लूका 15
15
हाजलो बिती मेंड़ा चो कहनी
1सपाय उसील करतो बितामन आउर पापी हुनचो लगे ऐई करते रवत बल्ले हुनचो सुनोत। 2मान्तर फरीसी आउर शास्तरी गुरमुराऊन भाती बोलुक मुरयाला, “ऐ तो पापीमन ले मीलु आय आउर हुनमन चो संगे खाऊ बले आय।” 3तेबे हुन हुनमन ले ये कहनी बल्लो: 4“तुमचो थानले कोन आसे जेचो सव मेंडामन रओ, आउर हुन थानले गोटक हाजुन जाओ तेबे निन्यानबे के रान ने छांडुन भाती, हुन हाजलो बाती के जिदलदाय ले मिरून नी जाये डगराते नी रओ? 5आउर जिदलदाय मिरू आय, तेबे हुन बड़े हरिक ले हुनके खांद थाने उठाऊन धरू आय; 6आउर घर ने ऐऊन भाती मीतमन आउर पड़ोसी मन के रुंडा करून भाती बोलु आय, ‘मोचो संगे हरिक करा, कसनबल्लोने मोचो हाजलो बिती मेंडा मिरली से।’ 7मय तुमचो ले बलें सें कि ऐई रीति ले गोटक मन फिरातो बिता पापी चो बारे ने बले सरग ने ईतली ची हरिक होये दे, जितरो कि निन्यानबे असन धरमीमन चो बारे नी होये, जोनमन के मन फिरातोर जरूरत निआय।
हाजलो बिती सिक्का चो कहनी
8“नाहले कोन असन बायले लेकी होये दे जेचो लगे दस सिका रओ, हुनमन थानले गोटक हाजुन जाओ, तेबे हुन दीया बारून भाती आउर घर झाड़-फाफड़ करून जिदलदाय ले मिरून नी जाये, मन लगाऊन भाती डगराते नी रये? 9आउर जिदलदाय मिरून जाऊ आय, तेबे हुन आपलो संगवारीनमन आउर पड़ोसीमन के रून्डाऊन भाती बोलु आय, ‘मोचो संगे हरिक करा, कसनबल्लोने मोचो हजलो बिती सिक्का मिरली से।’ 10मय तुमचो ले बलें सें कि ऐई रीति ले गोटक मन फिरातो बिता पापी चो बारे ने माहापुरू चो सरग दूतमन चो पुरे हरिक होऊ आय।”
उड़ाऊ बेटा चो कहनी
11फेर हुन बल्लो, “कोनी माने चो दुय ठान बेटा रला। 12हुनमन थानले नानी बिता बुआ ले बल्लो, ‘हे बुआ, धन थानले जोन भाग मोचो होओ हुन मोके देऊन दिआस।’ हुन हुनमन के आपलो जायदाद बाटुन दिलो। 13खुबे दिन नी बितु रये कि नानी बेटा सपाय काई रूंड़ा करून दूर देस ने जाते गेलो, आउर हुता खराप काम ने आपलो जायदाद उड़ाऊन दिलो। 14जिदलदाय हुन सपाय काई खरचा करून दिलो, तेबे हुन देस ने बड़े भुक पड़ली, आउर हुन कंगाल होऊन गेलो। 15ऐईकाजे हुन-हुन देस चो रतो बितामन थानले गोटक चो थाने जाऊन पड़लो। हुन हुनके आपलो बेड़ामन ने बराहां चरातो काजे पठालो। 16आउर हुन चाहते रलो कि हुन फलीमन थानले जेके बराहां खाते रवत, आपलो पेट भरो; आउर हुनके कोनी काई नी देते रला। 17जिदलदाय हुन आपलो चेत ने ईलो तेबे बोलुक मुरयालो, ‘मोचो बुआ चो कितलो ची कमयामन के भात ले आगर रोटी मिरू आय, आउर मय ऐथा भुके मरें सें। 18मय ऐबे उठून भाती आपलो बुआ चो लगे जायें दें आउर हुनचो ले बलेंदें कि बुआ, मय सरग चो बिरूद ने आउर तुचो नजर ने पाप करले से। 19अदायं ऐ लायक नी रलें कि तुचो बेटा बलायें, मोके आपलो गोटक कमया चो असन संगाव।’
उड़ाऊ बेटा चो आपस ऐतोर
20“तेबे हुन उठून भाती, आपलो बुआ चो लगे गेलो: हुन ऐबे लापी रलो कि हुनचो बुआ हुनके दकुन भाती जीव दुकालो, आउर पराऊन भाती हुनके पटारलो, आउर खुबे चुमलो। 21बेटा हुनचो ले बल्लो, ‘बुआ, मय सरग चो बिरूद ने आउर तुचो नजर ने पाप करले से; आउर अदायं ऐ लायक नी रलें कि तुचो बेटा बलायें।’ 22मान्तर बुआ आपलो दासमन ले बल्लो, ‘झटके अच्छा ले अच्छा फटीई निकराऊन भाती हुनके पिंदाहा, आउर हुनचो हाथे मुंदी, आउर पाँयमन ने पनही पिंदाहा, 23आउर पोसलो बिती बाचा आनुन भाती मारा बल्ले आमी खाऊ आउर हरिक बनाऊ। 24कसनबल्लोने मोचो ऐ बेटा मरून जाऊ रलो, फेर जीवलो: हाजुन जाऊ रलो, अदायं मिरलो से।’ आउर हुनमन हरिक करूक मुरयाला।
बड़े बेटा चो लड़ानी
25“मान्तर हुनचो बड़े बेटा बेड़ा ने रलो। जिदलदाय हुन ऐते-ऐते घर लगे पोंचलो, तेबे हुन गीत-बाजा आउर नाचतोर कोलार सुनलो। 26आउर हुन गोटक सेवक के हाग देऊन भाती पचारलो, ‘ऐ काय होये से?’ 27हुन हुनचो ले बल्लो, ‘तुचो भाई ईलो से, आउर तुचो बुआ पोसलो बिती बाचा कटालो से, ऐईकाजे कि हुनके ठीक-ठाक पावलो से।’ 28ये सुनुन भाती हुन रीस ले भरून गेलो आउर भीतरे जाऊक नी चाह लो, मान्तर हुनचो बुआ बाहरे ऐऊन भाती हुनके मनाऊक मुरयालो। 29हुन बुआ के जबाप दिलो, ‘दक, मय ईतलो बरक ले तुचो सेवा करे से आउर केबीई बले तुचो हुकुम नी टालले, तेबले बले तुमी मोके केबीई बले गोटक बकड़ी चो पिला बले नी दिलीस कि मय आपलो मीतमन चो संगे हरिक करते। 30मान्तर जिदलदाय तुचो ऐ बेटा, जोन तुचो धन बेश्यामन ने उड़ाऊन दिलो से, ईलो, तेबे हुनचो काजे तुय पोसलो बिती बाचा कटालीस।’ 31हुन हुनचो ले बल्लो, ‘बेटा, तुय सदा मोचो संगे आसीत; आउर जोन काई मोचो आय हुन सपाय तुचीई ची आय। 32मान्तर अदायं हरिक करतोर आउर उदम होतोर आसे कसनबल्लोने ऐ तुचो भाई मरून जाऊ रलो, फेर जीवलो से; हाजुन जाऊ रलो, अदायं मिरलो से’।”
S'ha seleccionat:
लूका 15: HLBNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Halbi Bible by The Love Fellowship is licensed under Creative Commons Attribution-ShareAlike 4.0 License.