LUK 15
15
Temadokba San Agi O-entepa
(Mat. 18.12-14)
1Alimelen sarurtem aser temenenpurtem ajak pa o angatsü pa anasai aruya liasü. 2Aser Farisitem aser tezülurtemi nüngnünga ashi, “Iba nisung yagi temenenpurtem agizüker aser parnok den chiyunger.” 3Anungji pai parnok dang iba o-entepba ya ashi, 4“Nenok rongnung san noklang ka akaba nisung kati item rongnung ka madokra, pai kechi inyaktsü? Pai tukur-tukuji arem nung toktsür, temadokbaji mangu tashi bushitsü. 5Aser pai aji kodang angur, pai pelashishia pei tapubang manung ajongloker. 6Aser kodang pai kidangi arur, pei tembartem aser kiyongertem jatepa parnok dang ashir, ‘Kü den pelatepang, kechiaser ni kü temadokba santo nguogo.’ 7Anungji ni nenok dang shidi, Yamaji temulung meyiptsü nüngdak makaba temeshipur tukur-tuku dangbo temulung meyipa aruba temenenpur ka agi kotak nung tali tepelaba asütsü.
Temadokba Sen Agi O-entepba
8“Ano taribi sen ter akaba tetsür kati item rongnung ka madokra, lai milen tsükloker ki oka aji mangu tashi anebalua mebushir ama? 9Aser kodang lai aji angu, lai tembartem aser kiyongertem jateper aser ashir, ‘Kü den pelatepang, kechiaser kü tesamaba sento ni nguogo.’ 10Ni nenok dang shidi, yamaji temulung meyipba temenen nisung ka agi Tsüngrem tenyartem rongnung tepela lir.
Temadokba Chir Agi O-entepba
11“Aser pai ashi, nisung ka jabaso ana liasü, 12Tanubusang jagi tebu dang ashi, ‘Oba, ne rongsen nungi kü shilem kechi lir aji kü nem kua.’ Anungji tebui pei rongsen parnok nem lemsa agütsü. 13Anogo ishika lir külen jabaso tanubusangi pei oset ajak bener alima talang kati aeni ao. Idakji pai pei rongsen lalushibonga temenen benshia ali. 14Aser pai pei rongsen ajak endokmar külen iba lima nungji aya-wara kanga tulu ka adok aser pa kanga sensak aten. 15Idangji iba lima alir nübur rongnung ka den pai semloka ali, aser kibur jagi moapu nung ak anüktsü yok. 16Aser ak-i achiba matsüklashi teküp achitsü pai yongya saka shingaia pa nem kecha magütsü. 17Saka kodang pa temulung tanga aru pai ashi, Kübu den ayangertem kwika chiyungtsü peria aser ano talia angur, saka nibo idaki taya agi tasür. 18Ni apusoa kübu dangi odi, aser ni pa dang ashitsü, ‘Oba, kotak anema aser ne madang ni temenen menaogo; 19ni joko ne jabaso ta ajatsü metemsü; ne ayangertem rongnung ka ama ni amshiang.’
20“Aser pai apusoa tebu dangi aru. Saka pa ano apiga nung alidang, tebui pa ngua aochia bilema asema ao aser tekong nung azüit aser pa tebang mesep. 21Idangji techiri tebu dang ashi, ‘Oba, kotak anema aser ne madang ni tai menaogo; ni joko ner jabaso ta ajatsü metemsü.’ 22Saka tebui kilirtem dang ashi, ‘Sobutsü tajungtiba yakta bena arung aser aji pa nem sobujang, pa temeyong nung küri aser tetsüng nung tsüngsem semokjang. 23Aser nashi chanu teyirabaji anir arung aser tepsetang aser asenoki chiyunga pelatepdi. 24Kechiaser kü jabaso ibai tasü liasü, aser tanaben taküm lir; pa sama-a liasü, saka tang meyipa nguogo.’ Aser parnoki pelateptsü tenzük.
25“Idangji par jabaso tambusangji alu nung liasü; aser pai adoka ki anasa arudang kentenba aser tsüngsangba ola pai angashi. 26Aser pai kilirtem rongnungi ka aja aser ya kechi tetezü ta asüngdang. 27Aser kilir jagi pa dang langzü, ‘Nenu shilanga lir, aser nebui nashi chanu teyirabato tepset kechiaser pai nenu junga aser anema lia meyipa angu.’ 28Saka pa tediji ain adok aser kidangi metuli ta ashi. Anungji tebui kimai adoka pa dang mepishi. 29Saka pai tebu dang langzü, ‘Ajiangjo, küm paikati ni ne dang tenzüka aru, aser nai ashiba o kodanga mangai mali; saka kü tembartem den pelateptsü asoshi kü nem nai kodanga nabong chanu ka danga magütsü. 30Saka kodang iba ner jabaso shibai nüktapangtatsürtem den ne sen chima aser kodang pa meyipa aru, pa asoshi nai nashi chanu teyirabato tepset.’ 31Idangji tebui pa dang langzü, ‘Kü jabaso, na teti kü den lir aser kü meyong ajakji ne meyong lir. 32Saka asenoki temulung chia pelateptsü tim dang lir, kechiaser nenu tasü liasü, aser tang pa tanaben taküm lir, pa madoka liasü saka tang pa nguogo.’ ”
S'ha seleccionat:
LUK 15: ANSEBSI
Subratllat
Comparteix
Copia
Vols que els teus subratllats es desin a tots els teus dispositius? Registra't o inicia sessió
The Bible Society of India
© 2023, Used by permission. All rights reserved. More