Yohanes 7
7
Yesus er weit yapu peda, er tep teka men tenepi taru tep, pepu upu
1Yesus er dombarami nesala weik, dabal kupupa, tapi taru di dipra daneitamaida, Yesusdi Galilea mutu neitamaipu peterep embaramu. Sun Yudea tara neitamai kurami neng, Yahudi yala nengdi, ‘Yesus poptepe’ tenen, er tep kalengmai ngeda, Yesus konum tenepka cadi, Yudea tara men embanmaue. 2Dinino, sun Yahudi yala nesaladi, ila tumi tenepra kalemaminge, er sida, Bura Ati dopnedi, Kalemna Tumi, damai kupu. 3-4Akalemna tumi, mambul tumi damai kupupa, Yesus er weit yapu sisa di, Yesus tep pepi.
“Kan upu gekenung nesaladi, nimi men kupmanto pel dorum ngeda, ‘Sun Yudea tara kunge neng ton eptenge’ tenen, telep ngeda, kan adipapu Galilea tara tapra, Yudea tara betume. Uda, ware neng do yuma, ‘Nun si kael kepsengedi, nun tep ereipsengepa, ila neng kunkamepe,’ tenenge nengda, inipra pel men donunge. Kandi nimi men kupmanto keca, kunupsek pen pel dona ngebo kurema tep, nesala ban-ban yuma kael kepketenga tep nengeda, Yudea tara bememdi, nesala yuma dinkamengai pel dorbeo,” pepi.
5Yesus er weit yapudi aupu mawa di pepya deiyoda, sun peda, ‘Yesusda tek sisi ngebo’ tenen, teka men teneramemeia tep, aupu pepi. 6Upepya tep nengeda, Yesusdi, er weit yapu sisa tep tamupra pepu.
“Sun tep ngeda ataru do, yuk taru do yuma, tali tarupu utotopu kurur dinino, Allahdi teneamneu taruda, kapul kupkamnera tep, neda Yudea tara kapul men benkamane. 7Sun teka tenena gum, tali kunung nesala yuma tep, nedi, ‘Sun kurum kecada, malipu kurume,’ pepra wenemnuna cadi, sundi ne tep dabal kuprepa, ‘Angebo nun song,’ tenenenunge. Dinin, yuk tali nengdi, sun tep nengeda, ‘Nun song,’ men tenesenunge. 8Atep ne weit yapu, sunpuda Yudea tara kalepkamengai benkurume. Allahdi teneamneu taru kapul men kupnera tep, neda Yudea tara kalepkamengaida, kapul men benkune.” Yesusdi pepu. 9Yesusdi aupu konum pepkopda, Galilea tara neitamaipu kunmau.
10Galilea mutupu kunmaupane, amenda taru er weit yapu, ‘Ila kalemna tumi benkupe’ tenen, bisi banmai taruda, Yesus peda amenda beu. Yesus erdi Yudea tara beuada, ‘Nimi yuma epkamneng’ tenen, tali lupra katuai men beu dinin, inipra beu.
11Uda, Yudea tara neitamai, ila tumi tep kalepmangaida, sun Yahudi yala deiyo nengdi, “Angebo dan do?” pepra asimaidi, er tep pio kalengnapu kunmai. 12Sun nesala weika di amutu bulupmaiya neitamai, sun yumadi Yesus tep weika di mur-murumdanmai. Ton nengdi, “Yesusda, telep kure ngebo,” penmai dinin, yuk neng dingeda, “Gume, Yesusda mawa di peserepa, er upu gekenge nesala mankau di mok keca tep teka tenenunge,” penmai. 13Ukupra yuk-yuk mur-murumdanmai dinin, sun awekmai nesala yumadi, ‘Yahudi yala deiyo neng gekepsengedi, mali kange doupra wenepsenung’ tenen, Yesus tep upu katuai men penmai. Mur-murumdanapu kunmai.
Yesusdi, “Ne nai bo Allahdi penere upupu peteremsenune,” pepu upu
14Sun anesala yuma, ila tumi tep kalepmaiyai kunmaipane, neitam taruto konum kupupa, Yesusdi beu. Ada, Yahudi yala nengdi Allah tep karerbarami ati, ila mambul ati dam beudi, gonga kepra peteremau. 15Yesusdi peteremaupane, sun Yahudi yala deiyo neng gekenmaidi, “Uo, angeboda yuk nengdi peteremipa, men kael keamu dinin, ware kuprap akeca-keca yuma ila kael di petereptu do?” pepra, asipetepidi lungdanapu kunmai.
16Upepra asipetepipa, Yesusdi tamupra pepu. “Gume. Nedi peteremsenun upuda, ne kange dipapu tenepra men pesenune. Ne dokotepneu ngebo Allahdi penerepa, er peneretopu aupupu ne peda peteremsenune. 17Ware nesala do yuma, sundi, ‘Allah teneamseudi, er upu deiki peseretopu, angepu talepra kunkamepe,’ tenepmengedi tek sisi kupmengopda, kael kepkameng keca pepkusene. Ne Yesusdi, ne kange dipapu peteremnun do? Ne nai bo Allahdi penere upupu peteremnun do? Aupu dombange nesalapu kael kepkameng ja,” Yesusdi pepu.
18Upepudi aupu ton cap pepu. “Ware neng do yuma, sun pe kange dipu peteremenge nengda ada, ‘Sun gekepsengedi, nun tep gispal dopra ereipkamsenge’ tenen, kununge. Ange utopu gum dinin, ware ngebo do yuma, ‘Ne tep dokotepneu ngebo, er tep pel dopnepane, yuk neng yumadi er teppu gispal dopra, er sipu erepkamenge,’ tenere ngeboda, angebo tek upupu perure. Er kure keca cap, er pere upu cap yumada, mok keca tenpunge peda men kurure. Dumsisipu kurure,” Yesusdi pepu.
19Upepudi, Yesusdi Yahudi yala neng tep pepu. “Allahdi, ‘Angeda ukunkamrume dinin, angeda men kunkamrume,’ peipupa, Musadi#7:19 Musa Musa sengamu upuda, Kejadian adinin Ulangan sekeipseu. Aupu lap pena ngeda, nomor 35 dirume. sekeiamseu mem upuda, men kareamseu do? Gume, er dipu aupu karepseu dinin, sun kan-kan neitamai di, tenpu ngebo peda, aupu moupra talepredi, men dombarure. Sunda ware keca deiyo tep, ‘Er poptepe’ tenen, piripetepmanerum do?” Yesusdi pepu. 20Upepupa, awekmai nesala kan-kan neitamai tenpu ngebodi pepu. “Gume, kanda isok taleamu ngebo kurume. Ware nengdi popterepmakengpa, aupu pepmaserem do?” pepu. 21-22Upepipa, Yesusdi pepu.
Sun pel dona gum tumi, Sabat tumi deiki, nimi men kupmanto keca tenpungepu, nimi kweten pel dopmasipa, sun yuma epra kael kepnerumdi, ‘Erda pel utopu keca kupmaue’ tenen, ne tep lukdana mali tenepnerume. Dinino, Musadi, “Nimi den bam bol deiki tarange#7:21-22 den bam bol sengna upu deiyo kael kemna tep, lap pena upu nomor 19 dirume. sengkamrume,” pepra deipseua tep, sundi pel dona gum tumi, Sabat tumi deiki sal nyapu dopra, sun den bam bol deiki tara sengrume. Ukumum ngeda, ‘Angeda mali kunupe,’ men tenerume.
23Uda, sun ton tenipetepso. Musadi, “Ukunkamrume,” pemseu upu, ‘Mem upu men yanipkup,’ tenepruma deiki di, Sabat tumi deiki di pel men dorume. Dinino, Sabat tumi akaptua peda, ‘Nun nyapu den bam bol deiki tara sengna telepe’ tenen, sengna pelpu dorume. Ukuruma tep nengeda, ware deiyo di ne tep, ‘Sabat tumi deiki nimi nong yuma kwetepmaua deiki di, pel utopu dopu’ tenen, yu kupseupa derepmanerum do? 24Sunda, nong bol deiki kecapu epra, upu bongdiramumdi, “Ange telepe, ange mali,” perum ngeda yapmumdi, tek sisi neitamaingepu tenepra, dumsisipu upu bongdinkamrume. Yesusdi pepu.
“Amenda yankamre ngebo, Kristus perameng ngeboda, Yesus kurur do?” pepra, asipetepi upu
25Yesusdi aupu pepupa, adipapu sun Yerusalem mutu neitamai kurami nesaladi upenmai. “Nun kayapu, sun Yahudi yala deiyo nengdi, ‘Angeboda nun poptepe,’ tenenmai ngeboda, er Yesus konum akunmar be? 26Erda, nun gekenmapai katuai dipu penmar dinin, sun deiyo nengdi er tep, upu tenpunge pe ton pepra, men wenemenge ngeda, warya tep do? Atep sun deiyo nengdi Yesus tep ukupra tenenung do? ‘Gume, Allahdi, nimi lyepkamre tenen, wepra deiamu ngebo, Kristus penup ngeboda, er Yesusda, tek sisi Nimi Lyemna Deiyo Ngebo kurure’ tenen, konum kael kepmangdi, dimpeprappu kunung do? 27Dinino, nun puda nun kaele. ‘Angeboda Kristus gume. Erda amutu ngebopu kurure,’ tenepra konum kael kepmepu. Tonda, nimi Lyemna Deiyo Ngebo, Kristus perameng ngebo yankamre taruda, nimi yumadi, ‘Angeboda amutu ngebo, anengdi deipi ngebo’ tenen, men kael kepmanto kunkamenge. Atep nengeda, Yesusda Kristus men kurure,” penmai.
28Sun awekmai nengdi upenmaipa, Yesusdi sun Yahudi yala nengdi doami ati, Allah er gispal dona cap, er si eremna cap tep karerbarami ati, mambul weik ati dam tupa tekmaua di, ila upu deiki di pepu.
“Sunda tek penmarume. Ne cap, ne mutu cap, konum kael keamnerume. Dinino, neda ne kange dipapu amutu men kunune. Ange gum dinin, ne dopra deipneudi, tuai mutu dokotepneu ngeboda, pio tek ngebo kurure. Er tep nengeda, sun men kael keamrume. 29Sun men kael keamrum dinin, ne dokotepneu ngebo Allahda, erdi dokotepneupa, nepuda er damai di yanamsa tep, er kael keamsi,” Yesusdi pepu.
30Yesusdi aupu pepupa, sun awekmai nesala yu kupupa adipapu, ‘Tomopkupe’ tenen, piripetepi dinin, Allahdi Yesus tep, ‘Er popkami taru ake,’ teneamemeu tumida kapula cadi, tenpu ngebo peda, Yesus men talepi. 31Awekmai nesala weika di mali tenenmai dinin, ton neng yambul weika di Yesus tep teka tenepmai. Ataru di teka tenepmai nengda, ‘Gume, ukutaru pepsere ngebodi, nimi men kupmanto keca, mambul pel dosere ngeda, ila mambul kurura cadi, Kristus peramenge ngebo amenda yankamre taruda, pio mambul pel weika di ton cap kupkamser do? Gume, er Yesusda, akonum yanmar adano,’ tenepidi teka tenenmai.
32Awekmai nesala kan-kan di, sun Farisi neng ton wekmaiya tep, anesala penmai upu gekepidi yu kupu. Yu kupupa, sun Farisi neng cap, Allah karena tep ila deiyo neng, sun imam neng capdi, ‘Yesus tomopra ateng koupkung’ tenen, beidi upu peipipa, Allah karerbarami ati jen talepra kalengami nengdi,#7:32 kalengna deiyo neng tep, lap pena upu nomor 8 dinkurume. Yesus tep er peterbei. 33Sun benmai taruda, Yesusdi acapu tupa wekmai neng tep aupu pepu. “Neda sun damai ke taru tep yasidi, sun cap kunmap dinin, yambul ton kunmapyanen, Allah tenepneu taru konum kupyopda, ne dokotepneu ngebo Allah damai benkamne.
34Bene paneda, sundi, ‘Dan mutu benmar do?’ tenen, pio er petenkamnerum dinin, men epkamnerume. Ne bena kunkamne mutuda, sun cap men yatume,” pepu. 35Yesusdi upepupa, sun Yahudi yala deiyo neng gekepidi upepdai.
“Angeboda, dan mutu betupa, nun men epdatepe do? Erda, nun yala nesala dinin, Yunani yala nesala cap wisipra kunge mutu benkamre do? Amutu beredi, Yunani nesala peterep embankamra tep, aupu penmaser do? 36Erdi, ‘Erpetenkamnerum dinin, pio men epkamnerume,’ pepmaunge cap, tonda, ‘Ne bena kunkamne mutuda, sun cap men yatume,’ pepmau upu cap, ware keca deiyo tep, ange tenepudi pepmaser do?” Sun Yahudi yala deiyo nengdi upedanmai.
37Ataru ila kalemna kalepbanmaipane, sirya tumi, ‘Atumida ila mambul tumi,’ tenerami ngeda, Yesus tekroudi upu ila di pepu. “Sun gekepneso. Ware ngebo do yuma, me putapyopda, ne damai yatudi me jenkamre. 38Ware nesala do yuma, ne tep teka tenepmengopda, amendada, me bungna me weika di bukra dinikredi embaramretopu, anesala sun kange dipru neitamai di, pio gam kuna deiyo kecada, me bungna bungamredi, pio embaramretopu kunkamre,” Yesusdi pepu.
39Uda, Yesusdi aupu pepu ngeda, ukupmanto tep pepu dinin, aupu nong neitamai ngeda ake. “Sun kange dipru neitamai di gam kuna deiyo keca me utopu embankamre,” pepunge nongda, Allah er Lek Sambala weika di karepkamunge tep pepu. Yesus tep teka tenepi nesalada, amenda taru Allah er Lek Sambala karepupa, dopropkaminge tep pepu. Dinin, aupu pepu taruda, Allah er Lek Sambala kapul men karepka cadi, kapul men dopropi. Yesus depupa, Allahdi gam bukra ereipudi, pio telep kupra deipkamuada, kapul men kupka tep, er Lek Sambala kapul men karepu taru di pepu.
40Yesusdi adomon upu utopu upu pepupa, er upu gekenmai nengdi pepi. “Gume, nun kangeda, apesere ngeboda, Allah er upu lap pena deiyo ngebo, nabi ngebo kurure,” pepi. 41Yuk neng dingeda, “Nun kangeda, erda nimi Lyemna Deiyo Ngebo, Kristus perameng ngebo kurure,” pepi.
Upepi dinin yuk neng dingeda, “Gume, ware kuprap Kristus penge ngeboda, Galilea mutu neitamai di yasetu do? Ada men kupmanto. 42Allah upu sekamseia neitamai di ware peserur do? ‘Nimi Lyemna Deiyo Ngebo, Kristus yankamre,’ penge ngeboda, ‘Daud er yala nengdi deipkamenge.’ Tonda, ‘Nun apu bo Daud, er kuramu mutu sisa, Betlehem mutu di yankamsere,’ perura cadi, angebo Yesusda, ware kuprap Kristus kuptu do? Angeda gume,” pepi.
43Ange utopu sun kange wang-wang pepupa, Yesus tep nimi bokra, ton neng yuk, ton neng yuk, upu yuk-yuk penmaiya cadi, kange yuk-yuk tenepi. 44Ton nengdi, ‘Yesus tomopra ateng kouptepe,’ tenenmai dinin, tenpu ngebo peda, Yesus er nong men taleproi.
Yahudi yala deiyo nengdi Yesus tep, teka men tenepi upu
45Sun yuma Allah er si eremna ati damaipu dakunmaipane, sun arup dokotepmai neng, Allah karerbarami ati kalengna tep, jen talena neng tamupra, sun Farisi neng cap, Allah karena tep deiyo neng cap, sun damai tamupra bei. Beipa, adeiyo nengdi asipetepi. “Sun dano, warya tep Yesus tomopra men denmaserum do?” pepra wenepi. 46Wenepipa, ajen talen nengdi, “Gume, angebo pere upuda, pio mambule. Yuk neng yumada, er peretopu pio men peramsei,” pepi.
47Upepipa, sun Farisi nengdi yu kupupa, tamupra pepi. “Erdi mawa upu deiki pepmaupa, sundi mok keca tep konum teka tenepmarumdi pepserum do? 48-49Sun tenepetepso. Nun Farisi neng cap, nun Yahudi yala deiyo neng capdi, er tep teka tenenup do? Gume, teka pio men tenenup dinin, amutu tali wekmang nesalada, sunda kange douna gum nesala kununge. Sunda Musa sekeiamu upu yumada, pio men kael kemami. Sunda yuk nengdi aneng tep, ‘Mutana talepkamre’ tenen, benepya deiki di, anesaladi Yesus tep teka tenenunge,” pepi.
50-51Sun Yahudi yala deiyo nengdi aupu pepipa, Nikodemus puda, sun kankan kuramu ngebo, sun pelpu doramu ngebo dinin, er menmena taru Yesus damai inipra asimbeu ngebodi aupu pepu. “Ne kayapu, Allahdi peipupa, Musadi sekeiamseu upu, nun talenup mem upuda, ‘Nimi tali lupra potamna telepe,’ peserur do? Agum dingeda, ‘Popkamep,’ tenepmarum ngebo, er upu lap peprepa, gekepmumyopda, adeiki dipu, ‘Mali kupunge ake’ tenen, ‘Upu bongdina telepe,’ peserur do?” pepra, Nikodemusdi asipetepu.
52Nikodemusdi, sun awekmai Farisi neng tep upepupa, sundi tamupra er tep pepi. “Kan peda Galilea mutu ngebo kumemya deiki di pepserem do? Allah upu sekaminge moupra dipetepmemdi, kael kepkamreme. Aupu neitamaida, ‘Allah upu lap pena deiyo ngebo, nabi ngebo Galilea mutu neitamai di yankamsere,’ men peserure,” pepra wenepi. 53Upepra wenepipa, sun yuma yuk-yuk sun ati tamupra bei.
S'ha seleccionat:
Yohanes 7: KNTOT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
©2022 Wycliffe Bible Translators, Inc