ลก 23

1วาย อัน ตี เฆ พึง ดูอี อี ซูงพยาด ดารา, เฆ บอกาเฆลียด ตึย เฌา เยซู ฌัม โดง กอย อาพีลาด. 2เฆ มืร กาย็อง เฌา เยซู ต็อห, “เย แฮะ ยึร ดูอี นี มาโนว แตห มืง เย กาปยาต ลึร. อัน บอ แคร ดูอี ดัว รึอน จึง ดอน โมยว ดี คูนดีคัม อาแกซา. อัน มืร ปีคึก อัน ต็อห, อัน มูห อัน เฌา ปี ร็อห ปี ตึย เฌาพรา แตห อัน คยอด ดูอี. อัน บอ ต็อห, อัน มูห คูนดีคัม.”

3เฆ แฮะ ฮอต กาย็อง อัน ปาย ตี, อาพีลาด ตึอน ดีหมอด เฌา เยซู. อัน ต็อห, “แฮะ หมาน มูห แม คูนดีคัม อี อึบ เฆ ดูอี อายูดา?”

เฌา เยซู วี ต็อห ดี อัน, “แฮะ หมาน ปี ต็อห แม.”

4ปัน ตี อาพีลาด วี ต็อห ดี เฆ ดา ตาง อี แยต เฆ ดูอี อี หลู ดี เฌาพรา บอ ดี เฆ ดูอี เฮา ตึอน, “โอว ตู ยึร นา ตู หมึอม แปะ แฮะ โบง ดูอี นี.”

5เฆ ดูอี ตึอน วี ต็อห หลึอม คา อาต “ดูอี นี โบง แตห อึณ ซีนัน ซีนืง แคง มืง. อัน แฮะ มาโนว ดูอี แคง อืง ฆาลีเล บอ วี ฮาว ฌัม บอ แคง อืง ยูดา ดอน โปละ. ดอ ตี นี, อัน แฮะ ตัห บอ แคง มืง เอ นี.”

6อาพีลาด, ดอ โทม อัน โฆรห ตี, อัน วี ดีหมอด ต็อห, “ดูอี นี ตัห อืง ฆาลีเล?” 7อัน กอ นับ, เฌา เยซู มูห ดูอี อี กอย แคง มืง ฆาลีเล อี มูห มืง ปี อึบ คูนดีคัม อาเฮโรด, อัน บอ ตึย เฆ แตห เฆ ฮาว โดง กอย อาเฮโรด ตึอน. ดอ อัน ตี อาเฮโรด แฮะ ตัห กอย แคง มืง เยรูซาแลม.

8อาเฮโรด ตึอน, ดอ ยึร อัน เฌา เยซู, น็อห อัน ดาคึย กาเซา. แฮะ เหลณ, อัน แฮะ ซี ยึร เฌา เยซู. อัน แฮะ ยึร โฆรห ปี กาลาง อี เฮา ลอง อัน. อัน บอ ซี ยึร เฌา เยซู โบง นา หมึอม อาม กาเซา. 9อาเฮโรด ดีหมอด ดอน โมยว ดี เฌา เยซู. อัน ยี ตู วี เวียะ มาเซ ดี อาเฮโรด. 10เฆ ดา ตาง อี แยต เฆ ดูอี อี หลู ดี เฌาพรา บอ เฆ ดา ซารา อี มาโนว ดารา ยูดา, เฆ ตัห ฌัม ดี อาต อัน, กาลาง นา ตู หมึอม ดอน โมยว ลอง เฌา เยซู. เฆ ต็อห, หมาบ อัน แฮะ ตาง กาเซา. 11ปัน ตี คูนดีคัม อาเฮโรด บอ เฆ ดา ซึก อัน กาณัห เฌา เยซู, โบง นา ตู หมึอม ดี อัน. เฆ มืร กาณัห อัน, แตห อัน ชึบ ซีโตว ชีด ปี คูนดีคัม. แฮะ ฮอต, เฆ วี ตึย อัน เวณ โดง กอย อาพีลาด ตึอน. 12คา อาต อาเฮโรด ฆาย อาพีลาด ตู ลาย กาล็อะ. ซีแง อัน ตี, ฆาย ยี แบน อู ฆึก.

13อาพีลาด บาง เฆ ดา ตาง อี แยต เฆ ดูอี อี หลู ดี เฌาพรา บอ เฆ ดา ตาง อี อึบ ดูอี บอ เฆ ดูอี กืน, แตห เฆ ฮาว ฌัม โดง กอย อัน. 14อัน ต็อห ดี เฆ, “เบ แฮะ ตึย ดูอี นี ฌัม ดี อาต โอว. เบ มืร ต็อห อัน มูห ดูอี มาโนว อี เฮา แกวะ ฮู แตห เฆ โดบ เย. ดอ ตี นี โอว แฮะ ดีหมอด ซีคยา แปะ แฮะ โบง อัน ดี อาต เบ. โอว ยี ตู ยึร นา ตู หมึอม มาเซ แปะ แฮะ กาย็อง เบ ลอง อัน. 15บอ คูนดีคัม อาเฮโรด ตู ยึร นา ตู หมึอม มาเซ. โคว, อาเฮโรด แฮะ ตึย อัน วี ตัห ฌัม โดง กอย โอว. ดูอี นี อาว มึห ดี โบง นา ตู หมึอม มาเซ, อี แตห โอว ปึอน ดี ง็อห ยัม อัน. 16โกบ อึณ ปาย ตี, โอว ดี แตห เฆ มัห อัน, แฮะ ฮอต, โอว ดี วี แตห อัน ลอด.”

17อึณ บอ มูห ฮีด เฆ, แตห อาพีลาด เบลห ดูอี อี กอย แคง กาปึม อู วี ดอ โบง เฆ บลอย โหลห เฆ เฌาพรา ดอ กาโลห อัน กาง เฆ.#23:17 บับ ดอ โฆว มัง โมยว อาว มึห กาบัก นี

18เฆ ดูอี กืน ตึอน บอ ดัด ตาง ต็อห, “แตห แม ง็อห ยัม ดูอี นี. แตห แม ดัว อาบาราบัะ เลห แคง กาปึม.” 19อาบาราบัะ ตึอน มูห ดูอี ปี ปัก เฆ, คร็อง แคง กาปึม โกบ แฮะ โบง อัน แตห ดูอี ซีนัน ซีนืง แคง มืง เยรูซาแลม. อัน มืร แฮะ ง็อห ยัม บอ ดูอี.

20อาพีลาด มึห น็อห ซี เบลห เฌา เยซู. อัน บอ วี ต็อห ดอน โมยว ดี ดูอี กืน ตึอน. 21เฆ ดูอี กืน ยี ดัด ตาง ต็อห, “แตห แม แตห อัน ยัม แดง ร็อง กาแวะ.” เฆ ดัด ตาง ปาย ตี แบน เฌณ แบน เฌณ.

22อาพีลาด วี ต็อห ดี เฆ โอย เฌณ. “เหมา อึณ ปาย ปี ซี แตห เบ อัน ยัม? ดูอี ตี แฮะ โบง นา ตู หมึอม โมยว เหมา? โอว ตู ยึร นา ตู หมึอม ปี กาอาบ อัน ยัม. โอว ดี แตห เฆ มัห อัน, แฮะ ฮอต, โอว ดี เบลห อัน.”

23เฆ ดูอี กืน ยี ตู โทม, นับ ดัด ตาง. เฆ วี กาโพรม ดี ดัด ตาง, หมาณ ดี อาพีลาด แตห อัน ง็อห ยัม เฌา เยซู แดง ร็อง กาแวะ. ปี กาลาง เฆ, อึณ ยี ตาง หลึอม ปี ต็อห อาพีลาด ดี เฆ. เฆ แฮะ แวน โฆรห อัน. 24ปัน ตี อาพีลาด ซูงพยาด, แตห เฆ ดูอี โบง ดี เฌา เยซู ปี หมาณ เฆ ดี อัน. 25อัน มืร เบลห ดูอี ปี ปัก คร็อง เฆ แคง กาปึม โกบ โบง อัน ซีนัน ซีนืง แคง มืง บอ ง็อห ยัม ดูอี. อัน บอ อาบ เฌา เยซู ดี เฆ ดา ซึก, แตห เฆ โบง ปี อึง เฆ.

ลอง เฆ ดึก เฌา เยซู ดี ร็อง กาแวะ

26วาย อัน ตี เฆ ตึย เฌา เยซู เลห โดง ตึอน. ดอ ฮาว เฆ โดบ อึณเตณ, เฆ บอ กาตูณ ดูอี อู วี อี ตัห แคง มืง กูเรณ. อัน จืร อาซีโมน. อัน แฮะ ตัห ดี มาน อัน, โดบ อึณเตณ ฮาว เฆ. เฆ กาชัวะ อัน, แตห อัน ฆอด ร็อง กาแวะ โดบ ดี ปัน เฌา เยซู. 27เฆ ดูอี กืน บอ โดบ ดี ปัน อัน. กาแต เฆ กืน บอ มึห อีบึณ มัง อี. เฆ ยาม บอ มึห น็อห กลึร ลอง เฌา เยซู. 28เฌา เยซู ยี ยึร เฆ, อัน บอ ต็อห ดี เฆ, “อึย เบ อีบึณ แคง มืง เยรูซาแลม, แกวะ ยาม โกบ กาเว เบ ดี โอว. แตห เบ ยาม โกบ กาเว เบ โดว เบ บอ ฆอน เบ. 29อึณ ดี ฌัม อู ซีแง, เฆ ดูอี ดี ต็อห, ‘เฆ อีบึณ อี ตู มึห ฆอน บอ อี ตู มึห ดี รัต ฆอน อางัะ, เฆ แฮะ ดาคึย หลึอม อี เฮา.’ 30ดอ อัน ตี เฆ ดูอี ดี ต็อห ดี นอน, ‘แตห เบ เกห ทีบ เย.’

เบ ดี บอ ต็อห ดี ดาอาง มาว, ‘แตห เบ ซีบลึก แวน เย ดี นี, แกวะ แตห เย โลว คัม ดูก ตาง อี ดี ตัห.’

31เซ ดูอี โบง ฌึร ตี ดี โอว, อี ตู มึห หมาบ, อี ปี เฮ อีม, อาว ฮู นับ ดี กาลาง ปี ดี โบง เฆ ดี ดูอี อี ปี เฮ กาฮ็อห.”

32ดอ อัน ตี เฆ ดูอี อี ตึย เฌา เยซู นา เรต มืง, เฆ บอ ตึย บอ ดูอี อา วี, อี แฮะ โบง หมาบ, ง็อห ดีรึม บอ ฆาย โดบ เฌา เยซู. 33เฆ แฮะ ตัห ฌัม โดง จืร โดง กอย กาอาง ฆีณ, เฆ บอ ดึก เฌา เยซู ดี ร็อง กาแวะ. แฮะ ฮอต, เฆ บอ ซัม ร็อง. อึณ บอ มึห ดูอี มึห หมาบ อา วี ดึก ดี ร็อง กาแวะ โคบ เฌา เยซู. เฆ แตห อู วี กอย บลาก อาอัห ปอ อู วี กอย บลาก อาฆัะ อัน. 34เฌา เยซู ยี ต็อห, “อึย ฆูณ โอว, โอว หมาณ, แตห แม ฆ็อห แวน หมาบ เฆ. เฆ ตู นับ มาเซ ปี โบง เฆ ดี โอว.” เฆ ดา ซึก ยี กาซาง ครึง ปี ตา อัน, ลาย กาโดว, อาเซ ดี ปึอน.

35ดูอี กืน บอ ยอด เฌา เยซู. เฆ ดา กาณา อึบ มืง กาณัห อัน. เฆ ต็อห, “ดูอี นี แฮะ ดึอม จอย ดูอี เฮา. เซ อัน มูห อัน เฌา ปี ร็อห ปี ตึย เฌาพรา แตห อัน คยอด ดูอี, แตห อัน วี จอย โดว บรีม อัน, คยอด อาซาก อัน.”

36เฆ ดา ซึก บอ กาณัห อัน. เฆ ตัห ดี อาต อัน, ดัว อัน เดียง อึม มางูน อี ปราง. 37เฆ บอ ต็อห, “เซ แฮะ หมาน, มูห แม คูนดีคัม ดูอี อายูดา, แตห แม คยอด โดว แม, แตห แม เลห โลง แดง ร็อง กาแวะ ตี.”

38เฆ ยี แฮะ แดม อูน นา แดง ฆีณ อัน, “ดูอี นี มูห คูนดีคัม อี อึบ ดูอี อายูดา.”

39ดูอี โบง หมาบ อู วี, อี แฮะ ดึก ดี ร็อง อี กอย โคบ เฌา เยซู, อัน บอ กาลาง โฆรห ตู หมึอม ดี อัน. อัน ต็อห, “เซ แม มูห อัน เฌา ปี ร็อห ปี ตึย เฌาพรา แตห อัน คยอด ดูอี, แตห แม คยอด โดว แม, คยอด บอ ยาย.”

40ดูอี อี ดึก ดี ร็อง ปอ อู บลาก ตู แตห อัน กาลาง ปาย ตี. อัน ต็อห, “แม ตู นับ ดี โยว เฌาพรา ดอ เหมา? แม ยึร, แม โลว คัม ดี รึม หมาบ อู โมยว โดบ อัน. 41อาย อา วี นี ยี แฮะ กาอาบ ยัม ปาย ตี. อาย แฮะ โบง นา ตู หมึอม. ดูอี นี ยี ตู โบง นา ตู หมึอม มาเซ.”

42อัน แฮะ ฮอต กาลาง ปาย ตี, อัน วี ต็อห ดี เฌา เยซู, “แตห แม นัมโหลห โอว. เซ แม ฌัม แคง มืง ปี อึบ แม, แกวะ แตห แม ปีว โอว.”

43เฌา เยซู วี ต็อห ดี อัน, “โอว ต็อห อาคัร ดี แม, อาตึร นี แม ดี ปึอน กอย ดาคึย, กอย รึม โดบ โอว แคง มืง ดาคึย, มืง ฆยามซา.”

ลอง เฌา เยซู ยัม

44ปัน ตี แฮะ ฌัม กาแต ซีแง. ดอ อัน ตี แคง มืง บอ มืง บอ อับ ว็อง อาดา โอย นารี. 45แคง โฮว เฌาพรา อึณ ยี มึห บีก ฆ็อง อี แบน แรง อี จัน กาเซา. อึณ บอ กายาต ราง อัน, แบน อา บลาก. 46เฌา เยซู บอ ดัด ตาง ต็อห, “อึย ฆูณ, โอว อาบ น็อห พึอม โอว ดี แม,” อัน แฮะ ฮอต ต็อห ปาย ตี, พึอม อัน บอ โตต.

47อึณ ยี มึห ดูอี อี อึบ ดา ซึก อู มาย็อห วี, ดอ ยึร อัน ดอน โมยว ปาย ตี, อัน จูห ดี อืบ เฌาพรา. อัน ต็อห, “แฮะ มูห, แฮะ หมาน, ดูอี ตี แฮะ มูห ดูอี ซืร, ดูอี ตู โบง หมาบ.” 48เฆ ดูอี กืน, อี แฮะ ตัห ยอด ปี โบง เฆ, ดอ ยึร เฆ ดอน โมยว ปี โบง เฆ ดี เฌา เยซู, เฆ บอ ปา บางน็อห เฆ, บอ จูห ดี วี เลห เวณ โดง กอย เฆ. 49เฆ ดูอี อี นับ เฌา เยซู บอ เฆ อีบึณ อี แฮะ โดบ อัน ตัห อืง ฆาลีเล, เฆ บอ กอย นา กาโต็ง ยอด โตต ดอน โมยว.

ลอง เฆ เบลห โดว โบ็ง เฌา เยซู แคง กาเดา บาเรว

50อึณ ยี มึห อีมาย อู วี, อัน มูห ดูอี หมึอม. อัน จืร อาโยวแซบ. อัน ตัห แคง มืง เอรีมาที อี กอย แคง อืง ยูดา. 51อัน แฮะ หน็อะ อึณด็อะ ปัน ดี ตัห อึบ เฌาพรา กาดาย. อัน บอ มูห ดูอี อี กอย แคง พึง ดา ตาง อี ซูงพยาด ดารา. อัน ยี ตู ซีเพา ปี ซูงพยาด เฆ ดี เฌา เยซู. อัน มืร ตู อึง ปี โบง เฆ. 52อาโยวแซบ บอ ฮาว ฌัม โดง กอย อาพีลาด. อัน หมาณ, แตห อาพีลาด ดัว โดว โบ็ง เฌา เยซู ดี อัน. 53อัน ดึห โลง โดว โบ็ง เฌา เยซู แดง ร็อง กาแวะ, ดึห บีก กาตัม ลูย อู พืน, กาบัน บีก ตี ดี โดว โบ็ง เฌา เยซู. แฮะ ฮอต, เฆ เบลห อัน แคง กาเดา บาเรว กามาย แปะ แฮะ ฮอต ฆึห เฆ แคง ดาอาง มาว, อี ตู ดึอม มึห ดี เบลห ดูอี ยัม. 54ซีแง อัน ตี มูห ซีแง แรน อูน เฆ ดูอี ดอน โมยว อาต ซีแง ดีเหลา. ดอ อัน ตี ซีแง ดีเหลา แฮะ หงา ดี ฌัม.

55เฆ อีบึณ อี แฮะ โดบ เฌา เยซู ซีณ ดอ ตัห อัน แคง อืง ฆาลีเล, เฆ บอ ฮาว โดบ อาโยวแซบ แคง กาเดา บาเรว, ยอด โดง เบลห เฆ โดว โบ็ง อัน. 56วาย อัน ตี เฆ บอ เวณ กาง เฆ, อึณปราย อูน อึณกรึห ซีนัม แปร บอ นามัน อูห หงูน ปี ตา เฆ พ็อห ดี โดว โบ็ง ดูอี ยัม. ซีแง ดีเหลา เฆ ยี กอย ดีเหลา, โดบ ปี ดัม ดารา เฆ โบง.

S'ha seleccionat:

ลก 23: pce

Subratllat

Comparteix

Copia