ଲୁକ 13
13
ପାପ୍ କାମାୟ୍ ପିସ୍ତି ମାନ୍ବାଦ୍ଲାୟ୍ କିୟାଟ୍
1ଯୀଶୁ ମାନାୟାରିଙ୍ଗ୍ ହିକ୍ଷା ହିନିହିଙ୍ଗ୍ କେତ୍ଜାଣ୍ ମାନାୟ୍ ହେୱାନିଙ୍ଗ୍ ୱେଚ୍ଚାର୍, ଗାଲିଲୀ ଜିଲ୍ଲାନି କେତ୍ଜାଣ୍ ମାନାୟାରିଙ୍ଗ୍ ରୋମିୟ ଗବର୍ନର୍ ପିଲାତ ରାଜା ମାର୍ନେ ଅସ୍ତାନ୍ନା, ଏଚେପାଦ୍ନା ହେୱାର୍ ଯିରୁଶାଲାମ ସହର୍ନି ମନ୍ଦିରତାକେ ପୁଜାକିଜି ମାଚାର୍। 2ଯୀଶୁ ୱେଚ୍ଚାନ୍, “ଏପେଙ୍ଗ୍ ଇନାକା ବାବିକିନାଦେରା ଇ ଗାଲିଲୀ ଜିଲ୍ଲାନି ମାନାୟାର୍। ଆରେ ଅଲ୍ଗା ଗାଲିଲୀ ମାନାୟାର୍ ଆଦିକ୍ ପାପିର୍ ମାଚାର୍। ହେଦାଙ୍ଗ୍ କାଜିଙ୍ଗ୍ ହେୱାରିଙ୍ଗ୍ ଇ ଦଣ୍ଡ୍ ପାୟା ଆଦେଙ୍ଗ୍ ଆନାତ୍କି? 3ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ପାପ୍ କାମାୟ୍ ପିସ୍ତି ମାନ୍ବାଦ୍ଲାଇ କିୱିତିସ୍ ଏପେଙ୍ଗ୍ ୱିଜାକାଦେର୍ ହେଲେକେ ଦଣ୍ଡ୍ ପାୟାଆନାଦେର୍।
4ଶିଲୋହ ସହର୍ତାକେ କାଲ୍କୁତାଙ୍ଗ୍ ରସ୍ତି ର ଡେଙ୍ଗା ବିଲ୍ଡିଙ୍ଗ୍ ବାଡ଼୍ହାଆଜି ହେ ଅଟ୍ର ଜାଣ୍ତିଙ୍ଗ୍ ଲେଦିଆଜି ହାଃତାର୍। ହେୱାର୍ ଯିରୁଶାଲାମ ସହର୍ତାକେ ମାନି ଜେକନି ମାନାୟାର୍ତାଙ୍ଗ୍ ଆଦିକ୍ ପାପି ମାଚାର୍ ଇଞ୍ଜି ଏପେଙ୍ଗ୍ ଇନାକା ବାବିକିନାଦେରା? 5ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ପାପ୍ କାମାୟ୍ ପିସ୍ତି ମାନ୍ବାଦ୍ଲାଇ କିୱିତିସ୍ ଏପେଙ୍ଗ୍ ପା ହେୱାର୍ ଲେକେ ଦଣ୍ଡ୍ ପାୟାଆନାଦେର୍।”
ପାଡ଼୍ ଆହ୍ୱି ତଗାମାର୍ତି କାତା
6ଯୀଶୁ ଆରେ ଇ କାତା ୱେଚ୍ନିଲେକେ କିଜି ୱେଚ୍ଚାନ୍, “ରକାନ୍ ତା ଅଙ୍ଗୁର୍ ବାଡ଼୍ଦ ତଗାମାର୍ ରୁଜ୍ଦି ମାଚାନ୍। ମାତର୍ ପାତିବାର୍ହୁ ପାଡ଼୍ ଆସ୍ତାତ୍ନା କି ଆକାୟ୍ ଇଞ୍ଜି ହେୱାନ୍ ହୁଡ଼୍ଦେଙ୍ଗ୍ ୱାଜିମାଚାନ୍। ମାତର୍ ରଞ୍ଜାଙ୍ଗ୍ ପା ପାଡ଼୍ ଆହ୍ୱାଦାଙ୍ଗ୍ ମାଚାତ୍। 7ଲାଗିଙ୍ଗ୍ ହେ ବାଡ଼୍ ଦାୟିତ୍ପ ମାନି ହଲିଆଙ୍ଗ୍ ୱେଚ୍ଚାନ୍, ‘ହୁଡ଼ା, ଆନେଙ୍ଗ୍ ତିନ୍ ବାର୍ହୁ ଆତାତେ ଇ ତଗାମାର୍ତ ପାଡ଼୍ ୱାନାତ୍ ଇଞ୍ଜି କାନାଙ୍ଗା। ମାତର୍ ରଞ୍ଜାଙ୍ଗ୍ ପା ପାଡ଼୍ ଗାଟାଆଉଙ୍ଗା। ଇ ମାର୍ତିଙ୍ଗ୍ କାଦ୍ଦି ତୁସିହିୟାଟ୍ ବେକାରେ ଚିକ୍ଲାତିଙ୍ଗ୍ ବାନ୍ଯା କିନାତା?’
8ମାତର୍ ହଲିଆହି ୱେଚ୍ଚାନ୍, ‘ମାଲିକ୍ ମାର୍ତିଙ୍ଗ୍ ଆରେ ର ବାର୍ହୁ ପିସ୍ତିହିଦା। ଆନେଙ୍ଗ୍ ମାର୍ ଚାରିବେଣ୍ତାଙ୍ଗ୍ କାର୍ଚି ଗାତ୍ ହିନାଙ୍ଗ୍। 9ଯଦି ୱାନିବାର୍ହୁ ଇମାର୍ତ ପାଡ଼୍ ୱାନାତ୍। ଆରେ ଯଦି ୱାନିବାର୍ହୁ ପା ପାଡ଼୍ ଆହ୍ୱିତିସ୍ ଇ ମାର୍ତିଙ୍ଗ୍ କାଦ୍ଦି ତୁସିହିୟା।’ ”
ଯୀଶୁ ଜମ୍ନିବାର୍ ନାଞ୍ଜିଙ୍ଗ୍ ର କଗ୍ଲେଙ୍ଗ୍ ହାର୍କିତାନ୍
10ରଗ ଯୀଶୁ ଜମ୍ନିଦିନ୍ ନାଞ୍ଜିଙ୍ଗ୍ ଯିହୁଦିର୍ ପାର୍ତାନା ଇଞ୍ଜ ହିକ୍ଷାହିଜି ମାଚାନ୍। 11ହେବେ ଇଲେକେ ର କଗ୍ଲେ ମାଚାତ୍। ହେଦେଲିଙ୍ଗ୍ ବୁତ୍ ଡୁଜି ମାଚାତ୍, ଅଟର ବାର୍ହୁ ପାତେକ୍ ହେଦେଲ୍ କୁବ୍ଡ଼ି ଆଜି ସିଦା ଆଦେଙ୍ଗ୍ ଆଡ୍ୱାଦାଙ୍ଗ୍ ମାଚାତ୍।
12ଏଚେପାଦ୍ନା ଯୀଶୁ ହେଦେଲିଙ୍ଗ୍ ହୁଡ଼୍ଜି ଲାଗାୟ୍ କୁକ୍ଚି ୱେଚ୍ଚାନ୍, “ଏ କଗ୍ଲେନି ଦୁଃକ୍କଷ୍ଟତାଙ୍ଗ୍ ନଙ୍ଗୟ୍ ହାର୍ ଆତାଇ।” 13ଏଚେପାଦ୍ନା ଯୀଶୁ ତା କେଇ ହେ କଗ୍ଲେ ଜପି ଇଡ଼୍ତାନ୍। ହେଦାପ୍ରେ ହେ କଗ୍ଲେ ସିଦାଆଜି ନିଲ୍ତେଙ୍ଗ୍ ଆଡ଼୍ତାତ୍। ହେଦେଲ୍ ଈଶ୍ୱରତିଙ୍ଗ୍ ଜୟ୍-ଜୟ୍ କିତାତ୍। 14ଯୀଶୁ ଜମ୍ନିଦିନ୍ ନାଞ୍ଜିଙ୍ଗ୍ ହେ କଗ୍ଲେଙ୍ଗ୍ ହାର୍ କିତିଲେଙ୍ଗ୍ ଯିହୁଦିର୍ ପାର୍ତାନା ଇଲ୍ନି ନେତାର୍ ରିସାଆତାର୍ ମାନାୟାରିଙ୍ଗ୍ ୱେଚ୍ଚାର୍। “ର ଆଟ୍ କାମାୟ୍ କିଦେଙ୍ଗ୍ ଚଅଦିନ୍ ମାନାତ୍। ଲାଗିଙ୍ଗ୍ ଏପେଙ୍ଗ୍ ହାର୍ ଆଦେଙ୍ଗ୍ ହେ ଚଅଦିନ୍ ବିତ୍ରେତାଙ୍ଗ୍ ରଦିନ୍ ୱାଡ। ଜମ୍ନିବାର୍ ନାଞ୍ଜିଙ୍ଗ୍ ଇନାୱେଡ଼ାଙ୍ଗ୍ ପା ହାର୍ ଆଦେଙ୍ଗ୍ ୱାମାଟ୍।”
15ଯୀଶୁ ୱେଚ୍ଚାନ୍, “ଏ ପାଟ୍କାର୍ କାଦେର୍, ଏପେଙ୍ଗ୍ ୱିଜୁଦିନ୍ ଇଲେକେ ଜମ୍ନିଦିନ୍ ନାଞ୍ଜ୍ ପା ମି କାମାୟ୍ କିଜି ମାନି ପଶୁତିଙ୍ଗ୍ ୱାରି ଏଜୁଙ୍ଗ୍ ଉଟ୍ପାନାଦେର୍। 16ଇ କଗ୍ଲେଙ୍ଗ୍ ଆନେଙ୍ଗ୍ ହାର୍ କିତାଙ୍ଗ୍ ହେଦେଲ୍ ମା ଅବ୍ରାହାମ୍ ଲାତ୍ରାନି ଗାଡ଼୍ଚେ ମାଚାତ୍। ଶୟତାନ ହେଦେଲିଙ୍ଗ୍ ଅଟ୍ର ବାର୍ହୁ ଆତାତ୍ ହଇରାଣ୍ କିଜି ମାଚାତ୍। ଲାଗିଙ୍ଗ୍ ଇନେସ୍ କିଜି ଜମ୍ନିଦିନ୍ ନାଞ୍ଜିଙ୍ଗ୍ ହେଦେଲ୍ ହାର୍ ଆନାତ୍?”
17ଯୀଶୁ ଇ କାତା ୱଚ୍ନିହିଙ୍ଗ୍ ଇମ୍ଣାକାର୍ ହେୱାନିଙ୍ଗ୍ କୁଟ୍ କିଜି ମାଚାର୍, ହେୱାର୍ ଲାଜୁ ଆତାର୍। ଯୀଶୁ ଇମ୍ଣିୱିଜୁ ଚାନିଆଆନି କାମାୟ୍ କିତାନ୍ ହେୱାନିଙ୍ଗ୍ ହୁଡ଼୍ଜି ୱିଜାକାର୍ ୱାରିୟା ଆତାର୍।
ହାର୍ହୁ ମାଞ୍ଜିନି କାତା
(ମାଥି. ୧୩:୩୧-୩୨; ମାର୍କ. ୪:୩୦-୩୨)
18ଯୀଶୁ ଆରେରଗ ୱେଚ୍ଚାନ୍, “ଈଶ୍ୱର ସାସନ୍ କିନି ରାଜି ଇଲେକେ ହେ ବିଷୟତାଙ୍ଗ୍ ଆନେଙ୍ଗ୍ ର କାତା ୱେଚ୍ଚାନାଙ୍ଗ୍। 19ଈଶ୍ୱର ରାଜି ର ହାର୍ହୁ ମାଞ୍ଜି ଲେକେ, ର ମାନାୟ୍ ହେଦାଙ୍ଗ୍ ଅଜି ଜାର୍ ଜମିତ ୱିତ୍ନାନ୍, ଆରେ ହେଦାଙ୍ଗ୍ ଗଜାଆଜି ଗାଜାମାର୍ ଆନାତ୍। ଆରେ ତା କେନ୍ଦାଙ୍ଗ୍ ଗାଜା-ଗାଜା ଆନିକ୍। ଆରେ କେନ୍ଦାକାଙ୍ଗ୍ ବାଦାଡ଼୍ନି ପଟିଙ୍ଗ୍ ଗୁଡା ଗାଚ୍ଚି ବାହାକିନିକ୍।”
ସଡ଼ାକାର୍ନି କାତା
(ମାଥି. ୧୩:୩୩)
20ଯୀଶୁ ଆରେ ୱେଚ୍ଚାନ୍, “ଆନେଙ୍ଗ୍ ଈଶ୍ୱର ସାସନ୍ କିନି ରାଜି ଇନେସ୍ ଲେଗ୍ଦାକା ହେ ବିଷୟତାଙ୍ଗ୍ ର କାତା ୱେଚ୍ଚାନାଙ୍ଗା। 21ଇଦାଙ୍ଗ୍ ସଡ଼ାକାର୍ ଲେକେ। ର କଗ୍ଲେ ରୁଟି ରସ୍ତେଙ୍ଗ୍ ର ଗାଜା ବାହାତାକେ ମାନି ଅଟାଗୁଣ୍ଡା ହୁଦାଙ୍ଗ୍ ଇ ସଡ଼ାକାର୍ ମେହାଇକିଜି ୱିଜୁ ଅଟାଗୁଣ୍ଡାତାକେ ମେହାଆତାତ୍।”
ଚିପା ହାଜି ସରଗ୍ତାକେ ଅସାହାଞ୍ଜ୍ନାତ୍
(ମାଥି. ୭:୧୩-୧୪; ୨୧-୩୨)
22ଯୀଶୁ ତା ଚେଲାହିର୍ ହୁଦାଙ୍ଗ୍ ଯିରୁଶାଲାମ ସହର୍ ଆରେ ନାସ୍କୁକାଙ୍ଗ୍ ହିକ୍ଷାହିଦେଙ୍ଗ୍ ହାନିହିଙ୍ଗ୍, 23ଆରେ ରକାନ୍ ଯୀଶୁଙ୍ଗ୍ ୱେଚ୍ଚାନ୍, “ମାପୃ, ଅଲପ୍ କେତ୍ଜାଣ୍ ମାନାୟାର୍ ରକ୍ଷା ପାୟାଆନାର୍?” 24ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ଏପେଙ୍ଗ୍ ଚିପା ହାଜି ନିପଣ୍ ଆଜି ସରଗ୍ ରାଜିତାକେ ହାଞ୍ଜେଙ୍ଗ୍ ଉପାୟ୍ କିୟାଟ୍। କେତେକ୍ ହେନି ହେବେ ହାଞ୍ଜେଙ୍ଗ୍ ଉପାୟ୍ କିନାର୍। ମାତର୍ ହେୱାର୍ ହାଞ୍ଜେଙ୍ଗ୍ ଆଡୁର୍।
25ଯଦି ଈଶ୍ୱର ତା ଇଲ୍ନି କାପାଟ୍ ଗେସ୍ତିତିସ୍, ଲାଗିଙ୍ଗ୍ ଏପେଙ୍ଗ୍ ବାର୍ତ ନିଲ୍ଚି କାପାଟ୍ ଇହ୍ନାଦେର୍। ମାତର୍ ହେୱାନ୍ କାପାଟ୍ ଜେତୁନ୍। ଏପେଙ୍ଗ୍ ୱେଚ୍ନାଦେର୍, ‘ମାପୃ, ମାପୃ, ମା କାଜିଙ୍ଗ୍ ଦୁୱେର୍ ଜେତା।’ ମାତର୍ ହେୱାନ୍ ଇଞ୍ଜ୍ନାନ୍ ଆନେଙ୍ଗ୍ ମିଙ୍ଗେଙ୍ଗ୍ ପୁଞ୍ଜ୍ୱାତାଙ୍ଗ୍ନା, ‘ଏପେଙ୍ଗ୍ ଇମେତାଙ୍ଗ୍ ୱାତାଦେର୍ନା?’ 26ତାପାଚେ ଏପେଙ୍ଗ୍ ୱେଚ୍ନାଦେର୍, ‘ଆସେଙ୍ଗ୍ ମିହୁଦାଙ୍ଗ୍ ରବେ ଚିଚାସ୍, ଉଟାସ୍ନା। ଏନେଙ୍ଗ୍ ମା ସହର୍କୁକାଙ୍ଗ୍ ହିକ୍ଷାହିଜି ମାଚାଇ।’ 27ତାପାଚେ ହେୱାନ୍ ମିଙ୍ଗେଙ୍ଗ୍ ୱେଚ୍ଚାନାନ୍, ‘ଆନେଙ୍ଗ୍ ମିଙ୍ଗେଙ୍ଗ୍ ପୁଞ୍ଜ୍ୱାତାଙ୍ଗ୍ନା। ଏପେଙ୍ଗ୍ ଇମେତାଙ୍ଗ୍ ୱାତାଦେର୍ନା? ଏପେଙ୍ଗ୍ ବାନ୍ଯା କାମାୟ୍ କିନାକାଦେର୍ ନା ଲାଗାୟ୍ତାଙ୍ଗ୍ ହାଲାଟ୍।’
28ଏପେଙ୍ଗ୍ ଅବ୍ରାହାମ୍, ଇସାକ, ଯାକୁବ ଆରେ, ୱିଜୁ ଭବିଷ୍ଯତବକ୍ତାରିଙ୍ଗ୍ ଈଶ୍ୱର ସାସନ୍ କିନି ରାଜିତାକେ ହୁଡ଼୍ଦେଙ୍ଗ୍ ଆଡ୍ନାଦେର୍। ମାତର୍ ମିଙ୍ଗେଙ୍ଗ୍ ନରକ୍ତାକେ ତୁସିହିଦ୍ନାର୍। ହେପାଦ୍ନା ଏପେଙ୍ଗ୍ ଆଡ଼୍ବାନାଦେର୍, ଆରେ ଟାଡାଙ୍ଗ୍ କାପ୍ଚି କିଲ୍ବିଲ୍ ଆନାଦେର୍। 29ମାନାୟାର୍ ପୁର୍ବ, ପଶ୍ଚିମ, ଉତର୍ ଆରେ ଦକ୍ଷିଣ ନିପଣ୍ଡାଙ୍ଗ୍ ୱାନାର୍। ହେୱାର୍ ୱାଜି ଈଶ୍ୱର ସାସନ୍ କିନି ରାଜିନି ବଜିତାକେ ଚିଞ୍ଜେଙ୍ଗ୍ କୁଚ୍ନାର୍। 30ନଙ୍ଗୟ୍ ଇମ୍ଣାକାର୍ ପାଚେ ମାନାର୍, ହେୱାର୍ ଈଶ୍ୱର ସାସନ୍ କିନି ରାଜିତାକେ ପାର୍ତୁମ୍ ଆନାର୍। ଆରେ ଇମ୍ଣାକାର୍ ପାର୍ତୁମ୍ ମାନାର୍ ହେୱାର୍ ପାଚେ ଆନାର୍। ଆରେ ପାର୍ତୁମ୍ ମାନି କେତେକ୍ ମାନାୟ୍ ଈଶ୍ୱର ସାସନ୍ କିନି ରାଜିତାକେ ୱିଜୁତାଙ୍ଗ୍ ପାଚେ ମାନ୍ଗାନାର୍।”
ଯିରୁଶାଲାମ ସହର୍ନି ମାନାୟାରିଙ୍ଗ୍ ଯୀଶୁ ଲାଡ୍ କିତି କାତା
31ହେପାଦ୍ନା କେତ୍ଜାଣ୍ ପାରୁସିଦଳ୍ ଯୀଶୁ ଲାଗାୟ୍ ୱାତାର୍। ଆରେ ହେୱାର୍ ୱେଚ୍ଚାର୍, “ଇବେତାଙ୍ଗ୍ ହାଲା ହେରୋଦ ରାଜା ନିଙ୍ଗେଙ୍ଗ୍ ମାର୍ନେ ଅସ୍ତେଦେଙ୍ଗ୍ ମାନ୍କିଦ୍ନାନା।” 32ଯୀଶୁ ହେୱାରିଙ୍ଗ୍ ୱେଚ୍ଚାନ୍, “ହାଲାଟ୍, ହେ କଲିଆ ଲେକେ ଚାତୁର୍ ହେରୋଦ ରାଜାଙ୍ଗ୍ ୱେଚାଟ୍, ‘ନେଞ୍ଜେଙ୍ଗ୍ ଆରେ ୱିଗାଲିଙ୍ଗ୍ ଆନେଙ୍ଗ୍ ମାନାୟ୍ ଗାଗାଡ଼୍ତାଙ୍ଗ୍ ବୁତ୍କୁକାଙ୍ଗ୍ ହପ୍ତାଙ୍ଗ୍ନା ଆରେ ମାନାୟାରିଙ୍ଗ୍ ହାର୍କିନି କାମାୟ୍ ୱିସ୍ତାଙ୍ଗ୍ନା। ତା ଆର୍କାତ୍ ନାଞ୍ଜିଙ୍ଗ୍ ନା କାମାୟ୍ ୱିଜ୍ନାତ୍।’ 33ମାତର୍ ଆନେଙ୍ଗ୍ ଇୱିଜୁ ନେଞ୍ଜେଙ୍ଗ୍ ଆରେ ୱିଗାଲିଙ୍ଗ୍ କିନାଙ୍ଗ୍। ତାପାଚେ ଆନେଙ୍ଗ୍ ହାଃନାଙ୍ଗ୍। ଇନେସ୍କି ୱିଜୁ ଭବିଷ୍ଯତବକ୍ତାର୍ ଯିରୁଶାଲାମ ସହର୍ତାକେ ହାଃନାର୍।
ଯୀଶୁ ଯିରୁଶାଲାମ ସହର୍ନି ମାନାୟାର୍ କାଜିଙ୍ଗ୍ ଆଡ଼୍ବାତାନ୍
(ମାଥି. ୨୩:୩୭-୩୯)
34ଏ ଯିରୁଶାଲାମ ସହର୍ନି ମାନାୟ୍ କାଦେର୍! ଏପେଙ୍ଗ୍ ଇ ଭବିଷ୍ଯତବକ୍ତାରିଙ୍ଗ୍ ଅସ୍ତାଦେର୍ନା। ଈଶ୍ୱର ଇମ୍ଣି ଭବିଷ୍ଯତବକ୍ତାରିଙ୍ଗ୍ ପକ୍ଚି ମାଚାନ୍, ଏପେଙ୍ଗ୍ ହେୱାରିଙ୍ଗ୍ କାଲ୍କୁ ହୁଦାଙ୍ଗ୍ ଟ୍ରାକ୍ଚି ପାଗ୍ତାଦେର୍ନା। ଆନେଙ୍ଗ୍ ମିଙ୍ଗେଙ୍ଗ୍ ବେସି ସାଇଜ କିଦେଙ୍ଗ୍ ଇଚାକିଜି ମାଚାଙ୍ଗ୍। ଇନେସ୍କି ର କୁଜୁ ତା ହିମ୍ଣାକାଙ୍ଗ୍ ଜାର୍ ମାରାଙ୍ଗ୍ ତାରେନ୍ ରୁଣ୍ଡାଇ କିନାତ୍, ହେଲେକେ ମିଙ୍ଗେଙ୍ଗ୍ ୱିଜୁ ହିମ୍ଣାକାଙ୍ଗ୍ ଇନେକିଦେଙ୍ଗ୍ ଆନେଙ୍ଗ୍ ବେସିହଟ୍ ମାନ୍ କିଜି ମାଚାଙ୍ଗ୍। ମାତର୍ ଏପେଙ୍ଗ୍ ନାଙ୍ଗେଙ୍ଗ୍ ହେଦାଙ୍ଗ୍ କିଦେଙ୍ଗ୍ ହିଦ୍ୱାତାଦେର୍। 35ନଙ୍ଗୟ୍ ମି ଇଲ୍ ୱିଜୁ ମେଲାକିଜି ହିୟାଆନାତ୍। ଆନେଙ୍ଗ୍ ମିଙ୍ଗେଙ୍ଗ୍ ୱେଚ୍ଚାନାଙ୍ଗା, ଇନାୱେଡ଼ାଙ୍ଗ୍ ପାତେକ୍ ଏପେଙ୍ଗ୍ ଇବେଣ୍ ୱେଚୁଦେର୍, ‘ମାପୃ ତର୍ଦାଙ୍ଗ୍ ଇମ୍ଣି ମାନାୟ୍ ୱାନାନ୍, ଈଶ୍ୱର ହେୱାନିଙ୍ଗ୍ ଆଶ୍ରିବାଦ୍ କିୟେନ୍, ହେପାଦ୍ନା ପାତେକ୍ ଏପେଙ୍ଗ୍ ନାଙ୍ଗେଙ୍ଗ୍ ଆରେରଗ ହୁଡ଼୍ଦୁଦେର୍।’ ”
S'ha seleccionat:
ଲୁକ 13: PEGNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Pengo Parja Bible by The Love Fellowship is licensed under Creative Commons Attribution-ShareAlike 4.0 License.