लुका 7
7
कप्तानको खाङधुरि
(मति 8:5-13)
1जेलाउ येसु ताइको गोताङ काथा द्याङगेलाइहेङ हिङपालि दोतेङ वा कर्फनहुम सहरता हानिहि। 2कर्फनहुम सहरता एमि कप्तान हिघाहि वाको एमि मायारु बान्धाइति मासाधितेङ सिलिना हिलि जेङका हिघाहि। 3जेलाउ येसुको बारेता वा हिङहि, कालाउ वाको बान्धाइतिहेङ एल्पा प्याको दोअ्तेङ कप्तान मुलि यहुदिगेलाइको आगुवागेलाइहेङ बिन्ति पालि दिङगिल्हि। 4उङको द्याङगेलाइ येसुकोता हानिहि, कालाउ उङको कप्तानहेङ साघाइपि दोअ्तेङ सेउपाहि कालाउ दोअ्हि उङको कप्तान नाङको साघाइका निङलि जातिङ भारि योग्यको हि।” 5वा केलाइको द्याङगेलाइहेङ प्रेम पाखे कालाउ केलाइको भाअ्सिङ चाउघारा साअ् बुङ धाम्पिका हि। 6येसु उङको द्याङगेलाइ दोफा हानिहि, वा साअ् थुकालि दुरे दोङ हिलाउ कप्तान ताइको सानाइतिगेलाइहेङ वाको दोफा एसा दोअ्लि दोअ्तेङ सेउपालि दिङगिल्हि, हे प्रभु, नाअ् काङको साअ्ता लोलि दुख मापापि नाअ् भाइका द्याङहेङ काङको साअ्ता खोकोइ टेकि पालि सोबाइका का मान्थुघा। 7ओदोङ भाअ्सिङ का ताइमिङ बुङ नाङको दोफा मान इज्जत भाइपा हानिलि सोबाइका मान्थुघा, नाअ् आग्या खिनिङ पि काङको चाकारिया एलावा। 8इदोइ का गिखा कि हाइपालिपानु का बुङ बार्का आधिकारिगेलाइको खाबाराता हिघा। कालाउ काङको खाबाराता सिपालाइ हि। का एमिहेङ हाने दोअ्खा कालाउ वा हानिखे, कालाउ भेनेङहेङ लौउ दोनु कालाउ वा लोखे। काङको चाकारियाहेङ एसा पाअ् दोअ्खा कालाउ वा पाखे।
9जेलाउ इङको काथा हिङहि, येसु आवाइ तुअ्हि, कालाउ ताइको दोफा लोकालाइहेङ घुरितेङ दोअ्हि, जातिङ भारि का नेलाइहेङ दोअ्खा का इसिका इस्राएल सारभिता बुङ इदोइ झोको बार्का खाङधुरि तिङका मान्थुघा जेदोङ इदोइ गैर-यहुदिकोता हि। 10येसुहेङ काइलि हानिका झाराङ द्याङगेलाइ साअ् भारि घुरिहि, इम्बालाइ उङको बान्धाइतिहेङ एल्लि दोका निङहि।
के सिकाको चान सिन्हुहि
11कालाउ न्हु दिना येसु नाइन दोअ्का नगर हानिहि, वाको चात्यागेलाइ कालाउ हेन्जा द्याङगेलाइको जेर वाको दोफाङ हानितेङ हिघाहि। 12जेलाउ येसु सहरको फिनु भेरपा थुकाहि, वा सिका द्याङको चानचाउलिहेङ चुम्पुकाताङ पाका तिङहि। उङको सिका वाजान चाहि एमि के सिका बेबालको एमि खिनिङ चान हिघाहि, उङको बेबाल दोफा मालामि हानिकालाइ सहरको हेन्जा द्याङगेलाइ हिघाहि। 13जेलाउ प्रभु येसु उङको के सिका बेबालहेङ तिङहि, येसु दायाहोइ पोङघातेङ कालाउ वासेहेङ दोअ्हि माखार।
14येसु चानचाउलिको भेरपा थुकाहि कालाउ चानचाउलिहेङ साइहि, सिका वाजानहेङ चुम्पुतेङ हानिका मालामिगेलाइ थिङगापा जाअ्हि, वा उङको सिका वाजानहेङ दोअ्हि, ओइ वाजान, का नासेहेङ दोअ्खा ल्हो। 15कालाउ एन्सालाउ दोङ उङको सिका वाजान ल्होतेङ योम्हि कालाउ काथा दोअ्लि तेङहि, येसु उङको वाजानहेङ वाको आमाइकोता सुम्पिपिहि।
16झाराङ द्याङगेलाइ भारभुसाइहि कालाउ एसा दोअ्काताङ परमेस्वरको बाखिन पाहि, एमि माहान परमेस्वरको बक्ता केलाइको माझाता लोका हि। कालाउ ओबालाइ बुङ दोअ्दोङघाखे, परमेस्वर ताइको प्रजागेलाइहेङ साघाइलि लोका हि। 17येसुको बिसोइता इदोइ सुसमाचार सारा यहुदिया जिल्ला कालाउ इन्ताको भेरपाङ प्रदेसता बुङ चार-चाराइहि।
युहान्ना येसुको बारेता काथा बुझिलि दिङगिल्हि
(मति 11:2-19)
18युहान्नाको चात्यागेलाइ इदोइ गोताङ कामगेलाइको बिसोइता वासेहेङ दोअ्पिहि, युहान्ना ताइको चात्यागेलाइ माझासो न्हेमि चात्याहेङ काइहि। 19युहान्ना ताइको चात्यागेलाइ माझासो न्हेमिहेङ प्रभु येसु दोफा हिअ्लि दिङगिल्हि, एमि जाइ लोलि खाङका हिघाहि, उङको नाअ् दोङ हिना कि? माकुनु आरोङ भेनेङहेङ दोङ ह्रुम्लि गोयाङ कि?
20कालाउ न्हुसो द्याङगेलाइ येसुकोता लोहि, इम्बालाइ दोअ्हि। बप्तिस्ता पिका युहान्ना केलाइहेङ इदोइ हिअ्लि नाङकोता दिङगिल्हि, हाइ लोलि खाङका नाअ् दोङ हिना कि? माकुनुते केलाइ आरोङ भेनेङ दामा खाङलि गोइका हि?
21ओदोङ बेला येसु हेन्जा द्याङगेलाइहेङ इम्बालाइको मिसा एल्पा पिहि कालाउ इम्बालाइसो भुत-आत्मा लाअ्पापिहि, वा हेन्जा कान्हाँ द्याङगेलाइहेङ बुङ मिसियाँ तिङपालि दोपाका बानाइहि। 22येसु युहान्नाको चात्यागेलाइहेङ जोबाफ पिहि, हानेसु जेदोङ हिङका कालाउ तिङका काथागेलाइ दोअ्सु। कान्हाँगेलाइ तिङदोङखे, बैरागेलाइ हिङदोङखे, कालाउ रोग्या खोअ्कालाइ एल्दोङखे। सिकालाइ आरोङ सिन्हुतेङ ल्होदोङखे, लेङग्रागेलाइ तेदोङखे, कालाउ गरिब द्याङगेलाइहेङ प्राचार पादोङखे। 23जेसापा हिदोइ बुङ द्याङ कासेहेङ साङखा मापाखे उङको धन्यको हि।
24कालाउ न्हुसो युहान्नाको चात्यागेलाइ हानिलि दोतेङ येसु द्याङगेलाइहेङ युहान्नाको बारेता काथा दोअ्लि तेङहि, नेलाइ चाका-मान्दा थामेता हाइ खाङलि हानिसुना? हाइ भेरमाहोइ हेङगालाइन्हाका निगालोहेङ? माको इङको खाङलि हानेका। 25माकुनु नेलाइ हाइ खाङलि हानेसुना कुनु? माको हाइ जाङका धाबा होङका द्याङगेलाइहेङ? जाङका-जाङका धाबा होङका कालाउ मोज मज्जाता हिका द्याङगेलाइते राजाको दरबारता कि हिखे। 26एन्सा माकुनु हाइ खाङलि नेलाइ बाहार ओल्लेसुना ह? हाइ एमि परमेस्वरको बक्ताहेङ खाङलि हानिसुन्हा? कालाउ का नेलाइहेङ दोअ्खा, नेलाइ युहान्नाहेङ तिङसुन्हा जाइ एमि परमेस्वरको बक्ता खान्तेङ माहान हि। 27युहान्ना जाइको बिसोइता इसिका लेखेका हि,
खाङसु, का काङको बानाल चुम्पुका नाङको लाङ-लाङ दिङगिल्लाङका,
जाइ नाङको दामा तियार पावा।
28का नेलाइहेङ दोअ्खा, प्रिथिबिता जोलोम जेङका गोताङ द्याङगेलाइ खान्तेङ युहान्ना माहान हि। जाइ परमेस्वरको सासनता म्हुइका हि, कालाउ बुङ वा खान्तेङ माहान हि।
29जेलाउ इम्बालाइ येसुको सिक्स्या हिङहि, गोताङ द्याङगेलाइ इता थेकापा, कि पोत ल्होपाकालाइ बुङ घोसाना पाहि, कि परमेस्वर धर्मि हिका हि हाइपालिपानु इम्बालाइ युहान्नासो बप्तिस्ता ह्रुहि। 30कालाउ बुङ फारिसिगेलाइ कालाउ व्यवस्था धिरपाका द्याङगेलाइ परमेस्वरको योजनागेलाइ हाइ दोङ काम मालागिका थानितेङ युहान्नासो बप्तिस्ता माह्रुहि।
31एलाको द्याङगेलाइहेङ का हासु दोफा तुलाना पालि? इम्बालाइते हाते-बाजारता योम्तेङ हिका जामाललाइ भाइका खिनिङ हि, जाइ दोङ एमिसो भेनेङगेलाइको बारेता काथा पोखे। 32केलाइ नेलाइको भाअ्सिङ बासुरि धुइपान्हाहि, कालाउ बुङ नेलाइ मान्हासुन्हा केलाइ मन आउलिका ले, लेन्हाहि कालाउ बुङ नेलाइ माखारसुन्हा। 33बप्तिस्ता पिका युहान्ना लोहि, दाखरस माआम्का कालाउ हेन्जा जोसो बारितेङ हिका कालाउ नेलाइ दोअ्सुखेना, यासिहेङ भुत-आत्मा धेल्का हि। 34का द्याङको चान बुङ आदेरमादेरका द्याङगेलाइ भाइपा चागिल्घा आमगिल्घा कालाउ नेलाइ कासेहेङ जिहुका, म्हाका पोत ल्होपाकालाइको कालाउ पापिगेलाइको सानाइति दोअ्तेङ दुसि सुखेना। 35कालाउ बिबेक नेलाइको सान्तानसो सत्ये साबित जेनावा।
येसु सिमोनको साअ्ता हानिहि
36फारिसिगेलाइ मध्येसो एमि येसुहेङ चालि काइहि, कालाउ वा फारिसिको साअ्ता हानिहि कालाउ चालि योम्हि। 37इङको सहरता एमि मारेम्का जिबन जियाइका बेजान हिघाहि, वा येसुहेङ फारिसिको साअ्ता चालि लोका हि दोअ्तेङ हिङहि, कालाउ वा एनोङ सिङगमरमरको बोतलता मेनाङ जाङका आत्तर चुम्तेङ लोहि। 38उङको बेजान येसुको न्हु पाहा जाअ्तेङ खारकाताङ येसुको खोकोइहेङ मितिहोइ भिजाइलि तेङहि, कालाउ ताइको पुसुङहोइ मोकाताङ वाको खोकोइता चुमाइतेङ कालाउ वाको खोकोइता आत्तर मलिपिहि।
39येसुहेङ नेउता पाका फारिसि इङको तिङतेङ मन मनता एसा दोअ्लि तेङहि, जेसापा येसु परमेस्वरको बक्ता हिनुते वासेहेङ साइका बेलाल हासु कालाउ हाइखालको बेजान दोअ्तेङ वा गिधावा, हाइपालिपानु इदोइ ते पापिनि बेजान कि वा।
40येसु वाको बिचार गितेङ फारिसिहेङ दोअ्हि, ओइ सिमोन, नासेहेङ हाइ दोङ दोअ्लि हि। वा दोअ्हि, गुरु ज्यु।
41जेलाउ येसु इदोइ निङपिका दोअ्हि, इन्ता न्हेमि द्याङ हिघाहि, न्हेमि दोङ एनोङ दोङ गिह्रिको रिन ह्रुका हिघाहि, एमि नासाइ चान्दिको थुरि, कालाउ भेनेङ चाहि न्हे कुरि तेताका चान्दिको थुरि ह्रुका हिघाहि। 42इम्बालाइकोता हेन्जा ताका मान्थुघाखे, ओदोङ भाअ्सिङ इम्बालाइ ताइको रिन चुक्ता पालि मादोहि। कालाउ गिह्रि ओबालाइ न्हेमिकोङ रिनमिन्हा पापिहि, उङको न्हेमि मध्येसो हासु चाहि उङको गिह्रिहेङ हेन्जा मायारु पाघाखे वाला?
43सिमोन दोअ्हि, काङको बिचारता जाइ हेन्जा स्यामा निङका हिघाहि वा दोङ वासेहेङ हेन्जा मायारु पाघाखे वाला। कालाउ येसु सिमोनहेङ दोअ्हि, नाङको काथा ठिक हि। 44कालाउ न्हुसो वा उङको बेजान भारि घुरितेङ सिमोनहेङ दोअ्हि, नाअ् उङको बेजानहेङ तिङन्हा? जेलाउ का नाङको साअ्ता लोघा, नाअ् केलाइको मुन्धुम आन्सार काङको खोकोइ झालि चि बुङ मापिन्हा। कालाउ वाते काङको खोकोइगेलाइ वाको मितिहोइ भिझाइतेङ कालाउ ताइको पुसुङहोइ योपिहि। 45नाअ् मुन्धुम आन्सार कासेहेङ माचुमाइन्हा, कालाउ वाते का लोकासोङ काङको खोकोइता चुमाइ चालि लाअ्का मान्थु। 46नाअ् काङको पुरिङता चुइति मामोपिन्हा, कालाउ वाते काङको खोकोइता मेनाङ जाङका आत्तरहोइ मोपिहि। 47ओदोङ भाअ्सिङ का नेलाइहेङ दोअ्खा कि उङको बेबालको हेन्जा पापगेलाइ स्यामा जेङका हि, एसापा गिखे कि वा हेन्जा प्रेम तिङपाहि जाइहेङ आधे पाप स्यामा पापिखे वा आतुइसा मायारु बाखाराइखे।
48कालाउ न्हुसो येसु उङको बेजानहेङ दोअ्हि, नाङको पापगेलाइ स्यामा जेङका हि।
49चालि योमकालाइ ता-ताइमिता दोअ्लि तेङहि, इदोइ द्याङ हासुको पाप स्यामा पाका? हाइपालिपानु परमेस्वर खिनिङ पाप स्यामा पालि दोअ्खे।
50येसु उङको बेजानहेङ दोअ्हि, परमेस्वर नासेहेङ बान्चिपाहि हाइपालिपानु नाअ् का ह्रुता खाङधुरि पान्हा, सान्तिसो सिता हाने।
S'ha seleccionat:
लुका 7: DHINT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Dhimal New Testament, by The Love Fellowship is licensed under Creative Commons Attribution-ShareAlike 4.0 License.