यूहन्ना 9
9
जल्मत्तिक आँधर मनैयाहे देख्नाहाँ बनैलक
1जब येशू वहाँसे जाइतिहिँत, तब ऊ एकथो जल्मत्तिक आँधर मनैयाहे देख्लाँ। 2हुँकार चेलनके हुँकिन्हे पुँछ्लाँ, “गुरुजी, यी पाप करल कि यकर दाई-बाबा पाप कर्लिस, केकर पापके कारण यी आँधर#9:2 आँधर; यहूदी गुरुनके मानिँत कि दुःख, आँधर हुइना जसिन चिज पाप कर्लक कारण हुइत; किहुहे ओकर दाईबाबक पापके कारण या पेटमे रहल समयमे दाई या भुणमे रहल बच्चक करल पापके कारण असिन दुःख उठैना परे सेकत। होके जल्मल?” 3येशू जवाफ देलाँ, “ना ते यी पाप करल ना यकर दाई-बाबा, पर परमेश्वरके शक्ति यी मनैयक जीवनमे प्रकट होए कहिके यी आँधर मनैया जल्मल। 4जे महिन्हे पठाइल ओकर काम हम्रे दिन रहले समयमे करदारी। रात आइता, तब केऊ फेन काम करे नै सेकी। 5मै संसारमे रहतसम मै संसारके ओजरार हुइतुँ।” 6यी बात कहिके येशू भुइयाँमे थुक्लाँ, और थुकेलेके माटिक रेपन बनाके ओकर आँखीमे लगादेलाँ। 7तब् येशू उहिहे कलाँ, “जाऊ, और अपन मुह सिलोआमके तलवामे धोलेऊ।” (सिलोआमके मतलब हो, पठागिलक।) तब ऊ जाके अपन मुह धोलेहेल, और वहाँसे देख्नाहाँ होके घुमल। 8ओकर रान-परोसके मनै और दोसुर मनै, जेने उहिहे भीख माँगत देखल रहिँत। ओइने एकदोसर जहनसे कहे लग्लाँ, “का यी वहे नै हो, जे बैठ्के भीख माँगे?” 9केऊ-केऊ कहल, “यी ते वहे हो।” और दोसुरजाने कलाँ, “नै हो, यी ओक्रेहे हस बिल्गाइत।” तब उ आँधर मनैया ओइन्हे कहल, “मै वहे हुइतुँ।” 10तब् ओइने उहिहे पुँछ्लाँ, “ते तैँ देख्नाहाँ कसिके हुइले?” 11ऊ जवाफ देहल, “येशू कना एकथो मनैया माटिक रेपन बनाके मोरिक आँखीमे लगादेलाँ, और महिन्हे कलाँ, ‘जाऊ, और अपन मुह सिलोआमके तलवामे धोलेऊ।’ तब् मै उ तलवामे जाके धुइनु, और मै देख्नाहाँ होगिनु।” 12ओइने उहिहे कलाँ, “उ मनैया कहाँ बताँ?” ऊ कहल, “मै नै जन्थुँ।”
फरिसीनके सोधपुँछ कर्लक
13-14जोन दिन येशू माटिक रेपन लगाके उ आँधर मनैयाहे देख्नाहाँ बनैलाँ, उ बिँसैना दिन रहे। तबेकमारे मनै देख्नाहाँ हुइलक उ मनैयाहे फरिसीनके थेन नन्लाँ। 15फरिसीनके उहिहे पुँछ्लाँ, “तैँ देख्नाहाँ कसिके होगिले?” ऊ ओइन्हे जवाफ देहल, “ऊ मोरिक आँखीमे माटिक रेपन लगादेलाँ, तब् मै धुइनु और देख्नाहाँ होगिनु।” 16तब फरिसीनमेसे केऊ-केऊ कलाँ, “उ मनैया परमेश्वरके ओहोँरसे नै आइल हो, काकरेकी उ यहूदिनके बिँसैना दिन नै मानत।” पर दोसुर जाने कलाँ, “यी पापी रहत कलेसे असिन चमत्कार ऊ कसिके करे सेकत?” तब ओइन्के बिच्चेम मनमुटाव होगिलिन। 17ओइने उ आँधर मनैयाहे फेनदोस्रे पुँछ्लाँ, “ऊ तुहिहे देख्नाहाँ बनादेहल, आब ओकर बारेमे तैँ का कबे?” ऊ जवाफ देहल, “ऊ परमेश्वरके अगमवक्ता हुइँत।” 18देख्नाहाँ हुइलक उ मनैयक दाईबाबाहे नै पुँछतसम यहूदी दलके नेतन ऊ आँधर रहे, और देख्नाहाँ होगिलस कहिके विश्वास नै करलाँ। 19तब् ओइने ओकर दाईबाबाहे पुँछ्लाँ, “का यी तुहुरिन्के छावा हो, जे आँधर जल्मल रहे कहिके तुहुरे कहतो? ते आब कसिके ऊ देख्नाहाँ होगिल?” 20ओकर दाईबाबा ओइन्हे कलाँ, “हम्रे जन्थी यी हमार छावा हो, और आँधर जल्मल रहे। 21पर आब यी कसिके देख्नाहाँ होगिल कहिके हम्रे नै जन्थी, या यिहिहे के देख्नाहाँ बनादेलिस कहिके फेन हम्रे नै जन्थी। यकर अक्किल आगिल बतिस, ज्या पुँछ्ना बा यिहिएसे पुँछो। अपन बारेमे ऊ अप्निहीँ बताई।” 22ओकर दाई-बाबा यहूदी दलके नेतनसे डराँइत। तबेकमारे ओइने असिके कलाँ। काकरेकी केऊ येशूहे ख्रीष्ट हो कहिके स्वीकार करी कलेसे, उहिहे बैठक भवनमेसे निकारे परी कहिके यहूदी दलके नेतन आग्गिहीँ सहमत होगिल रहिँत। 23तबेकमारे ओकर दाईबाबा कलाँ, “यकर थेन फेन ओकर जवाफ देना अक्किल बतिस, यिहिएसे पुँछो।” 24तब् यहूदी दलके नेतन उ आँधर मनैयाहे दोसुरचो बलाके कलाँ, “परमेश्वरके आघे वाचा करके सँच बता। हम्रे जन्थी कि उ मनैया पापी हो।” 25ऊ जवाफ देहल, “ऊ पापी हुइताँ कि नै हुइताँ कहिके मै नै जन्थुँ। पर एक्केथो बात किल मै जन्थुँ कि मै आँधर रहुँ, पर आब देख्नाहाँ होगिल बतुँ।” 26तब् यहूदी दलके नेतन उहिहे कलाँ, “ऊ तुहिहे का करल? ऊ तुहिहे कसिके देख्नाहाँ बनादेहल?” 27ऊ ओइन्हे जवाफ देहल, “मै अप्निन्हे पैलेहेँ बता सेक्नु, पर अप्निनके नै सुन्ली। आब फेनदोस्रे काकरे सुने चहथी? अप्निनके फेन हुँकार चेला हुई चहथी कि का?” 28ओइने उहिहे गरयैती कलाँ, “ओकर चेला ते तैँ हुइते, पर हम्रे ते मोशक चेला हुइती। 29हम्रिहिन्हे पता बा मोशासे परमेश्वर बोलल रहिँत, पर हम्रे नै जन्थी कि उ मनैया कहाँसे आइल।” 30उ मनैया जवाफ देके ओइन्हे कहल, “तब ते महा अचम्मक बात बा! अप्निन्हे पतै नै हो, ऊ कहाँसे अइलाँ, तभुन फेन ऊ महिन्हे देख्नाहाँ बनादेलाँ। 31हम्रे सक्कु जाने जन्थी कि परमेश्वर पापीनके बात नै सुन्थाँ। पर परमेश्वरहे आदर करुइया और हुँकार इच्छा पालन करुइया मनैयक बात परमेश्वर सुन्थाँ। 32जबसे संसारके सृष्टि हुइल रहे, तबसे लेके अभिनसम कबु नै सुनमिलल रहे कि केऊ फेन कौनो जल्मत्तिक आँधर मनैयाहे देख्नाहाँ बनाइल। 33यदि यी मनैया परमेश्वरके ओहोँरसे अइलक नै रताँ कलेसे ऊ कुछु नै करे सेक्ना रहिँत।” 34ओइने उहिहे जवाफ देके कलाँ, “तैँ ते बिरकुल पापमे जल्मल रहिस, और का आब तैँ हम्रिहिन्हे सिखाइते?” तब् ओइने उ मनैयाहे यहूदी बैठक भवनमेसे बाहेर निकारदेलाँ।
आत्मिक आँधर
35जब येशू यी सुन्लाँ कि यहूदी दलके नेतन उ मनैयाहे यहूदी बैठक भवनमेसे बाहेर निकारदेलाँ। तब येशू उहिहे भेँटा करके पुँछ्लाँ, “का तुँ परमेश्वरके छावकमे विश्वास करथो?” 36ऊ जवाफ देहल, “हे गुरुजी, महिन्हे बताई कि परमेश्वरके छावा के हो? ताकि मै हुँकारमे विश्वास करे सेकुँ।” 37येशू उहिहे कलाँ, “परमेश्वरके छावा महिँए हुइतुँ। पैलेहेँ तुँ महिन्हे देख सेकल बतो, और मै वहे हुइतुँ, जे अब्बे तुहिन्से बोलतुँ।” 38तब् ऊ कहल, “हे प्रभु, मै अप्निकमे विश्वास करतुँ।” और ऊ हुँकार आराधना करल। 39तब् येशू कलाँ, “मै यी संसारमे ओइन्के न्याय करे आइल बतुँ: जोन मनै आँधर बताँ, ओइने देख्नाहाँ होजाइँत। और जोन मनै देख्नाहाँ बताँ, ओइने आँधर होजाइँत।” 40यी बात सुनके हुँकार लग्गे रहुइया फरिसीनमेसे केऊ-केऊ हुँकिन्हे कलाँ, “का अप्नि कहती कि हम्रे फेन आँधर बती?” 41येशू ओइन्हे कलाँ, “तुहुरे आँधर रतो कलेसे पापके दोषी नै हुइना रहो, पर तुहुरे ‘हम्रे देख्थी’ कथो, तबेकमारे तुहुरिन्के पाप माफी नै हुई।”
S'ha seleccionat:
यूहन्ना 9: DVGNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Deukhuri (देउखरिया थारु) Bible by The Love Fellowship is licensed under Creative Commons Attribution-ShareAlike 4.0 License.