લુક 16
16
ચતુર કારભારી
1માગુન ઈસુની તેને ચેલા સાહલા બી યો દાખલા સાંગના, “એક ધનવાન માનુસના એક કારભારી હતા, દુસરે લોકાસી ધનવાન માનુસને પુડ તેને કારભારીવર આરોપ લાવા કા યો તુની માલ-મિલકત ઉડવી ટાકનાહા. 2તાહા ધનવાન માનુસ કારભારીલા બોલવીની સાંગના, ‘યી કાય આહા જી મા તુને બારામા આયકાહા? તુને કારભારના અખા હિસાબ દે. કાહાકા તુ યેને પુડ કારભારી નીહી રહી સકસ.’ 3તાહા કારભારી ઈચાર કરુલા લાગના, ‘આતા મા કાય કરુ? કાહાકા માના માલીક કારભારીના કામ મા પાસુન હીસકી લેવલા આહા, હાતકન માલા મેહનત ત નીહી કરાયનાર અન ભીક માંગુલા માલા લાજ યેહે. 4આતા મા સમજી ગેવ કા માલા કાય કરુલા પડ, કા જદવ માલા કારભારીને કામ માસુન કાડી દીજીલ તાહા લોકા માલા જી કાહી લાગહ માની મદત કરતીલ.’ 5અન તેની તેના માલીકને કરજદાર સાહમાસુન એક એકલા બોલવીની પુડલે યેલા સોદના, કા તુવર માને માલીકના કોડાક કરજા આહા? 6કરજદારની સાંગા, ‘તીન હજાર સાતસો લીટર જયતુનના તેલ,’ તાહા કારભારીની તેલા સાંગા કા, તુ તુને ખાતાની નવી ચોપડી લે અન બીસી ન લેગજ તેમા લીખ એક હજાર આઠસો પનાસ લીટર. 7માગુન દુસરે કરજદારલા સોદના, ‘તુવર કોડાક કરજા આહા? કરજદારની સાંગા, સેંબર મન ગહુ,’ તાહા તેની તેલા સાંગા, ‘તુને ખાતાની ચોપડી લીની તેમા એસી લીખ.’ ”
8“બાંડ કારભારીની અકલકન કામ કરાહા તે સાટી માલીકની તેલા વાના. કાહાકા યી ખરા આહા કા યે દુનેના લોકા તેહને સમયને લોકાસે હારી વેવહારમા ઉજેડના લોકાસે કરતા વદારે (હુસેર)ચતુર આહાત. 9અન મા તુમાલા સાંગાહા કા, સંસારિક ધન-દવલતકન તુમને સાટી દોસતાર બનવી લે, કા જદવ યી ધન પુરા હુયી જાયીલ, તાહા તે તુમાલા કાયીમના ઘરમા આવકાર કરતીલ. 10જો કોની માનુસ બારીક-બારીક ગોઠમા વીસવાસુ આહા તો ખુબ ગોઠે સાહમા વીસવાસુ આહા, અન જો માનુસ બારીક-બારીક ગોઠમા બાંડ આહા તો ખુબ ગોઠે સાહમા બાંડ આહા. 11તે સાટી જદવ તુમી યે દુનેમા ધન-દવલતમા વીસવાસુ નીહી રહા ત સરગના ધન-દવલત તુમાલા કોન સોપીલ? 12અન જો તુમી પારકે ધનમા વીસવાસુ નીહી બના ત તુમના જી કાહી આહા, તી તુમાલા કોન દીલ?”
13“કોની ચાકર દોન માલીકની ચાકરી નીહી કરી સક કાહાકા તો એકવર દુશ્મની અન દુસરેવર માયા રાખીલ, નીહી ત એકને હારી બેસ રહીલ અન દુસરેલા વેટ ગનીલ, તુમી દેવની અન ધન-દવલતની ચાકરી નીહી કરી સકા.”
દેવને રાજની કિંમત
(માથ. 11:12-13)
14ફરોસી લોકાસી યી અખા આયકી ન ઈસુની મશ્કરી કરુલા લાગનાત, કાહાકા તે પયસાલા માયા કર હતાત. 15ઈસુની તેહાલા સાંગા, “તુમી ત માનુસને પુડ પદરલા નેયી દાખવતાહાસ, પન દેવ તુમને મનલા જાનહ, કાહાકા જી માનુસને નદરમા મહાન આહા તી દેવને નદરમા વેટ આહા.
16મૂસાના નેમ સાસતર અન દેવ કડુન સીકવનારસા વચન તુમાલા વાટ દાખવ હતા જાવ પાવત યોહાન બાપ્તિસ્મા કરનાર આનેલ તાવ પાવત. પન આતા દેવને રાજની બેસ ગોઠના પરચાર કરુમા યેહે, અન અખા જના તેમા મદી જાવલા સાટી હાવસી આહાત. 17આકાશ અન ધરતી અલોપ હુયી જાતીલ પન દેવના નેમ સાસતર માસલા જરાક પન મીટનાર નીહી. 18જો કોની માનુસ પદરની બાયકોલા સોડીની દુસરેહારી લગીન કરહ, તો સીનાળી કરહ, અન જો કોની સોડી દીયેલ બાયકો હારી લગીન કરહ તો બી સીનાળી કરહ.”
ધનવાન માનુસ અન ગરીબ લાજરસ
19“એક ખુબ ધનવાન માનુસ હતા, તો ખુબ માહગી કપડા પોવ હતા. 20અન એક લાજરસ નાવના ગરીબ ભીકારી જેને અખે શરીરલા ફોડ હતાત, તેલા તે ધનવાન માનુસને ઘરને દારને બાહેર લોકા બીસવી દે હતાત. 21તેની મરજી ઈસી હતી કા, તો નાંદેલ માનુસને ટેબલવર પડેલ ઉસટા કુટકા વાની તેના પોટ ભર, અન કુતરા પન યીની તેના ફોડલા ચાટ હતાત.
22ઈસા હુયના કા તો ગરીબ લાજરસ મરી ગે, અન દેવદુત યીની તેલા આપલા વડીલ ઈબ્રાહિમને હારી રહુલા લી ગે, અન ધનવાન માનુસ બી મરના, અન તેલા દાટી દીદા. 23અન તો નરકને પીડામા ભોગવતા નદર વર કરી ન હેરના, ત દુરહુન લાજરસલા ઈબ્રાહિમને પાસી હેરના. 24તેની આરડીની સાંગના, ‘ઓ બા ઈબ્રાહિમ, માવર દયા કરીની લાજરસલા દવાડ કા, તો આંગઠીના બોઠ ભીજવીની માને જીબલા સેળા કર, કાહાકા મા યે ઈસતોમા આયાદેવા કરાહા.’ 25પન ઈબ્રાહિમની સાંગા, ‘ઓ નાતુસ, આઠવ કર, કા તુ તુના જીવન જગનાસ તેમા તુલા બેસ બેસ મીળનેલ, અન તીસા જ લાજરસલા વેટ મીળનેલ પન આતા અઠ તેલા શાંતિ મીળનીહી, અન તુ દુઃખમા આહાસ.’ 26‘અન યે અખે ગોઠી જાવંદે આમને ન તુમને મદી મોઠે દરાલા નકી કરેલ આહા કા જો કોની અઠુન ન તીકુન તુમા પાસી જાવલા માગ, ત તો નીહી જાયી સક, અન નીહી કોની તઠુન ન ઈકડુન યે મેરાલા આમાપાસી યી સક.’ 27ધનવાન માનુસની સાંગા, ‘ત ઓ બા, મા તુલા વિનંતી કરાહા કા, તુ લાજરસલા માને બાહાસને ઘર દવાડ. 28કાહાકા માના પાંચ ભાવુસ આહાત, તો તેહાલા યે ગોઠીસી ચેતવની દે, ઈસા નીહી હુય કા તે બી યે દુઃખ પીડાને જાગામા યેત.’ 29ઈબ્રાહિમની તેલા સાંગા, ‘તેહાપાસી મૂસાના નેમ સાસતર અન દેવ કડુન સીકવનારસે ચોપડે આહાત. તેહી તેહના આયકુલા પડ અન તી પાળુલા પડ.’ 30તેની સાંગા, ‘ઓ બા ઈબ્રાહિમ તીસા નીહી, પન કદાસ જો કોની મરેલ માસુન ઉઠી ન તેહને પાસી જા ત તે પસ્તાવા કરતીલ.’ 31ઈબ્રાહિમની તેલા સાંગા, ‘જદવ તે મૂસાને નેમ સાસતર અન દેવ કડુન સીકવનારસી આજ્ઞા નીહી માનત, ત જો મરેલ માસુન બી કોની જીતા હુયીલ તરી પન તેવર વીસવાસ નીહી કરનાર.’”
S'ha seleccionat:
લુક 16: DHNNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Dhanki Bible (ડાંગી) by The Love Fellowship is licensed under Creative Commons Attribution-ShareAlike 4.0 License.