Mataio 5
5
5. NA PAKANA.
1Ba i bobo diat a kum tara‐na‐kaiya, i wan toto na te u ra tagai: ma ba i ki a nuna tara‐na‐wa‐wera diat wan korom i: 2ma i wera diat lenkumi,
3Diat dan diat ba i bakuru a niodiat: kuma a nudiat a matanitu i ra maua. 4Diat dan diat ba diat tagtagi: kuma din wamarip diat. 5Diat dan diat a kum tenakomonopa: kura ut a nudiat a wanua. 6Diat dan diat ba diat molo ma diat maruk kai kup a petoduru: kuru ut din mauru. 7Diat dan diat a kum tenamaramari: kuma din mari diat bulug. 8Diat dan diat ba a niodiat i maramarek: kura ut diat a boboi Nara. 9Diat dan diat a kum tenawamalmal: kura din watugi u diat lena, A kum na tun Nara diat. 10Diat dan diat ba di a pet‐na‐bilbil u diat u ra petoduru: kuma a nudiat a matanitu i ra maua. 11Muat dan ba di uli akaka muat, ma pet‐na‐bilbil un muat, ma piri ururian un muat, ba welok ku, un iau. 12Muat kaia, muat a maig akit; kuma i gala a numuat wedok i tana u ra maua: kuma di a pet‐na‐bilbil lenkuma bulug u diat a kum parofita diat muka muat.
13A masima u ra vuravura muat: ba panaiai ko ra masima a mapakina din pet‐a‐mapak lelawai baletpai? pa i ka balet ma un ta lig ma di og‐a‐paritai na taman, ma ra tara di papinamai. 14A kapakapa u ra vuravura muat. Ba ta taman i tana u ra tagai, di kana burugbati. 15Pa in wakup a lamp ma pakitai na tudag i ra pupua na padi, u ra tuntunurina ku; ma i kapakapa u diat rap diat ki na ruma. 16Len kai kuma muat a wakumala a numuat kapakapa, na ra matadiat a tara, ba diat a boboi kon muat a wakwakak na makiramuat, ma diat a pira walauai uni a Tamamuat i ki u ra maua.
17Koniku muat kanapi lena iau wan urin lena ag warapua a wewadu ma ra wawera a nu ra kum parofita: iau pa iau wan urin ba ag warapuai, ba ag pet‐a‐wewaotpai ku. 18Kuma iau piri ligtatuna ta muat, Kura in panaiai a lagit ma ra vuravura kai, ma pa in panai ra kinalik na matan a buk ko ra wewapua, ba ra kinalik na wakilagina, un ta bug na wanua kuma din pet‐a‐wewaotpai uni a lig rap. 19Ia ba i pet‐a‐mampa ra pakan wewadu kumi, ba kinalik akit, ma i wera diat a tara lenkuma, din watugi un i lena. I kinalik akit u ra matanitu i ra maua: ia bulug ba i taram uni ma i wawera uni, din watugi un i lena, I gala u ra matanitu i ra maua. 20Kuma iau piri ta muat, Ba a numuat petoduru pa i awakak akit u ra petoduru a nudiat a kum tenatimtimu, ma ra kum te Faresaio, muat kana ruk u ra matanitu i ra maua.
21Muat a walogorotai lena, di a piri ta diat a tara mukamuka lenkumi, Koniku umdokopa te; ma ia ba i umdokopa te din kămkămiak na maruna u ra mata‐ra‐nakokon: 22Iau kai iau piri ta muat lenkumi, Ba te i kămkămiak korom tenalik, kura din kămkămiak na maruna u ra mata‐ra‐nakokon; ia bulug ba in watugi korom tenalik. Raka, kura din kămkămiak na maruna u ra gala na mata‐ra‐nakokon; ma ia ba i piri lena, A loglog ui, kura din kămkămiak na maruna u Kiena a ugan i kup iai.
23Kuma ba u tui kubai a num wetabara na ra kiuai‐na‐wetu, ma u kodopoi uni ta lig a kakum i lig ui uni, 24un paki a num wetabara na mata ra kiuai‐na‐wetu, un wan, muru wemanan mun ma ra kakum, ma un wan balet urin, Un tui marakam a num wetabara. 25Muru wemanan ma ut ma ia ba i takun ui, ba muru weuru mai u ra akapi; kaduk ia ba i takun ui in ben ui korom a tenanakokon, ma ra tenanakokon in taramwerua ui korom a tenawarua, ma din warukta ui u ra ruma na boboto, 26Iau piri ligtatuna tam, Pa un wan taka yai, ba pa u kele waraptai mun a măni.
27Muat a walogorotai ba di piri lenkumi. Koniku pet na tinauru. 28Iau kai, iau piri ta muat lena, Ia ba i bobo a tebuan ma i lig ma ut na maruna, i a pet na tinaurupa mun u ra balana. 29Ma ba a win a waot na matam i pet‐a‐rara ui, Un wili, ma un og‐igenuai kon ui: kuma i ka korom ui ba i mat ra pakan a panim ku, ma koniku din og a panpanim rap u Kiena. 30Ba a waot na limam i pet‐a‐rara ui un pokokutuai ma un og‐igenuai kon ui: kuma i ka korom ui ba in mat ra pakan a panim ku ma koniku din og a panpanim rap u Kiena.
31Di a piri kai lena, Ia ba i petpukua a nuna tebuan, awakak ba in tari tana ta buk na petpukuai: 32Iau kai, iau piri ta muat, Ba a tebuan pa i pet na tinauru ma ra nuna muana i petpukua i ku, i pam‐kabinpai lena a tenapetna‐tinauru ia: ma ia ba diara taula ma te kuma di a petpukua i, ia bulug i toka pet na tinauru.
33Muat a walogorotai kai lena, di a piri ta diat a tara mukamuka lenkumi, Koniku waruwaruka u ra welimăn, un tari ta ra Tadaru a lig kuma u welimăn uni: 34Iau kai, iau piri ta muat, Koniku muat welimăn: koniku watugi uni a maua, kuma a kinkini a nun Nara kuma: 35koniku watug a vuravura, kuma a turuturu na kakina ia: koniku watug uni Ierusalem, kuma a taman a nu ra gala na Tui ia. 36Koniku welimăn ma watug uni a lorim, kuma u kana pam ta win a weu na lorim ba in ko, ba in marut. 37Awakak ba in lenkumi a numuat pirapira, Iu, iu; Pate, pate: kuma ba ta lig bulug i gala un ia kumi, ko ra kabi‐na‐akaina lig ia.
38Muat a walogorotai ba di piri lenkumi, Din kele ra matadi kup ra matadi, ma ra lokodi kup ra lokodi. 39Iau kai, iau piri ta muat, lena, Koniku muat balu a petakakai: ma ba te i tibulta ui u ra papara waot na pakpakum na wam, un pukui korom i ra papara bulug. 40Ba te i ligna wan‐na‐ga tam in rakanpai kon ui a num mulina malu, un tari tana kai a num tutuvi. 41Ba te i lig‐lurāpa ui lena muru weuru ma i rā maile, un wan ugai ma i ta ruadi ma. 42Un tari ku tan te i arig ta lig kon ui, ma koniku tapuku kon te i ligna arig‐liman ui.
43Muat a walogorotai ba di piri lenkumi, Un mari a tepam, ma un tebua akaka a num iabara: 44Iau kai, iau piri ta muat, Muat mari diat a numuat kum iabara, muat arig kup diat diat pet‐na‐bilbil un muat: 45ba a kum na tu ra Tamamuat uni muat, ia ba i ki u ra maua: kuma i wairok pat a nuna make korom diat a kum akakaina tara ma ra kum kokoina tara, ma i tarua a bata korom diat a kum tenapetoduru, korom diat kai a kum tenapetakakai. 46Ba muat mari diat ku diat mari muat, awa ta wedok muat paki uni? pa diat pet lenkuma duk a kum telona? 47Ba muat wewatai ma diat a kum tepamuat ku, awa muat pam‐a‐wak‐wakakpai un ta tara bulug? A Tara‐igen pa diat pet lenkuma duk? 48Kuma muat pet kokoina muat, lenkuma i koina akit a Tamamuat i ki u ra maua.
S'ha seleccionat:
Mataio 5: RAI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Published by the British and Foreign Bible Society in 1896.