Lóka 8
8
Ɓake nde ɗáɓámɓǐ Yéso
1Mbusa á wa, Yéso áoga ka ntanga-nji na ka nji nɛngbo abɔbɔa. Kó, áɔ̌tɔmiaga ɓakpa na phɛá aɓɔ, Mbino-Ánjá á koɓoamɛ ndea Mokonga. Ɓagoigi nkama na ɓaɓɛ (12) ɓáotamba kimoci na yɛ. 2Ɓake moci-moci ɓâ phɔtɔ omɓea Yéso. Ɗáɓátú ka ɓundɔ Yéso ɗéamisi ka kukuwa ɗanga-ɗanga na kukuwa á ɓansombo. Sɔsɔɓɛ aɓɔ ɗáɓátú: Malía nseka á ka Magadála, mmbɔ ɓansombo ngianjaga iɓɛ (7) ɗáɓánjúani, 3Yɔána nka Kúja ímbɔ mɛna-moangɔ á nkumba á k'éndu ndea Moamɛ Ɛlɔ́dɛ, Sujána na ɓake ɓuangbo ɓásii ɓâ phɔtɔ omɓea Yéso. Ɓɔbu ɗáɓáphúi imɔna na nkumba nɛɓɔ, ɓáǒúnaneaga ně Yéso na ɓagoigi nɛkɛ.
Mɛní á mmisi-mbó
(Ɔna phɔtɔ Mat 13.1-9; Mkɔ 4.1-9)
4Cɔ, usɛsɛ ángbó á ɓakpa ɓáodondanaga na ɓátóki ka ntanga-nji ɗanga-ɗanga, ɓáoga mɔtɛ á Yéso. Ɓî ɗáɓádondanigi ye, Yéso áɔ̌tɔmia mɛní ndee: 5«Nkpa moci ɗágéomisia mbó ka ciko nɛkɛ. Mbenɔ nde ɗáokona mbó ndɔ, nɛngbo áogua k'aphe. Ɓanyɛ́nyi k'aphe ɓáɔɗɛtɛaga, ɓambǔ ɓáoea ú. 6Nɛngbo â phɔtɔ ogua gǔ á oɗo, ɛtɛ n'akusi í. Mbó kau atɛi tɔ, áɔɔmɔkaka, ka nyɔngɔ nde, oɗo ndɔ ɗákátú n'iɓo. 7Nɛngbo â phɔtɔ ogua sɔsɔɓɛ á ngenge, áɔtɛa kimoci na ngenge ndɔ. Kaɓondɔ, ngenge áophiphisa. 8Nɛngbo â gǎkɛ ogua ka oɗo ánjá. Áɔtɛa, áɔgɔmbisa. Mbó moci áɔgɔmba ejoko á mbuka mia moci (100).» Wa, Yéso áoɗáphisa ɛsɔ akɛ, áogea ɓe: «Cɔ, mmbé ana kecue á ɔkapha, ambe áɔ́kɛ!»
Yéso ɗáɔtɔmiaga nyɔngɔ ka mɛní ka ɓo?
(Ɔna phɔtɔ Mat 13.10-17; Mkɔ 4.10-12)
9Mpɔ, ɓagoigi ndea Yéso ɓáomúsia: «Cɔ, kantíti á mɛní ndɔ a ɓo?» 10Yéso â gǎkɛ ǒsikisia: «Ɓenu ɓáunge Mokonga anoúbisi nyɔngɔ á ɓɔsɔmɛa á ka koɓoamɛ ndeakɛ. Ɓakpa ɓunɛngbo gǎkɛ, ɓá tɔ ɔɔ́ka ka mɛní, ka gea te:
‹Ɓáɔɔnjia, ɓákáɔnɛ,
ɓáɔɔ́ka, ɓákáengekisɛ#Ɔna Isa 6.9.›»
Kantíti á mɛní á mmisi-mbó
(Ɔna phɔtɔ Mat 13.18-23; Mkɔ 4.13-20)
11Cɔ, kantíti á mɛní ndɔ a ɓe: Mbó ndɔ ande Nyɔngɔ á Mokonga. 12Ɓakpa ɓuangbo ɓá ɓea mbó ndɔ ɗágu k'aphe. Ɓáɔɔ́ka Nyɔngɔ á Mokonga. Nketi â gǎkɛ otókisa ka měma aɓɔ, ka gea ɓákáɓeekeɛ na ama ka měma. 13Ɓuangbo ɓá gǎkɛ ɓea mbenɔ nde mbó ndɔ ɗágu ka oɗo nde á n'ɛtɛ. Ɓáɔɔ́ka nyɔngɔ á Mokonga, ɓáɔbɛɗa ú na maseye. Nyɔngɔ ndɔ kangiɛ ndiu ɓea mǐgi suɓi aɓɔ. Ɓá tɔ oɓeekea ka mbenɔ ábɔa. Aoɓá na ɓáetambisigi tɔ ábɔa, ɓáoɗeketa ú. 14Mbó ndɔ ɗágú sɔsɔɓɛ á ngenge, a ɓea mbenɔ nde ɓakpa ɓáɔɔ́ka Nyɔngɔ á Mokonga. Nyɔngɔ ásii á ka měma, siki á ɓá n'ɛtɔi na ɓongeaga á kema á ka mokonda, áǒphiphisa, ɓákagɔmbɛ ye. 15Nndɔ agu gǎkɛ ka oɗo ánjá, a ɓea mbenɔ nde ɓakpa ɓáɔɔ́ka Nyɔngɔ á Mokonga, ɓáoamba nyɔngɔ kau ka měma ánjá na měma á ɗoni. Ɓɔ gǎkɛ, ɓáoamba Nyɔngɔ ndɔ k'ésa ásii na gɔmbisa á mbuka.
Mɛní á ɔbɛa
(Ɔna phɔtɔ Mkɔ 4.21-25)
16«Nna na nkpa nde aotoɓoa ɔbɛa, áogbukumia ú na mbeka, áɔsɔmɛa kusi á eka. A ndiu otoɓoa ɔbɛa, áɔbɛɛngisa ka ngeɔ, ka gea te ɓunde ɓáongia, ɓáɔnɛ owanga í#Ɔna Mat 5.15; Lók 11.33. 17Nga, nna na ka kema á ɓɔsɔmɛa nde káɔnɛkanɛku. Nna phɔtɔ na ka nyɔngɔ á ɓɔsɔmɛa nde kángoɗokanɛku na úbikana base. 18Kaɓondɔ, ɛngɛphani mbenɔ nde ɓɔɔ́ka nyɔngɔ! Nga, mmbé ana ka kema aámbé ɓáyameande k'ínɛkɛ. Mmbé nna gǎkɛ na ka kema, ɓámutande n'ǐndɔ aně.»
Ekombo ndea Yéso
(Ɔna phɔtɔ Mat 12.46-50; Mkɔ 3.31-35)
19Cɔ, amakɛ na Yéso na ɓana-amakɛ ɗáɓábiki ka ɔna akɛ, ɓákátɔkɛ gǎkɛ bîmisia akɛ ka nyɔngɔ á usɛsɛ á ɓakpa. 20Wa, ɓakpa ɓáobika ongoɗea Yéso ɓe: «Amakɔ na ɓana-amakɔ ɓáunge ɓáiki ka nsɛngɛ, ɓáokonda ɔna akɔ.» 21Yéso â gǎkɛ ǒsikisia: «Ayi na ɓana-ayi, ɓánde ɓundɔ ɓáɔɔ́ka nyɔngɔ á Mokonga na tɔtɔkisa í.»
Ɓukpɛkpɛ á Yéso gǔ á sumbu na kɛtɛmbɔ
(Ɔna phɔtɔ Mat 8.23-27; Mkɔ 4.35-41)
22Ɗái tɔ esa moci, Yéso na ɓagoigi nɛkɛ ɓáokambea ka koko. Áǒngoɗea ɓagoigi nɛkɛ: «Ɓéjabɛni kubi á etǔ#8.22 Wani ande etǔ Galiláya. Ɓakpa nde ɗáɓáiki kuɓî ɗáɓákátú Ɓayúda..» Mpɔ, ɓáojaba. 23Mbenɔ nde ɗáɓáokáia, Yéso áoɗa. Wa, sumbu akpɛ áɔ̌ɓɛta ka iɓo. Iɓo áotúma ka koko, ɓáoɓá bíbí á ina. 24Ɓagoigi ɓáɔnsɛkɛɗɛa Yéso, ɓáonjujukisa, ɓáongea: «Ngoisigi! Ngoisigi! Ɓesi!» Mpɔ, Yéso áojujuka, áokeea sumbu na kɛtɛmbɔ. Bui áɔphɔnga phio! 25Mpɔ, Yéso áǒngoɗea ɓagoigi te: «Cɔ, ɓeekea nɛnu a wa?» Ɓagoigi ɓáoɓá na kɔɓɔɓɔkɔ, ɓáotangaaga, ɓáɔyɔngaga sɔsɔɓɛ aɓɔ: «Nkpa sina mmbé? Aokeea sumbu n'iɓo áɔmɔ́ka ɓende#Ɔna Jab 65.8; 89.10; 107.23-32?»
Ɓukpɛkpɛ á Yéso gǔ á ɓansombo
(Ɔna phɔtɔ Mat 8.28-34; Mkɔ 5.1-20)
26Mbusa, ɓáodunduisa koko ka nji ndea Ɓagɛási#Ɔna Mat 8.28. Nji ndɔ ɗátú kubi á etǔ, n'akɔɔnjiana na Galiláya. 27Ɓî Yéso ɗáokia ka koko, nkpa moci á ka ntanga-nji, áobika odondana na yɛ. Nkpa ndɔ ɗákisi tambaga na ɓansombo kala. Ɗánaɔɔ́la bɔngɔ. Ɗánáoika k'éndu, ɗá ndiu koika ka bóta. 28Ɓî amɔni ye Yéso, áokoga «Hoo!» Áogua k'écinji akɛ, áɔyɔnga n'ɛsɔ akpɛ: «Eke nde ɓe n'oɓɛ kau, Yéso Muna-Mokonga mmbé ana kɔkɔta bui? Neoɗengemisigi, komotambisɛgɛmbɛ!» 29Mpɔ Yéso áǒsosea ɓansombo gea te ɓántokɛ. Nga, ɗáɓántambisigi k'ésa ásii. Ɗáɓáomɓóaga na ngoi á ngɔa ka njaga na k'écinji ka amba akɛ. Yɛ ɗá gǎkɛ otenaga ú. Ɓansombo ɗáɓáɔnsɔndɔɛa ka nkanda.
30Cɔ, Yéso áomúsia te: «Ina akɔ ande eke?» Áonsikisia: «Ina ani ande Ekombo á ɓato émani.» Ɗági ɓo nga, ɓansombo ɓásii ɗáɓángí suɓi akɛ. 31Ɓansombo ɓáonɗengemisaga Yéso te: Aoɓá n'osóɓǐgi, kǒsososeɛmbɛ ɓégɛ ka Mininga. 32Wandɔ, nsamba ángbó á ɓangɛa#Ɔna Mkɔ 5.11 ɗáɓátúoeaga ka mamba. Kaɓondɔ, ɓansombo ɓáonɗengemisaga Yéso gea, ésoseɛ ɓángiɛ suɓi á ɓangɛa ndosii. Yéso áǒsosea. 33Mpɔ, ɓansombo ɓáonjuana nkpa ndɔ, ɓáongia ka nsamba á ɓangɛa. Ɓangɛa ndɔ ɓáoga mbangɔ ka dida á mamba, ɓáondia k'étǔ.
34Ɓaɓondigi-ɓangɛa ɓunde ɗáɓátú wa, ɓî ɓáɔni ye ɓó, ɓáotea. Ɓáoga mbangɔ, ɓáoga ɔtɔmiaga nyɔngɔ ndɔ ka ntanga-nji na ka nji abɔbɔbɔa. 35Ɓakpa ɓáobika ɔɔna kema nde ɗágeani. Ɓáɔmɔna Yéso na nkpa ndɔ ɓansombo ɗáɓánjúani, n'aiki k'écinji á Yéso. Ɗáɔ́li ye tɔ bɔngɔ ánjá, â ye tɔ oúbapha. Ɓunde ɓákiɗi, ɓáoɓá na kɔɓɔɓɔkɔ. 36Ɓundɔ gǎkɛ ɗáɓáɔni nyɔngɔ ndɔ bui, ɓáɔ̌tɔmiaga ɓakpa ɓuangbo aphe nde nto á ɓansombo ndɔ ɗáami kau.
37Wa, ɓakpa ɓɔbu á ka nji á Gɛási, ɓáongodea Yéso ágɛ nga, ɗáɓátú na kɔɓɔɓɔkɔ phɛɛ. Kaɓondɔ, Yéso áokambea ka koko, áoga. 38Mbenɔ á mɛa akɛ, nkpa ndɔ ɓansombo ɗáɓánjúani, â gǎkɛ onɗengemisaga Yéso gea te, ɓágɛ kimoci na yɛ. Wa, Yéso â ndiu onjisa, áongea: 39«Gǎ mɔtɛ-akɔ, ɔ́gɔtɔmiɛgɛ nyɔngɔ bui nde Mokonga agi k'óɓɛ.» Nkpa ndɔ áoga. Áɔtɔmiaga ka ntanga-nji bui, kema nde Yéso agi ka phɔakɛ.
Ɓukpɛkpɛ á Yéso gǔ á kukuwa
(Ɔna phɔtɔ Mat 9.18-26; Mkɔ 5.21-43)
40Ka ja á Yéso na Gɛnɛsalɛ́ti, usɛsɛ á ɓakpa ɗáɓábiki onsesea nga ɓɔbu ɗáɓáomɓondeaga. 41Ɓî akiɗi ye, nkpa áogua k'écinji á Yéso. Ina akɛ ɗátú Yaílɔ, n'ande mɔkɔta éndu á madondanɔ ndea Ɓayúda ka nyɔngɔ á Mokonga. Cɔ, áonɗengemisaga Yéso te ángiɛ k'éndu nɛkɛ. 42Nga, ɗátú tɔ na nseka nɛkɛ moci n'ana ɓasaga nkama na ɓaɓɛ (12), yɛ ɗáoɗúsukanaga. Mbenɔ nde Yéso ɗáoga kuɓei, usɛsɛ á ɓakpa áɔmɓɔkanisa.
43Wa, nke moci ɗátú na kukuwa-ɛ́yɛna#8.43 kukuwa-ɛ́yɛna: ɗátú kukuwa nde ɗá gǎkɛ ɔnjɔɔkisa nke ɓindɔ ɓeotanga ka Ɓlw 15.25 ka ɓasaga nkama na ɓaɓɛ (12). Ɗágɔɓi nkumba na imɔna nɛkɛ bui mɔtɛ á ɓasaku. Kaɓɛ na ka ɓɔ nde ɗátɔki amisa akɛ. 44Cɔ, nke ndɔ áombîmisia Yéso ɓí na ngɔngɔ, áodunga ɛɔkɔ á bɔngɔ nɛkɛ, kɛ̌kɛndɔ tɔ, kukuwa ndɔ áontenekeana. 45Yéso â gǎkɛ oúsia: «Ani mmbé amogbondu?» Ɓakpa ɓɔbu ɓáongána. Pɛ́tɛɛ áonsikisia te: «Ngoisigi, cɔ, usɛsɛ á ɓakpa ɓáotimbi ndiu na ɓɔkanisa akɔ!» 46Yéso â ndiu ogea: «Ka ɓakpa amogbondu tɔ. Nga, n'ɛ̌yɔki ka ɓukpɛkpɛ n'amotóki.»
47Nke ndɔ ɗáɔni ye gea te, nnaɔtɔka n'ɛ̌sɔmɛani, áobika mosá á Yéso n'aɔkpɔkpɔmaga. Áogua k'écinji akɛ. Áɔtɔmiaga ka nkíndí á ɓakpa ɓɔbu kema sina nde atónteki ángbondoɛ Yéso ka gea te áamɛ. Na ɓî ɗáami tɔ mɔngɔ ímoci. 48Mpɔ, Yéso áongoɗea: «Nseka nɛmɔ, ɓeekea nɛkɔ akoamisi. Gǎ ka ɓujɛjɛ.»
49Yéso n'a phɔ́tɔ ɔyɔnga, ntɔmi-mbino moci áokiɗia n'atóki k'éndu á moamɛ á endu á madondanɔ ndea Ɓayúda ka nyɔngɔ á Mokonga. Áongoɗea Yaílɔ: «Cɔ, nseka nɛkɔ aku. Kɔ́nɛisɛgɛmbɛ ye Ngoisigi.» 50Ɓî Yéso amɔ́ki ntɔmi-mbino, áongoɗea Yaílɔ te: «Kóɓɛmbɛ na kɔɓɔɓɔkɔ. Ɓá tɔ na ɓeekea, nseka nɛkɔ aamande.»
51Mbenɔ nde akiɗi ye mɔtɛ á Yaílɔ, Yéso â tɔ oɓeekea gea, Pɛ́tɛɛ, Yoáni, Yakɔ́ɓɔ na ɓaɓɔkɔti á nseka ndɔ tɔ ɓáunge ɓángiɛ k'éndu. 52Ɓî ɓakpa ɓɔbu ɗáɓáongámea miki na ika ka kekusa akɛ, Yéso áǒngoɗea: «Ɓókógámɛmbɛ! Nga, káku. A ndiu ka tɔ̌.» 53Ɓakpa ɓâ gǎkɛ ɔntɛbɛa nga ɗáɓáúbi gea, aku tɔ ɗoni. 54Mpɔ, Yéso áɔmbɛɗa nseka ndɔ ka njaga, áɔyɔnga n'ɛsɔ akpɛ gea: «Cɔ, miki, ómesia!» 55Kɛ̌kɛndɔ tɔ, měma akɛ áoja, miki áǒmesia. Yéso áososea gea, ɓámophɛ eea. 56Wa, ɓaɓɔkɔti akɛ ɓáotangaaga phɛɛ. Aunge Yéso aengoɗi te, ɓákántɔmiɛmbɛ nkpa nyɔngɔ nde ɗányɛ́nyi.
S'ha seleccionat:
Lóka 8: KMW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2021, Wycliffe Bible Translators, Inc.