Mateo 2
2
Amoua tauimari nauatoqquiri naporrarideni Zeso qquide rrauirronarrari
1Zesopa oza panani onini Bereiaza tossonarrari. Narraro ozape Zodeauarricca zamacca. Zeso tossonauicca uarranozapa tamine Erodi zama Zodeacca madirra cacauade torrarrari. Pouapa oza panani Zerozareza madirrari. Nazapa tamine Erodi nauiza madiui parra naccaza zama uarri tanicca madirra marri ccarronauiuarri rrauirronaza Zerozareza bacco narronemanarrari. Pouadenipa amoua tauimari nauatoqquiri naporrarideni. 2Zerozareza bacco narronemanaza attidenipa: —Nirra? Nerrecouarri Izarraeo potemaui arra zodeodenicca tamine tossonarraritta? −narronemanarrari. —Iape marri ccarronauiuarri imadiza amoua zati qqui icanade. Narraro uimape tamine deni torrarrari tossonauitoui quenaporraricca uima torrarraro. Narrari qquide rrauirrarronarraro. Ipitoza rrassi ineza pouaza: “Icca tamine” inaniuarrine −quenarrari.
3Nazapa tamine Erodi narraro uima mittazapa bodi nacassera tarrari. Pocca madirra naui Zerozareza madimanarrarideni uima mittemanaza naco bodideni cappinemanarrari. 4Nazapa tamine Erodipa dada toqquimade taminedeni, zodeodenicca marinarra maridedeni naco inaqueriqquiuiuarrine ua inabaqquirrari. Queriqquimanazapa pouadeniza uati tarrari: —Arri Deo Atti dozo naniza ia Idinide Cristo-Mesia tossonauicca uimape nerrecoma naporrarotte? Nerrecouarrina Cristo-Mesia tossonauitoui naporrarotte? −naui nade Erodi. 5Tamine Erodiza uima ecomeremanarraro: —Zodeauarricca oza panani Bereiazana tossonauitoui. Narraro uimape Deo Atti cacomerabote Miqueo dozo inaporraro. 6Poua atti arrama naporrari:
“Bereiacca uima uati onana. Zodeacca zamauarri oza panani uapi teraha Bereiape arrimani torra-rrerani.
Uima bicani deni torranicca carrinitoui. Nauiza tamine deni torrauicca tossonauitoui. Pouapa occa madirra Izarraeo potemauideni ecauabaqquiuitoui”
napoui nade Deo Atti cacomerabote −quenaui nade zodeodenicca marinarra maridedeni.
7Erodi narraro uima mittazapa arra amoua tauimari nauatoqquiri naporraridenitoui cacomeheza ua inabaqquirrari, poccadeni uima mittauiuarrine. Rrauirronazapa pouadeniza uati tarrari: —Arra amoua zati qqui ticanemanarraripa nerrecoma naza cauatorraritta? −naui nade. Nazapa pouaza amoua tauimari ecomeremanaza mittarrari. 8Nazapa Erodi Bereiauarri zosse iqquimabaqquirrari: —Bereiauarri rraui tirrana. Naniuarri erredenitoui qqui tarizemanana. Bacco tiquenazapa ouaza uati tanimanana. Oua naqui poua qquide oqqueza opitoza ouitteza pouaza: “Occa tamine” onaniuarrine, onarraro −naraha maizarrari. Tamine ouahaza parrima onani narrari Erodi atti.
9-10Erodi atti mittemanazapa rraui torrarrari. Rraui torra, rraui torra nanarra amoua arra qqui icanemanaporrari pouadeni tezerrema cauatopomarrari. Cauatopomaza amoua tauimari nauatoqquiri naporrarideni uatizemaneri narrari. Pouadeni tezerrema touaccaza erredeni tossonauicca ozaza queuenacossarrari. 11Nauiza rraui torrezimazapa erredeni qqui, imeni Maria qqui toquenarrari. Pouaza uatizemanazapa pouadeni pitoza rrassi taza: —Tamine deni torraui −quenarrari. Pouadeni zepetarri bau bedeni bicaqquiri narraro itaborizemaneza poccadeni danirri erredeniza da inaqquimanarraro. Oro uatini ccara tanicca da iquenarraro. Aua marricone touessiui marro bica tarrari naco da iquenarrari. Aua ouaha oni mirra marricone marro ocassa tauicca naco da iquenarrari.
12Naza zome nauiza cauadirrazapa uada carrimanarrari. Deo pouadeniza uati tarrari: —Tamine Erodiuarripe rraui tirrani-rrerarri. Pocca uima oppina tani −narrari poccadeni uadaza. Nama nazapa poccadeni zamauarri rraui torraniuiuarrinepa Zerozarecca rrauiuarri rraui torrani-rraraui. Rraui onihina rraui torranirrari.
Zama Ezitouarri rroppa icanemanarraricca uima
13Nazapa amoua tauimari nauatoqquiri naporrarideni rraui torrania rricaui. Zotodepa Zoze pocca uadaza Deocca zozosse Poua Atti ccaccaronade auatoza atti arrama narrari: —Zoze, nocco tirrarri. Uassinarra arra erredeni imeni tazarrani zama Ezitouarri tiaccabaqquirro. Tamine Erodicca zossenirri erredenitoui qqui narizemanabote naui, inanazoqque-manauiuarrine. Nani Ezitouarri timadi-zanapoccana. Niza tiaza uati onapomezana ticcanipomaniuarrine bica tani −narrari. 14Nazapa uassinarra nocco toquerrenaza: —Rrina, rridapana zome icadana −narrari Zoze. Nazapa zomeraha erredeni imeni tazarrani Ezitocca rraui rraui torrarrari. 15Ezitouarri bacco toquenazapa tamine Erodi madiccaza nauiza madimana-zanapoccarrari. Narraro uimape maittaccazama Deo uati tapoza Poua Atti cacomerabote Ozea dozo inaporrarope arrima narraro: —Occa Erredeni Ezitouarri madiraha pouatoui uaua onarraro −narrari Deo Atti Ozearrine dozo naniza. Nazapa tamine Erodi zoqqueui uima mittemanazana poccadeni zamauarri rrauinirrari.
Erodi erredeni inarricarizauiuarrine zosse inabaqquirizarrari
16Erodi zoqque-rraraccaza uima arrima inanarraro. Arra amoua tauimari nauatoqquiri naporraridenitoui madiraha pouauarri rrauini-rrarazapa bodi uatomarrari: —Oua icamaizemanarraro −narrari. Nazapa parra uadirirrari. Uadizapa tamine zati tossonarrari zori tarrarauiuarrine pocca madirra zosse inabaqquirrari: —Rrari, Bereiaza madimanarrarideni, Bereia uarrira taniza madirizemanarrarideni naco bedideni maqquiderre bedi uarranorideni 2 narrari, uarranorideni arramanicca naco, narrarideni bazima tinarricarizemanauissa tarro −naui nade Erodi. Arra amoua zati qqui icanemanaporraricca uarranoza tocatorrarizarrarideni bazima rricarizauiuarrine. 17Nama quenazapa Izarraeo potemauidenicca erredeni baziraqquiri narrari inarriquemanarrarirrine imehideni, imenideni orri orri quenarrari. Narraro uimape pina maittaccazama Deo Atti cacomerabote Zeremia dozo inaporrarossa narraro torrarraro. Izarraeo potemauidenicca ini maittaccazama madiporraro onini Rraqueo tauimariniza dozo nanipe arrima narraro:
18—Oza panani Ramauarricca zamaza orri imeni torrarraro. Rraqueo potemanidenipe bedidenitoui orri orri quenarraro. Ponidenicca orrie naqui uatinideni ssonaniuarrine touini querarraro, bedideni rricarizaza −napoui nade Deo Atti Zeremiarrine dozo naniza.
19Nazapa zotode tamine Erodi zoqqueui nattipa zama Ezitouarri Deo Atti ccaccaronade Zoze pocca uadaza auatopomaza uati tarrari: 20—Zoze, nocco tirrarri. Arra erredeni imeni tazarrani Izarraeo potemauidenicca zamauarri tiaccanibaqquirro. Erredeni inanazoqque-manauiuarrine toui quenarraridenipa rricaui −naui nade.
21Nazapa Zoze nocco torrazapa narroraza Izarraeodenicca zamauarri erredeni imeni tazarrani iaccanibaqquirrari. 22Naniuarri bacco tanimanazapa Zoze uima mittarrari: —Erodi zoqquezapa poua bedi onipa Aquerao narrarina zama Zodeacca tamine torrarrari −quenarrari. Narraricca uima naqui uaidira tarraro, pina imehicca uimassa nezape Zoze nauiuarri madiuiuarrine cappinarrari. Naraha pocca uadaza Deo pouaza uati tarrari: —Arri zama Zodeazape timadimana-rrerarri −naui nade. Nazapa zama arobeni Carireauarrina torroppememanarrari. 23Rraui torrazapa Carireauarri bacco toquenarrari. Nazapa oza panani Nazaretiza madimanarrari. Narraro uimape pina Deo Atti cacomeraqquiri narrarideni madirra Idinide Cristo-Mesia tauimari uati toquenaporrarissa narraro: —Pouaza: “Nazaretiuarricca” quequenanauitoui −quenapoui nade Deo Atti dozo naniza.
S'ha seleccionat:
Mateo 2: KBNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
2020 Impresso na Graafica da Biblia