मत्ती 13
13
बीज बीजण आळै गी मिसाल
(मरकुस 4:1-9; लूका 8:4-8)
1बिं दिन यीसू घर छोडगे झील गै किनारै बेठगे उपदेस देण लागरयो हो। 2लोग बिंगै च्यारूंमेर भेळा हो'ग्या जद बो एक किस्ती में चडगे बेठग्यो अर सारा लोग किनारै पर खड़या रेया। 3बण बानै मिसाल ऊं भोत सारी बातां बताई। बण केयो, “एक किसान बीज बीजण गेयो। 4बीजता टेम केई रा गै किनारै पड़ग्या, बानै जानवरां चुग लिया। 5केई पक्की जिग्यां पर पड़ग्या। बठै बे ऊग तो गेया। 6पण सूरज गो तावड़ो लागतांई जड़ डूंगी ना जाण गै कारण बे बळग्या। 7केई बीज झाड़का में पड़ग्या। जद बे उगग्या बानै झाड़का दबा लिया। 8पण केई बीज आच्छी जमीन पर पड़ग्या, बे उगगे केई सौ गुणा, केई साठ गुणा अर केई तीस गुणा फळ ल्याया। 9झिको सुणनो चावै बो सुणल्यै।”
मिसाल गो मतलब
(मरकुस 4:10; लूका 8:9,10)
10फेर बिंगै चेला बिं कनै आ'गे पूछयो, “थे बातां करता टेम मिसाल क्यामी बताओ।” 11बण उतर दियो, “सुरग गै राज गी भेद भरी बातां जाणण गो हक सिरफ थानै ई देयड़ो है बानै कोनी देईड़ो। 12मेरी बात सुणन आळा कनै भोत सारो ग्यान ओर आज्यैगो अर झिका मेरी बात कोनी सुणै बे झिको कीं जाणै बो ई भूल ज्यैगा।” 13ईंखातर मैं बांगै सागै मिसाल ऊं बात करूं,
“क्यूंकै बे देखै तो है पण बानै दिखै कोनी।
बे सुणै तो है पण बानै कोनी सुणिज्यै अर ना समझ आवै।”
14यसयाह परमेसर गी बात बताण आळो इंया लिखै,
“थे सुणोगा अर सुणता रेवोगा पण थारी समझ में कोनी आवैगो।
थे देखता तो होवोगा पण थानै दिखैगो कोनी।
15क्यूंकै आंगो मन गळत बाता ऊं भरिज्यैगो।
आं आपगा कान बंद कर राख्या है
अर आंख बी बंद कर राखी है झिकै ऊं बे ना कीं देख सकै
अर ना कीं सुण सकै। पण बे आपगै मन ऊं कदी ना समझ सकै।
अर बे कदी मेरै कानी मुड़गे आवैगा
अर मैं बानै चंगा करूंगा।”#यसयाह 6:9,10
16पण धन्य है थारी आंख, कै बा देखै अर धन्य है थारा कान झिका सुणन लागरया है। 17मैं थानै साची केऊं कै भोत सारा परमेसर गी बात बताण आळा अर धरमी लोग झिकी बातां नै देखणी चावा बे थे देखण लागरया हो। पण बे कोनी देख सकया। अर झिकी बातां नै थे सुणण लागरया हो बानै बे सुण कोनी सकया।
बीज बीजण आळै गी मिसाल गो सार
(मरकुस 4:13-20; लूका 8:11-15)
18अब थे बीज बीजण आळै गी मिसाल गो अरथ सुणो। 19रा में पडे़ड़ा बीज बे है, झिका परमेसर गै राज गी बात सुणी पण बिं पर गोर कोनी करी अर दुस्ट सैतान झिकी बात बण सुणी बिनै समझण गी सोच नै बंद कर दी। 20पक्की जमीन पर पडे़ड़ा बीज बे लोग हा झिका परमेसर गै राज गी बात सुणी अर बिनै भोत खुसी ऊं मान बी ली। 21पण इतो जादा बिस्वास कोनी करयो। जद बिंगै जीवन में बचन गै कारण थोड़ी सी मुसकिल आयी तो बो डगमगाग्यो। 22झाड़का में गिरेड़ा बीज बे लोग है झिका संसार गै लोभ लाळच अर चिंता में पड़गे दबज्यै अर बे बिस्वास ऊं लारै हटज्यै। 23आच्छी जमीन पर पडे़ड़ा बीज बे लोग है झिका परमेसर गै राज गी बात नै सुणी अर समझ गे बिं पर चाल्या। अर बे बीज सौ गुणा, साठ गुणा अर तीस गुणा फळ ल्याया।
कणक अर घास गी क्हाणी
24फेर यीसू बानै एक ओर मिसाल बताई कै सुरग गो राज बिं आदमी बरगो है झिकै आपगै खेत में आच्छो बीज बिज्यो। 25जद लोग सूत्या तो बिंगो दुसमण आ'गे बिं खेत गै मा घास गो बीज खिण्डाज्यै। 26जद कणक मोटी होयी तो बिमै घास बी दिखण लागग्यो। 27फेर खेत गा माळी आ'गे मालिक नै बतायो कै थे तो आच्छो बीज बिज्यो फेर ओ कठूं आ'ग्यो? 28जद मालिक बानै केयो ओ दुसमण गो काम है। जद बण केयो थे केओ तो म्हे इमै खोदी करा दैयां। 29पण मालिक केयो, जे अब थे खोदी करोगा तो सागै कणक बाढ दैयोगा। 30फसल पाकण तांई इनै सागै ई बधण दैयो। जद कणक बाडण गो टेम आवैगो मैं भंडारा नै केऊंगा पेलां घास गी पुळी बाळण खातर न्यारी बांध ल्यो अर कणक नै खळै में न्यारी भेळी कर ल्यो।
राई गै बीज गी मिसाल
(मरकुस 4:30-32; लूका 13:18,19)
31यीसू बानै ओर केई मिसाल बताई कै सुरग गो राज राई गै दाणै बरगो है। झिकै नै कणी आपगै खेत में बिज्यो। 32ओ बीज भोत छोटो होवै पण उगगे मोटो बूंटो बणज्यै अर पंछी आ'गे बिंगै डाळियां पर बेठण लागज्यै।
खमीर गी मिसाल
(लूका 13:20,21)
33फेर बण केयो सुरग गो राज खमीर बरगो है। झिकै नै एक लुगाई तीन सैर आटै में रळा गे रख दियो। अर होळै होळै सारो खमीर बणग्यो।
34यीसू ऐ सारी बातां मिसाल ऊं बताई। बो मिसाल बिना कोई बात कोनी करतो। 35ईंखातर परमेसर गी बात बताण आळै गै द्वारा केयेड़ी बातां पूरी होवै।
“मैं मिसाळ गै द्वारा थारूं बात करूंगा
अर धरती बणण ऊं पेलां झिकी बातां लुकेड़ी है बानै थारै सामणै ल्यावूंगा।”#भजन संगिता 78:2
कणक अर घास गी क्हाणी गो सार
36फेर यीसू बिं भीड़ नै भेजगे घरे आ'ग्यो। जद बिंगै चेलां बिनै पूछयो कै खेत अर घास आळी मिसाल गो मतलब म्हानै बता। 37यीसू उतर दियो, “झिको आच्छो बीज बिज्यो बो मिनख गो बेटो है। 38अर खेत ओ संसार है, आच्छो बीज सुरग राज गो वारिस है अर घास बे लोग है झिका सैतान गी उळाद है। 39अर घास गो बीज बीजण आळो दुसमण सैतान है। बाडण गो टेम ईं संसार गो अंत है अर बाडण आळा सुरगदूत है। 40बिंयाई जिंया घास भेळी कर'गे आग में बाळ दी बिंयाई संसार गै अंत में होवैगो। 41मिनख गो बेटो आपगै सुरगदूतां नै घालगे अर बिंगै राज ऊं सारा पापियां अर बां लोगां नै झिका पाप करण खातर तैयार करै। 42बानै भेळा कर'गे नरक गी आग में बाळ देसी। जठै दांतां गो पीसणो अर रोणो ई रोणो हो'सी। 43जद धरमी लोग आपगै पिता परमेसर गै राज में सूरज गी तरियां चमकैगा झिको सुणनो चावै बो सुणल्यै।”
धन अर मोती गी मिसाल
44“सुरग गो राज खेत में दबेड़ै धन बरगो है झिकै कोई आदमी नै लादज्यै तो बो पाछो बिनै दाब ज्यै अर बो इतो राजी होवै कै बण आपगो सारो कीं बेजगे बो खेत मोल ले'ल्यै। 45सुरग गो राज हिस्यै बोपारी बरगो है झिको आच्छा मोतियां गी खोज में रेवै। 46जद बिनै आच्छा मोती लादज्यै तो आपगो सारो कीं बेचगे बिं मोती नै खरीदल्यै।
जाळ गी मिसाल
47सुरग गो राज मछली पकड़ण आळै जाळ बरगो है झिकै में न्यारी न्यारी भांतगी मछली पकड़िज्यै। 48जद जाळ भरिज्यै तो बिमुं आच्छी आच्छी मछलियां काडगे टोकरियां में घाल ल्यै। अर बेकार मछलियां नै फेंक दैय। 49-50संसार गै अंत में इंयाई होवैगो। सुरगदूत आवैगा अर पापी लोगां नै धरमिया ऊं न्यारा करसी अर बानै भड़कती आग में झोंक देसी। बठै रोणो अर दांतां गो पीसणो हो'सी। 51यीसू चेला नै पूछयो, थारी समझ में कीं आवै है के? बां केयो हां। 52यीसू आपगै चेला नै केयो, हर एक बिस्वासी झिको नेम विधान अर परमेसर गै राज नै जाणै है बो एक घरेलू मालिक बरगो है झिको आपगै भण्डार ऊं नुई अर पुराणी सारी चिजां बारै काडै।”
नासरत में यीसू गी बेजती
(मरकुस 6:1-6; लूका 4:16-30)
53जद आ मिसाल केगे बठूं चाल पड़यो। 54अर आपगै गाम में आ'ग्यो। फेर बण यहुदियां गै सतसंग घर में उपदेस देणो सरू करयो। जद सारा हेरान होगे पूछण लागग्या कै इनै हिसी बुद्धी अर ग्यान गी सकती कठूं मिली है। 55ओ बिं लकड़ी आळै मिस्तरी गो छोरो कोनी के? इंगी मां गो नाम मरियम है। याकूब, युसुफ, समौन अर यहूदा इंगा भाई है। 56इंगी सारी भेना आपणै अठै ई रेवै है। फेर ओ सारो कीं कठूं सीख्यो है। 57फेर बां बिनै मान्यो कोनी। यीसू बानै केयो, “कोई परमेसर गी बात बताण आळै गो बिंगै गाम गा अर घर गा आदर कोनी करै।” 58ईंखातर बांगै कम बिस्वास गै कारण बण बठै जादा चमत्कार कोनी करया।
S'ha seleccionat:
मत्ती 13: BGQ
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023 (Active), Wycliffe Bible Translators, Inc. All rights reserved. © WIn Publishing Trust