यूहन्ना 7
7
येशू दाङ येशूगी नो़हया़
1ओ़ह तिङले येशू गालील साने़लाराङ कोरा क्याहप नाङसीन, येशू यहूदीयाला फेप्च्ये थु जे माहनाङ, च्यिबेमाना यहूदीया़गी येशूला सेच्ये छोल्गो येहकें। 2ओहजे काहङला यहूदीया़गी पालीप जे़दी तेहकेन्गी छ्येपा#७:२ पालीप जे़दी तेहकेन्गी छ्येपा : दि छ्येपा यहूदीया़की राहङदी चावाया़ लोह ज़्यिप-च्यु थु रिह-काम्बुला फार छुर पेहती तेहक्यो ती़हजी टेहम्बा साल्ज्येगी तेहन्दाला पालीप जे़दी ओ़ह पालीप नाहङला तेहती छ्येपा ताहङगो येहबा। लेवी २३:३४; व्य १६:१३ लेप्च्ये पेहती येहकें। 3ओ़ह सोङबे येशूगी नो़हया़गी येशूला मासीन, “दि ग्या़ क्युर ज़्या़दी यहूदीयाला फेप नाङदोङ, ओहले राहङगी जेती ज़्य़ू नाङग्योकी छ्या़लेया़ राहङगी स्याहप्च्यीया़गीॱआङ थोङज्यु। 4मिहन छ्यिम्बु थोप्च्ये सेम्बा पेहकें मिहगी नाहमॱआङ राहङगी पेहक्योकी ल़ेहया़ पे़हदी मे़हज्याएँ। ओ़ह सोङबे राहङगीॱआङ याहम्जेन छ्येवागी छ्या़लेया़ जे नाङगेराङ येह ओहले दि ल़ेहमु छ्या़लेया़ राहङगी मिह थाम्ज्यीला तेन नाङदोङ।” 5च्यिबेमाना येशूला राहङगी नो़हया़गीॱआङ यिह मे़हछ्ये येहकें।
6येशूगी खुङया़ला सुङ नाङसीन, “ङाहगी ती़हजी ताहन्दा लेप्ती म़ेह। यिहॱनाङ ख्याया़गी तेहन्दालानी का़हन्दी ती़हजी माॱनाङ ठाबेराङ येहबा। 7जाम्बुलीङगी मिहया़गी ख्याला ङेन्ज्येन पेह मी़हखुएँ, यिहॱनाङ ङाहलादी ङेन्ज्येन पेहकें, च्यिबेमाना ङाहगी जाम्बुलीङगी मिहया़ती डोलु-तेहलुया़ चोक्पा येह म़ेदी पाङबु तेर्के। 8ख्याराङ ओ़ह छ्येपाला सोङ, ङाह मेहन्डो। च्यिबेमाना ङाहती ती़हजी लेप सिहन्दी म़ेह।” 9देजे सुङदी येशू गालील साने़लाराङ ज़्य़ू नाङसीन।
पालीप जे़दी तेहकेन्गी छ्येपा
10यिहॱनाङ येशूगी नो़हया़ छ्येपाला काहल फान्ज्यो सुगीॱआङ माहछोर्पा जेती मिहरोॱआङ फेप नाङसीन। 11छ्येपाला यहूदी गोबाया़गी येशूला छोल्गेराङ येहकें। “येशू का़हला येहबा?” म़ेदी खुङया़गी टी़हगेनॱराङ येहकें। 12मिह मिह-माहङया़गी पाहरक्यीला येशूगी तेहन्दाला माहङबुराङ लोहङडी काहल्सीन। लाहलागी, “खोनी मिह या़हबु यिहम्बा” म़ेदी माउ येहकें ओहले लाहलागीनी, “मिहम्बा, खोनी मिहया़ला गो़ च्यी़राङ कोर च्य़ूएँ” म़ेदी माउ येहकें। 13यिहॱनाङ यहूदी गोबाया़की ज्यी़सुगी पेहती सुज्यीगीॱआङ येशूगी तेहन्दाला ख्याक-क्या़दी ताम मा मी़हखु येहकें।
14छ्येपा छ़ूदी फ़ेचे डोएँमु येशू छ्योखाङ नाहङला फेप्ती सुङ ख्येप्टा नाङज्ये छ़ूसीन। 15ओहले यहूदी गोबाया़गी ज्यिबुराङ ह्अ ल़ेहदी मासीन, “दि मिहगी टा़हॱआङ मा़हटाहबा पेहती दि रोहवा काह-ठि पेहती स्य़ेगे काहल्ग्यो यिहम्बा?” 16ओहले येशूगी खुङया़ला ल़ेहन क्याहप्ती सुङ नाङसीन, “ङाहगी सुङदेन ङाहती मिहन, यिहॱनाङ दि सुङदेन ङाहला ताङ नाङगेन किन्ज्योदी यिहम्बा। 17किन्ज्योकी थु ङ्य़ेबु ल़ेह पेहच्ये छोल्गेया़गी दि सुङदेन किन्ज्यो लाहमले ओहङग्यो यिहम्बानी ङाह राहङ लाहमलेॱराङ ओहङग्यो यिहम्बा माएँ ताम ङोह स्ये़ज्ये येह। 18का़हन्दीगी राहङ ङो़ले ताम माएँ, ओ़हदीगी राहङदीराङ चा़ छ्यिम्बु छोल्गे, माॱनाङ का़हन्दीगी राहङला ताङ नाङग्योदीला चा़ पेहच्ये छोल्गे, ओ़हदी तेहम्बा यिहन, ओहले खोला च्यिॱआङ क्येन म़ेह। 19च्यि मोशागी ख्याया़ला छ्य़े-ठिम नाङग्यो मिहम्बा ले? यिहॱनाङ ख्या सुज्यीगीॱआङ ओ़ह छ्य़े-ठिम मी़हचीएँ दु। ख्याया़गी ङाहला च्यिबे सेच्ये छोल्गे?”
20मिह मिह-माहङया़गी मासीन, “ख्येला ल्हेन्डी स्य़ूहसीन दु, ख्येला सुगी सेच्ये छोल्बा?” 21येशूगी खुङया़ला सुङ नाङसीन, “ङाहगी ल़ेह च्यी़ पेहसीन ओहले ख्या थाम्ज्यी ओ़ह ल़ेहला ह्अ ल़ेहगे। 22मोशागी ख्याया़ला स्या-ताककी ठिम तेर्ती येह (यिहन्ज्येनी ओ़ह मोशा लाहमले मिहम्बा ओ़हदीनी चावाया़ लाहमले यिहम्बा), यिहॱनाङ ख्याया़ थाङ सोएँ ङ्यिहमाला मिहया़ला स्या-ताक पेहकें।#लेवी १२:३; उत १७:१० 23मोशाकी छ्य़े-ठिम माहगोम्ज्यु म़ेदी ख्यागी सुज्यी पेहजा च्यी़ला थाङ सोएँ ङ्यिहमाला स्या-ताक पेह तेर्के माना, ङाहगी मेहन्दा च्यी़ला थाङ सोएँ ङ्यिहमाला खोदी नाहजा थाम्ज्यीराङ टा़ह च्य़ूसीन म़ेदी च्यिबे ख्या ङाह ङ्याम्बु स्यिहताङ पेहकें? #यूह ५:९ 24ख्यागी मिहला ठिम ताङगेमु मिहगी खा त़ेदी मिहम्बा, यिहॱनाङ तेहन्दाम च्यि यिहम्बा ओ़हला ते़बे ठिम टाहङबु पेहती ताङदोङ।”
येशू मास्यीका यिहम्बा?
25यरूशलेमगी लाहला मिहया़गी मासीन, “खुङया़गी सेच्ये छोल्ग्योकी मिहनी दिराङ मिहन ले? 26त़ेदोङ, दि मिहनी ख्याक-क्या़दी गा ताम म़े तेहकु दु, यिहॱनाङ सुज्यीगीॱआङ खोला च्यिॱआङ मेहमाएँ दु! च्यि दि खोराङ मास्यीका यिहम्बा म़ेदी ओहराङ गोबाया़गी तेहम्बा-तेहन्सुमॱराङ यिह-छ्य़ेबानी च्यि यिहम्बा? 27यिहॱनाङ, दि मिह का़हले ओहङग्यो यिहम्बा म़ेदी ओहराङ थाम्ज्यीला क्यी़ह येहबा। यिहॱनाङ मास्यीका फेप नाङगेमु, मिहरो का़हले फेप नाङग्यो यिहम्बा, ओ़ह सुॱलाङ क्यी़ह ओहङज्ये म़ेह।”
28येशूगी छ्योखाङला लोप्केॱराङ जेकेमु, मिह थाम्ज्यीगी थे़गेन पेहती सुङ नाङसीन, “ख्याया़गी ङाहला ङोह स्य़ेएँ ओहले ङाह का़हलेगी ओहङग्यो यिहम्बा, ओ़हॱआङ ख्याया़ला क्यी़ह येह यिहॱनाङ ङाह राहङ सेमगी ओहङग्यो मिहन, यिहॱनाङ का़हन्दीगी ङाहला ताङ नाङबा मिहरोनी तेहम्बा यिहन। ख्याया़गी मिहरोला ङोह मे़हस्येएँ दु, 29यिहॱनाङ ङाहगी मिहरोला ङोह स्य़ेएँ, च्यिबेमाना ङाह मिहरो लाहमले ओहङग्यो यिहम्बा, ओहले मिहरोगीॱराङ ङाहला ताङ नाङग्यो यिहम्बा।”
30ओ़ह सोङबे खुङया़गी येशूला ज़ुङज्ये छोल्सीन, यिहॱनाङ सुज्यीगीॱआङ येशूला लाहक्पा माहक्याहप, च्यिबेमाना येशूकी ती़हजी तोहरोङॱआङ लेप्ती म़ेहबा येहकें। 31यिहॱनाङ ओ़ह मिह-माहङला येहकेन्गी मिह माहङबुगीराङ येशूला यिह छ्य़ेसीन। खुङया़गी मासीन, “मास्यीका फेप नाङगेमु च्यि दि मिहगी पेहक्योगी ताक्छेनया़ म़ेदी माहङबु ता़स्यी मास्यीकागी जे नाङवा ले?”
येशूला ज़ुङज्ये छोल्ग्यो
32ओ़ह मिह मिह-माहङगी येशूगी तेहन्दाला ताम लोहङटी पेह तेहक्यो फरिसीया़गी थ़ेसीन। ओहले पूजाहारी छ्यिम्बुया़ दाङ फरिसीया़गी येशूला जु़ङज्येला छ्योखाङ सुङगेन्गी मिहया़ला ताङसीन।
33येशूगी सुङ नाङसीन, “तोहरोङॱआङ ङ्यिहमा तोबा थु ङाह ख्या ङ्याम्बुराङ तेहच्ये येह, ओ़ह तिङले ङाहला ताङ नाङगे याहप साला ङाह लो़हदी डोज्ये येह। 34ओहजेला ख्याया़गी ङाहला छोल्ज्ये येह, यिहॱनाङ ख्याया़गी ङाहला च्य़ेह सिहन्ज्ये म़ेह ओहले ङाह डोएँगी ग्या़ला ख्याया़ ओहङ मी़हखु।”
35दि थे़दी यहूदी गोबाया़गी राहङ नाहङदुङ मासीन, “दि मिह का़हला डोज्ये छोल्गे यिहम्बा, ओहराङगी च्य़ेह सिहन मी़हखु म़ेदी गा माउ दु? च्यि दि मिह ग्रीकया़गी पाहरक्यीला फेतोर कोहतोर काहल्दी तेहक्योगी यहूदीया़ साला काहल्दी ग्रीकया़ला सुङदेन तेर्च्ये म़ेदी सेम पेहक्यो यिहम्बा नि? 36‘ख्यागी ङाहला छोल्ज्ये येह, यिहॱनाङ च्य़ेह सिहन्ज्ये म़ेह’ च्यिबेमाना ‘ङाह डोएँगी ग्या़ला ख्याया़ ओहङ मी़हखु’ म़ेदी गा माउ दु। दि च्यि माज्ये छोल्ग्यो यिहम्बा नि स्युस्ये?”
सोम्बो छ्यु
37ता़ह छ्येपागी तिङस्यो ङ्यिहमा पे यिहॱनाङ चा़ छ्येस्यो ङ्यिहमाला, येशूगी ज़्याङदी मिह थाम्ज्यीगी थे़गेन पेहती दि ल़ेहमु सुङ नाङसीन, “का़हलेॱआङ सुज्यीला खा कोम्ग्यो येहसीमाना खो ङाहसाला ओहङज्यु ओहले थुङज्यु। 38सुङरापगी सुङ नाङग्यो ल़ेहमुराङ ‘सुगी ङाहला यिह छ्य़ेगे ओहले थुङगे, खोगी सेम तिहङ यिहन्ज्युराङ सोम्बो छ्यु क्येज्युया़ क्ये़दी तेहच्ये येह’।” 39यिहॱनाङ दि स्याहल येशूगी नाम्पार-ताहक्पा थुगी तेहन्दाला सुङ नाङग्यो येहकें, ओहले ओ़ह नाम्पार-ताहक्पा थुदी येशू थो़ला यिह छ्य़ेगेया़गी ज्योर्च्ये पेहक्यो येहकें। ओहले ओ़ह नाम्पार-ताहक्पा थु ताहन्दा थुॱआङ किन्ज्योगी नाङदी म़ेहबा येहकें च्यिबेमाना येशू स्यिहङगामला लो़हदी फेप माहनाङ येहकें।
मिहया़गी पाहर्कीला ठ़ूस्यी काहल्ग्यो
40दि केच्या थे़गे लाहला मिहया़गी मासीन, “तेहम्बा-तेहन्सुमॱराङ दि मिह नि मिहया़गी रेहवा पेहक्योकी लुहङतेम्बा गा यिहन्गे दुबा।” 41ओहले लाहलागी मासीन, “दि मिह नि मास्यीका यिहम्बा।” यिहॱनाङ लाहलागी मासीन, “च्यि मास्यीकाॱआङ गालील साने़ले फेप्कें यिहम्बा ले? 42मास्यीका नि दाऊदकी क्यिह दाङ दाऊदकी युहल बेथलेहेमलेॱराङ फेप नाङज्ये येह म़ेदी च्यि सुङरापला प्रुहक्यो म़ेहबा ले?”#२ शमू ७:१२; मीका ५:२ 43दि ल़ेहमु पेहती येशूगी तेहन्दाला मिहया़गी पाहरक्यीला ठ़ूस्यी काहल्सीन। 44खुङया़ नाहङगी काहजे मिहगी येशूला ज़ुङज्ये छोल्सीन यिहॱनाङ सुज्यीगीॱआङ येशूला लाहक्पा माहताङ।
यहूदी गोबाया़गी येशूला यिह मा़हछ्येबा
45ओहले येशूला ज़ुङज्ये म़ेदी काहल्ग्योगी छ्योखाङ सुङगेन माक्मीया़ आहन्डाराङ लो़ह ओहङसीन। ओहले पूजाहारी छ्यिम्बुया़ दाङ फरिसीया़गी खुङया़ला टी़हसीन, “के ले, ख्यागी च्यिबे येशूला ज़ुङदी माहख्योङबा?” 46ओहले माक्मीया़गी मासीन, “दि मिहगी ल़ेहमु नि नाहरे थु सु मिह च्यी़गीॱआङ ताम म़ेदी म़ेह!” 47ओहले फरिसीया़गी मासीन, “ख्याया़लाॱआङ ओ़ह मिहगी गो़ ली़दे ताङबा नि च्यि यिहम्बा? 48च्यि ओहराङगी गोबाया़ दाङ फरिसीया़ नाहङले सुज्यीगीॱआङ ओ़ह मिहला यिह छ्य़ेक्यो येहबा ले? 49यिहॱनाङ दि मिह मिह-माहङ नाहङला येहकेन काहजेगी मोशागी नाङग्योगी छ्य़े-ठिम ङोह मे़हस्येएँ, खुङया़गी थो़ला किन्ज्योगी मे़मु फो़ सिहन्दी येह।”
50ता़ह खुङ नाहङगी मेहन्दा च्यी़, खोगी मिहनती निकोदेमस यिहन्गे, खो तोहङले लेहमा च्यी़ येशूला थ़ू ओहङग्यो येहकें, खोगी मासीन,#यूह ३:१,२ 51“ओहराङगी छ्य़े-ठिमगी सुङ नाङग्यो ल़ेहमु तोहङस्यो ओ़ह मिहला टी़हदाप माहबेबा पेहती ओहले खोगी च्यि ल़ेह नोहरक्यो स्यी़हक्यो येहबा ओ़ह ताहक्स्यार माहबेबा पेहती च्यि ओहराङगी खोला ठिम ताङदे ङ्य़ेहबा काल ङ्युहङगे ले?” 52ओहले खुङया़गी खोला मासीन, “च्यि ख्येॱआङ गालील साने़दी यिहम्बा? छ्य़ेला छोल्दी त़ेदोङ ओहले ख्येगी ह्अ कोहज्ये येह, गालील साने़ले सुज्यीॱआङ लुहङतेम्बा ओहङदी म़ेह।”
53(ओ़ह तिङले खुङ थाम्ज्यी राहङ-राहङगी खाङबाला लो़ह काहल्सीन।)
S'ha seleccionat:
यूहन्ना 7: HYLM
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023 (Active), Wycliffe Bible Translators, Inc. All rights reserved.
