San Lucas 18
18
Uarhiti tsîndi ka juramutiri uandantskua
1Kájtu Jesusi uandantskua terukutarantskua ma aianguaspti; jurhendaani uékani eskaksï no kuatantaparini méntku ísï uandamukukorheni. 2Ka arhiaspti: “Iretarhu ma, kuájpiri ma irekaspti enga Diósïni no chérhempka ka enga nójtu janhanharhpempka. 3Imani iretarhujtu uarhiti tsîndi ma irekaxapti enga arhirperata ma kámani jápka, ka niraspti kuájpiri arhini eska jarhuatapiringa imani jinguni engaksï arhirperani jápka. 4Kuájpiri ióni ísku kurhajchasptia, kóru tátsekua ísï eratsespti: ‘Na uéjkini Diósïni no chérhejka ka nójtuni kaxumbitini, 5ka jimbokarini inde uarhiti tsîndi méntku ájchakuxaka, kuájpeaka, eska nóteru méntku junguani jauaka ka tekantskuarini k'amajkutacheni.’ ” 6Ka Acha ísï uandasptiteru: “Kuájpiri nómbemaru arisïsï arhini jápti. 7¿Ka andi jíani Diósï imeri erakukatechantu no kuajpeaua, imechani engaksï chúrekua ka jurhiakua uekujka? ¿Andi erokataraua? 8Jíksïni arhisïnga eska no erokatarauaka, eska kuájpeauaka. Ka k'óru enga jamberi acheti Uájpa parhakpeni junguaaka ¿Arhijkijtsï eska jakajkunhani janhaakateru?”
Fariseoueri ka tumina tánatiri uandantskua
9Jesusi máteru uandantskua aianguaspti imechani engaksï sési ambe úni uandakorhejka ka jiniksï máteruechani no xénhchaani: 10“Tsimanksï niraspti tiósïo uandamukukorheni, ma fariseo, ka máteru tumina Roma axakua tánati. 11Fariseo, anhandetini, ísï uandamukukorhexapti: ‘Diósï, diósmaiamukuakini arhixaka engani ji no indeni jáxeka, engaksï sïpajkurheka, ka nósesi kámpitini, ka ísku jándini, ka nójtuni inde tumina tánatini jásïska. 12Ji tsimani jurhia k'arhinda jarhasïnga iúmu tsimani jurhia jimbo ka témbeni jima iámueri íntspentasïnga engani xáni andajka.’ 13Ka tumina tánati iauani tátsepani uératini no jamberi tekaasïrempti erancheni, sánderu uánhesïrempti, ka uandasïrempti: ‘¡Tata Diósï, p'amojkurini jíndeni engani k'amanharhintstika!’ 14Arhixakaksïni eska inde tumina tánati kaxumbentatini niántaskia, ka fariseo májkueni pakarasti. Jimboka ne enga k'éramakorheaka, ísku ambeni exenhaaka; ka ima enga kétsekua uérajka, ima k'éri amberanhaati.”
Jesusi sapichani újchakuraasti
15Ístuksï Jesusini tataka ka nanaka sapirhatichani pákuasïrempti, eska ima p'ájtsïkuapiringa; ka engaksï jurhengorhericha exepka, xukaasptiksï imechani engaksï sapichani páani jápka. 16Jimajkani Jesusi arhiaspti: “Jurajkujtsïni sapirhaticha andarherani, ásï p'íngua je, jimboka Diósïri irechekua imecheriska ne engaksï indeni járhaka. 17Sési jimboksïni arhixaka eska ne enga Diósïri irechekuani no ísï jiókorhejka eska sapi ma na jiókorhejka ima Diósïri irechekuarhu no jatanheati.”
Acheti jatsikorheri ma Jesusini jinguni uandontskorhesti
(Mt 19.16-30; Mc 10.17-31)
18Ka tátsekua ireteri urhejtsïkuri ma Jesusini kurhamarhespti arhiparini: “Ambakiti jurhentpiri ¿Néna uétarhesïnki eskani jámaaka, eskani ísï jámani jíjtuni méntkisï anapu irekua intsïnhaaka?” 19Jesusi arhispti: “¿Andirinisï arhijki eskani ambakitiska? Diósïjkusï ambakititi. 20Míteaskaria juramukuechani: ‘Ásï ísku jándi úkorhe, ásï uándikpe, ásï sïpa, ásï nemani chkuándirakua jimbo nósesi úku, ka chéti táteni ka chéti nándeni janhanharhi.’ ”#18.20 Ex 20.12-16; Dt 5.16-20. 21Ka ima urhejtsïkuri arhispti: “Tumbirinitkini iámu indeni ambe ísï úxaka.” 22Enga Jesusi ísï kurhajchapka, arhispti: “Ma ambeterkuri no úxaka: Atarantsï iámu ambe engari xáni jatsikorheka ka no jatsikorherichani íntsaa. Ísïri jámani auandarhu jatsikorhekua p'iuaka. Ka jimajkani k'órurini ju chúxapunia.” 23K'óru enga ísï kurhajchapka, kánekua mískorhespti, jimboka kánekua jatsikorherispka.
24Enga Jesusi ísï exepka, uandaspti: “¡Kánekua ts'unhapesti eskaksï jatsikorhericha Diósïri irechekuarhu inchaaka! 25Kameiu ma, p'ikukueri p'orhojchakuarhu sánderu no ts'unhapekua jimbo parhijchakuaati, eska jatsikorheri ma Diósïri irechekuarhu inchani.” 26Ima engaksï kurhajchani jápka, kurhangorhesptiksï: “¿Ka jimajkani néchkasï p'ímutakorhentaia?” 27Jesusi arhiaspti: “Ima ambe engaksï parhakpeni anapuecha no újka úni, Diósï k'óru úsïndi.” 28Pédru arhispti: “Acha, jucha iámendu ambe jurajkuska, ka chúxapuskaksïni.”
29Ima arhiaspti: “Sési jimboksïni arhixaka eska ne enga Diósïri irechekua jimbo k'umanchekua jurajkuka o témbani o erachi jémbechani o tátjembani ka amambani, o uájpechani jurajkuaka, 30íni jurhiatekuechani sánderu uánekua ambe p'iuati, ka imani jurhiatekuechani jimbo engaksï jurhani jaka méntku ísï anapu tsípekua p'iuati.”
Jesusi tanimu úni jámani uandanukorhesti
(Mt 20.17-19; Mc 10.32-34)
31Tátsekua Jesusi témbeni tsimani jurhengorherichani támu páaspti, ka arhiaspti: “Jerusalenichi niraxaka, jima enga iámu ambe úkorheaka eskaksï Diósïri uandaricha acheti Uájperi ambe na karaka. 32Jimbokaksï uérakua iretichani intsïnharhitantaaka, ka teresmarhuatiksï, útakuatiksï ka t'uánharhikuatiksï. 33K'uikirheatiksï ka uándikuatiksï; k'óru tanimu jurhia jimbo tsíntaati.”
34Imaksï nómbema kurhanguspti, ka nójtuksï mítespti ambesï arhiani jápi, jimbokaksï imani ambe no kurhangusïrempka.
Jesusi Jerico anapu ma pátenharhi ambakerantasti
(Mt 20.29-34; Mc 10.46-52)
35Enga Jesusi Jeriko niárani jápkia, pátenharhi ma xanhari jimbo uaxakatini tumina kurhajkorhexapti, 36ka enga kurhapka eska uánekua nitamanhaxapka, kurhangorhespti ambesï úkorheni jápi, 37ka aiangunhaspti eska Jesusi Nasareti anapusï jimesï nitamani jápka, 38Ka ima uinhachaparini uandaspti:
–¡Jesusi, Dabidi Uájpa, p'amojkurini!
39Ima engaksï urhepani jápka xukasïremptiksï eska ísku japiringa, ka ima sánderu uinhachasïrempti:
–¡Dabidi Uájpa, p'amojkurini!
40Jesusi p'íngukorhespti ka arhiaspti eskaksï andarheterapiringa. Enga na andarherani jápka kurhamarhespti:
41–¿Amberi uéksïnki?
Ka pátenharhi arhispti:
–Acha, éskantani uéksïnga.
42Jesusi arhispti:
–¡Éskantsïchkia! Chéti jakajkukua jimbori ambakeranhantaskia.
43Pátenharhi éskantapaspti, ka Diósïni k'éri ambe arhiparini chúxapaspti. Ka iámendu engaksï xáni exepka, imajtuksï uénaspti Diósïni k'éri ambe arhini.
S'ha seleccionat:
San Lucas 18: BI-PURHE
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia en P´urhépecha, Michoacán, México © Sociedad Bíblica de México, A.C.