Mateo 6
6
Sema Pesing Tayon Penodong Na Kolang I Mesepol To
1Intoloy Jesus a iyantoro i “Tanchaani yo i no gwariy a-magen jon mapteng, enog i imag cha sangoanan na tothoo et say chejawen cha kayo. Tep no seman i pesing jo, si Awejon gwared dangit, nagwariy i-kan tod si-kayon kongkona.
2“Isonga, no mengi-kan kayo na tolong ired ma iyangkebitheg, enog i inbiybiy tan enog i inpekes i esel jo maypangkep niyay ired synagog tan chiwa iren kalsaren inges to ira ma naengibili-biling a naengamag na mapteng et say chejawen ira na tothoo. Sejay a konen kod si-kayo, podnon ida ra wiy kongkona ra. 3Nem no ontolong kayo, enog i ingwanggwanggwang cha angken kapategan a kajem jo 4say nagwariy mengamta. Tan si Awejon naeni-neng na jowan amagen eg aamtaan, si-kathoy mengi-kan kayo na kongkona yo.”
Sema Maypangkep Na Pankararag
(Luke 11:2-4)
5Et kigwan Jesus pay i “No mankararag kayo, enog i iyonoran ira ma naengibili-biling a naengamag na mapteng tep piyan chen on-akgwat a mankararag ired synagog tan chiwa iren kalsara say metaen ira na too. Sejay a konen kod si-kayo, podnon ida ra wiy kongkona ra. 6Nem no mankararag kayo, sekep kayon sa-sa-ki yod kwadto, ibengbeng joy selbeng, et pankararag kayo wed Awejon nat naesi-neng. Tan si Awejon naeni-neng na jowan amagen eg aamtaan, i-kanan to kayo na kongkona yo.
7“Say pankararag jo, enog i pinidpidgway ese-esel a inges to ira ma eg cha amtes Afo Chiyos. Nainpasing cha man tep kin cha i no chakel i esel cha, meki-ngelan i kararag cha. 8Enog ira i iyonoran tep si Awejo, amta tho waliy mesepol jo angken eg jo pay nin inbaged si-katho. 9Inges niyay miy pankararag jo:
Awa thayon gwared dangit,
sapay koma mechejaw i ngaran mon esantoan.
10Sapay koma onmothok aliy pantorayan mod dobong
say seta piyan mo, metongpal chiya dobong a inges tod dangit.
11I-kani mo kawi na kakanen mi na gwiya-gwa-gwa.
12Pekawanim i basol min
inges to ngoy pemakawanan mi iren ma iyanbasol cha si-kawi.
13Et enog i intolok a mesolisog kawi,
no diket idisi mo kawid ngaaw. #6:13 Say sa-kin banag na birsikolon 13 cha Greek a sola-solat, sejay: idisi mo kawid Diablo. #6:13 Sema echom a sola-solat na kaonoran, iyay-echom iya ese-esel ired man: Tep si-kam a gwariy karebengan to tan panakabalin to tan chayaw to na ingked ingka. Amen.
14“Tep no pekawanan jo ira ma iyanbasol cha si-kayo, si Awejon gwared dangit, pekawanan to kayo ngo. 15Nem no eg jo pekawanan ira ma iyanbasol cha si-kayo, eg to kayo ngo pekawanan Awejo.”
Sema Maypangkep Na Pan-ayonar
16Et intoloy men Jesus a engowan i “Say pan-ayonar jo, enog i inbiybiy i singen kaengos kayon inges to ira ma naengibili-biling a naengamag na mapteng. Eg cha sagaysayen i bowek cha, tan eg ira manda-nop say amtaen na too i man-aayonar ira. Sejay a konen kod si-kayo, podnon ida ra wiy kongkona ra. 17Nem no man-ayonar kayo, sagaysay joy bowek jo tan panda-nop kayo 18say nagwariy mengamta i man-aayonar kayo, malaksid si Awejo bengat a eg naesi-neng. Tan si Awejon naeni-neng na jowan amagen eg aamtaan, si-kathoy mengi-kan kayo na kongkona yo.
Sema Kinabaknang Cha Dangit
(Luke 12:33-34)
19“Enog i sini-nop i kinabaknang jod ja dobong tep sema kokowa yo, inam-ay a omasen na sipet tan dathi, tan tokiban na mengibot et kibothen cha. 20No diket si-nop joy kinabaknang jod dangit a nagwariy mengetket na baro tan mengidathi na pilak, tan nagwariy menokib a mengibot. 21Tep sema kawad-an na kinabaknang jo, chiwan ngoy kawad-an na nemnem jo.
Sema Mathen Silow Na Angel
(Luke 11:34-36)
22“Say matha, may-arig cha silow na angel. No mapteng i peni-neng jo, esilowan i emiin a nemnem jo. 23Nem no ngaawes i peni-neng jo, enbolinget i emiin a nemnem jo. Isonga, no konen jo i esilowan i nemnem jo iy enbolinget, epalado diy bolinget to!
Nakiyajoan Afo Chiyos Ira Ma Naemiyal Cha Si-katho
(Luke 16:13; 12:22-31)
24“Nat mebedin a mansilbiy bagaen cha chegwen afo tep sesmeken toy sa-ki iy owesen toy sa-ki. Chejawen toy sa-ki iy disjonen toy sa-ki. Isonga, no pilak i kapategan cha si-kayo, nat mebedin a mansilbi kayo ngod Afo Chiyos.
25“Isonga, konen kod si-kayo i enog i chanag na panbiyag jo--sema kakanen jo tan sema inomen jo tan sema ibaro yo. Tep ampet siya iy nat epateg i biyag jo iy say mekan, tan ampet siya iy nat epateg i angel jo iy say baro? 26Nemnem jo ira ma titit a ketinayab cha iyaykayang. Eg ira naiyantanem, eg ira naiyan-ani, tan eg ira naengikamid cha agong na kakanen cha, nem eg ira naaofa tep si Awejon gwared dangit, nain-i-kanan to ira na kakanen cha. Ampet siya iy nat epateg kayo iy say titit? 27Et siyed si-kayoy mebedin a mengi-chom na angken sa-kin oras cha panbiyag jo kagol na chanag jo?
28“Niyana pay nachimanag kayo na baro yo? Nemnem joy nainpasing na sabsabong a nabimadeg cha chonchontog. Nat naiyan-obda ira tan nat naengagwel ira, 29nem konen kod si-kayo i angken si Ari Solomon a baknang a pasiya, sema kamapteng na baro tho, kolang pay iy say sema sa-ki iren ma sabsabong. 30No inges niwan i kamapteng a nain-i-kan Afo Chiyos cha do-bet a mabiday cha payow niman, nem mepoolan nem megwa-gwa, ampet siya iy eg to kayo pay baroan? Niyana chechan enka-jas i pamati yo? 31Isonga, enog i chana-chanag a konen jo i ‘Toy pengedaan mi na kakanen mi i?’ tan ‘Toy pengedaan mi na inomen mi i?’ tan ‘Toy pengedaan mi na ibaro wi i?’ 32Tep sema iren eg mahaamten Afo Chiyos, natiyofog cha ira man, et si Awejon gwared dangit, amta tho waliy mesepol jon emiin ira man. 33Nem si-kayo ngo, tofog joy pantorayan Afo Chiyos tan sema mapteng a panbiyag a inbilin to, et i-kan to ngon emiin ira man cha si-kayo. 34Isonga, enog i chana-chanag maypangkep na diga-digat jon da-kamen jo emo no megwa-gwa. Panseked kayo ingkathod megwa-gwa, et sangoen joy digat a onmothok no seman alin akow. Tep sema diga-digat a nadiya-kaman tayo niman a akow, naimanay. Eg tayo wa ka-choman.”
S'ha seleccionat:
Mateo 6: KAR
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
© 2023 Wycliffe Bible Translators, Inc. All rights reserved.