Matáyɔ 5
5
Yéso aogoisaga gǔ á mamba
1Mbenɔ nde Yéso ɗáɔni usɛsɛ á ɓakpa, áoɗapha gǔ á mamba, áoika kó. Ɓagoigi nɛkɛ ɓáɔsɛkeɗa bíbí akɛ, 2mpɔ áokpanga goisaga aɓɔ ɓe:
Ɓɔjɛmɛ á ɗoni
(Ɔna phɔtɔ Lók 6.20-23)
3«Maseye ka ɓundɔ ɓá na ɓuyɛnɛ á ka měma ka nyɔngɔ nde koɓoamɛ á na koba ande aɓɔ! 4Maseye ka ɓunde ɓáogáma, ka nyɔngɔ nde Mokonga aɛkɔmbɛande iɓo á ngamɔ! 5Maseye ka ɓato-aphɔngɔ, ka nyɔngɔ nde ɓátɔande mokonda nde Mokonga ɗɛ́ɓɔku. 6Maseye ka ɓunde ɓá na nja n'ɛnyɔta á koɗoni, ka nyɔngɔ nde ɓákutande. 7Maseye ka ɓunde ɓáǒkuia ɓadaɓɔ ngomi, ka nyɔngɔ nde Mokonga aékuiande phɔtɔ ngomi. 8Maseye ka ɓato á měma ánjá, ka nyɔngɔ nde ɓámɔnande Mokonga. 9Maseye ka ɓunde ɓáobikisa ɓujɛjɛ, ka nyɔngɔ nde Mokonga aɛɓɔphanande ɓɔ, ɓ'anakɛ. 10Maseye ka ɓunde ɓakpa ɓáǒtambisaga ka nyɔngɔ á koɗoni nga, koɓoamɛ á na koba ande aɓɔ. 11Maseye ka ɓenu, mbenɔ nde ɓáonóbóma, ɓáonótambisaga, ɓáonógeea ájeɗe na ɓátekea anu na nyɔngɔ á mbɛa ka nyɔngɔ ani. 12Gúani jaí na maseye, ka nyɔngɔ nde ɛkɔmi nɛnu ángbó ana koba. Nga, ɓondɔ unge ɗáɓáetambisigi ɓaɔtu-nyɔngɔ ndea Mokonga á mosá anu.#Ɔna 2 Nyɔ 36.16; Eku 7.52
Mɔnɛi na owanga
(Ɔna phɔtɔ Mkɔ 9.50; Lók 14.34-35)
13Ɓonde mɔnɛi á ka mokonda. Cɔ, aoɓá mɔnɛi na nna ɔɛkɛmisa, ɓábisande kema sina kau ka gea áɛkɛmisɛ? Nna ye na kantíti. Akeni maka í ka nsɛngɛ, ɓakpa ɓáɗɛtɛɛgɛ.
14Ɓonde owanga á ka mokonda. Ntanga-nji nde ɓáphɛ̌ki gǔ á mamba, nnaɔtɔka nɛ̌sɔmɛani. 15Ɓákáotoɓoa ɔbɛa ka bisa kusi á mbungu, ɓá ndiu obisa ka ngeɔ ka gea te, ábɛnyɛ ka phɔa ɓakpa ɓunde ɓá suɓi éndu. 16Kaɓondɔ, ambe owanga nenu ábɛnyɛ mosá á ɓakpa, ɓáɔnɛ ekuma nɛnu na ánjá. Mpɔ ɓámbebɛ Abanu mmbɔ á na koba.
Ɓɔphɛi ka nyɔngɔ ɛ́ɔphi
17Ɓókokanisiɛmbɛ gea nebiki ɔngbɔa ɛɔphi ndea Mósa na ɓɔphɛi ndea ɓaɔtu-nyɔngɔ ndea Mokonga. Kébiki k'aphe á ngbɔa í. Nebiki ndiu k'aphe á kpeengeanisa í. 18Nenóngoɗi ɗoni gea te, mosá á sungiaga á koba na mokonda, nna tanda na miki á nyɔngɔ moci kaɓɛ phaeka í, nnde aimikande k'ɛɔphi na ka ɓî nyɔngɔ bui atɔtɔkɛanande. 19Cɔ, nkpa nde aotingiaga ka ɓaniki ɛ́ɔphi nde, na phɛá á ɓadakɛ gea ɓágeɛ phɔtɔ ɓó, aɓande miki á nkpa ka koɓoamɛ ndea Mokonga. Nkpa nde a gǎkɛ oamba ú, na phɛá ɓadakɛ gea ɓágeɛ phɔtɔ ɓó, aɓande mokongo á nkpa ka koɓoamɛ á na koba. 20Nenógie, akoɓá koɗoni anu na kányɛ́nyi nnde á ɓaɗundu-ɛɔphi na Ɓaphaisáyɔ, ɓókóngiɛku ka koɓoamɛ á na koba.
Ɓɔphɛi ka nyɔngɔ á esúia
21Ɗóɓoɔ́ki gea, ɗáɓáengoɗi ɓatatasu te: Kommowɛmbɛ nkpa#Ɔna Tɔl 5.17 nga, mmbé aommowa nkpa, ɓánjúsande ka ntua á tena á nyɔngɔ. 22Cɔ, eme nenóngoɗi ɓe: Nkpa buakɛ mmbé aɔmɓɛɛa dakɛ, akeni ɓánjusɛ ka ntua á tena á nyɔngɔ. Mmbé aombóma dakɛ te: ‹Kóúbapha!›, akeni júsa akɛ ka ntua ángbó á tena á nyɔngɔ ndea Ɓayúda. Mmbé aongea dakɛ te: ‹Ona ganja!›, akeni ɓámmakeɛ k'ɛɛmbɛ á nsa nnde nnaoimika. 23Aoɓá n'obiki na ɛkɔmi nɛkɔ k'ɛtɛ-ɔ́phɛ́ɔ, n'okanisi te dakɔ ana nyɔngɔ n'oɓɛ, 24akeni óɗeketɛ phɔ́ ɛkɔmi nɛkɔ mosá á ɛtɛ-ɔ́phɛ́ɔ, ógɛ ɔ́ɓɔngisiɛgɛ nyɔngɔ nɛkɔ na dakɔ. Mpɔ ósikianɛgɛ goto ka gǎ opha á Mokonga ɛkɔmi kau.
25Aoɓá n'ona nyɔngɔ na nkpa, kamisaga ɔ́kana na yɛ na ɓo phɔ́tɔ k'aphe. Ka gea te, kakojúsɛmbɛ mɔtɛ á nteni-nyɔngɔ na nteni-nyɔngɔ kákobisɛku ka njaga á nto-émani ka gea kakomakeɛmbɛ suɓi á mekakɔ. 26Nekongoɗi ɗoni, kótókɛku kó na kógɔɓɛi phenda imɔna bui nde ajigi.
Ɓɔphɛi ka nyɔngɔ á otungɔ
27Ɗóɓoɔ́ki ɓî ɗáɓáyɔngi gea te: ‹Kotunganɛmbɛ mɔnɔ#Ɔna Jua 20.14; Tɔl 5.18.› 28Eme nenóngoɗi te: Nkpa buakɛ mmbé aɔmɔnjia nke n'íso ótungɔ, agɔɓi ye n'anɛɓɛi nke ndɔ ka měma.
29Aoɓá iso akɔ á nci á mǔku aunge aokongisa ka ɓojeɗe, ambe óphongotɛ ú, ómakɛ ɗanga n'oɓɛ. Akeni ɓúngisa gbútuka moci á nyama, kángá á makea á nyama akɔ bui k'ɛɛmbɛ á nsa nde nnaoimika. 30Aoɓá njaga akɔ á mǔku aunge aokoɓoteaga ka ɓojeɗe, tena ú cé! Ómakɛ ɗanga n'oɓɛ. Akeni ɓúngisa gbútuka moci á nyama, kángá á makea á nyama akɔ bui k'ɛɛmbɛ á nsa nde nnaoimika.
31Ɗáɓági te: ‹Nkpa nde aon'yá nkakɛ, akeni ámophɛ nke ndɔ ɓaoɓa á keyé#Ɔna Tɔl 24.1.› 32Cɔ, eme nenóngoɗi gǎkɛ te, aoɓá nkpa n'an'yé nkakɛ na kátungani#Ɔna Ɓlw 18.6-18, antunganisi ye tɔ, aoɓá n'aɔmani goto. Aoɓá nkpa n'amɓu nke nde ɓán'yé, atungani phɔtɔ.
Ɓɔphɛi gǔ á ɔphá á nyɔngɔ
33Ɗóɓoɔ́ki ɓî ɗáɓáengoɗi ɓatatasu te: ‹Kɔɔphɛ mɔnɔ ka mbɛa. Tɔtɔkisa ndiu ɔphá nɛkɔ mosá á Mɔkɔta#Ɔna Mɔɔ 30.3; Tɔl 23.22-24.› 34Eme nenóngoɗi gea, ɓókokengisiɛmbɛ ɔphá: Ɓɔ́kɔɔphɛ mɔnɔ k'ína á koba nga, ande kankaanga á koɓoamɛ ndea Mokonga, 35tanda ka mokonda nga, ande ɔma á bisa ecinji akɛ, tanda ka Yɛusalɛ́ma nga, ande ntanga-nji ndea Moamɛ angbóngbó. 36Kɔ̌yɔphisanɛgɛ mɔnɔ sasakɔ. Nga, kɔ́ɔtɔka n'okěti ka sɛkamɔ̌ akɔ ka ɓá ábusǔ kaɓɛ índa. 37Aoɓá n'oɓeeki, ɓeekea ka ɗoni. A gǎkɛ oɓá n'ongani, ngana ka ɗoni nga, nyɔngɔ nde aobika gǔ índɔ aotóka ka Nketi.
Ɓɔphɛi gǔ á gisia
(Ɔna phɔtɔ Lók 6.29-30)
38Ɗóɓoɔ́ki ɓî ɗáɓáyɔngi gea: ‹Dakɔ aoboma iso akɔ ôboma nɛkɛ, aotena minyɔ akɔ, ôtena nɛkɛ#Ɔna Jua 21.24; Ɓlw 24.20; Tɔl 19.21.› 39Eme nenóngoɗi gǎkɛ te nkpa aokogeeya ájeɗe, kogisiɛ mɔnɔ. Aoɓá n'akɔɓɛti ka ngaga á nci á mǔku, óphaia goto áɔɓɛtɛ k'índe á nci á nkei. 40Aoɓá nkpa n'aɔtɔngi ka uta akɔ ngɔ́mbɛ á k'egogo, nɗeketea phɔtɔ ngɔ́mbɛ nɛkɔ á phiɔ. 41Aoɓá nkpa n'aogi ónkumbiɛ nkumba nɛkɛ ónɗeketeɛ ka kilɔmɛ́tɛɛ moci, gǎ ónɗeketeɛ ka kilɔmɛ́tɛɛ iɓɛ. 42Aoɓá nkpa n'akɔmɛmi kema, mopha ú. Aoɓá n'akondi ɔ́nɛkisɛ, kɔnkpɛmɛɛmbɛ.
Ókondani ɓaɓiɓia nɛnu
(Ɔna phɔtɔ Lók 6.27-28,32-36)
43Ɗóɓoɔ́ki ɓî ɗáɓági te: ‹Nkonda dakɔ#Ɔna Ɓlw 19.18, ónkangeɛ ndiu mɓiɓia nɛkɔ.› 44Eme nenóngoɗi gǎkɛ te: ókondani ɓaɓibia nɛnu, ɓɔ́mɛmɛ ndiu Mokonga ka phɔa ɓundɔ ɓáonótambisaga. 45Ɓoogea ɓó, ɓóoɓá ɓana-Abanu mmbɔ á na koba. Nga, yɛ aɔɓɛtisa maní ka ɓakpa ɓánjá na ɓakpa ɓájeɗe na ɔkisa mbua ka ɓato á koɗoni na ɓunde ɓáká ɓato á koɗoni. 46Aoɓá na ɓǒkondi tɔ ɓundɔ ɓáonókonda, ɓooɓondea ophendɔ ka Mokonga ka ɓo? Ɓaphendisigi-manjanja ɓá phɔtɔ ogea ɓó. 47Aoɓá ɓana-amanu tɔ ɓáunge ɓǒsesea, kema ángbó sina nde ɓoogea? Ɓundɔ ɓánáomúba Mokonga, ɓá phɔtɔ ogea ɓó. 48Cɔ, ɓáni ɓato á kanga kisɛki#Ɔna Ɓlw 19.2; Tɔl 18.13 ɓea Abanu mmbé á na koba kángá kisɛki.
S'ha seleccionat:
Matáyɔ 5: KMW
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2021, Wycliffe Bible Translators, Inc.