Lukas 21
21
Janda kasiang kasi kolekta
21:1-4
(Markus 12:41-44)
1Waktu Yesus masi ada di orang Yahudi pung Tampa Sombayang Pusat pung kintal tu, Antua lia orang-orang kaya kasi maso dong pung kepeng kolekta dalang peti derma. 2Antua jua lia janda kasiang satu kasi maso kepeng gobang dua. Kepeng tu pung nilai paleng kacil. 3La Antua bilang kata, “Dengar bae-bae tagal apa yang Beta bilang ni batul! Janda kasiang tu kasi labe banya dari samua orang yang kasi kepeng dalang peti derma tu. 4Barang, dong samua kasi dari dong pung labe, mar janda tu kasi dari dia pung kurang. Apa yang dia pung par hidop hari-hari, dia su kasi akang samua-samua.”
Tampa Sombayang Pusat nanti ancor
21:5-6
(Matius 24:1-2; Markus 13:1-2)
5Satu kali bagini, Yesus pung murid-murid puji-puji Tampa Sombayang Pusat pung bagus, tagal akang dapa biking dari batu-batu yang bagus-bagus deng dapa hias deng barang-barang yang orang kasi par Allah. Mar Yesus bilang par dong kata, 6“Samua yang kamong ada lia ni, satu waktu nanti, seng ada satu batu lai yang tinggal tasusung di atas batu yang laeng. Samua nanti rata deng tana.”
Hari-hari susa deng sangsara
21:7-19
(Matius 24:3-14; Markus 13:3-13)
7La Yesus pung murid-murid tanya Antua kata, “Tuang Guru e, apa tempo yang Tuang Guru baru bilang tadi tu jadi? La kalo mau jadi, akang pung tanda apa?”
8La Antua jawab dong kata, “Kamong musti jaga diri bae-bae, jang sampe kamong dapa parlente. Barang, nanti ada banya orang datang pake Beta pung nama la bilang, ‘Beta ni Orang yang Allah su Angka par kasi Salamat manusia!’ Ada lai yang bilang, ‘Dunya su mau kiamat!’ Mar jang iko dong! 9La kalo kamong dengar kata ada kaco basar ka prang, jang taku. Barang, samua tu musti jadi do, mar itu balong waktu par dunya ni kiamat.”
10Tarus, Antua bilang par dong kata, “Nanti bangsa satu baku prang deng bangsa laeng, la karajaang satu baku prang deng karajaang laeng. 11Nanti jua ada tana goyang basar-basar di banya tampa deng susa makanang, deng panyaki yang bajangke nanti marajalela. La orang nanti lia tanda-tanda yang hebat paskali di langit yang biking dong pung bulu badang badiri.
12Mar orang nanti tangkap la siksa kamong, baru samua tu jadi. Dong nanti bawa kamong ka orang Yahudi pung tampa-tampa sombayang par sidang kamong la kasi maso kamong dalang bui. La tagal kamong iko Beta, kamong nanti dapa bawa ka muka raja-raja deng gubernur-gubernur. 13Mar, itu tu waktu yang bae par kamong par kasi tau Kabar Bae soal Beta par dong. 14Jadi, kamong musti kasi kuat hati biar jang kamong balisa kamuka soal bagemana mau bela diri. 15Barang, Beta sandiri nanti biking kamong pung pikirang tajang sampe kamong bisa jawab kamong pung musu-musu samua. La seng ada satu lai dari dong yang bisa malawang ka jawab kamong.#Lukas 12:11-12 16Kamong pung mama-papa, ade-kaka, basudara, deng tamang-tamang nanti kasi kamong par kamong pung musu-musu la saparu dari kamong nanti dapa bunu. 17Samua orang nanti binci kamong tagal kamong iko Beta. 18Mar jang taku. Barang, biar kata dong bisa bunu kamong pung badang, dong seng bisa kasi pisa kamong dari Beta.#21:18 Dong seng bisa kasi pisa kamong dari Beta: Teks bahasa Yunani bilang, “kamong pung rambu saurat jua seng bisa gugur”. Ada saparu yang pikir kalo akang pung arti tu Allah nanti jaga orang parcaya pung badang la dong seng dapa apapa, mar yang laeng pikir kata orang parcaya nanti mati, mar dong pung jiwa nanti maso sorga. 19Kalo kamong batahang tarus par parcaya Beta, kamong nanti hidop tarus-tarus deng Beta.”
Yerusalem nanti ancor
21:20-24
(Matius 24:15-21; Markus 13:14-19)
20Tarus, Yesus bilang lai par Antua pung murid-murid kata, “Nanti, kalo kamong lia tantara-tantara su kurung kota Yerusalem ni, kamong musti tau kalo seng lama lai kota ni su mau ancor. 21Kalo sampe itu su jadi, orang-orang di propinsi Yudea ni musti lari ka gunung-gunung. Orang-orang yang tinggal di kota ni musti lari kaluar dari kota la orang-orang yang tinggal di kampong, jang maso ka kota ni lai. 22Barang, hari itu tu, hari par Allah hukum orang-orang Yerusalem yang seng dengar-dengarang Antua, sama deng samua yang su tatulis dalang Antua pung Tulisang.#Hosea 9:7 23Sio kasiang! Waktu itu jadi, parampuang-parampuang yang ada deng badang deng mama-mama yang masi kasi susu ana nanti paleng sangsara paskali. Samua orang di tana Israel nanti susa deng sangsara paskali, tagal Allah mau hukum dong samua. 24Waktu itu, saparu orang nanti dapa bunu deng parang deng saparu orang nanti dapa bawa ka sagala bangsa di dunya par dapa tahang. Bangsa-bangsa yang seng kanal Allah nanti datang inja-inja kota Yerusalem ni la parenta akang sampe waktu yang Allah su kasi par dong tu abis.”
Tanda-tanda kalo Yesus su mau bale kombali ka dunya
21:25-33
(Matius 24:29-35; Markus 13:24-31)
25Tarus Yesus bale bilang lai, “Kalo Beta Orang yang Datang dari Allah ni su mau bale kombali ka dunya, nanti ada akang pung tanda-tanda yang orang bisa lia di matahari, bulang, deng bintang-bintang. La di dunya, bangsa-bangsa nanti takotang deng pung hati balisa tagal omba basar di lautang pung babunyi.#Yesaya 13:10; Yeheskel 32:7; Yoel 2:31; Yohanis Dapa Tanda 6:12-13 26Kuasa-kuasa di langit#21:26 Waktu orang Yahudi dolo-dolo bilang kuasa-kuasa di langit, itu bisa pung arti apa sa yang kasi kaluar sinar di langit, roh-roh jahat, ka bangsa-bangsa yang nanti dapa hukum dari Allah. nanti talamburang sampe orang-orang smaput tagal taku apa yang mau jadi par dunya ni. 27Waktu itu, orang-orang nanti lia Beta Ana Manusia ni datang dalang awang. Beta datang deng Beta pung kuasa dalang sinar yang manyala tarang paskali.#Danyel 7:13; Yohanis Dapa Tanda 1:7 28Waktu samua tu su mulai jadi, kamong musti parcaya deng kasi kuat hati, tagal seng lama lai Allah su mau kasi salamat kamong.”
29La Yesus bale bilang ande-ande satu lai par Antua pung murid-murid kata, “Coba lia pohong ara, ka pohong apa sa. 30Waktu kamong lia akang pung jaga-jaga su mulai batunas, kamong tau sandiri kalo musing panas su dekat. 31Bagitu lai kalo kamong lia tanda-tanda yang Beta bilang tadi tu jadi, kamong tau kalo waktu par Allah pegang parenta jadi Raja tu su dekat.
32Dengar bae-bae tagal apa yang Beta bilang ni batul! Dari samua orang yang hidop jamang sakarang ni, ada yang balong mati waktu samua tu jadi. 33Langit deng dunya nanti ancor, mar Beta pung kata-kata tetap ada tarus-tarus!”
Jaga diri bae-bae sampe Yesus bale kombali ka dunya
21:34-38
34La Yesus bilang par Antua pung murid-murid lai kata, “Jaga diri bae-bae. Jang kamong maniso par biking pesta, ka minong-mabo, ka talalu pikirang deng kamong pung hidop hari-hari, sampe seng pusing soal Beta lai. Kalo kamong biking macang bagitu, waktu Beta bale kombali ka dunya, kamong takajo macang deng binatang yang kana dodeso. 35Barang, waktu Beta bale kombali, seng ada satu orang lai di dunya yang bisa sambunyi dari Beta. 36Jadi, kamong musti jaga diri bae-bae tarus. Sombayang biar kamong kuat waktu samua tu jadi. Deng bagitu, waktu Beta Ana Manusia ni bale kombali ka dunya, kamong seng malu ka takotang par baku dapa deng Beta.”
37Sabang hari, Yesus pi kasi balajar di orang Yahudi pung Tampa Sombayang Pusat pung kintal. Mar sabang malang, Antua kaluar dari kota Yerusalem la pi tidor di gunung Saitun. 38La pagi-pagi paskali orang banya jaga pi ka Tampa Sombayang Pusat par dengar Antua pung ajarang.#Lukas 19:47
S'ha seleccionat:
Lukas 21: ABMA
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2022, Sinode Gereja Protestan Maluku