ଯୋହନ 3
3
ଯୀଶୁ ଆରେରଗ ଜିବୁନ୍ଆନି ବିଷୟରେ ନିକଦିମଙ୍ଗ୍ ୱେଚ୍ଚାନ୍
1ପାରୁସିଦଳ୍ ବିତ୍ରେ ରକାନ୍ ନିକଦିମ ତର୍ଦାକାନ୍ ମାଚାନ୍, ହେୱାନ୍ ରକାନ୍ ଯିହୁଦିର୍ ମୁଡ଼୍ଦି ନେତା ମାଚାନ୍। 2ହେୱାନ୍ ଦିନେକ୍ ମିକାଲିଙ୍ଗ୍ ଯୀଶୁ ଲାଗାୟ୍ ୱାଜି ୱେଚ୍ଚାନ୍, “ଏ ଗୁରୁ, ଆପେଙ୍ଗ୍ ପୁଚାପ୍ନା ଯେ, ଏନେଙ୍ଗ୍ ରକାଇ ଈଶ୍ୱରତାଙ୍ଗ୍ ୱାତି ଗୁରୁ। ଏନେଙ୍ଗ୍ ଇମ୍ଣିୱିଜୁ ଚାନିଆଆନି କାମାୟ୍ କିନାୟା। ଈଶ୍ୱର ସାଇଜ କିୱିତିସ୍ ଇୱିଜୁ କାମାୟ୍ ଇନେର୍ ପା କିଦେଙ୍ଗ୍ ଆଡୁର୍।”
3ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ନିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା। ଆରେରଗ ଜନମ୍ ଆୱିତିସ୍ ଇନେର୍ ଈଶ୍ୱର ସାସନ୍ କିନି ରାଜିତାକେ ହାଞ୍ଜେଙ୍ଗ୍ ଆଡୁନ୍।”
4ନିକଦିମ ଯୀଶୁଙ୍ଗ୍ ୱେଚ୍ଚାନ୍, “ମାତର୍ ଇମ୍ଣି ମାନାୟ୍ ବୁଡ଼ା ଆଜି ୱାତିସ୍, ମାନାୟ୍ ଇନେସ୍କିଜି ଆରେରଗ ଜନମ୍ ଆନାନ୍? ହେୱାନ୍ ଇନାକା ଆରେରଗ ଜାର୍ ଆୟା ଗରବ୍ତାକେ ହାଲ୍ଜି ଜନମ୍ ଆଦେଙ୍ଗ୍ ଆଡ୍ନାନ୍?” 5ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଆନେଙ୍ଗ୍ ନିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା। ରକାନ୍ ଏଜୁଙ୍ଗ୍ ଆରେ ଆତ୍ମାତାଙ୍ଗ୍ ଜନମ୍ ଆୱିତିସ୍, ହେୱାନ୍ ଈଶ୍ୱର ସାସନ୍ କିନି ରାଜିତାକେ ହାଞ୍ଜେଙ୍ଗ୍ ଆଡୁନ୍। 6ରକାନ୍ ମାନାୟ୍ ଗାଗାଡ଼୍ତାଙ୍ଗ୍ ଜନମ୍, ହେଦାଙ୍ଗ୍ ଗାଗାଡ଼୍। ମାତର୍ ର ମାନାୟ୍ ଆତ୍ମାତାଙ୍ଗ୍ ଜନମ୍, ହେଦାଙ୍ଗ୍ ଆତ୍ମା। 7ଲାଗିଙ୍ଗ୍ ଚାନିଆ ଆମାଟ୍, ଇନେସ୍କି ମିଙ୍ଗେଙ୍ଗ୍ ୱେଚ୍ଚାନାଙ୍ଗ୍, ‘ଏପେଙ୍ଗ୍ ଆରେରଗ ଜନମ୍ ଆଦେଙ୍ଗ୍ ଆନାତ୍।’ 8ଡ଼ୁଇ ତା ଇଚାତାଙ୍ଗ୍ ୱାନାତ୍ ଆରେ ତା ଇଚାତାଙ୍ଗ୍ ହାନାତ୍। ଏପେଙ୍ଗ୍ ଡ଼ୁଇ ୱାନି ଶବଦ୍ ୱେନାଦେର୍, ମାତର୍ ଏପେଙ୍ଗ୍ ପୁନ୍ୱାଦାଙ୍ଗ୍ ମାନାଦେର୍, ଡ଼ୁଇ ଇମେତାଙ୍ଗ୍ ୱାନାତ୍ ଆରେ ଇମେତାକେ ହାନାତ୍। ପବିତ୍ର ଆତ୍ମାତାଙ୍ଗ୍ ଜନମ୍ ଆତାକାର୍ ଟିକ୍ ହେଲେକେ।”
9ନିକଦିମ ହେୱାନିଙ୍ଗ୍ ୱେନ୍ବାତାନ୍, “ଇୱିଜୁ ଇନେସ୍କିଜି ଆନାତ୍?”
10ଯୀଶୁ ହେୱାନିଙ୍ଗ୍ ୱେଚ୍ଚାନ୍, “ଏନେଙ୍ଗ୍ ରକାଇ ଇସ୍ରାଏଲନି ମୁଡ଼୍ଦି ଗୁରୁ। ମାତର୍ ଏନେଙ୍ଗ୍ ଇ ୱିଜୁବେଣ୍ ବୁଜା ଆଦେଙ୍ଗ୍ ଆଡୁୟା? 11ଆନେଙ୍ଗ୍ ନିଙ୍ଗେଙ୍ଗ୍ ସତ୍ ୱେଚ୍ଚାନାଙ୍ଗା, ଆନେଙ୍ଗ୍ ଇନାକା ପୁନାଙ୍ଗ୍ ହେଦାଙ୍ଗ୍ୱିଜୁ ୱେଚ୍ନାଙ୍ଗା, ଆନେଙ୍ଗ୍ ଇନାକା ହୁଡ଼୍ନାଙ୍ଗା ହେଦାଙ୍ଗ୍ ନିଙ୍ଗେଙ୍ଗ୍ ୱେଚ୍ଚାନାଙ୍ଗା, ମାତର୍ ଏପେଙ୍ଗ୍ ନା କାତାତିଙ୍ଗ୍ ପାର୍ତି କିଉଦେରା। 12ଆନେଙ୍ଗ୍ ମିଙ୍ଗେଙ୍ଗ୍ ଇ ଜଗତ୍ନି ବିଷୟ ୱିଜୁ ୱେଚ୍ତାଙ୍ଗ୍ନା। ମାତର୍ ଏପେଙ୍ଗ୍ ନାଙ୍ଗେଙ୍ଗ୍ ପାର୍ତି କିଦୁଦେରା। ଆନେଙ୍ଗ୍ ଯଦି ସରଗ୍ ଜପିନି କାତା ବିଷୟରେ ୱେଚ୍ଚାନାଙ୍ଗ୍, ହେ ବେଣ୍ତିଙ୍ଗ୍ ହାତ୍ପା ଏପେଙ୍ଗ୍ ପାର୍ତି କିଉଦେର୍। 13ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ହେୱାନ୍ ରକାନ୍ ସରଗ୍ତାଙ୍ଗ୍ ୱାତାନ୍ନା, ଆରେ ହେୱାନିଙ୍ଗ୍ ପିସ୍ତି ଇନେର୍ ପା ସରଗ୍ଜପି ହାଲ୍ୱାତାର୍ନା। 14ମୋଶା ଟାଙ୍ଗ୍ରାବାହାତାକେ ରାଚ୍ତିଙ୍ଗ୍ ଜପି ଗାଚ୍ଚି ମାଚାନ୍। ହେଲେକେନେ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣାତିଙ୍ଗ୍ କୃଶକାଟ୍ତାକେ ଦୁପ୍ନାର୍। 15ଇଦାଙ୍ଗ୍ କାଜିଙ୍ଗ୍ ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣାତାକେ, ପାର୍ତିକିନି ୱିଜାକାର୍ ୱିଜ୍ୱି ଜିବୁନ୍ ପାୟାଆନାର୍।
16ଇନେସ୍କି ଈଶ୍ୱର ପୁର୍ତିତିଙ୍ଗ୍ ଏଚେକ୍ ଲାଡ୍ କିତାନ୍ ଯେ, ହେୱାନ୍ ତା ରକାନ୍ ଇଞ୍ଜି ମେହିଙ୍ଗ୍ ହିତ୍ତାନ୍। ଇନେସ୍ ଲେକେ ତା ମାଜିଙ୍ଗ୍ ପାର୍ତିକିନାର୍ ହେ ମାନାୟାର୍, ନଷ୍ଟ ଆୱାଦାଙ୍ଗ୍ ୱିଜ୍ୱି ଜିବୁନ୍ ପାୟାଆନାର୍। 17ଈଶ୍ୱର ତା ମେହିଙ୍ଗ୍ ଇ ପୁର୍ତିତାକେ ବିଚାର୍ କିଦେଙ୍ଗ୍ ପକ୍ତାୱାଦାଙ୍ଗ୍ ମାନ୍ଞ୍ଚାନ୍। ମାତର୍ ଇ ଜଗତ୍ ଇନେସ୍ ତା ମେହି କାଜିଙ୍ଗ୍ ରକ୍ଷା ପାୟାଆନାତ୍, ହେଦାଙ୍ଗ୍ କାଜିଙ୍ଗ୍ ହେୱାନ୍ ତା ମେହିଙ୍ଗ୍ ପକ୍ଚି ମାନ୍ଞ୍ଚାନ୍।
18ଈଶ୍ୱର ମେହିଙ୍ଗ୍ ପାର୍ତି କିନାକାରିଙ୍ଗ୍ ଇନାୱେଡ଼ାଙ୍ଗ୍ ପା ବିଚାର୍ କିୟା ଆଉନ୍। ମାତର୍ ହେୱାନ୍ତାକେ ପାର୍ତି କିୱାକାରିଙ୍ଗ୍ ବିଚାର୍ କିୟାଟ୍। ଇନେସ୍କି ହେୱାନ୍ ଈଶ୍ୱର ରୱାନ୍ ଇଞ୍ଜି ମେହିଙ୍ଗ୍ ପାର୍ତି କିୱାତାନ୍ନା। 19ମାନାୟାର୍ ଈଶ୍ୱର ମେହିଙ୍ଗ୍ ପାର୍ତିକିୱି କାଜିଙ୍ଗ୍ ବିଚାର୍ ଆନାତ୍। ହେ ଅଜଡ଼୍ ଜଗତ୍ତାକେ ୱାତାତ୍ନା, ମାତର୍ ମାନାୟାର୍ ହେ ଅଜଡ଼୍ତିଙ୍ଗ୍ ହୁଡ଼୍ୱାତାର୍, ହେୱାର୍ ମାଜ୍ଗାତିଙ୍ଗ୍ ଡେକ୍ତାର୍, ଇନେସ୍କି ହେୱାର୍ କରାପ୍ କାମାୟ୍ତାକେ ମାଚାର୍। 20କରାପ୍ କାମାୟ୍ କିନାକାର୍ ଅଜଡ଼୍ତିଙ୍ଗ୍ ଗିଣ୍ କିନାର୍। ହେୱାନ୍ ଇନାୱେଡ଼ାଙ୍ଗ୍ ପା ଅଜଡ଼୍ତାକେ ୱାଉନ୍, ଇନେସ୍କି ଅଜଡ଼୍ ତା କିତି କରାପ୍ କାମାୟ୍ ୱିଜୁ ଚଚ୍ଚି ହିନାତ୍। 21ମାତର୍ ଇମ୍ଣାକାନ୍ ସତ୍ ହାଜ୍ଦିଙ୍ଗ୍ ହାନାନ୍, ହେୱାନ୍ ଅଜଡ଼୍ତାକେ ୱାଦେଙ୍ଗ୍ ମାନ୍ କିନାନ୍। ତାପାଚେ ଅଜଡ଼୍ ସତ୍ କାମାୟ୍ ୱିଜୁ ଚଚ୍ଚି ହିନାତ୍। ହେ ମାନାୟ୍ ଇମ୍ଣି କାମାୟ୍ କିତାନ୍ନା ହେଦାଙ୍ଗ୍ ହେୱାନ୍ ଈଶ୍ୱର ଆଦେସ୍ ମାନିକିଜି କିତାନ୍ନା।”
ଡୁବନ୍ହିନି ଯୋହନ ଯୀଶୁ ବିଷୟରେ ୱେଚ୍ଚି କାତା
22ତାପାଚେ ଯୀଶୁ ଆରେ ତା ଚେଲାହିର୍ ଯିହୁଦା ଜିଲ୍ଲାତାକେ ହାଚାର୍। ହେବେ ଯୀଶୁ ତା ଚେଲାହିର୍ ହୁଦାଙ୍ଗ୍ ମାନ୍ଞ୍ଜି ମାନାୟାରିଙ୍ଗ୍ ଡୁବନ୍ହିଜି ମାଚାନ୍।
23ଡୁବନ୍ହିନି ଯୋହନ ଶାଲମ୍ ସହର୍ କଚଣ୍ନି ଏନୋନ ନାଟ ମାନାୟାରିଙ୍ଗ୍ ଡୁବନ୍ହିଜି ମାଚାନ୍। ଇନେସ୍କି ହେବାହାତାକେ ବେସି ଏଜୁଙ୍ଗ୍ ମାଚିକ୍। ଆରେ ମାନାୟାର୍ ହେବେ ଡୁବନ୍ ଅଦେଙ୍ଗ୍ ହାଲ୍ଜି ମାଚାର୍। 24ହେପାଦ୍ନା ଡୁବନ୍ହିନି ଯୋହନ ଜଇଲ୍ ଇଞ୍ଜ ବନ୍ଦି ଆୱାଦାଙ୍ଗ୍ ମାଚାନ୍। 25ଡୁବନ୍ହିନି ଯୋହନ ଚେଲାହି ରକାନ୍ ଯିହୁଦି ଦରମ୍ ବିଦିତିଙ୍ଗ୍ ଅଜି ମାନାୟ୍ ଜୁକ୍ତି କିତାନ୍। 26ଯୋହନ ଚେଲାହିର୍ ୱାଜି ଯୋହନତିଙ୍ଗ୍ ୱେଚ୍ଚାର୍, “ଏ ଗୁରୁ ନି ହୁଦାଙ୍ଗ୍ ଯର୍ଦ୍ଦନ ନାଗୁଡ଼୍ ଆରେ ର ପାଡ଼୍କା ଇମ୍ଣି ମାନାୟ୍ ମାଚାର୍, ହେୱାରିଙ୍ଗ୍ ମାନ୍ତ ଏତୁ କିୟା। ଏନେଙ୍ଗ୍ ହେୱାନ୍ ବିଷୟରେ ମାନାୟାରିଙ୍ଗ୍ ୱେଚ୍ଚି ମାଚାଇ। ହେୱାନ୍ ଡୁବନ୍ ହିନାନା ଆରେ ବେସିହେନି ମାନାୟ୍ ହେୱାନ୍ ଲାଗାୟ୍ ହାନାରା।”
27ଡୁବନ୍ହିନି ଯୋହନ ହେୱାରିଙ୍ଗ୍ ୱେଚ୍ଚାନ୍, “ଈଶ୍ୱର ରକାନିଙ୍ଗ୍ ଇନାକା ହିନାନ୍, ହେୱାନ୍ ହେ ଏଚେକ୍ ପାୟା ଆନାନ୍। 28ଏପେଙ୍ଗ୍ ନିଜେ ନା ୱେଚ୍ଚାକା ୱେଚାଦେର୍ନା, ‘ଆନେଙ୍ଗ୍ ଖ୍ରୀଷ୍ଟ ଆକାୟ୍। ମାତର୍ ହେୱାନ୍ କାଜିଙ୍ଗ୍ ହାଜି ରସ୍ତେଙ୍ଗ୍ ନାଙ୍ଗେଙ୍ଗ୍ ଈଶ୍ୱର ପକ୍ତାତାନ୍ନା।’ 29ଇନେର୍ ଯଦି ଡକ୍ରିଙ୍ଗ୍ ଆହ୍ନାନ୍ ହେୱାନ୍ ବର। ମାତର୍ ବର ପାର୍ଟି ନିକାର୍ ନିଲ୍ଚି ତା କାତା ୱେନାର୍। ଆରେ ହେୱାର୍ ବର ବେଣ୍ ୱେନ୍ଞ୍ଜି ବେସି ୱାରିଆ ଆନାର୍। ହେଲେକେ ଆନେଙ୍ଗ୍ ପା ୱାରି ଆନାଙ୍ଗ୍। 30ଯୀଶୁ ଗାଜାକାନ୍ ଆଜି ହାଲେନ୍, ଆନେଙ୍ଗ୍ ହିରୁକାଙ୍ଗ୍ ଆଜି ହାନାଙ୍ଗ୍।
31ସରଗ୍ତାଙ୍ଗ୍ ୱାଜିମାଚି ମାନାୟ୍ ହିମ୍ଣା ଜେକନି ମାନାୟାର୍ତାଙ୍ଗ୍ ଗାଜାକାନ୍। ପୁର୍ତିତାଙ୍ଗ୍ ୱାତି ମାନାୟାର୍ ପୁର୍ତି ନିକାର୍। ମାତର୍ ଇମ୍ଣାକାନ୍ ସରଗ୍ ଜପିତାଙ୍ଗ୍ ୱାନାନ୍, ହେୱାନ୍ ୱିଜାକାର୍ତାଙ୍ଗ୍ ଗାଜାକାନ୍। 32ହେୱାନ୍ ଇନାକା ହୁଡ଼୍ତାନ୍ନା ଆରେ ୱେଚାନ୍ନା ହେ ବିଷୟରେ ୱେଚ୍ନାନ୍। ମାତର୍ ହେୱାନ୍ ୱେଚ୍ନି ବେଣ୍ତିଙ୍ଗ୍ ଅଲପ୍ ହେନି ମାନାୟାର୍ ଆହ୍ନାର୍। 33ମାତର୍ ଇମ୍ଣାକାନ୍ ହେୱାନ୍ ୱେଚ୍ଚି ବେଣ୍ତିଙ୍ଗ୍ ଆହ୍ନାର୍, ହେୱାନ୍ ଈଶ୍ୱର ନେ ସତ୍ ଇଞ୍ଜି ପାର୍ମାଣ୍ କିନାନ୍। 34ଇନେସ୍କି ଈଶ୍ୱର ଇନେରିଙ୍ଗ୍ ପକ୍ତାନ୍ନା। ଈଶ୍ୱର ଇନାକା ୱେଚ୍ଚି ମାନାନ୍, ହେୱାନ୍ ହେଦାଙ୍ଗ୍ ୱେଚ୍ନାନ୍। ଈଶ୍ୱରଆତ୍ମା ପୁରାପୁରି ହିନାନ୍। 35ଆବା ଈଶ୍ୱର ତା ମେହିଙ୍ଗ୍ ଲାଡ୍ କିନାନ୍। ହେୱାନିଙ୍ଗ୍ ୱିଜୁ ବିଷୟତିଙ୍ଗ୍ ଆଦିକାର୍ ହିତାନ୍ନା। 36ଇନେର୍ ମେହିଙ୍ଗ୍ ପାର୍ତିକିନି ମାନାୟ୍ ୱିଜ୍ୱି ଜିବୁନ୍ ପାୟା ଆନାନ୍। ମାତର୍ ମେହିଙ୍ଗ୍ ପାର୍ତି କିୱିତି ମାନାୟ୍ ଇନାୱେଡ଼ାଙ୍ଗ୍ ପା ୱିଜ୍ୱି ଜିବୁନ୍ ପାୟା ଆଦେଙ୍ଗ୍ ଆଡୁନ୍। ଈଶ୍ୱର ହେୱାରିଙ୍ଗ୍ ଦଣ୍ଡ୍ ହିନାନ୍।”
S'ha seleccionat:
ଯୋହନ 3: PEGNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Pengo Parja Bible by The Love Fellowship is licensed under Creative Commons Attribution-ShareAlike 4.0 License.