مادتھا 2
2
شار چھوگسنے سکیودکھانّی مجُوسی عالِم کُن۔
1ہیرودِیس گیالپو این زانے، یہُودیہ یولّی بیت لحمی نانّگا حضرت عیسیٰ سکیس۔ تیتوسلا شار چھوگسنے مجُوسی عالِم سکارما سیلکھانّی می کھاچیگ یروشالیمّی گیالسا یونگستے 2ٹیس، ”یہُودی پے گیالپو لتامسکھانبو کانے دُوگ؟ نگاجا کھونگی سکارما شار چھوگسلا تھونگپا، کھونّگا سجدہ چوا یونگسپین۔“
3تے سپیرابو تشورّاچیگ، گیالپو ہیرودِیس ہالاستے جیگس یانگ یروشالیم پا تشانگمانگ۔ 4گیالپو ہیرودِیس اِمام کُنی چھونمو گون تانگ شریعتی عالِم تشانگما بودتے خُدے لدامّا زادکھانّی مسیحا کارُو سکیچیس دوگ زیرتے ٹیس۔
5کھونگونی لانتانگس، ”یہُودیہ ڈونگکھیر بیت لحما۔ کازوگ پیغمبری خُدے مولّا زادکھانبو ڈِیازادتے اینوگ،
6یہُودیہ ڈونگکھیر بیت لحم،
’یہُودی پے یولجونگسّی نانّگا کھیوجے ڈونگکھیر چھونگونبوانگ،
ڈونگکھیر ما کھاگچانجیک گیورین،
چیازیرنا کھیوجے ٹونے تیزوگ وانگثولپاجیک یونگین،
کابوے بنی اِسرائیل پا نگے میگونلا لُوگ زی تشولّا ستاستوگ چوین‘۔“
7تینے ہیرودِیس شار چھوگسّی مجُوسی عالِم کُن سوانگ گیوسچھا ماچوگّا چیگپو بودتے سکارما گومارانگ تھونگکھانّی توسپو گیوسچوس۔ 8کھوے کھونگون بیت لحما لامچوگستے زیرس، ”سونگ، جیبسال چوستے ٹھوگوبو ژول، یانگ کھونگ تھوبّاچیگ لوگستے یونگستے نگا شود، چیازیرنا نگا کھونگ جالّا سونگتے کھونّگا چولین۔“
9گیالپوے سپیرا زیرکھانگون نیانتے ستینگنے، کھونگون شار چھوگسلا تھونگکھانّی سکارمے گیابنے سونگ، کا بو ٹھوگو یودسے ناسّیکا لیبّاچیگ، نامکھے نانّگا ڈول ماڈولّا دُوگس۔ 10سکارمابو ڈول ماڈولّا دُوگستے تھونّگاچیگ، کھونگونی سیمستھادپوے گانگ۔ 11کھانگپے نانّگا چھاچیگ، کھونگونی ٹھوگو کھونگرانگی اما حضرت مریم نیامپو تھونگ، یانگ کھونگون پِیکمویکا گییلتے کُوسپا نیامپو سجدہ تانگس ۔ تینے ستیرغامگون پھیستے سیر، ٹیجیم چانّی سپوس تانگ میر زیرکھانّی ٹیجیم چانّی مارناگی سکییسگون کھونّگا پھولس۔
12یانگ نیلامی نانّگا خُدے کھونگونلا گیالپو ہیرودِیس یودسا لوگستے ماچھا مولس، یانگ لام سوسوجیکنے رانگیولّا لوگستے سونگ۔
مصری یولجونگسلا شورّا زادس۔
13مجُوسی عالِم کُن لوگستے چھاچیگ، خُدے فرشتا جیک حضرت یُوسفؔ ی نییلامّی نانّگا مولین جال، ”لونگس، ٹھوگو تانگ کھونگی اما مصری یولجونگسلا ٹھیدتے شور۔ یانگ نامتشوگپا نگے میزیر تےتےتشوگپا تیرو دوگ، چیازیرنا گیالپو ہیرودِیس ٹھوگوبو سادچیسلا ژالین۔“
14حضرت یُوسفؔ لانگستے ٹھوگو تانگ ٹھوگوی اما حضرت مریم نیسکو ٹھیدتے تینّا ژانلا مصری یولّا شورتے سونگ، 15کارُو کھونگون گیالپو ہیرودِیس شیـ شی ژوگپا جوگس۔ کازوگی خُدے پیغمبر گیُودتے، ”نگے مصر یولنے پھیلوگا نگارانگی بُوژا بودپین#2:15 ہوشایی شوقبُو 11۔ 1“ مولتے یودکھانبو ڈانڈا ڈوب۔
16گیالپو ہیرودِیس مجُوسی عالِم گونّی گوبسکور تانگکھانبو ہاگوپا ماثانٹے ثو یونگس۔ کھوے بیت لحم تانگ تے نییکھورّی یولّی نانّگا یودکھانّی بُوژا لو نیس یانگ تیسانگ چھونّگا تشانگما سود زیرتے کا تانگس، کا بو مجُوسی عالِم گونّی تانگپورانگ سکارمابو تھونگ زیرکھانّی توس نانگجین اِنپین۔ 17تینے پیغمبر حضرت یرمیاہ گیُودتے خُدے مولکھانگون ڈوب۔ تیبو نی،
18”رامے یولنے سکاد تشورین،
نگوین یانگ ردوگپو چوین۔
راہیلّی اولاد رانگی ٹھوگوگونّی پھیا نگوین،
اِین نانگ سیمسّو میگوس،
چیازیرنا ٹھوگوگون شیتے مید۔“#2:18 حضرت یرمیاہ شوقبُو 31۔ 15
مصر نے لوگتے سکیودس۔
19گیالپو ہیرودِیس شیتے ستینگنے، حضرت یُوسفؔ مصری یولّا یودی توسلا کھوا نییلامّی نانّگا خُدے فرشتا جیکّی مولس، 20”لونگس، ٹھوگو تانگ کھونگی اما ٹھیدتے بنی اِسرائیلی یولّا سونگ چیازیرنا ٹھوگو سادّالا ژالکھانگون شیتے مید۔“
21تیبویپھیا حضرت یُوسفؔ لانگستے ٹھوگو تانگ کھونگی اما ٹھیدتے بنی اِسرائیلی یولّا لوگستے سونگ۔ 22اِین نانگ حضرت یُوسفؔ بی ارکھیلییس کھوے ابا ہیرودِیس تشابسلا یہُودیہ گیالپو چوکھانبو تشورّاچیگ، کھو یہُودیہ یولجونگسلا لوگستے چھاچیسلا جیگس۔ کھوا نیلامّی نانّگا لابجا زاد پاسانگ گلِیلی یولجونگسلا سونگ۔ 23کھونگون سونگتے ناصرة زیرکھانّی ڈونگکھیرّی نانّگا دُوگس۔ تینّابویپھیا سنگونمے پیغمبر گونّی کھونگی سکورلا مولکھانبو ڈانڈا ڈوب، ”کھونّگا ناصرة پا جوین۔“
S'ha seleccionat:
مادتھا 2: LBJNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Ladakhi Bible by The Love Fellowship is licensed under Creative Commons Attribution-ShareAlike 4.0 License.