Mǒhtûlû̌hǎhtûsa 4
4
Kaî̌no ta Abělè
1Ada hǎmoǒhtu ta ama Ěwa̤ dě a mo̤do a phû̌ǒnṳ aphû̌makhû tapwa̤ dě Ěwa̤ hî̌, “Cǒmara tûjûpwa̤ ma̤jè he dě he phû̌ǒnṳ he phû̌makhû tapwa̤ hǒ,” dě a kaǎ nû̌ûmi̤ ta Kaî̌no. 2Děnǒkòdě a phû̌ǒnṳpo̤ apṳ makhû Abělè htě a htû pwa̤gèǐsophû̌. Awè̤ Kaî̌no dě a htû pwa̤ma̤hǔklaphû̌.
3Akhîakha to̤hèta sǒsǎpwa̤ sǒsǎmi akha, Kaî̌no phî̌hènṳ sǒsǎwû̌pho htě ashǒǐ toǒ dě a hè lṳhtò̌ǐ nû̌ûta Cǒmara tûjûpwa̤. 4Pwǎ̤ta Abělènu a phî̌hènṳ sophû̌ phû̌wè̤pwa̤ apo̤kû htǒotado dě a lṳhtò̌ asû̌abè̌ htě awǐgutṳ̌ toǒ ta Cǒmara tûjûpwa̤. Dě Cǒmara sò̌phlǒto Abělè ta ata̤lṳta̤tò̌. #Ebrephû̌ 11:4 5Pwǎ̤ta Kaî̌no ata̤lṳta̤tò̌ htǒonu, a to Cǒmara tûjûpwa̤ sò̌phlǒ tò̤ akhû̌akhî, Kaî̌no sò̌phlǒdû̌ tûlû̌shû̌ dě ami̤sǎ pî̌kè.
6Dě Cǒmara tûjûpwa̤ gwè Kaî̌no, “Na cû̌ sò̌phlǒdû̌ tǒ̤ ma̤tè? Nami̤sǎ cû̌pî̌tǒ̤ ma̤tè? 7Na dè ma̤to ta̤ dèhî̌dě he jû na tò̤ ya? Na dè ma̤to ta̤ tò̤ hî̌dě ta̤sǔ htǒonu alò̤ta sî̌ò̌ htě a ǒphǔ nakòshî̌ dě a gupṳ̂ǎ nayo̤, dě a sò̌yṳ pǒǐ na pò̤̌ta na bǎ ma̤pè̤kè a.”
8Ti̤ni̤kha Kaî̌no hî̌ apṳ Abělè, “Pa hǎhtò̌cû̌ hǔklakhû̌ hò꤮,” bǎ asî ǒ hǔklakhû̌ akhanu, a sò̌phlǒdû̌ apṳ Abělè dě a ma̤sikè nû̌û. #Matěo 23:35; Lǔka 11:51; Jowǎ̤ni̤ awǐlǒ tabǎ 3:12-15
9Dě Cǒmara tûjûpwa̤ gwè Kaî̌no, “Napṳ Abělè ǒ bǎtè?”
Dě a hî̌shǔ nû̌û, “He sî̌ya tò̤, he mî̌ pwa̤ǒkè̌ǐ hepṳ mè̤tò̤?”
10Cǒmara tûjûpwa̤ hî̌ yǎ, “Na cû̌ma̤tǒ̤ hè̌o ma̤tè? Gana̤demò̌! Napṳsǐnu a ǒ hǎla̤ dě yi̤kǒhtò̌ heǒ hǒ. #Ebrephû̌ 12:24 11Hǐnuakhû̌akhî, ma̤pûhǐ hǎkhû̌ cî̌o napṳ asǐ htě na ma̤sisǐlò̤ nû̌û htǒo sǎhtò̌phohtò̌ bǎpe pû ta naya tò̤nu, he ǐshokè na hǒ. 12Htû̌꤮ naǎnawè̤ shǒǐ kû̌kò bǎ hǎkhû̌bǎo pěnu a sǎhtò̌phohtò̌ bǎ na pě tò̤. Nashodohǐ shodophò pě, na bǎ khlè̌htokhlè̌lò̤ hǎkhû̌bǎo pě,” a hî̌ nû̌û hǐnu.
13Kaî̌no hî̌ Cǒmara tûjûpwa̤, “Pha Běcǎ, nata̤cèròhtǒo apò̤asha mè̤mè̤̌ heya, he khòbò̌pè̤ nòtò̤hǒ. 14Khònò̤dě Cǒmara tûjûpwa̤ wṳ̂hǎhtò̌ tepheyî̤kè he ta hǎkhû̌ htě he la̤shǒǎǐ htǒo dě Cǒmara tûjûpwa̤ alo̤mo̤ hǒ. He glè htû pwa̤cû̌lète̤we̤ shodola̤ǒkǔ hǎkhû̌bǎo hǒ. Ûpèpè̌ bǎbǎ htě a kè̌shǐ he toǒnu, a ma̤sinò he pě.”
15Pwǎ̤ta Cǒmara tûjûpwa̤ hî̌ yǎ, “A mè̤ tò̤. Kòyò tapwa̤pwa̤ a ma̤si nanu a khòbǎjîkhlo gesǒ ali̤ ta na pě susǒ taplǎ pě.” Htodě ma̤pûhǐ kòyò htě a kè̌shǐ Kaî̌no toǒ ma̤si pû nû̌û tò̤ ayanu, Cǒmara tûjûpwa̤ ma̤dòǐkè ta̤tacǎ ta Kaî̌nolo̤. 16Ma̤hǐnudě Kaî̌no hǎhtò̌cû̌tephekè Cǒmara tûjûpwa̤ alo̤mo̤ dě a cû̌ǒ Nò̌dǎga, Edîwe̤ mṳhtò̌ tokho. (Nò̌dǎ amûasǎnu Ebrephû̌ ayo̤ mî̌ cû̌shido te̤we̤.)
Kaî̌no akhlialè
17Dě Kaî̌no hǎmoǒkû̌ ta ama dě amo̤dohtò̌, dě aphû̌ǒnṳ ta Ěnò̌. Kaî̌no shǒhtò̌nṳ Ěnò̌wî̤ dě wî̤ htǒonu a kaǎ nû̌ûmi̤ ta aphû̌mi̤ Ěnò̌. 18Ěnò̌ aphû̌ mi̤ ta Irǎ, Irǎ phû̌ mî̌ ami̤ta Mahuyaělè, Mahuyaělè aphû̌ mî̌ ami̤ta Matushaělè, Matushaělè aphû̌ mî̌ ami̤ta Lamè̌. 19Lamè̌ phî̌nṳ ama sò̌gini̤, tapwa̤mî̌ ami̤ ta Adǎ, tapwa̤mî̌ ami̤ ta Sǐla. 20Adǎ phû̌ǒnṳ Yabalǎ dě Yabalǎ mî̌ a mî̌ phiphu htě a cû̌shǒ hǐphû̌ tò̤glò hto tò̤glò dě a bǔǐ ta̤phû̌ta̤li̤ awǐgutṳ̌ tapwa̤ hǒ. 21Yabalǎ apṳ mî̌ ami̤ ta Jǔbalǎ. Jǔbalǎ mî̌ ahtû kòyò lǒ̤bò htě a dǒ tǐtu, a ǔ tî̌lû̌ ta a ǔ tǔnu toǒ apha hǒ. 22Sǐla phû̌ǒnṳ Tǔbalǎkaî̌no. Amî̌ pwa̤de ta̤kî̌ta̤kû̌ ta tîlî ta te̤htò̌ lǒ̤bònu tapwa̤ hǒ. Tǔbalǎkaî̌no apṳmamǔ mî̌ ami̤ ta Namǎ.
23Lamè̌ hî̌ ama sî toǒ,
“Kǒ꤮ phû̌ma sî!
Gana̤de lǒkho he hî̌ bǎ sî htǒo,
makhû phû̌sǎ tapwa̤ ma̤sha he dě he ma̤sikè a hǒ.
24Kòyò htě a ma̤si Kaî̌no tapwa̤pwa̤nu,
a bǎ khòbǎ jîkhlo gesǒ ali̤ ta a susǒ taplǎ pě dèhî̌mî̌ kòyò htě a dè ma̤silè̌ he tapwa̤pwa̤ hî̌nu,
a bǎ khòbǎ jîkhlo gesǒlè̌ ali̤ susǒ tishi ta susǒ taplǎ pě.”
25Ada hǎmoǒhtu gesǒ ta amanu a phû̌ǒnṳ aphû̌makhû tapwa̤ dě Ěwa̤ hî̌, “Abělè htě Kaî̌no ma̤sikè nû̌ûnu tapwa̤ agûla̤nu, Cǒmaradû̌ ǐtèplè̌ gesǒ bǎ he phû̌makhû tapwa̤ hǒ,” hǐnudě a kaǎ nû̌ûmi̤ ta Shěta. (Shěta amûasǎnu Ebrephû̌ ayo̤ mî̌ a ǐ.) 26Shěta phû̌ǒnṳ aphû̌makhû tapwa̤ dě a kaǎ nû̌ûmi̤ ta Ěno. Bǎnukha kòyò toǒ tèhtò̌ sabahtò̌ Cǒmara tûjûpwa̤ hǒ. #Lǔka 3:38
S'ha seleccionat:
Mǒhtûlû̌hǎhtûsa 4: KRC
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Wycliffe USA