San Lucas 1
1
La yich' ts'ihbabeyel Teófilo
1Ay tsobol mach'atic xtiq'uet la sc'an shachic sts'ihbayel ta hun te bintic c'ohem ta pasel ta cohliltic te bin mero melel, 2hich te bin ut'il la ya'botic jnoptic te mach'atic ta shahchibal to la yil ta sitic te bintic c'oht ta pasel soc te a'tejic ta yalel te c'ope. 3Ha nix hichon, te bin ut'il nahil la joc'oylan ca'iy ta lec spisil bin ut'il hahchem tal te bintic c'ohem ta pasel, lec la jca'iy te xtiq'uet ya jts'ihbabat ta hun, Teófilo, te buen ich'bilat ta cuenta, 4scuenta yu'un yac ana' a te ha smelelil te bintic a'bibilat anop.
Halbot sc'oblal ya x'ayin Juan
5Te bin ora ay ta ajwalil yu'un Judea a te Herodes ay jtuhl sacerdote Zacarías sbihil te ha yu'un te jchahp yu'un Abías; te yihnam ha nix sts'umbal Aarón, Elisabet sbihil. 6Schebalic toj yo'tanic ta stojol Dios, soc ts'acal sch'uhumbeyejic spisil smandar te Cajwaltique. 7Pero mayuc yal-snich'anic, como ma x'alaj te Elisabet, soc ta schebalic ayix ya'bilalic.
8Te c'alal ay ta a'tel ta sacerdotehil ta stojol Dios a te Zacarías soc te jchahp smohlol ta a'tel, 9ta scuenta seña ta na'el c'oht ta scuenta te Zacarías, hich bin ut'il costumbre yu'un te sacerdotehetic, te ya x'och bahel ta chiq'uel pom ta ch'ul awilal yu'un te Cajwaltique. 10Spisil te ipal ants-winiquetic yu'un te pueblo tec'ajtic ta yamaq'uil Templo ta sc'oponel Dios ta yorahil ta chiq'uel pom. 11Chicnaj ta stojol Zacarías ch'ul a'bat yu'un te Cajwaltic, teq'uel ta wa'el ta schic'ojibal pom. 12Te Zacarías, c'alal la yil la xi', u'untayot yu'un xiwel.
13Pero hich halbot yu'un te ch'ul a'bat: Ma xiwat, Zacarías, yu'un a'iyotix ac'op ta stojol Dios; ya me x'ayin jtuhl squerem-al te awihnam Elisabet, Juan sbihil ya me xc'oht awu'un. 14Bayel yutsil awo'tan soc tse'el awo'tan yu'un, soc tsobol mach'atic ay yutsil yo'tanic yu'un te ya x'ayine, 15como muc' sc'oblal ya xc'oht ta stojol Dios. Ma me xyuch' vino o bin pajuben, soc ya xnoj ta yo'tan te Ch'ul Espíritu te c'alal wolbil to yu'un snan a. 16Ya me ya'be suhteslan yo'tanic ta stojol Dios tsobol te al-nich'anetic yu'un Israel. 17Ha ya xnahilij bahel ta stojol Dios ta scuenta te espíritu soc te yip te Elías, yu'un ya yac' suhtuc yo'tanic te me'iltatiletic ta stojol te yal-snich'anic, soc te jc'axun-c'opetic ta stojol te p'ijil-o'tanil yu'un te mach'atic toj yo'tanic, scuenta yu'un ya schahpambe te Cajwaltic jun pueblo te chapale, xchi sc'oblal.
18Te Zacarías hich la yalbe te ch'ul a'bat: ¿Bin ut'il ya xhu' ya jna' ini? como mamalonix soc ayix ya'bilal te quihname, xchi.
19La sjac' te ch'ul a'bat: Ho'on Gabrielon te teq'uelon ta stojol te Diose, soc ticombilon yu'un ya calbat te lequil ach' c'op ini. 20Yo'tic uma' ya xhilat, ma xhu' ya xc'opojatix ha to c'alal ya xc'oht ta pasel bin la jcalbat, como ma ba la ach'uhumbon te jc'op te ya xc'oht ta pasel ta mero yorahil, xchi sc'oblal.
21Te pueblo yac smahliybelic te Zacarías, soc yaquic na'etel yu'un te halajix ta ch'ul awilal. 22Pero c'alal loc' talel ma ba hu' te ya sc'opon te pueblo; hich la sna'ic te ay bin la yil ta nahalsitil ta ch'ul awilal. La sc'oponlan ta seña ta sc'ab, uma' a hil. 23C'alal ts'acay yu'un te jayeb c'ahc'al ay ta a'tel ta Templo, suht bahel ta sna.
24Patil hahch yal te yihnam, ha te Elisabet; ho'eb u ma ba loc' ta sna, yu'un hich la yal: 25Hich spasbeyejon te Cajwaltique, ta ora ini la yaq'uix ta ilel te lec yo'tan ta jtojol, la sloq'uesbon te jq'uexlal ta stojol te ants-winiquetique, xchi.
Halbot sc'oblal ya x'ayin Jesús
26Waqueb u ta patil te ch'ul a'bat Gabriel ticonot bahel yu'un Dios ta jun pueblo yu'un Galilea, Nazaret sbihil, 27ta stojol jtuhl ach'ix te macbil yu'un jtuhl winic, José sbihil, sts'umbal David; María sbihil te ach'ixe. 28Te ch'ul a'bat och bahel ta banti ay te ach'ix, hich la yal: ¡Ya jpatbat awo'tan, ha'at te c'uxultaybilat yu'un Dios! Sjoquinejat te Cajwaltic, bayel awutsil ta yohlil te antsetique,#1.28 Ay antiguo hunetic te ma ba ya yal: bayel awutsil... te antsetique, xchi.
29Te María, c'alal la yil te ch'ul a'bat, xiw yu'un te bin halbot yu'une, soc xna'et yu'un te bin scuentahiluc te patil-o'tanile. 30Ha yu'un hich halbot yu'un te ch'ul a'bat: Ma xiwat, María, bayel yutsil yo'tan awu'un te Diose. 31Ya me xhahch awal, ya x'ayin jtuhl aquerem-al, JESÚS me sbihil ya xc'oht awu'un. 32Muc' sc'oblal ya xc'oht, soc ya x'a'bot sbihilin Snich'an te Mach'a ay ta toyol. Te Cajwaltic Dios ya me ya'be sjelolin ta ajwalil te David te state. 33Sbahtel q'uinal ay ta ajwalil yu'un te patil al-nich'anetic yu'un Jacob; mayuc slajibal te cuentahinel yu'une, xchi sc'oblal.
34Te María la sjoc'obe te ch'ul a'bat: ¿Bin ut'il ay a ini, como mayuc jmamalal? xchi.
35La sjac' te ch'ul a'bat: Ya me xhul ta atojol te Ch'ul Espíritu, ya spotsat ta yaxinal yu'el te Mach'a ay ta toyol; ha yu'un te Ch'ul Alal te ya x'ayine, Snich'an Dios sbihil ya xc'oht. 36Ha nix hich te amohlol ats'ahquil Elisabet, te mach'a jma'al ta halel yu'unic, swolojix yal aunque me'elix, swaquebalix u shahchel a te yale. 37Como mayuc bin ma xhu' yu'un stuquel te Diose, xchi.
38La yal te María: Ya'baton te Cajwaltic Dios; ac'a spasbon hich te bin ut'il la awal, xchi. Hich te ch'ul a'bat la yihquitay hilel.
Te María baht yula'tay te Elisabet
39Ta hich ora hahch bahel te María, baht ta ora ta jun pueblo te ay ta witsiltic ta sq'uinal Judea; 40och ta sna Zacarías, la spatbe yo'tan te Elisabet. 41C'alal patbot yo'tan yu'un María te Elisabet, la stij sba te alal swoloje. Te Elisabet noj ta yo'tan te Ch'ul Espíritu, 42tulan c'opoj, hich la yal: ¡Bayel awutsil ta yohlil te antsetic, soc bayel yutsil te sit te yawil alal awu'un! 43¿Bin ut'il ay a te hich c'oht ta jtojol, te ha tal stahon te snan te Cajwal? 44Como te c'alal la jca'iy te spatil-o'tanil awu'un, te alal jwoloj wihl yu'un yutsil q'uinal la ya'iy. 45Bayel me yutsil te mach'a la sch'uhun te ya xc'oht ta pasel te bin halbot yu'un te Cajwaltique, xchi.
46La yal te María:
Ya yalbe yutsilal Cajwal te jch'uhlel,
47soc te espíritu cu'un bayel yutsil ya ya'iy
ta stojol Dios te Jcoltaywanej cu'une,
48como la yil
te peq'uel ay te a'bat yu'une.
Ta ora bahel ya me yalbonic yutsil jc'oblal
spisil te cajalcaj ts'umbalil,
49como muc' bin la spasbon te Mach'a bayel yu'el.
¡Ch'ultesbil te sbihile,
50soc te sc'uxul yo'tan ya xc'oht ta stojol
te cajalcaj mach'atic ya yich'ic ta muc'!
51Bayel bintic muc' spasticlanej ta sc'ab;
la spucticlan bahel te mach'atic stoyoj sbahic
yu'un te bin snopoj ta yo'tanic.
52La sloq'ueslan ta shuctajibic
te mach'atic ay yipic,
soc la stoybe sc'oblal
te mach'atic peq'uel ayique.
53Te mach'atic ayic ta wi'nal
la yac'ticlambe te bintic lec,
pero jochol sc'abic la sticonlan bahel
te jc'uhlejetique.
54La scoltay te Israel te a'bat yu'une,
la to sna' te ya sc'uxultay
55te Abraham soc te sts'umbal
scuenta sbahtel q'uinal,
hich te bin ut'il yalbeyej
te jme'jtatic, xchi te María.
56Te María oxeb u la sjoquin te Elisabet, patil suht bahel ta sna.
Ayin Juan te J'ac'-ich'-ha'
57C'alal la sta yorahil te ya x'ayin yal te Elisabet, ayin squerem-al. 58C'alal la ya'iyic te spat-xuhc soc smohlol sts'ahquil te la yich'ix bayel c'uxultayel yu'un Dios, pajal bayel yutsil yo'tanic soc.
59Ta swaxaquebal c'ahc'al yayinel a, tal ya'beyic yich' circuncisión, soc c'an ya'be sbihilin Zacarías, hich te bin ut'il sbihil te state; 60pero la yal te snan: ¡Ma'uc! Juan sbihil ya xc'oht, xchi.
61¿Bin yu'un? Mayuc amohlol ats'ahquil te hich sbihil, xchihic.
62Ha yu'un la sjoc'obeyic te stat ta scuenta seña sc'abic bin sbihil ya xc'oht yu'un. 63Hich te Zacarías la sc'ambe jun tut tabla yu'un ts'ihbayel, hich la sts'ihbay: Juan sbihil, xchi. Spisilic xcham yo'tanic yu'un. 64Ora jahm ye soc tojob yac' te Zacarías, hahch yalbe bayel yutsil te Diose. 65Tojic xiwel yu'un spisil te spat-xuhc, soc puhc ta halel ta witsiltic yu'un Judea te bintic c'oht ta pasele. 66Spisil te mach'atic la ya'iyic la sq'uej ta yo'tanic, hich la sjoc'oyic: ¿Bin yilel ya xc'oht ta patil te alal ini? xchihic. Como te sc'ab te Cajwaltic ay ta stojol.
Sc'ayoj Zacarías
67Te Zacarías te stat te alale, noj ta yo'tan te Ch'ul Espíritu, hahch ta c'op ta scuenta jalwanej, hich la yal:
68Bayel yutsil te Cajwaltic, te Dios yu'un Israel,
yu'un tal swehtesbe scolel te pueblo yu'une.
69Ta sts'umbal David te a'bat yu'un
la schicnajtesbotic jtuhl Jcoltaywanej
te bayel yu'el,
70hich te bin ut'il la yal ta scuenta
te ch'ul jalwanejetic yu'un ta shahchibal tal,
71ya scoltayotic loq'uel ta sc'ab te jcontratic,
soc ta sc'ab te mach'atic ya yil-o'tantayotic;
72yu'un ya sc'uxultay te jme'jtatic,
soc yu'un sna'el te ch'ul chapbil-c'op yu'une,
73ha te jc'axel la yalbe ta jamal te jtatic Abraham
te ya me xc'oht ta pasel,
74ha te ya scoltayotic loq'uel ta sc'ab te jcontratic,
te hich mayuc xiwel
te ya cac' jbahtic ta a'batinel yu'un
75ta scuenta ch'ultesel soc toj-o'tanil ta stojol Dios
te jayeb c'ahc'al cuxulotique.
76Ha'at, alal, jalwanejat yu'un
te Mach'a mero toyol ay, ya xc'oht abihil;
yu'un ya me xnahilijat ta stojol te Cajwaltic
yu'un yac achahpambe te behetic yu'une,
77yac awa'be sna'ic te pueblo yu'un sc'oblal colel
te ay ta scuenta spasel perdón yu'un smulic,
78ta scuenta yutsil sc'uxul yo'tan te Dios cu'untic,
te la stahotic c'alal ta toyol
ta scuenta te c'ahc'al te loq'uemix tal,
79yu'un ya sacubtes q'uinal ta stojol
te mach'atic ayic ta yihc'al q'uinal
soc ta yaxinal lajel;
yu'un ya stojobtesotic bahel
ta sbehlal lamal q'uinal, xchi te Zacarías.
80Muc'ub te alale, la yich' yip yo'tan; ayin ta jochol taquin q'uinal ha to c'alal la sta yorahil te la yac' sba ta ilel ta stojol Israel.
S'ha seleccionat:
San Lucas 1: TZH
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia Tzeltal Bachajon © Sociedad Bíblica de México, A.C., 2006.