Lǔka 23
23
Kò kaǎcû̌ Ye̤shǔ dě Khwǐpilǎto alo̤mo̤
(Matěo 27:1-2, 11-14; Mǎ̤riko 15:1-5; Jowǎ̤ni̤ 18:28-38)
1Htodě kòyò lǒ̤꤮ bò htû hǐkǒdû̌ htǒotoǒnu, a ihtǒ dě a kaǎcû̌ Ye̤shǔ Khwǐpilǎto alo̤mo̤. 2Asî bè̌ lǒkho ta̤sǔ dě Ye̤shǔ alo̤ dě a hî̌, “Pa pṳ̂nṳ kòyò htǒotapwa̤, ma̤tè̤hî̌dě a sûsǔplṳ̂ pa kòyò toǒ aklè̌, dě a hî̌ ta lo̤bǎǐ ta Rò̌mǎkhwǐ ta̤kûta̤cî̌ tò̤, htohǒtò̤ a hî̌lò̤po̤ ana̤ ta he mî̌ Khrî̌stu htě a mî̌ Khwǐ tapwa̤, a hî̌ hǐnu.”
3Khwǐpilǎto gwè nû̌û, “Na mî̌ Yṳ̌daphû̌ akhwǐ tapwa̤ mè̤mè̤̌ ya?”
Dě a hî̌shǔ Khwǐ, “O, a mè̤mè̤̌ pwǐ na hî̌nu hǒ.”
4Htodě Khwǐpilǎto hî̌ pwa̤tòlûhtò̌ hǐkǒdû̌ toǒ ta kòyò saprṳ̂ toǒ, “He glè̌ cèrò kòyò htǒotapwa̤nu, he kè̌shǐ yǎ ta̤sǔ dǐcǎ꤮ tò̤.”
5Pwǎ̤tadě, asî tǐ̤ yi̤kǒhtò̌ shû̌shû̌khlopo̤ ta, “A cû̌shido ma̤shû̌shǎbò Yṳ̌daphû̌ sagala̤ ta a ta̤sû̌ǐtòwòǐ htǒonu. A tèhtò̌ ma̤ Galilî̌aga dě a hèto̤ bǎo hǒ.”
Kò sûcû̌ Ye̤shǔ dě Khwǐherǒ alo̤mo̤
6Bǎ Khwǐpilǎto gana̤de asî hî̌ ta Galilî̌aga akha, dě a gwè asî, “Kòyò htǒotapwa̤ mî̌ Galilî̌aphû̌ ya?” 7Bǎ a sî̌ya ta Ye̤shǔ mî̌ Galilî̌aphû̌ htě a ǒ dě Khwǐherǒ ata̤pǒ agûla̤ akhanu, a nosûgesǒ nû̌û dě Khwǐherǒ a ǒ. Bǎnukha mî̌ Khwǐherǒ ǒ dě Ye̤rǔshèlèwî̤.
8Bǎ Khwǐherǒ kè̌shǐ Ye̤shǔ akhanu, a sò̌le̤sò̌lò̤ mè̤mè̤̌, ma̤tè̤hî̌dě a gana̤dehto Ye̤shǔ awi̤akè̌ dě a sò̌yṳ kè̌shǐ nû̌ûnu ayî̤hǒ. A sò̌yṳ kè̌shǐ a glè ma̤ ta̤cǒklî̌kî̌ya tacǎcǎ. 9Hǐnu akhû̌akhî, Khwǐherǒ gwèplṳ̂ Ye̤shǔ pwǎ̤tadě Ye̤shǔ hî̌shǔ nû̌û dǐmû̌꤮ tò̤. 10Pwa̤tòlûhtò̌ hǐkǒdû̌ toǒ ta pwa̤sû̌ǐ ta̤sû̌ta̤tòwò asara htě a ihtǒ ǒ lǒkho bǎnu toǒ, kè̌lǎ bè̌ Ye̤shǔ ta̤sǔ. 11Khwǐherǒ ta akliphû̌ toǒ luya̤ Ye̤shǔ, hî̌tukutakǎbò Ye̤shǔ, dě a sǒhtò̌ bǎ nû̌û hǐdopo̤to̤ tṳpṳ, dě Khwǐherǒ nosûgesǒ asî dě Khwǐpilǎto aǒ. 12Bǎnu ti̤ni̤nu, Khwǐherǒ ta Khwǐpilǎto htûhtò̌ kè̌khînû̌û sû̌kho. Dě awǐkha numî̌ asî sò̌khěkhû̌khwè nû̌û.
Kò cèrò Ye̤shǔ ta a tobǎsi
(Matěo 27:15-26; Mǎ̤riko 15:6-15; Jowǎ̤ni̤ 18:39-19:16)
13Khwǐpilǎto kaǎplǒ pwa̤tòlûhtò̌ hǐkǒdû̌ toǒ, kòyò htû pwa̤pǒta̤ hǐkǒdû̌ toǒ ta kòyò saprṳ̂saho. 14Dě a hî̌ asî, “Sî hèsû kòyò htǒotapwa̤ dě he ǒ, dě sî hî̌ ta a sûsǔ kòyò saprṳ̂ toǒ aklè̌, sî hî̌ hǐnu. Khònò̤htǒo he gwèsèlèkè̌ yǎ dě sî lo̤mo̤ hǒ pwǎ̤tadě pwǐ sîyṳ̂sînè̌ yǎnu, he kè̌shǐ ata̤sǔ dǐcǎ꤮ tò̤. 15Khwǐherǒ nosûgesǒ nû̌û dě pa ǒ ma̤tè̤hî̌dě a kè̌shǐ nû̌ûta̤sǔ dǐcǎ꤮ tò̤tò̤. Kòyò htǒotapwa̤nu, ata̤sǔ ǒ dě a tobǎ sinu a ǒ dǐcǎ꤮ tò̤. 16Hǐnu akhû̌akhî, he glè nophlě kò ta a, htodě he glè plûhǎhtò̌gekè yǎ.”
17-18Kòyò saprṳ̂ yi̤kǒhtò̌bò ta, “Ma̤sikè yǎ, plûhǎhtò̌ bǎ pa ta Barǎba.” Ta̤cû̌tûlû̌pwè akhîakha hèto̤hǒ hî̌nu, pwèhtǒo ala̤klo ǒ ta Khwǐpilǎto bǎ plûhǎhtò̌ bǎ asî kòyò htě kò dǒlò̤te̤ yǎ dě apo̤kû toǒ akla tapwa̤.#23:17-18 Kò khwè̌ lî̤phě dě꤮ wǐnukha toǒǒnu amaphû̌ 18 htǒo a ǒpa kû̌ tò̤. 19(Kò ma̤shû̌shǎ dě wî̤kû akhanu, Barǎba cû̌ma̤shû̌shǎ pakû̌dǒkò akhû̌akhî, kò dǒlò̤te̤ yǎ apo̤kû, htohǒtò̤ anu a ma̤sibǎ kòyò tapwa̤pwa̤.)
20Khwǐpilǎto sò̌yṳ plûhǎhtò̌kè Ye̤shǔ dě a hî̌po̤sǒ ta kòyò saprṳ̂ toǒ, 21Pwǎ̤tadě asî yi̤kǒhtò̌shû̌ sělěpe, “Htǎwa̤sikè yǎ dě nò̌dòhtǔlo̤nu! Htǎwa̤sikè yǎ dě nò̌dòhtǔlo̤nu!”
22Dě Khwǐpilǎto hî̌po̤ asî suplǎtaplǎ, “Mî̌ma̤tè̤dě bǎ htǎwa̤sikè yǎya? A ma̤sǔ mî̌titè? A ma̤sǔta̤ htě a tobǎ sinu, he kè̌shǐ dǐcǎ꤮ tò̤. He nopo̤ kò ta a dě he bǎ plûgekè yǎ pě.”
23A hî̌ hǐnu pwǎ̤ta asî tǐ̤꤮ yi̤kǒhtò̌shû̌khlo po̤ ta glè htǎwa̤sikè Ye̤shǔ dě nò̌dòhtǔlo̤. Dě gutṳ̌lò̤nu, asî pè̤kè. 24Hǐnu akhû̌akhî, Khwǐpilǎto cèròkè Ye̤shǔ pwǐ asî kwi nû̌ûnu pwǎ. 25Khwǐpilǎto plûhǎhtò̌ bǎ asî kòyò htě asî sò̌yṳ noplûhǎhtò̌ nû̌ûnu tapwa̤. Kòyò htǒotapwa̤ mî̌ a ma̤shû̌shǎ ta̤, a ma̤si kò dě kò dǒ yǎ dě apo̤kû. Htodě ma̤pûhǐ asî ma̤ nû̌û jǔ꤮ tû̌ asî sò̌yṳ ma̤nu dě a ǐlò̤kè Ye̤shǔ dě asî a cǔdekû.
Kò htǎwa̤si Ye̤shǔ dě nò̌dòhtǔ alo̤
(Matěo 27:31-44; Mǎ̤riko 15:21-32; Jowǎ̤ni̤ 19:17-27)
26Bǎ kliphû̌ kaǎcû̌ Ye̤shǔ akhanu, asî cû̌glashǔ ta kòyò tapwa̤ htě ami̤ ta Shîmǒ̤nè̤. A mî̌ Cyrenewî̤phû̌ tapwa̤, a ǒ do hè pwǎ dě a hènṳ bǎ wî̤kû. Bǎ a hènṳ akhanu, kliphû̌ pṳ̂ nû̌û dě asî dò̌htò̌ Ye̤shǔ nò̌dòhtǔ aplebòkhû̌, a noò̌ nû̌û dě a nogûcû̌kû̌ nû̌û ta Ye̤shǔ akò. 27Kòyò gûcû̌plṳ̂ gûcû̌phǎ kû̌bò Ye̤shǔ akò, dě kòyò htǒotoǒ aklanu, mamǔ htě anî̤bǎ mè̤mè̤̌ ta̤sǎpla̤ toǒnu, a ǒpacû̌kû̌dǒ bǎnu, dě a hǎsihǎǒ lǒkho. 28Ye̤shǔ htû̌tiwǐ kè̌cû̌ asî ǒ dě a hî̌cû̌ asî, “Ye̤rǔshèlèwî̤phû̌mǔ sî꤮, hǎǐ ma̤ he ma̤, hǎǐ lǒkho tû̌ sîna̤ ta sîphû̌sîli̤ toǒ ayanu. 29Ma̤tè̤hî̌dě, ta̤jîta̤jû amṳni̤mṳsa toǒ hèto̤ pě dě kò glè hî̌ lǒkho, ‘Mamǔshodophû̌ ta mamǔ htě aphû̌ ǒbǎ lǒkho dǐplǎ꤮ tò̤, ta mamǔ htě a ǐonû̌nǒ kû̌kò phijaû̌ dǐkhò̌꤮ tò̤ toǒ nî̤bǎ mè̤mè̤̌ ta̤howi̤!’ Kò hî̌ lǒkho hǐnu pě. 30Bǎnukhapě
‘Kò hî̌ lǒkho kholo toǒ pě ta, “Lò̤te̤ja dě pakhû̌bǎo!” Htohǒtò̤ a hî̌ lǒkho kholophû̌ toǒ, “Ǒ tûdûbǐpû pa nî̌꤮!”’ #Hoshea 10:8; Ta̤dǔlè̌nǎ 6:16
31He dě alò̤ta sǒsǐso htǒonu, asî dè ma̤jîma̤jû he bǎo dèhî̌dě, kòyò ahǔwa̤ htě a sǒsǒ lǒkho pwǎ ta sǒkhwe toǒnu, asî ma̤jîma̤jûkhlo pěpě.”
32Asî cǐcû̌nṳdǒ kòyò sò̌gini̤ htě a ma̤sǔ shiga a ta̤sû̌ta̤tòwò dě a glè htǎwa̤si kû̌dǒ nû̌ûta Ye̤shǔ. 33Asî cû̌to̤ gûla̤ tò̤glò htě kò kaǎ yǎta, hǐkǒkhwǐ gûla̤ htǒonu. Htodě asî htǎwa̤si kû̌dǒ kòyò ma̤sǔ shiga a ta̤sû̌ta̤tòwò htǒosò̌gini̤ ta Ye̤shǔ dě nò̌dòhtǔlo̤. Tapwa̤ dě htǎwa̤si nû̌û dě Ye̤shǔ cǔdemû tokho, tapwa̤ dě a htǎwa̤si nû̌û dě cǔcocî̌ tokho. 34Ye̤shǔ hî̌, “Pha꤮, bòlû̌kè asî ta̤sǔ nî̌꤮, ma̤tè̤hî̌dě asî ma̤ ta̤pwǐhè̌onu, a sî̌ya tò̤.” Dě kliphû̌ toǒ glè mèphî̌ plǒnû̌û Ye̤shǔ hǐdo htǒonudě asî bǒ lǒkho ta̤bèbwǐ tacǎ dě jǔ꤮ tû̌ a lò̤te̤to bǎtè tapwa̤ tophî̌ bǎtè tokhotè hǐnupwǎ. #Ta̤htû̌sò̌ǐ 22:18
35Kòyò toǒ ihtǒkè̌ lǒkho pepwǎ bǎnu akha, kòyò htě a htû hǐkǒdû̌ toǒ pi̤jishǐcǒ luya̤ lǒkho Ye̤shǔ, dě a hî̌takǎ lǒkho ta, “A mî̌ a ma̤lû̌htò̌gejò dòdû̌ kò nî. A dè mè̤ ta Khrî̌stu htě Cǒmara wû̌lǎ yǎnu tapwa̤ dèhî̌dě, noma̤lû̌htò̌ge tû̌mò̌ yǎta ana̤nu ta.” #Ta̤htû̌sò̌ǐ 22:7
36Kliphû̌nu toǒ bǎbǎ, a luya̤bò nû̌û. Asî cû̌ Ye̤shǔ ǒ dě a cû̌ǐo nû̌û shisî̌yo̤shî̌. #Ta̤htû̌sò̌ǐ 69:21 37Dě asî hî̌ nû̌û, “Na dè mè̤na̤cè̌ ta Yṳ̌daphû̌ toǒ akhwǐ dèhî̌dě ma̤lû̌htò̌ge tû̌mò̌ nana̤nu ta.”
38Dě a hǐkǒkhû̌conu, kò khwè̌htò̌ yǎta, “A mî̌ Yṳ̌daphû̌ toǒ akhwǐ.”
39Kòyò htě a ma̤sǔ shiga a ta̤sû̌ta̤tòwò dě kò htǎwa̤siplǒ yǎta Ye̤shǔ htǒosò̌gini̤ akla tapwa̤nu a pi̤jishǐcǒ Ye̤shǔ ta, “Na mî̌ Khrî̌stu mè̤tò̤ ya? Ma̤lû̌htò̌ge tû̌mò̌ nana̤nu, dě ma̤lû̌htò̌ge dǒmò̌ pa ta!”
40Pwǎ̤tadě kòyò ma̤sǔ shiga a ta̤sû̌ta̤tòwò ahǔwa̤tapwa̤ sǎhtǎ nû̌û dě a hî̌ nû̌, “Na ǐsha kû̌kò Cǒmara ala̤ tò̤ ya? Na mî̌ na khòbǎ sǒsǒkû̌ pwǎ̤ta ta̤cèròbǎ yǎ htǒonu. 41Pa htǒosò̌gini̤ khòbǎ ta̤cèrò pwǐ pa ma̤sǔhtonu toǒ akhû̌akhî, atoabǎ pwǎ. Pwǎ̤tadě anu, a ma̤sǔ kû̌kò dǐcǎ꤮ tò̤.”
42Htodě a hî̌ Ye̤shǔ, “Kǒ꤮ Ye̤shǔ꤮, bǎ na hèpǒǐ pwǐ Khwǐ tapwa̤ akhapěnu, gènè̤htò̌bǎ dǒ he pě nî̌꤮.”
43Dě Ye̤shǔ hî̌shǔ yǎ, “He hî̌ mè̤mè̤̌꤮ na, khò̌ti̤ni̤ pěnu, na geǒ kû̌dǒ ta he dě Paradǐsu gakû pě.”
Ye̤shǔ si awi̤akè̌
(Matěo 27:45-56; Mǎ̤riko 15:33-41; Jowǎ̤ni̤ 19:28-30)
44Bǎ lṳmṳbǎ shǐginǐ̤na̤rî bǎphǔ akhanu, lṳmṳ khǐsuwulò̤ sagala̤ to̤htû̌ lṳmṳhǎlò̤ suna̤rî bǎnu. #Ta̤lû̌htò̌ge 26:31-33 45Dě hǔgòpwî̌pṳdû̌ htě kò codǐdòbǐ yǎta ta̤lṳhtò̌hoakû htǒotṳpṳnu, a htò̌lè̌ kihtò̌kilò̤ phlǔkè ginǐ̤kho. 46Ye̤shǔ jipwi̤ yi̤kǒhtò̌shû̌ dě a hî̌, “Kǒ꤮ pha, he ǐlò̤kè he ta̤htûpwa̤ dě na cǔdekû hǒ,” #Ta̤htû̌sò̌ǐ 31:5 a hî̌ hǐnu htodě asǎlò̤te̤kè.
47Rò̌mǎ klita̤ya̤ hǐkǒdû̌ htǒotapwa̤ kè̌shǐ ta̤ma̤ana̤ htǒotoǒ dě a htû̌sò̌ǐ Cǒmara dě a hî̌, “Kòyò htǒotapwa̤ mî̌ kòyòcǒkòyòtè̤ mè̤mè̤̌nu hǒ!” 48Kòyò saprṳ̂saho htě a hè ǒpo̤kè̌ dě a kè̌shǐ ta̤ma̤htûhtò̌ ana̤ htǒotoǒnu, a sǎpla̤bò akhû̌akhî, asî pla̤lò̤ lǒkho asoo dě a ge lǒkho ahǐ. 49Kòyò lǒ̤꤮ bò htě a sî̌ya Ye̤shǔ toǒ ta mamǔ htě a ǒ Galilî̌aga dě a gûkû̌ nû̌û toǒnu, a cû̌ ihtǒ ǒ tûcûyî̤ dě a kè̌ lǒkho a htûhtò̌bò htǒotoǒ. #Lǔka 8:2-3
Kò lǔ Ye̤shǔ
(Matěo 27:57-61; Mǎ̤riko 15:42-47; Jowǎ̤ni̤ 19:38-42)
50-51Kòyò htě ami̤ ta Jǒjè ǒ tapwa̤. A ǒ dě Arimatǐawî̤, Yṳ̌dagakû. A mî̌ kòyòwǒ, kòyòcǒtè̤ dě a ǒpo̤kè̌shuǐ Cǒmara ashiaga glè hè pě tapwa̤. A mî̌ a ǒpakû̌dǒ ta kòyò htûhǐkǒdû̌ aprṳ̂ahokû tapwa̤ pwǎ̤tadě bǎ kò olò̤bò ta kò glè cèrò Ye̤shǔ akhanu, a olò̤pa kû̌dǒkò tò̤. 52A cû̌ dě Khwǐpilǎto a ǒ dě a cû̌kwi Ye̤shǔ alṳto̤. 53Htodě a cû̌ jolò̤te̤ Ye̤shǔ a lṳto̤ htǒo nò̌dòhtǔ alo̤ dě a bǒbǐ nû̌û ta hǔgòpwî̌bǎplo̤ pwî̤dû̌ tṳpṳ htodě a cû̌dò̌nṳ nû̌û lṳkû htě kò khǔkûnṳ sa nû̌û dě khopa̤lo̤ dě kò lǔnǒ yǎta lṳ hǒtò̤ htǒonu tûkû. 54Mṳni̤nu ti̤ni̤ mî̌ mṳyè̤̌ni̤ dě kò ma̤wǒnǎ lǒkho Yṳ̌daphû̌ a mṳni̤dǔ aya. Yṳ̌daphû̌ a mṳni̤dǔ phǔhèto̤hǒ.
55Mamǔ ǒ Galilî̌aga dě a gûhèkû̌ Ye̤shǔ akò htǒotoǒnu, a gûhèkû̌ ta Jǒjè dě a kè̌nǎǐkè kò la̤dò̌nṳ Ye̤shǔ agûla̤ htǒotò̤glò. 56Htodě asî gesǒ hǐ dě a ge ma̤wǒnǎ lǒkho shinṳmû̌ ta Mǔra dě a glè hèplṳ lǒkho nû̌ûta lṳto̤htǒo aya. Pwǎ̤tadě bǎ Yṳ̌daphû̌ a mṳni̤dǔnu ti̤ni̤nu, Yṳ̌daphû̌ toǒ a ta̤mǎlò̤ ǒ ta asî bǎ ǒkǔ akhû̌akhî, asî ǒkǔbò lǒkho. #Ta̤lû̌htò̌ge 20:10; Ta̤dǒhtû̌ǐ 5:14
S'ha seleccionat:
Lǔka 23: KRC
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
Wycliffe USA