लूका 13
13
सेमगी स्या़बा पेहती तिहक्पा पाङज्ये नि तोङदी डोज्ये?
1ओहजे काहङला मिहया़गी येशूला दि ल़ेहमु म़ेदी स्युहसीन, “मार्च्ये फुल तेहकेमु पिलातसगी काहजे गालीलगी मिहया़ला सेत्ती खुङया़गी ठा़ ङ्याम्बुराङ मार्च्येगी ठा़ॱआङ स़ेसीन।” 2ओहले येशूगी सुङ नाङसीन, “दि ल़ेहमु पेहती स्यिक्यो गालीलगी मिहया़ राहङसा म़ेदी तिहक्च्येम्बा यिहम्बा म़ेदी ख्याया़गी सेमला ने़उ दुबा? 3ङाहगी ख्याला माएँ, ओ़ह ल़ेहमु मिहम्बा, यिहॱनाङ ख्याया़गी सेमगी स्या़बा मेहबेसीमाना ख्या थाम्ज्यीराङ ओ़ह ल़ेहमुराङ पेहती तोङदी डोज्ये येह। 4ओहले येहपाराङ, ओ़ह सिलोआम माएँगी दुम्दुम रोहम्दी स्यिक्यो मेहन्दा च्याप्क्ये यरूशलेमगी राहङसा मिहया़ म़ेदी तिहक्च्येम्बा येहकें म़ेदी ख्यागी सेमला ने़उ दुबा? 5ओ़ह ल़ेहमु मिहम्बा, ङाहगी ख्याला माएँ, ख्याया़गी सेमगी स्या़बा पेहती तिहक्पा मेहपाङसीमानानी ख्याॱआङ थाम्ज्यीराङ तोङदी डोज्ये येह!”
सेदो मे़हयाहएँगी तोहङबो
6ओहले येशूगी येहपाराङ दि पे ज़्या़दी सुङ ख्येप्टा नाङसीन,
“मिह च्यी़गी राहङगी कुहन्डुमकी स्यिहङला को़स्यीङ तोहङबो च्यी़ च़ूक्यो येहकें। ओहले खोगी लोह टाहङमाराङ को़स्यीङ या़हबा नि म़ेदी ता डोउ येहकें। काहल्दी ताएँमु को़स्यीङ या़हक्यो नाहमॱआङ माहथोङ। 7ज्युक्स्योलला खोगी कुहन्डुम स्यिहङला ल़ेह पेहकेन्गी योक्पुला मासीन, ‘ते़ नाह, दि तोहङबोला को़स्यीङ या़हगे नि म़ेदी ङाहगी लोह सुम यिहन्ज्यो लाहम तासीन यिहॱनाङ मा़हयाह। ता़ह स्यिती काम्बुला खोला च्यिबे ग्या़ ता़ह च्य़ूज्ये? तुप्ती क्युर्तोङ।’ 8ओहले योक्पुगी मासीन, ‘ने़बु ला़ह, ताहलेन च्यी़ ज़्या़गे, ङाहगी दि तोहङबोगी साहर-सुहरला सा क़ेदी ली़ह लू़एँ, 9नाह साङबेनी या़हगेन गा यिहम्बा नि? या़हसीमाना ठाबेराङ यिहन मे़हयाहसीमाना तुप्ते क्युर्कें ला़ह’” म़ेदी स्युहसीन।
येशूगी नेहपाला टा़ह च्य़ू नाङग्यो
10ङ्यिहमा च्यी़ थाङ सोएँ ङ्यिहमु येशूगी छो़खाङला सुङदेन नाङगेराङ येहकें। 11ओहले ओ़ह छो़खाङला नेहपा पी़हमी च्यी़ येहकें। ङ्येहम्बा नाम्स्यीगी मोहला ऩेह-रोक्पा जे़दी लोह च्याप्क्ये काहल्दी येहकें। मोह क्येपा कुहर्ती काहल्दी ख्याङ पेह मी़हखु येहकें। 12ओ़ह नेहपाला येशूगी ज़ी़सीन ओहले क़े क्याहप्ती सुङ नाङसीन “ए पोहमो, ता़ह ख्ये राहङगी नाहजालेगी थार टोहल्सीन।” 13ओहले येशूगी मोह थो़ला छ्या़ ज़्या़ नाङसीन। छ्या़ ज़्या़ नाङ-लुहङ मे़हबाराङ मोह टा़हदी ख्याङ पेहती लाहङसीन। ओहले मोहगी किन्ज्योला थुज्यी-छ्ये़ फुल्सीन।
14ओहले ओ़ह पी़हमी-पेहजाला येशूगी थाङ सोएँ ङ्यिहमाला टा़ह च्य़ूक्यो थोङदी छो़खाङगी पोम्बोला स्यिहताङ लाङसीन। ओहले खोगी मिहया़ला मासीन, “ल़ेह पेहच्येला ङ्यिहमा ट़ूह येहॱराङ येहबा! थाङ सोएँ ङ्यिहमाला टा़हज्येला च्यिबे ओहङग्यो? च्यि दि ङ्यिहमा म़ेदी राहङसा ङ्यिहमा म़ेहबा ले?”#प्रस २०:९,१०; व्य ५:१३,१४
15ओहजेला येशूगी सुङ नाङसीन, “ए पेहचीन तेन्गे मिहया़, थाङ सोएँ ङ्यिहमाला कोहरेला ता़ ज़्या़क्योगी पाहलाङ, लाङगो क्यिनी पुहङगुला ताङदे छ्यु तेर्च्येला मेहख्येर्कें ले? 16दि अब्राहामगी पोहमोला ती़ह गो-छ्येवागी ताहम ज़्या़दी लोह च्याप्क्ये काहल सिहन्दी येहकें, ओहले मोहला थाङ सोएँ ङ्यिहमाला स्यी़दी ताङ तेर्च्ये मेहयोहङगे ले?” म़ेदी सुङ नाङसीन। 17दि स्याहल थ़े फान्ज्यो येशूला टाह पेहकेन मिहया़ ङोह छासीन। लेहमेन मिहया़गीनी येशूगी जे नाङग्योकी याहम्जेम्बागी छ्या़लेया़ थोङदी काहसो पेहसीन।
राइ-सेन दाङ खमिर
(मत्ती १३:३१-३३; मर्क ४:३०-३२)
18ओहले येहपाराङ येशूगी सुङ नाङसीन, “किन्ज्योगी क्याहल्सी ङाहगी च्यि ङ्याम्बु तुहर्च्ये? 19पे यिहॱना़: किन्ज्योगी छ्या़ले दि रोहवा यिहम्बा, मिह च्यी़गी राहङगी स्यिहङला राइ-सेन ताप्सीन माना ओ़ह क़ेदी छार्कें ओहले छ्यिम्बु काहल फान्ज्यो ओ़हगी याहल्गाया़ला च्याह-च्यिहवाया़गी छाङ ज़ोएँ।”
20ओहले येहपाराङ येशूगी सुङ नाङसीन, “किन्ज्योगी क्याहल्सी ङाहगी लेहमेन च्यि ङ्याम्बु तुहर्च्ये? 21दिनी खमिर लू़क्योगी खुरा ल़ेहमु यिहम्बा। पी़हमी-पेहजा च्यी़गी सिपाज्यी खमिर लेहन्दे डा़लो सुम चाम्बाला स़े ज़्या़एँ, ओहले ओ़ह थाम्ज्यीराङ चाम्बाया़ फोर्ती ओहङगे!”
स्याहङ फेमागी कोह
(मत्ती ७:१३-१४,२२-२३; ८:११-१२)
22येशू क्याहसा क्याहसा दाङ युहल युहलया़ला स्य़ूहदी मिहया़ला सुङदेन नाङदी यरूशलेम ङो़ले फेप नाङसीन। 23ओहले मिह च्यी़ ओहङदी येशूला स्युहसीन, “चो़वो, मिह ङ्ये़हमु च्यी़गीराङ थार्पा थोप्कें यिहम्बा लाह?” 24ओहले येशूगी सुङ नाङसीन, “स्याहङ फेमागी कोह लाहमले नाहङला स्य़ूहज्येला निङरु पेहतोङ। ङाहगी ख्याला माएँ, मिह माहङबुराङ ओ़ह स्याहङ फेमागी कोह लाहमले नाहङला स्य़ूहज्ये छोल्ज्ये येह, यिहॱनाङ स्य़ूह ख़ूज्ये म़ेह। 25ओ़ह ती़हजीला खाङबा ताहक्पु लाहङदी कोह क्याहप्च्ये येह ओहले ख्याया़गी फिले कोह तुहङदी माज्ये येह, ‘कोह खा फे़ नाङदोङ।’ ओहजेला खाङबा ताहक्पुगी माज्ये येह, ‘ख्या सु यिहम्बा ओहले का़ह ग्या़ले ओहङग्यो? ङाहगी ङोह मे़हस्येएँ!’ 26ओहले ख्यागी माज्ये येह, ‘ङ्यिहगी राहङ ङ्याम्बुराङ तेहती साहउ येहकें ओहले राहङगी ङ्यिह युहलया़ला सुङदेन नाङगो येहकें।’ 27ओहजेला खाङबा ताहक्पुगी, ‘ए ल़ेह ङ्येहम्बा पेहकेनया़, ख्या सु यिहम्बा, ख्या का़हले ओहङबा ङाहगीनी ङोह मे़हस्येएँ। देलेगी थेन्दी सोङ!’ म़ेदी माज्ये येह।#भज ६:८ 28ओहजेला ख्यागी अब्राहाम, इसहाक, याकूब दाङ थाम्ज्यीराङ लुहङतेम्बाया़ला किन्ज्योगी क्याहल्सीला थोङगेमु ओहले राहङलादी फिला क्युरक्यो थोङगेमु ख्याया़ सो मुहर्ती ङुहप्रा तिहङरा पेहती तेहच्ये येह।#मत्ती २२:१३; २५:३०; मत्ती ८:११,१२ 29ओहजे काहङला स्यार, नुहप, च्याहङ, ल्हो छ्यो़ ज़्यिलेराङ मिहया़ ओहङदी किन्ज्योगी क्याहल्सीला खाम्साङबु पेहती डेन साहज्ये येह। 30यिहॱनाङ नाहरे तिङला येहकेनया़ तोहङला ओहङज्ये येह ओहले नाहरे तोहङला येहकेनया़ तिङला ओहङज्ये येह।”#मत्ती १९:३०; २०:१६; मर्क १०:३१
येशू यरूशलेमला टेहन्दी थु ङ्युङबु जे नाङग्यो
(मत्ती २३:३७-३९)
31ओ़हजेलाराङ सुज्यी फरिसीया़ येशूसाला ओहङदी मासीन, “राहङ देलेगी थेन्दी लेहमेन ग्या़ च्यी़ला फेप नाङदोङ च्यिबे मासीमाना हेरोदगी राहङला सेच्येला छोल्गेराङ येह।” 32ओहले येशूगी खुङया़ला सुङ नाङसीन, “काहल्दी ओ़ह लिहन्दीला म़ेदोङ, तिहरीङ दाङ नाहङबार ङ्यिहमु ल्हेन्डीया़ तेन्गे ओहले मिहया़ला टा़ह च्य़ूएँगी ल़ेह पेहकें ओहले नाङ ङ्यिहमुदी ङाहगी ल़ेह सिहन्दा च्येकें। 33यिहॱनाङ तिहरीङ, नाहङबार दाङ नाङ ङाह राहङगी लाहमला तोहङले डोॱराङ कोहच्ये येह च्यिबे मासीमाना यरूशलेम फिला राहङसा लुहङतेम्बा मेहसेकें!”
34 “यरूशलेम, ए यरूशलेम! ख्ये लुहङतेम्बाया़ला सेकें ओहले किन्ज्योगी लेहङगु ख्योङगेनया़ला तोहगी क्याहप्के। च्याहमु आमागी च्याहमु पी़हरुया़ला रूदी स्योक्पागी उप्के ल़ेहमुराङ ङाहगीॱआङ काहजे ख्यागी पुह पोहमोया़ला रुज्ये छोल्सीन, यिहॱनाङ ख्यागी माहङ्यीहन। 35त़ेदोङ, किन्ज्योगी ख्येगी छ्योखाङ क्युर ज़्या़ नाङज्ये येह ओहले ङाहगी ख्येला माएँ, नाहम थु ख्येगी ‘चो़वो किन्ज्योगी छेनला फेप नाङगे काहजे सोनाम-साक्पु!’ म़ेदी मा़हमे थु ख्येगी ङाहला थोङज्ये म़ेह।”#मत्ती १:१८; ४:१८; मर्क १:२४; यूह १:३४,४९; २०:३१; भज ११८:२६
S'ha seleccionat:
लूका 13: HYLM
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023 (Active), Wycliffe Bible Translators, Inc. All rights reserved.