JUAN 5
5
Betesda pueblomanda, na cuyuri ushaj runatami alichishca
1Chai jipami Jesusca, judiocunapaj shuj cushijui punlla cajpi, Jerusalenman vichai rirca. 2Jerusalenbica, llamacuna yaicuna pungu quimiriapimi, yacuta churangapa rurashca tiyarca. Chai yacu churanaca, hebreo rimaipica, Betesda shutimi carca. Chaipica, picha pungucunami tiyarca. 3Chaipica: Ñausacuna, jangacuna, na cuyuri ushajcunami, yacu cuyurinata shuyashpa, ashtaca, ashtaca huañunajujcuna sirinajurca. 4Chaitaca, jahua pachamanda shuj ángel shamushpami, huaquimbi huaquimbilla cuyuchij carca. Chai yacu cuyurijhuan, maijan punda huashajunllami, ima nanaita charishpapash ali tucunlla carca. 5Chaipica, quimsa chunga pusaj huatata huañujujlla runami sirijurca. 6Shina sirijujta Jesús ricushpami, ña unai huatacunata huañujujta yachashpa:
“¿Nachu ali tucungapa munangui?” nishpa tapurca.
7Shina nijpimi, chai huañujuj runaca:
“Yacu cuyurijhuan, ñucata huashajuchingapaca, pipash na tiyapanllu Taitalla. Ñuca rijujpillatami, shujra mishashpa huashajun” nirca.
8Shina nijpimi Jesusca:
“Jatari, can imapi sirijushcatapash apashpa rilla” nirca.
9Shina nijhuanmi chai runaca ñapash ali tucushpa, pai imapi sirijushcata aparishpa rirca. Samana punllapimi chashna alichirca. 10Shinamandami, mandaj judiocunaca, chai ali tucushca runataca cashna ninajurca:
“Cunanga samana punllamari. Can imapi sirijushcata apashpa rijushpaca, na alitamari rurajungui” ninajurcami.
11Shina nijpimi, paica:
“Ñucata alichijllatami: ‘Can sirijushcacunata aparishpa rilla’ nihuarca” nishpa tigrachirca.
12Shina nijpimi:
“¿Pita candaca: ‘Can imapi sirijushcata aparishpa rilla’ nircayari?” ninajurca.
13Ashtahuangarin, maijan paita alichishcatapash na yacharcachu. Jesusca, chai gentecunamanda ña anchurishpa rishca cajpimi, na rijsi usharca. 14Chai jipami Jesusca, Pai alichishca runataca, Diospaj huasipi tuparishpa cashna nijurca:
“Ricui, cunanga ña ali tucushcami cangui. Ama ashtahuan juchata ruranguichu. Juchata rurashpaca, ashtahuanmi llaquichi tucungui” nijurcami.
15Chai ali tucushca runaca, judiocunapajman rishpami, paitaca Jesús alichishca cashcata villajurca.
16Shinamandami judiocunaca, Jesusta ninanda fiñashpa huañuchingapa mascai callarirca. Samana punllapi chashna rurashcamandami Paitaca mascanajurca. 17Shinamandami Jesusca, cashna nirca:
“Ñuca Taitaca, cunangaman imatapash rurajunllami, chaimandami Ñucapash imatapash rurajunilla” nirca.
18Shinamandami judiocunaca, Jesusta huañuchishunpacha nishpa, tucuita ruranajurca. Samana punllatapash faquishpa, Taita Diosca Ñuca Taitami nishpa, Dios tucujushcamandami, ashtahuan fiñarinajurca.
Diospaj Churica, ninan ushaitami charin
19Jesusca, paicunataca cashnami nijurca: “Na llullashpami, cashna nini: Churica, pailla imatapash ruraitaca na ushanllu. Ashtahuangarin, Taita imata rurajta ricushpami, Churipash Taitashnallata rurajun. 20Taitaca, Churita ninanda juyashpami, Pai imata rurajushcatapash tucuita ricuchin. Caicunataca ashtahuan yali ruranacunatapashmi ricuchinga. Chaita ricushpami cangunaca ninanda manllaringuichi. 21Imashnami Taitaca, huañushcacunata jatarichishpa causaita caran, chashnallatami Paipaj Churipash, maijan chaita munajcunamanlla causaita caranga. 22Taitaca, pitapash na yangamanda juchachinllu. Ashtahuangarin chaitaca, churi ricuchunmi cushca. 23Imashna Taitata tucuicuna ninanda alicachin, chashnallata Paipaj Churitapash ninanda alicachinajuchunmi chashna cushca. Paipaj Churita na alicachishpaca, Paita cachamuj Taitatapash na alicachinajunllu.
24Na llullashpami cangunataca cashna nini: Ñuca imata villajujtapash uyashpa, Ñucata cachamuj Taitatapash crishpallami, causaita causanataca charin. Chashna crishcamandami, na chingaita chingagrishpa, ashtahuangarin causaita causanata charin. 25Na llullashpami cangunataca cashna nini: Taita Diospaj Churi rimajta, huañushcacuna uyana punllacunami cunanga ña chayamushca. Pipash Paita uyashpaca causaitami causagringa. 26Taita Diosllami, causaita carangapaca ushaita charin, shinallatami, Paipaj Churimambash causaita carachun ushaita curca. 27Shinallata, llaquichi ushachumbash, Runa Aichayuj tucushca cajpimi ushaita cararca. 28Cashna nijushcamandaca, na manllarinachu canguichi. Huañushpa pambai tucushcacunapash, tucuicuna Pai rimajta uyana punllacunami ña chayamujun. 29Alita rurajcunallami causaita causangapa causaringa. Ashtahuangarin, na alitalla rurashpa causashcacunaca, ninanda llaquichi tucungapami causaringa.
Cristo maijan cashcata villajcunamanda
30Ñucapaj munailla, imata ruraitapash na ushanichu. Ñuca Taitata uyashpallami, ali cajta, na ali cajtapash ricujuni. Na Ñucapaj munailla chashna rurashpami, imata cashpapash chashnatapacha rurajuni. Ashtahuangarin, Ñucata cachamuj Taita munashcatallami rurajuni. 31Ñucapaj munai, Ñucamandallata villajushpaca, llullashpami nijuiman. 32Ashtahuangarin shujmi, Ñucata alicachishpa villajun. Pai Ñucamanda villajuj shimicunaca, napacha llulla cajtami yachani. 33Cangunaca Juanda tapuchunmi cachamurcanguichi. Paica, na llullashpami villajurca. 34Maijan runa Ñucamanda villajuchumbash, na shuyajunichu. Ashtahuangarin, canguna quishpirishca cachunllami caitaca villajuni. 35Juanga, micha japichishcashnami punchayachijurca. Cangunaca, chai michapimi asha punllacunatalla cushijungapa munarcanguichi. 36Ashtahuangarin, Ñuca villashcacunaca, Juan villashcataca yalimi. Ñuca Taita imata rurachun cushcatallami pactachijuni. Chai Ñuca rurashcacunallatami, Ñucamandaca ricuchijun. Chaipajmi Ñuca Taitaca cachamuhuarca. 37Shinallata, Ñucata cachamuj Taitapash, Ñucamandami villajurca. Pai imata rimajujtapash, napacha uyashpami, Pai imashna cajtapash na ricushcanguichi. 38Pai, Ñucata cachamushcatapash na crishpami, Paipaj shimitapash cangunapaj shungupica na alichishcanguichi. 39Dios quilcachishca Shimicunataca, aligutapacha callarishpami ricunguichi. Causaita causagrinata charingapami chashna ricunguichi. Chai Shimicunapica Ñucamandami villajun. 40Shina cajpipash, causaita causagrinata charingapa Ñucapajman shamungapaca, na munashpami causanguichi.
41Gentecuna, Ñucata jatumbi churanajuchunga na munanichu. 42Ashtahuangarin, cangunataca ña rijsinimi. Cangunaca Diosta na juyaj, cajtami yachani. 43Ñuca Taitapaj shutipi shamujpipash cangunaca, Ñucata na chasquishpami causanguichi. Maijan cashpapash, Paipaj shutipi shamujtaca chasquinguichimanmi. 44Cangunapurallata, shujmanda shujmanda alicachirishpaca, ¿imashnata, Taita Dios Paipaj ushaihuan cachamushcatacarin mascashpa cringuichiyari?. 45Ñuca Taitaman, cangunata juchachishpa villangami yashpaca na manllanachu canguichi. Cangunaca, Moisés yanapangallami yashpami shuyanajunguichi. Ashtahuangarin paillatami, cangunataca juchachinga. 46Moisés villashcata crishpaca, Ñucatami cringuichiman. Paica, Ñucamandami quilcarca. 47Ashtahuangarin, Moisés quilcashcatapash na crishpaca, ¿imashnata Ñuca villashcatacarin cringuichiyari?” nijurcami.
S'ha seleccionat:
JUAN 5: QVI16
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Biblia en Quichua de Imbambura: Diospaj Shimi © Sociedades Biblicas Unidas, 1994, 2023.