Luka 24
24
Iysanıń qayta tiriliwi
(Mat 28:1-10; Mrk 16:1-8; Yuxn 20:1-10)
1Ekshembi kúni tań sáhárde hayallar#Luk 24:1 Bazı qoljazbalarda «…olar menen taǵı basqalar» degen sózler de bar. tayarlap qoyǵan xosh iyisli mayların alıp, qábirge keldi. 2Olar qábirdiń awzındaǵı tastıń domalatıp alıp taslanǵanın kórdi. 3Biraq ishke kirgende, Iyemiz Iysanıń denesin taba almadı. 4Olar buǵan tań qalısıp turǵanda, tosattan jarqıraǵan kiyim kiygen eki adam payda boldı. 5Hayallardıń húreyleri ushıp, basların jerge iygende, eki adam olarǵa bılay dedi:
– Tirini ólilerdiń arasınan nege izleysizler? 6Ol bul jerde joq, Ol qayta tirildi! Galilada bolǵanında, Onıń sizlerge ne aytqanın eslerińizge túsirińler. 7Ol sizlerge: «Adam Ulı gúnakar adamlardıń qolına uslap beriledi, atanaq aǵashqa shegelenedi hám úshinshi kúni qayta tiriledi», – degen edi. 8Sonda olar Iysanıń sózlerin eslerine túsirdi.
9Qábirden qaytıp barǵan hayallar bulardıń hámmesin on bir elshige hám basqa barlıq adamlarǵa xabarladı. 10Bul xabardı elshilerge jetkizgenler magdalalı Máriyam, Yuxanna, Yaqıptıń anası Máriyam hám olar menen birge júrgen basqa hayallar edi. 11Biraq bul sózler elshilerge bos gáp bolıp kórinip, olar hayallarǵa isenbedi. 12Al Petr ornınan turıp, qábir tárepke qaray juwırıp ketti. Ol ishke úńilip qaraǵanda, sol jerde jatırǵan zıǵır kepindi ǵana kórdi. Bolǵan waqıyaǵa tań qalıp, izine qayttı.
Emmausqa baratuǵın jolda
(Mrk 16:12-13)
13Tap sol kúni shákirtlerdiń ekewi Erusalimnen on eki shaqırımday qashıqlıqtaǵı Emmaus dep atalatuǵın bir awılǵa baratırıp, 14bolǵan usı waqıyalar haqqında óz ara sóylesti. 15Olar óz ara sóylesip, pikir alısıp baratırǵanda, Iysanıń Ózi olarǵa jaqınlap, qatar júrdi. 16Biraq olardıń kózleri baylanǵanday bolıp, Onı tanımadı. 17Iysa olardan:
– Sizler óz ara neler haqqında sóylesip baratırsızlar? – dep soradı.
Olar tunjırap toqtap qaldı. 18Arasındaǵı Kleopa atlı birewi Oǵan:
– Erusalimde bolsań da, usı kúnlerde sol jerde júz bergen waqıyalardan hesh xabarı joq, jalǵız Sen shıǵarsań, – dedi.
19Iysa olardan:
– Qanday waqıyalardan? – dep soradı.
Olar juwap berip:
– Nasıralı Iysa haqqındaǵı waqıyalardan. Ol Qudaydıń hám pútkil xalıqtıń aldında isinde de, sózinde de qúdiretli bolǵan payǵambar edi. 20Bas ruwxaniylerimiz benen basshılarımız Onı ólim jazasına hám atanaq aǵashqa shegelewge tapsırdı. 21Al bizler Onı Izraildı azat etedi dep, úmit etken edik. Mine, bul waqıyalardıń bolǵanına búgin úsh kún boldı. 22Bunıń ústine, aramızdaǵı hayallardıń geybirewleri bizlerdi tań qaldırdı. Olar erte tańda qábirge barıp, 23Onıń denesin tappay keldi. Qaytıp kelip, Iysanıń tiri ekenin bildirgen perishtelerdi kórgenin aytıp berdi. 24Jáne bizlerdiń ishimizdegi ayırımlarımız qábirge barıp, anıq hayallardıń aytqanınday ekenin kóripti. Biraq Iysanıń Ózin kórmepti, – dedi.
25Iysa olarǵa bılay dedi:
– Háy, aqılsızlar! Payǵambarlardıń aytqanlarınıń hámmesine shın júrekten isenbeytuǵınlar! 26Masiyx usı azaplardı shegip, Óz saltanatına kiriwi kerek emes pe edi?
27Sońınan Muwsanıń hám barlıq payǵambarlardıń Jazıwlarınan baslap, Muxaddes Jazıwlardıń hámmesinde Ózi haqqında aytılǵanlardı olarǵa túsindirip berdi.
28Olar ózleri baratırǵan awılǵa jaqınlaǵanda, Iysa Ózin jolın dawam etetuǵın qılıp kórsetti. 29Biraq olar:
– Bizler menen birge qal, kún batıwǵa shamalasıp, kesh bolajaq, – dep Onnan ótindi.
Solay etip, Iysa olar menen birge qalıw ushın awılǵa kirdi.
30Olar menen dasturxan basında otırǵanda Iysa nandı alıp, Qudayǵa shúkirlik etti hám sındırıp, olarǵa berdi. 31Sonda ǵana olardıń kózleri ashılıp, Onı tanıdı. Biraq Iysa kózden ǵayıp boldı. 32Olar bir-birine:
– Ol jolda bizler menen sóylesip, Muxaddes Jazıwlardı túsindirgende, júreklerimiz quwanıshqa tolmaǵan ba edi? – dedi.
33Dárriw orınlarınan turıp, Erusalimge qaytıp keldi. On bir elshini hám olar menen birge jıynalǵanlardı taptı. 34Jıynalǵanlar:
– Iyemiz haqıyqattan qayta tirilip, Shimonǵa kórinipti, – desti.
35Sonda eki shákirt te joldaǵı waqıyalardı hám Iysa nandı sındırǵanda, Onı qalay tanıp qalǵanın aytıp berdi.
Iysanıń shákirtlerine kóriniwi
(Mat 28:16-20; Mrk 16:14-18; Yuxn 20:19-23; Elsh 1:6-8)
36Olar usını aytısıp turǵanda, Iysanıń Ózi olardıń ortasında payda bolıp:
– Tınıshlıq sizlerge yar bolsın! – dedi.
37Biraq shákirtler árwaq kórip turmız dep oylap, tań qalısıp, qattı qorqıstı. 38Iysa olarǵa:
– Nege hayran qalıp tursızlar? Nege kewillerińizge bunday gúmanlı oylar keledi? 39Meniń qollarıma hám ayaqlarıma qarańlar. Bul Meniń Ózimmen. Maǵan qol tiygizip kórińler. Árwaqta et penen súyek bolmaydı, biraq kórip turǵanıńızday, Mende bar, – dedi.
40Usını aytıp, olarǵa qolların hám ayaqların kórsetti. 41Al shákirtleri quwanısıp hám ań-tań bolıp, ele isenbey turǵanda, Iysa olardan:
– Bul jerde jeytuǵın bir nárseńiz bar ma? – dep soradı.
42Olar Oǵan pisirilgen balıqtıń bir bólegin berdi. 43Iysa onı alıp, olardıń kóz aldında jedi.
44Sońınan Iysa olarǵa:
– Sizler menen birge bolǵanımda, Men tuwralı Muwsanıń Nızamında, payǵambarlardıń Jazıwlarında hám Zaburda jazılǵanlardıń hámmesi orınlanıwı tiyis, dep aytqan edim, – dedi.
45Keyin Muxaddes Jazıwlardı túsiniw ushın olardıń zeyinlerin ashtı 46hám dawam etip olarǵa bılay dedi:
– Masiyx azap shegip, úshinshi kúni ólimnen qayta tiriledi, – dep te jazılǵan. 47– Erusalimnen baslap barlıq xalıqlarǵa Onıń atı menen táwbe etse, gúnalarınıń keshiriletuǵının járiyalaw tiyis. 48Al sizler bulardıń gúwasısızlar. 49Mine, Men Ákemniń wáde etkenin sizlerge jiberemen. Biraq sizler joqarıdan bul qúdiretti alǵanǵa deyin usı qalada qalıńlar, – dedi.
50Sońınan Iysa shákirtlerin qaladan sırtqa, Betaniyaǵa deyin apardı. Qolların kóterip, olarǵa pátiyasın berdi. 51Pátiyasın berip turǵanda olardan uzaqlasıp, aspanǵa alındı. 52Shákirtler Iysaǵa tájim etip, úlken quwanısh penen Erusalimge qaytıp keldi. 53Qudaydı alǵıslap, hámme waqıt Ibadatxanada boldı.
S'ha seleccionat:
Luka 24: QrqMK22
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© Институт перевода Библии, 2022