लुका 7:7-9

ओदोङ भाअ्सिङ का ताइमिङ बुङ नाङको दोफा मान इज्‍जत भाइपा हानिलि सोबाइका मान्थुघा, नाअ् आग्या खिनिङ पि काङको चाकारिया एलावा। इदोइ का गिखा कि हाइपालिपानु का बुङ बार्का आधिकारिगेलाइको खाबाराता हिघा। कालाउ काङको खाबाराता सिपालाइ हि। का एमिहेङ हाने दोअ्खा कालाउ वा हानिखे, कालाउ भेनेङहेङ लौउ दोनु कालाउ वा लोखे। काङको चाकारियाहेङ एसा पाअ्‌ दोअ्खा कालाउ वा पाखे। जेलाउ इङको काथा हिङहि, येसु आवाइ तुअ्हि, कालाउ ताइको दोफा लोकालाइहेङ घुरितेङ दोअ्हि, जातिङ भारि का नेलाइहेङ दोअ्खा का इसिका इस्राएल सारभिता बुङ इदोइ झोको बार्का खाङधुरि तिङका मान्थुघा जेदोङ इदोइ गैर-यहुदिकोता हि।