Jowǎ̤ni̤ 2
2
Khòmò̤pwè dě Kanǎwî̤ akû
1Suni̤ ti̤ni̤nu khòmò̤pwè ǒdě Galilî̌aga, Kanǎwî̤kû tûphû̌, dě Ye̤shǔ amo̤ ǒdǒ bǎnu. 2Khòmò̤pwè htǒonu, kò mǎhè dǒ Ye̤shǔ ta akhophijaû̌ toǒ. 3Bǎ sobîshisî̌yo̤ htě shǐtè̤mè̤ toǒ aya hǎbòkè akhanu, Ye̤shǔ amo̤ pwe̤ǐlṳ Ye̤shǔ, “Asî sobîshisî̌yo̤ hǎbòkèhǒ.”
4Dě Ye̤shǔ hî̌shǔ nû̌û, “Mo̤, na cû̌hè pwe̤ǐtǒ̤ he ma̤tè? Khîkha to̤ta he glè dǔlṳ he ta̤po̤ta̤phǎ hǒtò̤.”
5Ye̤shǔ amo̤ pwe̤ǐ pwa̤ma̤ta̤ toǒ, “A dè nosî tacǎcǎ hî̌dě ma̤ bǎ yǎ nî̌꤮.”
6Te̤we̤lṳ̂ bǎnu tò̤glònu sodû̌ ǒ masusǒ dě tamanu, kò yṳnṳ nû̌ûta shi hî̌numî̌ a nî̤ pò̤dû̌nu 80-120.#2:6 80-120 Pò̤dû̌ hî̌numî̌ Kû̌lǎ yo̤sǎ mî̌ liters Sodû̌ htǒotoǒnu, Yṳ̌daphû̌ toǒ yṳnṳ nû̌ûta shi dě asî noǎ nû̌ûta a la̤shǔbò nû̌ûta cǔde pwǐ asî ta̤subusaba la̤klo ǒ aya nupwǎ.#2:6 Ma̤pûhǐ Israelphû̌ toǒ ma̤to Cǒmara sò̌phlǒ ayanu, asî gû shǔbòdǒ pwǐ ta̤sû̌ta̤tòwò ǒnu.
7Ye̤shǔ nopwa̤ma̤ta̤nu toǒ, “Yṳnṳbebò shi dě sodû̌ toǒ akûnu.” Dě asî yṳnṳbebò htodě,
8Ye̤shǔ hî̌ asî, “Khònò̤htǒo dǔnṳshi taba dě cû̌ǐyǎ ta pwèhǐkǒdû̌ htě a pǒtòwò kè̌ǐkhwè̌ǐbò bǎ kò ta̤pṳ̂̌꤮ tacǎnu tapwa̤ a ǒ,” a hî̌ dě asî dǔcû̌ bǎ nû̌û. 9Pwèhǐkǒdû̌ okè̌ shi dě a htûhtò̌ sobîshisî̌yo̤ htǒonu. Pò̤̌ta sobîshisî̌yo̤ htǒo a ǒ bǎtè hènu a sî̌yatò̤. (Pwa̤ma̤ta̤ htǒotoǒ dǔshi akhû̌akhî, a sî̌ya pwǎpǒ̤ asî htǒotoǒ pwǎ) dě pwèhǐkǒdû̌ htǒotapwa̤ kaǎhè pwa̤khòmò̤ makhû, 10Dě a hî̌ nû̌û, “Kò pṳ̂̌꤮ tapwa̤ la̤klo ǐowǐ sobîshisî̌yo̤ htě awǐashu toǒ, htodě kò sò̌o pwî̌tètè̌ kò ohto akhanu, kò ǐolè̌ sobîshisî̌yo̤ paa toǒ. Pwǎ̤tadě nahtǒo na bè̌hǔ to̤pe na sobîshisî̌yo̤ awǐashu toǒ tǒ̤lò̤khònò̤.”
11Ye̤shǔ ma̤cǒklî̌ wǐgutṳ̌ ta̤ taplǎmî̌ bǎ Kanǎwî̤, Galilî̌aga htǒonuhǒ, dě a dǔlṳhtò̌ a ta̤sîrîdû̌sîrîhtû bǎnu. Hǐnudě akhophijaû̌ toǒ yṳǎna̤ǎ nû̌û.
12Htodě a ta amo̤ ta apṳ toǒ ta akhophijaû̌ toǒ lò̤ lǒkho dě Kaperanòwî̤kû, dě asî cû̌ ǒ lǒkho bǎnu ginǐ̤suni̤.#Matěo 4:13
Ye̤shǔ cû̌ dě ta̤lṳhtò̌ho
(Matěo 21:12-13; Mǎ̤riko 11:15-17; Lǔka 19:45-46)
13Yṳ̌daphû̌ ta̤cû̌tûlû̌pwè phǔhè akhû̌akhî, Ye̤shǔ cû̌ dě Ye̤rǔshèlèwî̤.#2:13 Ta̤cû̌tûlû̌pwè mî̌ pwè tèpwè htě kò ma̤ sî̌yahtò̌gesǒ ta̤ bǎ Cǒmara ma̤lû̌htò̌ge Yṳ̌daphû̌ toǒ dě tanaphû̌ hèlò̤ ma̤si kò phû̌wè̤pwa̤ akhanu.#Ta̤lû̌htò̌ge 12:1-27 14Bǎ a hèto̤ dě ta̤lṳhtò̌hokû akhanu, a kè̌shǐ kòyò shaǎ pṳ̂, sophû̌, htû̌li̤cò̌ toǒ ta kòyò hǎnòò̌ htû̌lè̌ wû dě dîjowa̤ kòshî̌ toǒ. 15Hǐnudě a ma̤ sǒpli̤ la̤phlě dě a wṳ̂hǎhtò̌kèbò sophû̌ ta pṳ̂ toǒ dě ta̤lṳhtò̌hokû. Htodě a htû̌lòglokèbò kò la̤htû̌lè̌ wû a dîjowa̤nu toǒ dě a ma̤pò̌ma̤shî asî wûyî̌ toǒ. 16Htodě a hî̌ kòyò shaǎ htû̌li̤cò̌nu toǒ, “Johtò̌ tephekèbò htǒotoǒ. Nohtûhtò̌ ma̤ hepha ahǐ htǒonu ta klǎma̤.”
17Akhophijaû̌ toǒ gènè̤htò̌ to̤ lî̤cahtǐkû hî̌, “He sò̌phlǒ mo̤ǐshû̌ mè̤mè̤̌ nahǐ. He sò̌phlǒ ta̤mo̤ǐshû̌ htǒonumî̌ a glè gèbòkè he sǒsǒta mî̌nu pě.” #Ta̤htû̌sò̌ǐ 69:9
18Dě a ma̤ pwǐhè̌o akhû̌akhî, Yṳ̌daphû̌ hǐkǒdû̌ toǒ gwè nû̌û, “Ma̤pûhǐ pa sî̌ya ta na nî̤bǎ ta̤sîrîshû̌sho dě na hè ma̤pò̌ma̤shî htǒo mî̌ anî̤ pwǎ ayanu, na dǔlṳ bǎ pa ta̤cǒklî̌ titè pě tè?”
19Ye̤shǔ hî̌shǔ, “Ma̤ lòte̤jakè ta̤lṳhtò̌ho htǒonu. Suni̤ akû, he ma̤htò̌ gesǒ pě.”#Matěo 26:61, 27:40; Mǎ̤riko 14:58, 15:29
20Htodě Yṳ̌daphû̌ gwè nû̌û, “Suni̤ akû, na glè̌ ma̤htò̌htobò̌ gesǒ pě ya? Ta̤lṳhtò̌ho htǒonumî̌ kò ma̤htò̌ yǎ mî̌ ayî̤ aněli̤shi ta susǒ yahî̌.” 21Pwǎ̤tadě bǎ Ye̤shǔ hî̌ ta ta̤lṳhtò̌ho awi̤akè̌ akhanu mî̌ a hî̌lò̤ tû̌pwǎ ana̤. 22Hǐnu akhû̌akhî, bǎ Ye̤shǔ htûpwa̤gesǒ ta ta̤si akhanu, akhophijaû̌ toǒ gènè̤htò̌ to̤bǎ gesǒ htě a hî̌bǎ ayo̤ htǒonu dě asî yṳǎ lî̤cahtǐ ta a hî̌nǎ ayo̤nu toǒ.
Ye̤shǔ sî̌yabò kò sò̌phlǒ
23Bǎ Ye̤shǔ ǒpe bǎ Ye̤rǔshèlèwî̤ ta̤cû̌tûlû̌pwèkû akhanu, kò kè̌shǐ a ma̤ ta̤cǒklî̌nu toǒ akhû̌akhî, kò yṳǎ plṳ̂ nû̌û. 24Pwǎ̤tadě Ye̤shǔ yṳǎ asî tò̤, ma̤tè̤hî̌dě a sî̌ya bò̌phlǒbò kò sò̌phlǒ. 25Kò lo̤bǎ pwe̤ǐlṳ bǎ Ye̤shǔ ta kòyò pṳ̂̌꤮ tapwa̤ awi̤akè̌ tò̤ ma̤tè̤hî̌dě Ye̤shǔ sî̌yahtotû̌ kò pṳ̂̌꤮ tapwa̤ asò̌phlǒ hǒ.
S'ha seleccionat:
Jowǎ̤ni̤ 2: KRC
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Wycliffe USA