मत्ती 4
4
शयतान चो हाथ ले ईशु मसीह चो परीक्षा
1तेबे हुन समया माहापुरू चो आत्मा ईशु के छिड़ा ने निली बल्ले शयतान हुनचो परीक्षा धरो। 2ईशु चालीस दिन, आउर चालीस राती, नीराहार रलो, तेबे हुनके भुक लागली। 3तेबे परकतो बिता शयतान लगे ऐऊन भाती ईशु ले बल्लो, “अगर तुय माहापुरू चो बेटा आस, तो बोलुन देस, कि ऐ पकना रोटीमन बनुन जाओ।” 4ईशु जबाप दिलो, “लिकलोर आसे,
‘माने मात्र रोटी ची ले नाई,
मान्तर हर एक बचन ले जोन माहापुरू चो टोंड ले निकरू आय जीव रयदे।’”
5तेबे शयतान ईशु के पवितर नंगर ने नीलो आउर मंदिर चो गुबा उपरे उबा करलो। 6आउर ईशु ले बल्लो, “अगर तुय माहापुरू चो बेटा आस, तो आपन खुद के खाले घसराऊन देस; कसनबल्लोने लिकलोर आसे, ‘हुन तुचो बारे ने आपलो सरग दूतमन के हुकुम देये दे, आउर हुनमन तुके हाथो-हाथ उठादे; काहांय असन नी होओ कि तुचो पाँयमन ने पकना ले ठेस पाओ।’” 7ईशु हुनचो ले बल्लो, “ऐ बले लिकलोर आसे, ‘तुय परबु आपलो माहापुरू चो परीक्षा नी धर।’” 8फेर शयतान हुनके गोटक खुबे डेंग डोंगरी उपरे निलो आउर सपाय जगत चो राज आउर हुनचो धनमाल दकाऊन भाती 9हुनचो ले बल्लो, “अगर तुय घसरुन भाती मोके पाँय पड़से, तेबे मय ऐ सपाय काई तुके देऊन देयेंदे।” 10तेबे ईशु हुनचो ले बल्लो, “हे शयतान दूर होऊन जा, कसनबल्लोने लिकलोर आसे: ‘तुय परबु आपलो माहापुरू के पाँय पड़, आउर मात्र हुनचेई उपास कर।’” 11तेबे शयतान हुनचो लगले जाते गेलो, आउर सरगदूत ऐऊन भाती हुनचो सेवा करूक मुरयाला।
ईशु चो उपदेश देऊक मुरयातोर
12जिदलदाय ईशु ऐ सुनलो कि यूहन्ना बन्दी बनाया गेलोसे, तेबे हुन गलील परदेश ने जाते गेलो। 13आउर हुन नासरत नंगर के छांडुन भाती कफरनहूम नंगर ने जोन झील चो कटा जबूलून आउर नप्ताली चो देश ने आसे जाऊन भाती रऊक मुरयालो। 14बल्ले जोन यशाया अगम गिआनी चो बाटले बल्ला जाऊ रये, हुन पुरा होओ।
15“जबूलून आउर नप्ताली चो देश,
झील चो बाटले यरदन लंदी चो लगे दुसर जातिमन चो गलील
16जोन लोग माहापुरू चो सत के नी जानते रवत हुनमन माहापुरू चो बड़े सत के दकला; आउर जोन मरना चो देश आउर छांय ने बसु रवत, हुनमन उपरे उजर बरली।”
17हुन समया ले ईशु परचार करतोर आउर ऐ बोलतोर मुरयालो, “मन फिरावा कसनबल्लोने सरग चो राज लगे ईलीसे।”
पयला चेलामन के हाग देतोर
18ईशु गलील चो झील चो कटा बुलते-बुलते हुन दुई भाईमन बल्लोने शिमोन के जोन पतरस बलाया जाऊ आय, आउर हुनचो भाई अन्द्रियास के झील ने झारी पकातोर दकलो; कसनबल्लोने हुनमन मछरी धरतो बितामन रवत। 19आउर हुनमन ले बल्लो, “मोचो पाट-पाट ईआ, तेबे मय तुमके मानेमन के धरतो बिता बनायेंदें।” 20हुनमन तुरते झारीमन के छांडुन भाती हुनचो पाट-पाट गेला। 21आउर हुता ले पुरे जाऊन भाती, ईशु आउर दुय भाईमन बल्लोने जबदी चो बेटा याकूब आउर हुनचो भाई यूहन्ना के आपलो बुआ जबदी चो संगे ड़ोंगा थाने आपलो झारीमन के जतनातोर दकलो; आउर हुनमन के बले हाग दिलो। 22हुनमन तुरते ड़ोंगा आउर आपलो बुआ के छांडुन भाती हुनचो पाट-पाट गेला।
गलील ने रोगीमन के चेंगा करतोर
23आउर ईशु सपाय गलील परदेश ने बुलते-बुलते हुनमन चो आराधना घरमन ने उपदेश करते, आउर राज चो नगतखबर परचार करते, आउर लोगमन चो सपाय परकार चो बेमार आउर कमजोरी के दूर करते रलो। 24आउर सपाय सीरिया देश ने हुनचो किरती फयलुन गेली; आउर लोग सपाय बेमारीमन के, जोन नाना परकार चो बेमारमन आउर दुखमन ने पडु रवत, आउर जोनमन ने दुष्टआत्मामन रली आउर बापुर बितामन आउर लकवा चो रोगाहामन के हुनचो लगे आनला आउर हुन हुनमन के चेंगा करलो। 25आउर गलील परदेश, दिकापुलिस, यरूशलेम, यहूदिया परदेश आउर यरदन लंदी चो हुनपाट ले भीड़ चो भीड़ हुनचो पाट-पाट होली।
S'ha seleccionat:
मत्ती 4: HLBNT
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Halbi Bible by The Love Fellowship is licensed under Creative Commons Attribution-ShareAlike 4.0 License.