Marko 13
13
O Isus vaćarol so ka avol angleder
(Mt 24,1–22; Lk 21,5–24)
1Kana iklilo o Isus andaro Hram, jekh tare lese sikade vaćarda: “Učitelju, dikh save lačhe bara thaj kala lačhe građevine!” 2O Isus vaćarda lese: “Dičhe li gola građevine? Ni bar po bar ni ka ačhol. Sa ka avol crdimo.”
3Kana o Isus bešlo ko Maslinsko brego prekal o drom taro Hram, o Petar, o Jakov, o Jovane thaj o Andrija korkore pučlje e Isuse: 4“Vaćar amenđe kana gova ka avol? Save znakosa ka sikadol gova so ka ćerdol sa gova?”
5A o Isus lija te vaćarol lenđe: “Aračhen tumen khoni te ma xoxavol tumen! 6But ka aven ane mingro alav thaj ka vaćaren: ‘Me sem o Hrist.’ Thaj buten ka xoxaven. 7Kana ka šunen maripe thaj glasura taro maripe save si dur, ma daran! Golese kaj trubul gijate te avol, al gova naj krajo. 8Golese so ka uštol o narodo po narodo thaj o carstvo po carstvo. I phuv ka tresil pe ke but thana thaj ka aven bune thaj bokhalipe. Gova si anglunipe tare bare muke, sar kana i romni trubul te bijanol.
9Kana ka avol sa gova, aračhen tumen! Golese kaj ka inđaren tumen ke sudura thaj ke sinagoge. Ka maren tumen thaj zbog mande angle vladara thaj angle carura ka ačhen, te svedočin lenđe mandar. 10Al angleder, o Lačho Lafi sa e manušenđe trubul te propovedil pe. 11Kana ka phanden tumen thaj ka inđaren tumen ko sudo, ma angleder te brinin tumen so ka vaćaren. Vaćaren gova so dol pe tumenđe te vaćaren ane gova sato. Golese kaj ni ka vaćaren tumen, nego ka vaćarol o Sveto Duxo.
12O phral e phrale ka dol te mudarol pe thaj o dad e čhave. E čhave ka ušten pe dada thaj pe deja, a von ka den te mudaren len. 13Thaj savore ka dičhen tumen banđeste paše mande. Al ko ka ačhol dži ko krajo pačavno, ka spasil pe.
14Kana ka dičhen i ‘grozota savi anol uništipe’, kaj ačhol kote kaj naj lako than, [sar vaćarol o proroko Danilo] – savo čitil kava, nek haljarol – tegani kola save si ani Judeja nek našen pe bregura. 15Ko si po čher, ma te uljol tele te džal ano čher te lol khanči andral! 16Thaj ko si ano polje ma te iril pe te lol po fostano! 17Pharo e khamnjenđe thaj kole džuvljenđe save den čuči e čhavorenđe ane gola đivesa! 18Molin tumen o našipe tumaro te ma avol ano jevend! 19Golese kaj ane gola đivesa ka avol gasavo bilačhipe savo ni sasa taro anglunipe kana o Dol ćerda o sveto, pa dži akana thaj niti ka avol. 20Al o Dol te ma kratila o đinipe gole đivesengo, khoni ne bi ačhola džuvdo. O Dol e đivesa kratisada paše kola manuša saven vov birisada.
21Te phenda tumenđe tegani khoni: ‘Ak kate si o Hrist!’, il ‘Ek okori si!’, ma pačan. 22Golese kaj ka ikljen xoxavne hristura thaj xoxavne prorokura thaj ka sikaven znakura thaj čudesura te bi xoxavena, te šaj, čak i e Devlese birimen. 23Aračhen tumen! Sa vaćardem tumenđe angleder so ka avol!”
E Isuseso dujto avipe
(Mt 24,29–51; Lk 21,25–28)
24“Al ane gola đivesa, pale gova bilačhipe,
‘o kham ka kaljol
thaj o čhon ni ka sijajil.
25E čerenja ka peren taro nebo
thaj e zora e nebose ka tresin pe.’
26Tegani e manuša ka dičhen man, e Čhave e manušese, sar avav pe oblakura e zuralimasa thaj e bara slavasa. 27Me ka bičhalav me melekuren thaj von ka ćiden e birimen tare štar barvalja, taro krajo e phuvako dži o krajo e neboso.”
O Isus koristisada i smokva sar primer
(Mt 24,32; Lk 21,29–30)
28O Isus vadži vaćarol kaja paramič: “Tari smokva kava sikljon: Kana pe laće raja ikljen pupoljkura thaj mučhen patrna, džanen kaj si o milaj paše. 29Gija i tumen kana ka dičhen kaj kava avol, džanen kaj si o vreme paše, anglo vudar. 30Čače vaćarav tumenđe, kaj kaja generacija ni ka načhol dok sa kava ni avol. 31O nebo thaj i phuv ka načhen, al me lafura nikad ni ka načhen!”
O Isus vaćarol kaj ni džanolpe ni o đive ni o sato
(Mt 24,36–51; Lk 21,34–36)
32“Al khoni tare gova đive thaj gova sato ni džanol kana gova ka avol, ni e melekura taro nebo, pa ni me, o Čhavo. Džanol samo o Dad. 33Aračhen tumen! Aven džungade [thaj molin tumen]! Golese kaj ni džanen kana ka avol gova vreme. 34Gova si sar o manuš, savo džal ko drom. Ačhada po čher thaj naredisada e kandinenđe so te ćeren. Svakonese dija pi bući thaj e manušese so ačhol ko vudar vaćarda te avol džungado te pazil.
35Gija aven džungade, golese kaj ni džanen kana ka avol kova kaso si čher, il angleder i rat, il ki opaš i rat, il kana e bašne đilaben, il ki sabalin. 36Ako ka avol tare jekh drom, ma te aračhol tumen sar soven. 37So vaćarav tumenđe, vaćarav savorenđe: Aven džungade!”
S'ha seleccionat:
Marko 13: GSP
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió