गाधाता लादाइतेङ एनोङ पाटि पौवाता चुम्पुहि, कालाउ ताइमिङ झेम्पाङ वासेहेङ सामाराइहि। 35कालाउ न्हु दिना उङको सामारि न्हेनोङ चान्दिको थुरि पाटि पौवाको ग्रिहिहेङ पितेङ दोअ्हि, यासेहेङ रेम्फा सामाराइपि, कालाउ याको भाअ्सिङ आरोङ हेन्जा खर्च जेङनु का घुरितेङ लोलाउ नासेहेङ तिरि प्याङका।
36कालाउ येसु वासेहेङ दोअ्हि, इदोइ सुमि मध्येता हिदोइ चाहि डाकु पाहासो आधामारापाङ दान्हाइका द्याङहेङ हासु चाहि देरागेलाइ भाइपा दाया पाहि?
37वा दोअ्हि जाइ वासेहेङ दाया हि, कालाउ येसु दोअ्हि, नाअ् बुङ हाने कालाउ एन्साङ पाअ्।
मार्था कालाउ मरियमको साअ्ता
38जेलाउ प्रभु येसु कालाउ वाको चात्यागेलाइ हानिकाताङ पालाउ एनोङ देराता थुकाहि। जेलाउ इम्बालाइ इन्ता थुकाहि मार्था मिङ पाका एमि बेबाल वासेहेङ ताइको साअ्ता स्वागत पाहि। 39मार्थाको एनोङ मरियम मिङ पाका बेजान ओने हिघाहि, मरियम येसुको खोकोइ भेरपा योमतेङ वाको दोअ्का सिक्स्या हिङतेङ हिघाहि। 40कालाउ मार्था उम गाअ्का कामता आल्झितेङ हिघाहि, हेन्जा काम पालि गोइनाङ मार्था हानितेङ येसुहेङ दोअ्हि, हे प्रभु! गोताङ काम का दोङ पालि गोइखे। वा चाहि हाइ दोङ मापाखे, हाइ नाअ् मातिङखेना? वासेहेङ दोअ्पि ल्होतेङ काम पालि साघाइयाको।
41कालाउ प्रभु येसु वासेहेङ जोबाफ पिहि, मार्था-मार्था, नाअ् हेन्जा काथाता चिन्ता कालाउ फिकिरि पाखेना। 42कालाउ एनोङ काथा चाहि महत्व पुर्न हि, जेदोङ मरियम साल्का हि, इङको वाकोसो बुङ माघिनावा।
S'ha seleccionat:
लुका 10: DHINT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Dhimal New Testament, by The Love Fellowship is licensed under Creative Commons Attribution-ShareAlike 4.0 License.