यूह 16
16
1तमरो बिश्वास जन घटउ भणबर मइले यिन सब कुरणी तमनलाइ भण्या हु। 2तिननले तमलाइ यहुदि सभाघर बठेइ निकाल्दिन्या हुन। वास्तवमि यिसो समय आउनाछ, जब तमनलाइ हत्या अद्द्याले परमेश्वरको सेवा अद्दउ भणि माणन्छ। 3तिननले यिन काम अद्देहुन, क्याकि तिननले पितालाइ पछेण्या आथिन रे मलाइ लगइ पछेण्नाइन। 4पइ यिन कुरणी मइले तमनलाइ बताइराइछु कि जब त्यो समय आउँछ, तब तमनलाइ कि भण्याथ्या त्यो तमनलाइ सम्जना हुन्या हो। जब तमनले मलाइ पछ्याउन सुरु अर्याथ्या तइ बेला मइले यिन कुरणी भणेइन, क्याकि म तमनसित थ्या।
पबित्र आत्माका काम
5आब म मलाइ पठाउन्या वाँ जान्नार्याउ, तर तम काँ जान्ना छौ? भणबर तमन कोइलगइ मलाइ सोद्दानु। 6रे मइले तमनलाइ यिन कुरणी भण्या हुनाले तमन भौत उदास भइरइछौ। 7पइलगइ म तमलाइ सत्य कुरणी भण्नउ, म जानाइमि तमरो हित छ। क्याकि म गएइन भण्या, सायता अद्द्या पबित्र आत्मा तमरा वाँ आउन्या आथिन। तर म गया भण्या उनलाइ तमरा वाँ पठाइ दिनउ। 8पइ जब उन आउनाहान, उनले संसारका मान्सन पाप, धार्मिकता रे न्यायका बारेमि गलत छन भणि धेकाउन्या हुन। 9उनले तिननलाइ पापका बारेमि धेकाउन्या हुन क्याकि तिनन मलाइ बिश्वास अदाइन। 10धार्मिकताका बिसयमि, क्याकि म पिता वाँ जानउ, रे तमन मलाइ आजी धेक्द्या होनु। 11रे उनले न्यायका बारेमि धेकाइ दिनाहान, क्याकि यइ संसारका सासक सैतानलाइ दण्ड आज्ञा भइ सक्या छ।
12मइले तमनलाइ आजी भौत कुरणी भण्न चाहानउ, तर अइल तमन तिन कुरणी बुज्जु सक्दाहान। 13जब उन, अर्थात पबित्र आत्मा आउनाहान, तब उनले तमनलाइ त्यो सत्यको बारेमि सम्जिनाइलाइ एक कारण बन्या छ। क्याकि उन आफना अधिकार बठेइ बोल्या होइन। उन जी परमेश्वर बठेइ सुण्नाहान, तेइ बोल्ल्याहुन, रे हुनाइ आउन्या कुरणी तमनलाइ बताइदिनाहान। 14उनले मेरो महिमा अद्देहुन, क्याकि जी उनलाइ म बठेइ मिल्या छ, उनले तेइ बताउन्या हुन। 15जी-जति पितासित छन, तिन मेरा हुन। तबइकिलाइ मइले भण्या, जी मेरो हो त्यो म बठेइ लइजाइबर आत्माले तमनलाइ बताइदिन्याहान।
16थोकाइ बेर पछा तमनले मलाइ धेक्द्या होनु, तर थोकाइ बेर पछा आजी मलाइ धेकन्छौ।
शिष्याको सोक आनन्दमी बदलियो
17तब उनरा कसइ कसइ शिष्यले एक अर्खासित भण्यो, “उनले हामलाइ यो कि भण्या हो? ‘थोकाइ बेर पछा तमन मलाइ धेक्द्या होनु’, तर आजी थोकाइ बेर पछा तमन मलाइ धेकन्छौ, रे ‘क्याकि म पिता वाँ जान्नार्याँउ’।” 18तिननले भण्यो, “उनले ‘थोकाइ बेर’ भण्या कि हो? हाम जाँण्नाइन, उन कि भण्ना छन।”
19तिननले उनलाइ सोद्दाइ मन अरिराइछ भण्या येशूलाइ था होइय्यो, रे उनले भण्यो, “थोकाइ बेर तमन मलाइ धेक्द्या होनु, तर थोकाइ बेर पछा मलाइ आजी धेकन्छौ भण्नेइ कुरणीको अर्थ कि रइछ भण्न्या बारेमि कि तमन आपसमी बहस अद्दाछौ? 20साँच्चि, म तमनलाइ भण्नउ, म मर्या पछा तमन रुन्या हौउ रे बिलाप अद्द्याहौउ, तर संसारका मान्सन रमाउन्या छन। जब तमन मलाइ जिउनो धेक्द्याछौ, तब तमरो सोक आनन्दमी बद्लिन्या हो। 21जब एक स्वानिको प्रसव बेथाको समय आउछ, उ भौत पीडामी हुन्छे। क्याकि तइको बेला आया हुन्छ, तर जब तइले बालक जन्माउछे, तब तइलाइ तइ दु:ख याद आउनैन क्याकि संसारमी एक बालक जन्म्यो भण्नेइ कुरणीमि त्यो खुशी हुन्छे। 22यिसेरी अइल तमनलाइ दु:ख हुन्या हो, तर म आजी तमनलाइ धेक्दे हु, रे तमन आनन्दित हुन्या हो। कसइले लगइ तमरो आनन्द तमन बठेइ खोसीबर लैन्या आथिन। 23तइ समय तमनले मलाइ केइ सोद्द्या होनु। साँच्चि, म तमनलाइ भण्नउ, तमनले पितालाइ मेरा नाउँमि जी मागला त्यो उनले तमनलाइ दिन्या छन। क्याकि तमन मेरा शिष्या हौ। 24अइल सम्म तमनले मेरा अधिकारमि पितासित केइ माग्या आथिनऊ। माग, तमनलाइ दिइन्या हो। यिसेरी तमरो आनन्द पुरा होइजाउ।
25यिन कुरणी मइले तमनलाइ कथामि भणिराइछु। तर समय आउनाछ, जब म तमनसित आजी कथामि बोल्ल्या आथिन, तर पिताको बारेमि तमनलाइ सफासित बताउनउ। 26तइ समय तमन मेरा अधिकार बठेइ पितासित मागन्छौ। म तमरा निउति पितासित प्रार्थना अरिदिनु पडइन। 27क्याकि मेरा पिता आफइ तमनलाइ प्रेम अद्दाहान, क्याकि तमनले मलाइ प्रेम अर्या छौ, रे म परमेश्वरका बठेइ आया हु भणि बिश्वास अर्या छौ। 28म पिता बठेइ संसारमी आया हु, रे आजी म संसारलाइ छाडिबर पिता वाँ जान्नार्याँउ।”
29उनरा शिष्याले भण्यो, “आब तम सफा बोल्लाछौ, कथामि होइन। 30आब हामले बुज्या, तम सब कुरणी जाणन्छौ, रे तमलाइ कसइले सोद्दाइ जरुडी आथिन, तबइलाइ हाम बिश्वास अद्दाउ, कि तम परमेश्वर बठेइ आया हउ।”
31येशूले तिननलाइ जबाफ दियो, “कि तमन आब बिश्वास अरन्छौ? 32हेर, समय आउनाछ, साँच्चीमि आइय्यो, जब तमन छाडिबर आफना ठाउँमि जान्छौ रे मलाइ एकलोइ छाडन्छौ। पइलगइ म एकलो आथिन, क्याकि पिता मसित छन। 33मइले तमनलाइ यिन कुरणी यइ उइले भणिराइछु, कि तमन मेरा शिष्य भया हुनाले ममि तमनलाइ सान्ति होइजाउ। संसारमी तमनलाइ संकट हुन्या छ, तर साहास अर, मइले यइ संसारको सासक सैतानलाइ जितिराइछु।”
S'ha seleccionat:
यूह 16: DTYNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Dotyali (डोटेली) New Testament, by The Love Fellowship is licensed under Creative Commons Attribution-ShareAlike 4.0 License.