Mataio 9
9
9. A PAKANA.
1Ma i ka u ra tampag, ma i karot u ra papara ma i wan u ra nuna taman. 2Ma boboi, di lotai korom i rā muana, a paralutiko ia, ma i inep u ra bana: ma Iesu ba i bobo a nudiat nuru, i piri ta ra muana a paralutiko lena, Na tuglik, un manatug; di unuai a num petakakai. 3Ma boboi, ta magan a kum tenatimtimu diat nukpai u ra baladiat lena, A muana bi i pira‐ululi un Nara. 4Ma Iesu i nunura a nuknukidiat, ma i piri lena, Lelawai kuma muat nukakakai u ra balamuat? 5O oi na pa diara kumi i ka, ba di piri lena Di unuai a num petakakai; ba di piri lenkumi, Un turu, un wan ma? 6Ma muat a nunurai uni lena na Tu ra muana i una larapa a petakakai u vuravura (i piri ta ra muana a paralutiko), Un turu, un rak‐anua a bam, un wan u ra num ruma. 7Ma i turu ma ut, ma i wan u ra nuna ruma. 8Ma ra tara‐na‐kaiya, ba diat boboi, diat burut, ma diat pira‐walaua Nara, kuma i tari a dekdek lenkumi korom diat a tara.
9Ba Iesu i wan taka iai, i bobo rā muana, a yana Mataio, ba i ki u ra ruma‐na‐telo: ma i piri tana, un patap un iau. Ma i turu ma ut, ma i patap un i.
10Ma ba i ki na winagan u ra ruma, boboi mogoro na telona ma ra kum tenapetakakai diat wan korom i, ma diat ki ugai ma Iesu ma ra nuna tara na wawera. 11Ba diat a kum te Faresaio diat boboi, diat piri ta diat a nuna tara na wawera lena, Lelawai a numuat Tenawawera i wagan ugai ma diat a kum telona ma ra kum tenapetakakai? 12Ba Iesu i walogoropai, i piri lenkumi, Pa i ka a tenawakadel korom diat diat lalaun nakurai korom diat ku diat malapag. 13Muat wan, muat a wawera u ra pipilai ra pirapira kumi, Iau lig kup a maramari, ma pate a wekul: kuma iau pa iau wan urin lena ag wata diat a kum tenapetoduru, a kum tenapetakakai ku.
14Ma diat a kum disaipel a nun Ioane diat wan korom Iesu, ma diat tiri lena, Lelawai miat ma ra kum te Faresaio miat wawel mogoro na pakan, ma diat a num kum disaipel pa diat wawel? 15Ma Iesu i piri ta diat, Diat tagi lelawai a kum te pa ra matakina‐tinaula, ba i ki ugai ma diat kubai a matakina‐tinaula? Kura ta bug na wanua in wan pat ba din ben igenuai ko diat a matakina‐tinaula, ma diat a wawel marakam. 16Pa te in igit ugai a pakan a matakina malu ma ra turaina malu, kaduk ia ba di lig uni lena in tanabat a tara‐batina, in pet‐rabanuai balet a malu ma in gala ma uni a tarabat. 17Pa te i witup a matakina waine u ra turaina pala‐pani‐ra‐me: kaduk in tapuek a kum pala, ma ra waine in talabo, in akatau bulug a kum pala: diat witup a matakina waine u ra matakina pala, ma diara rap diara tana laig.
18Ba i piri kubai a lig rap kumi korom diat, rā tadaru i wan korom i ma i tutudug nana, ma i piri lena, Na tuglik a wawina i mat ma: un wan urin, un paki a limam un i ma in lalaun. 19Ma Iesu i turu ma i patap un i, ma diat kai a nuna tara na wawera.
20Ma boboi, rā tebuan i malapag a no tinoon ma ruadi, kuma a kap i nonoro kon i, i wan na muru tana, ma i tukta a titi ra runa in a malu: 21kuma i nukpai lena, Ba ag tuktai ku a nuna in a malu ag lalaun ma. 22Ma Iesu i tapuku ma i bobo i, ma i piri tana, Na tuglik a tebuan, un manatug, a num nuru i walaunpa ui. Ma ra tebuan i lalaun balet tak u ra pakan a bug kuma.
23Ma ba Iesu i ruk u ra ruma a nu ra tadaru ma i bobo diat a kum tena‐ip‐kauru, ma mogoro na tara diat luan, 24i piri lena, Muat tur’ara: kuma a nat wawina pa i mat i inep ku. Ma diat nogon‐a‐kurur i. 25Ba di tul a pariua diat a mogoro na tara, i ruk iai, ma i pam a limana, ma ra nat wawina i turu ma ut. 26Ma i winarag a lig kumi u ra bual rap kuma.
27Ba Iesu i wan taka iai, ru muana diara pula, diara murumur i, ma diara wata i lenkumi, Na Tun David, un mari mira. 28Ma ba i ruk u ra ruma, diara pula diara wan korom i: ma Iesu i piri ta diara lenkumi, Muru nurutau un iau lena ag pam larapai a lig kumi, ba pate? Diara uruniauot tana, Iu, Tadaru. 29Ma i pam a matadiara, ma i piri lena, Din peti korom muru lenkuma muru nuru uni. 30Ma diara bobo ma ut, Ma Iesu i pakbat akit diara lena Koniku te in nunurai. 31Ma diara wan ma wapua wanawanai, ma i winarag uni u ra rakrakan wanua kuma.
32Ba diat pari, boboi, di benpa te korom i ba i mutmut, ma ra tebaran i og i. 33Ma ba i lu‐a‐parita a tebaran, a muana, ia ba i mutmut, i pirapira marakam: ma ra tara‐na‐kaiya diat kakaian uni, ma diat piri lena, Pa di bobo a lig lenkumi u Israel u ra pupukai narap. 34Ma diat a kum te Faresaio diat piri lena, I lurua diat a kum tebaran u ra dekdek i ra tadaru a nu ra kum tebaran.
35Ma Iesu i wan wetalut u ra kum wanua na ruma, ma ra kum taman rap, ma i wawera u ra nudiat kum ruma na lotu, ma i wawera kai u ra wewapua awakak i ra matanitu, ma i wakadelpa tiba na ugan a malapag, ma tiba na ugan a malmalum kai. 36Ma ba i bobo diat a tara‐na‐kaiya, i makil a balana korom diat, ma i mari diat, kuma diat pot na maramari, ma diat tana bia tatau le ra kum sipi, ba pa nudiat a tenawarua. 37Ma i piri ta diat a nuna tara na wawera lena, A ligtatuna, a taun kida‐kidaina kuri ma, ma ta kabanadi ku a tenawogoro. 38Ia kuma muat a arig uni korom a Tadaruna‐pinapam, lena, in tularuai bulug a kum tenawogoro u ra nuna pinapam.
S'ha seleccionat:
Mataio 9: RAI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Published by the British and Foreign Bible Society in 1896.